कलस्सी 2 - पश्चिम तामाङ1 एङ्यीमातेङ् लाउडीकीयारी मुबे म्हीमा ओसेम् ङत अस्येःबे जम्मनो म्हीमाकी लागीरी ङचे गत्ते दुख लज्यीम् लक् स्य्हेङ्बल मुब पङ्बे तम् एङ्यीमाचे स्येःखइ पङ्बे सेम् ङल मुब। 2 थेङ्यीमाचे आर् यङ्खइ ओसेम् गीःचे गीःत म्होइज्यीम् सेम् गीः लज्यीम् टीखइ पङ्ज्यीम् ङचे चोले स्य्हेङ्बल य्हीन्ब। होत्तज्यीम् थेङ्यीमाचे आत्मारी य्हक्को बरु तज्यीम् पर्मेस्वर्की छुम्ज्यीम् थेन्बे तम्त ज्यनले गोब खम्स्ये मुब, ओसेम् हुजु तम्मी ख्रीस्ट् य्हीन्ब। 3 ख्रीस्ट्रीनो पर्मेस्वर्चे जम्मनो ज्ञान्तेङ् बुद्दीइ सम्पत्ती छुम्जेत्पल मुब। 4 होत्तज्यीम् ङ एङ्यीमात पङ्ब, खल्चेएनो एङ्यीमात देमेन् र्हङ्बे भ्युकी तम्मा पङ्ज्यीम् अलुखइ। 5 तलेपङ्सम् ल्हीःरी एङ्यीमा ग्यम्से थारीङ् मुलेएनो आत्मारीमी ङ एङ्यीमातेङ्नो मुब। ओसेम् एङ्यीमा जम्मनो गीः तज्यीम् सोबल ओसेम् ख्रीस्ट्री बीस्वास्री कोङ्बल म्रङ्ज्यीम् ङ य्हक्को तङ्बल मुब। ख्रीस्ट्री सोब 6 होत्तज्यीम् एङ्यीमाचे येसु ख्रीस्ट्त एङ्यीमाकी प्रभु पङ्ज्यीम् ग्रहन् स्य्हेङ्ब र्हङ्लेनो देरेम् थेङ्की लीप्चे ब्रस्यीनो टीउ। 7 ओसेम् ख्रीस्ट्रीनो एङ्यीमाकी टा युज्यीम् थेङ्तनो एङ्यीमाकी जीवन्की जग तबुङो। ओसेम् एङ्यीमात ङोन्ग्यम् लोप्प अनुसार् एङ्यीमाकी बीस्वास् कोङ्न लउ, ओसेम् थेङ्त व्होर्छ्ये पीन्स्यीनो टीउ। 8 होसीयार् तज्यीम् टीउ, खल्चेएनो एङ्यीमात म्हीमाकी ज्ञान्-बुद्दीइ भ्युकी तम्मा ग्यम्से अलुखइ। होतेबे तम्मामी ख्रीस्ट् ग्यम्से अय्हीन् तर हुजुमामी म्हीमाचे म्हेन्ज्यीम् लोप्पे तम्मा ग्यम्से ओसेम् जम्बुलीङ्की आत्ममाइ सक्ती ग्यम्से खबल य्हीन्ब। 9 तलेपङ्सम् पर्मेस्वर् ख्रीस्ट्की ल्हीःरीनो स्य्हुजेत्ज्यीम् र्हङ्की जम्मनो स्वभाब्मा ङोन्जेत्प। 10 ओसेम् एङ्यीमाचे ख्रीस्ट्रीनो देमेन्की जीवन् यङ्बल मुब, थेङ्नो जम्मनो सासक्मातेङ् अधीकार्की क्र य्हीन्ब। 11 एङ्यीमा ख्रीस्ट्री तबनो देमेन्की खतना यङ्ब य्हीन्ब। म्हीमा ग्यम्से ल्हीःरी स्य्हेङ्बे खतना अय्हीन् तर ख्रीस्ट्चे स्य्हेङ्बे खतना य्हीन्ब। चु खतनामी एङ्यीमाचे चु ल्हीःकी स्वभाब्की सक्ती ग्यम्से फेःब यङ्ब य्हीन्ब। 12 तलेपङ्सम् बप्तीस्मा कीन्बे बेलोरी एङ्यीमा ख्रीस्ट्तेङ् बक्च्य बुप्ज्यी ओसेम् एङ्यीमाचे ख्रीस्ट्त स्यीब ग्यम्से सोनलजेत्पे पर्मेस्वर्की सक्तीरी बीस्वास् स्य्हेङ्बल तज्यीम् एङ्यीमा ख्रीस्ट्तेङ् बक्च्य सोज्यीन्बल मुब। 13 ङोन्ग्यम् एङ्यीमा र्हङ्की पाप्माचे लज्यीम् ओसेम् एङ्यीमाकी पाप् स्वभाब् दवम् ख्लाबल अरेज्यीम् आत्मीक्री स्यीबल मुबल। तर देरेम् पर्मेस्वर्चे ङ्य्हङ्माकी जम्मनो पापमा क्षमा स्य्हेङ्जेत्ज्यीम् ख्रीस्ट्तेङ्नो सोनलजेत्पल मुब। 14 पर्मेस्वर्चे ङय्हङ्माकी बीरुद्दरी दोस् पीन्बे स्योस्यो खारेज् लजेत्ज्यी ओसेम् हुजुमात क्रुस्री खील् ठोक्ज्यीम् नास् स्य्हेङ्जेत्ज्यी। 15 चोले ख्रीस्ट्चे क्रुस्री स्यीजेत्ज्यीम् जम्मनो आत्मीक् सासक्मा ओसेम् अधीकार्मातेङ् पर्मेस्वर् डाजेत्ज्यी, ओसेम् थेङ्यीमात जम्मइ ङ्होन्सङ् पेत्नलजेत्ज्यी। 16 होत्तज्यीम् चबतेङ् थुङ्बरी, वुइ पर्बइ दीन्, वुइ औसी वुइ दुःब न्हबे दीन् म्हन्दीबे बारेरी खल्चेएनो एङ्यीमात दोस् अपीन्खइ। 17 चु जम्मनो लीक्यम् खस्येकी तम्माकी ब्लकीनो य्हीन्ब, तर देमेन्मी ख्रीस्ट्री मुब। 18 थेङ्यीमाचे दर्सन् म्रङ्बल मुब पङ्ज्यीम् एङ्यीमात नम्र तबुङ्ज्यीम् स्वर्गदुत्त तेन्बुङ्ज्यीम् एङ्यीमाचे पर्मेस्वर् ग्यम्से यङ्थोबे बक्सीस् थबेन्बुङो। चोतेबे म्हीमा र्हङ्की सेम्चे म्हेन्बे तम्री ओलेनो घमन्ड लज्यीम् टीब। 19 होतेबे म्हीमामी क्रतेङ् बक्च्य अटीनले फेःज्यीम् टीबल तब, हुजु क्रमी ख्रीस्ट् य्हीन्ब। तलेपङ्सम् ख्रीस्ट्चेनो ल्हीःकी जम्मनो अङ्गमात थेङ्री थुत्जेत्प, ओसेम् थेङ् ग्यम्से तज्यीम्नो ल्हीः बङ्ज्येन् तस्ये मुब ओसेम् पर्मेस्वर्की थुः अनुसार् छर्बोर्स्ये मुब। ख्रीस्ट्तेङ् स्यीज्यीम् ख्रीस्ट्तेङ्नो सोब 20-21 एङ्यीमामी ख्रीस्ट्तेङ् बक्च्य स्यीज्यीम् चु जम्बुलीङ्की आत्माइ सक्तीमा ग्यम्से फेःज्यीन्बल मुब। तले एङ्यीमा चु जम्बुलीङ्ल र्हङ्ब तज्यीम् सोटीब? तले एङ्यीमाचे चु स्य्हेङ्ब अत, म्य्हङ्ब अत ओसेम् छुब अत पङ्बे नीयम्मा ङ्येन्ज्यीम् ब्रब? 22 चु जम्मनो तम्मा कोल्ब बीसेम् नास् तज्यीम् य्हर्स्ये मुब। चुमामी म्हीमाचे र्हङ्की सेम्चे म्हेन्ज्यीम् स्य्हेङ्बे नीयम्तेङ् लोप्पे तम्मा य्हीन्ब। 23 धर्म कर्म स्य्हेङ्ब, नम्र तब ओसेम् ओसेम् धर्मी ङोन्बरी र्हङ्की ल्हीःत दुख पीन्ज्यीम् सोब, चु जम्मनो तम्मा बुद्दी मुबे तम् र्हङ्ब म्रङ्ब, तर चु तम्माचे ल्हीःकी स्वभाब्मात दुल्ज्यीम् थेन्बमी अखम्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.