कलस्सी 3 - पश्चिम तामाङ1 एङ्यीमा ख्रीस्ट्तेङ् बक्च्य सोज्यीन्बल तज्यीम् स्वर्गइ तम्मा म्हइगो, हुजुरी ख्रीस्ट् पर्मेस्वर्की केत् फ्या पट्टीचे स्य्हुजेत्पल मुब। 2 एङ्यीमाकी सेम् जम्बुलीङ्की तम्मारी अय्हीन् तर स्वर्गइ तम्मारी पीनो। 3 तलेपङ्सम् एङ्यीमा स्यीबल मुब, देरेम् एङ्यीमाकी जीवन् पर्मेस्वर्री ख्रीस्ट्तेङ् छुम्बल मुब। 4 एङ्यीमाकी देमेन्की जीवन् ख्रीस्ट्नो य्हीन्ब, ओसेम् थेङ् जम्बुलीङ्की म्हीमाज म्रङ्खजेत्पे बेलोरी एङ्यीमाएनो थेङ्तेङ् महीमारी म्रङ्स्ये मुब। बोक्टतेङ् छार् जीवन् 5 होत्तज्यीम् एङ्यीमाचे जम्बुलीङ्की अज्यबे बानी बेहोर् ख्लागो। हुजु बानी बेहोर्मामी बेस्या स्य्हेङ्ब, असुद्द तम् पङ्ब, बेस्या स्य्हेङ्बे सेम् लब, दुस्ट सेम् थोःब ओसेम् लोभ स्य्हेङ्ब, हुजु लोभ् स्य्हेङ्बमी ख्लमात तेन्ब य्हीन्ब। 6 तलेपङ्सम् चोतेबे लक्मा स्य्हेङ्ज्यीम् पर्मेस्वर्चे कुल्जेत्पे तम्मा अङ्येन्बलमात थेङ्चे सजाय न्हङ्जेत्स्ये मुब। 7 ङोन्ग्यम्मी एङ्यीमाचेएनो होतेबे लक्मा स्य्हेङ्ज्यीम् ब्रब मुबल। 8 तर देरेम् एङ्यीमाचेएनो जम्मनो बोमो, स्हेर्ब, नीन्द स्य्हेङ्ब ओसेम् र्हङ्की सुङ् ग्यम्से अज्यबे तम्मा पङ्ब पीत्थोब। 9 एङ्यीमाचे गीःचे गीत भ्यु थपङो, तलेपङ्सम् एङ्यीमाचे ङोन्ग्यम्की जीवन्तेङ् हुजुइ जम्मनो अज्यबे बानी बेहोर्मा ख्लाज्यीन्बल मुब। 10 देरेम् एङ्यीमाचे छार् जीवन् यङ्बल मुब। ओसेम् जम्मनो स्हेमा स्य्हेङ्जेत्पे पर्मेस्वर्त एङ्यीमाचे देमेन्नो स्येःखइ पङ्ज्यीम् थेङ्चे एङ्यीमात थेङ् र्हङ्बनो तनलजेत्टीब। 11 चोले एङ्यीमा छार् म्हीमा तबल तज्यीम् यहुदी म्हीमा य्हीन्लेएनो वुइ यहुदी अय्हीन्बे म्हीमा य्हीन्लेएनो, ल्हीःरी खतना स्य्हेङ्बे म्हीमा य्हीन्लेएनो वुइ खतना अस्य्हेङ्बे म्हीमा य्हीन्लेएनो, बानमा य्हीन्लेएनो वुइ बानमा अय्हीन्लेएनो, अखेत्पे म्हीमा य्हीन्लेएनो, असभ्य म्हीमा य्हीन्लेएनो, हुजुमामी तेएनो फरक् अत, तर ख्रीस्ट्नो जम्मनो स्हेः य्हीन्ब ओसेम् जम्मतेङ्नो थेङ् स्य्हुजेत्प। 12 एङ्यीमा पर्मेस्वर्चे दम्जेत्पे, पबीत्रतेङ् थेङ्चे म्होइबे म्हीमा य्हीन्ब। होत्तज्यीम् एङ्यीमाचे करुना, दय, नम्र, सोजो ओसेम् नापत येन् येन्ब र्हङ्ले येन्थोब। 13 गीःचे गीःत नाको, खलइ बीरुद्दरी पङ्लेनो तए दोस् मुसम् गीःचे गीःत क्षमा पीनो। प्रभुचे खले एङ्यीमात क्षमा स्य्हेङ्जेत्ज्यी, होलेनो एङ्यीमाचेएनो गीःचे गीःत क्षमा स्य्हेङो। 14 म्होइबमी चु जम्मा तम्मा बीम य्हक्को ङ्हच्छयङ् य्हीन्ब, तलेपङ्सम् म्होइबचेनो जम्मतनो गीः तनलज्यीम् थुन्नले थेन्ब। 15 ख्रीस्ट्की सान्तीचे एङ्यीमाकी सेम्री राज्य स्य्हेङ्खइ। पर्मेस्वर्चे एङ्यीमात सान्तीरी टीबे लागीरीनो ल्हीः गीःरी ङ्होत्जेत्पल य्हीन्ब। एङ्यीमाचे पर्मेस्वर्त व्होर्छ्ये पीन्थोब। 16 एङ्यीमाकी सेम् ख्रीस्ट्की फ्रोइचे प्लीङ्खइ। गीःचे गीःत जम्मनो बुद्दीचे लोप्ज्यीम् अर्ती पीनो। ओसेम् भजन सङ्ग्रहकी व्हइमा कोज्यीम्, भजनकी व्हइमा कोज्यीम् ओसेम् आत्मीक् व्हइमा कोज्यीम् पर्मेस्वर्त व्होर्छ्ये पीनो। 17 एङ्यीमाचे ता पङ्लेनो वुइ स्य्हेङ्लेनो जम्मनो प्रभु येसुइ छेन्री स्य्हेङो, ओसेम् थेङ् ग्यम्सेनो पर्मेस्वर् अपत व्होर्छ्ये पीनो। ख्रीस्टीयन् दीम्की म्हेम्यमात लोप्पल 18 म्रीङ्मा, र्हङ्-र्हङ्की र्हेम्बोइ अधीन्री टीथोब। तलेपङ्सम् होले स्य्हेङ्ब प्रभुइ ङोन्री जेःबे तम् य्हीन्ब। 19 र्हेम्बोमा, एङ्यीमाचे र्हङ्-र्हङ्की म्रीङ्मात कोङ्बे सेम् अथोनले म्होइगो। 20 कोलमा, एङ्यीमाचेएनो खेम पङ्लेनो र्हङ्की अप-अमचे कुल्बे अर्ती ङ्येनो, तलेपङ्सम् चोले स्य्हेङ्बतेङ् प्रभु तङ्जेत्प। 21 अपमा, एङ्यीमाचे र्हङ्की कोलमात बोमो रप्न थलउ, अय्हीन् पङ्सम् थेङ्यीमाकी सेम् नस्ये मुब। 22 बानमा, एङ्यीमाचे र्हङ्की मालीक्माचे कुल्बे जम्मनो अर्ती ङ्येनो। मालीक्त तङ्न लबरी थेङ्यीमाकी ङ्होन्सङ्कीनो अय्हीन् तर प्रभुत स्य्हेस लज्यीम् सेम्य्हङ्सेनो थेङ्यीमाकी अधीन्री टीउ। 23 एङ्यीमाचे ता स्य्हेङ्लेनो म्हीइ लागीरी र्हङ्ले अय्हीन् तर प्रभुइ लागीरी स्य्हेङ्ब र्हङ्ले सेम् य्हङ्सेनो स्य्हेङो। 24 तलेपङ्सम् एङ्यीमात प्रभुचे न्हङ्ब पङ्ज्यीम् बाचा लजेत्पे बक्सीस् न्हङ्जेत्स्ये मुब पङ्बे तम् एङ्यीमाचे स्येःब। एङ्यीमाचे प्रभु ख्रीस्ट्की सेवा स्य्हेङ्टीब मुब। 25 अज्यब स्य्हेङ्बल खल्चे पङ्लेनो सजाय नास्ये मुब। पर्मेस्वर्चे खल्लएनो लीः च्याज्यीम् न्याय स्य्हेङ्अजेत्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.