कलस्सी 1 - पश्चिम तामाङ1 पर्मेस्वर्चे थुः लजेत्प अनुसार् येसु ख्रीस्ट्की प्रेरीत तबरी दम्बे ङ पावल ओसेम् ङ्य्हङ्माकी अले तीमोथी ग्यम्से, 2 कलस्सी पङबे सहर्री टीबे पर्मेस्वर्की म्हीमात चु चीठी ब्रीटीब, थेङ्यीमा ख्रीस्ट्री बीस्वासी र्होमा य्हीन्ब। ङ्य्हङ्की पर्मेस्वर् अपचे एङ्यीमात अनुग्रहतेङ् सान्ती न्हङ्जेत्खइ। व्होर्छ्येकी प्रार्थना 3 ङ्यीमाचे एङ्यीमाकी लागीरी प्रार्थना स्य्हेङ्बे बेलोरी ङ्य्हङ्माकी प्रभु येसु ख्रीस्ट्की अप पर्मेस्वर्त खेम पङ्लेनो व्होर्छ्ये पीन्ब। 4 तलेपङ्सम् येसु ख्रीस्ट्री एङ्यीमाचे स्य्हेङ्बे बीस्वास् ओसेम् पर्मेस्वर्की जम्मनो म्हीमात एङ्यीमाचे स्य्हेङ्बे म्होइबइ बारेरी ङ्यीमाचे थ्येःबल मुब। 5 एङ्यीमाचे ता आस् लज्यी हुजु एङ्यीमाकी लागीरी पर्मेस्वर्चे स्वर्गरी थेन्जेत्पल मुब। एङ्यीमाचे चोले बीस्वास् स्य्हेङ्ब ओसेम् म्होइबे लक् स्य्हेङ्बल य्हीन्ब। चु आस्की बारेरी एङ्यीमाचे ङोन्ग्यम्नो देमेन्की ज्यबे सम्तर् थ्येःबल मुब। 6 चु ज्यबे सम्तर् एङ्यीमात स्येत्पल मुब, एङ्यीमाचे ज्यबे सम्तर् थ्येःज्यीम् पर्मेस्वर्की अनुग्रहत गोबे दीन् य्हङ्से एङ्यीमाकी गुङ्री ख्रीस्ट्त बीस्वास् स्य्हेङ्बे म्हीमा य्हक्को तस्यीनो बोर्टीब, ओसेम् पर्मेस्वर्त तङ्नलबे लक्मा स्य्हेङ्टीब, होलेनो जम्बुलीङ्की जम्मनो ग्लामारी य्हक्को तस्यीनो बोर्टीब मुब। 7 एङ्यीमात चु ज्यबे सम्तर्की बारेरी ङ्यीमातेङ् बक्च्य लक् स्य्हेङ्बे म्होइबे र्हो इपाफ्रास्चे लोप्पल मुबल। थे ङ्यीमाकी देब्री एङ्यीमाकी गुङ्री ख्रीस्ट्की लक् स्य्हेङ्बे बीस्वासीलो अले य्हीन्ब। 8 थेचेनो पबीत्र आत्माचे एङ्यीमात न्हङ्जेत्पे म्होइबइ बारेरी ङ्यीमात स्येत्ज्यी। 9 होत्तज्यीम् ङ्यीमाचे एङ्यीमाकी बारेरी थ्येब य्हङ्सेनो ङ्यीमाचे खेम पङ्लेनो एङ्यीमाकी लागीरी प्रार्थना स्य्हेङ्स्यीनो टीब। पबीत्र आत्माचे न्हङ्जेत्पे ज्ञान्तेङ् गोब ग्यम्से तज्यीम् एङ्यीमाचे पर्मेस्वर्चे थुः लजेत्पे जम्मनो तम्मा ज्यनले स्येःब खम्खइ पङ्ज्यीम् प्रार्थना स्य्हेङ्स्यीनो टीब। 10 ओसेम् एङ्यीमाचे प्रभुत सेम्री ङ्यीबे बानी बेहोर्मा थोःज्यीम् खेम पङ्लेनो थेङ्त तङ्नलबे लक्मा स्य्हेङ्ब खम्स्ये मुब। ओसेम् एङ्यीमाचे जम्मनो ज्यबे लक्मा य्हक्को स्य्हेङ्स्यीनो बोर्स्ये मुब, ओसेम् एङ्यीमाचे पर्मेस्वर्की बारेरी झेन् य्हक्को गोस्ये मुब। 11 पर्मेस्वर्की महीमीत् सक्ती यङ्ज्यीम् बङ्ज्येन् तउ पङ्ज्यीम्एनो ङ्यीमाचे प्रार्थना स्य्हेङ्ब, हुजु लीप्चे एङ्यीमाचे जम्मनो दुखमा नाज्यीम् तङ्बतेङ् धैर्य लब खम्स्ये मुब। 12 होत्तज्यीम् पर्मेस्वर् अपत व्होर्छ्ये पीनो। पर्मेस्वर्चे य्हल्की य्हुल्री थेङ्की म्हीमाचे यङ्स्येकी हक्मा एङ्यीमातएनो यङ्ब खम्नलजेत्पल मुब। 13 तलेपङ्सम् थेङ्चेनो ङ्य्हङ्मात म्हुन्दुङ्की य्हुल् ग्यम्से फेःपीन्जेत्ज्यी, ओसेम् र्हङ्की म्होइबे ज ख्रीस्ट्की य्हुल्री नोम्जेत्पल मुब। 14 परमेस्वरकी जचेनो ङ्य्हङ्मात पाप्की दोस् ग्यम्से फेःपीन्जेत्ज्यीम् क्षमा न्हङ्जेत्ज्यी। ख्रीस्ट् गोदोब्न्हङ्री ङ्य्हच्छ्यङ् 15 म्रङ्ब अखम्बे पर्मेस्वर्की रुप्मी ख्रीस्ट्नो य्हीन्ब। थेङ् पर्मेस्वर्चे स्य्हेङ्जेत्पे जम्मनो स्हेमा बीम ग्रेन् य्हीन्ब। 16 तलेपङ्सम् ख्रीस्ट् ग्यम्से तज्यीम् स्वर्गतेङ् जम्बुलीङ्री मुबे जम्मनो स्हेमा पर्मेस्वर्चे स्य्हेङ्जेत्पल मुबल। म्रङब खम्बलतेङ् म्रङ्ब अखम्बे स्हेमा, आत्माइ सक्तीमा, मालीक्मा, सासक्मा ओसेम् अधीकार् लबलमा, चु जम्मनो स्हेःमा पर्मेस्वर्चे ख्रीस्ट् ग्यम्सेनो ख्रीस्ट्की लागीरी स्य्हेङ्जेत्पल य्हीन्ब। 17 स्य्हेङ्ज्यीन्बे जम्म स्हेःमा बीम ङोन्ग्यम्नो थेङ् मुबल, ओसेम् थेङ्रीनो जम्मनो स्हेःमा पान्दीज्यीम् चल्तीजेत्टीबल मुब। 18 थेङ्की ल्हीः मन्डली य्हीन्ब ओसेम् हुजुइ क्रमी थेङ् य्हीन्ब। थेङ्नो सुरु य्हीन्ब ओसेम् स्यीब ग्यम्से सोबलमान्हङ्री गोदोब्न्हङ् ङोन्ग्यम् सोबलएनो ख्रीस्ट्नो य्हीन्ब। होत्तज्यीम् थेङ् गोदोब्न्हङ्री ग्रेन् य्हीन्ब। 19 तलेपङ्सम् परमेस्वर र्हङ्की जम्मनो स्वभाब्मा ख्रीस्ट्री पुरा तबरीनो थेङ् तङ्जेत्ज्यी। 20 ओसेम् पर्मेस्वर्चे क्रुस्री य्हर्पुङ्बे येसु ख्रीस्ट्की काः ग्यम्से सान्ती नोम्खजेत्ज्यीम् स्वर्गतेङ् जम्बुलीङ्री मुबे जम्मनो स्हेमात र्हङ्तेङ् थुन्नलजेत्ज्यी। 21 ङोन्ग्यम् एङ्यीमा पर्मेस्वर् ग्यम्से थारीङ् मुबल, ओसेम् अज्यबे तम्मा म्हेन्ज्यीम् अज्यबे लक्मा स्य्हेङ्बल तज्यीम् एङ्यीमा पर्मेस्वर्की सत्तुर् तबल मुबल। 22 तर देरेम्, पर्मेस्वर्चे एङ्यीमात पर्मेस्वर्की ङोन्री पबीत्र, सुद्द ओसेम् दोस् अरेबल ङोन्बरी येसु ख्रीस्ट्त ल्हीःरी स्यीबुङ्जेत्ज्यी। ओसेम् पर्मेस्वर्चे एङ्यीमात र्हङ्तेङ् थुन्नलजेत्पल य्हीन्ब। 23 होत्तज्यीम् एङ्यीमा र्हङ्की बीस्वास्री य्हङ्य्होङ् अतनले कोङ्ज्यीम् टीथोब। ओसेम् एङ्यीमाचे ज्यबे सम्तर् थ्येःबे बेलोरी यङ्बे आस्त थपीतो। एङ्यीमाचे थ्येःबे चु ज्यबे सम्तर् जम्बुलीङ्की जम्मनो ग्लाकी म्हीमात स्येत्पल मुब। ओसेम् ङ पावलएनो चु ज्यबे सम्तर् स्येत्पे लक् स्य्हेङ्बे योक्पो तबल मुब। मन्डलीइ लागीरी पावलचे स्य्हेङ्बे लक् 24 देरेम् ङ एङ्यीमाकी लागीरी दुख नाथोलएनो तङ्ब, तलेपङ्सम् ख्रीस्ट्चे थेङ्की ल्हीः मन्डलीइ लागीरी खले दुखमा नाजेत्ज्यी, होलेनो ङएनो मन्डलीइ लागीरी नाथोस्येकी दुखमा ङइ ल्हीःरी नाज्यीम् टोप् तनलबरी र्हो लब। 25 पर्मेस्वर्चेनो ङत मन्डलीइ योक्पो स्य्हेङ्जेत्ज्यी, ओसेम् थेङ्की जम्मनो फ्रोइ एङ्यीमात स्येत्पे जीम्मा ङत न्हङ्जेत्ज्यी। 26 पर्मेस्वर्चे दङ्बो म्हेम्हेमा ग्यम्से छुम्ज्यीम् थेन्जेत्पल तज्यीम् चु तम् खल्चेएनो गोब अखम्, तर देरेम् चु तम्त थेङ्चे र्हङ्की म्हीमात स्येःनलजेत्पल मुब। 27 पर्मेस्वर्चे चोले स्य्हेङ्जेत्ज्यी, तलेपङ्सम् एङ्यी यहुदी अय्हीन्बे म्हीमाचेएनो थेङ्की छुम्ज्यीम् थेन्बे महीमीत तम् गोब खम्खइ पङ्बे थुः लजेत्ज्यी। ओसेम् ख्रीस्ट् एङ्यीमातेङ् स्य्हुजेत्प पङ्बे तम्नो छुम्ज्यीम् थेन्बे तम् य्हीन्ब। चु पङ्बलमी एङ्यीमाचे पर्मेस्वर्की महीमा यङस्ये मुब पङ्बल य्हीन्ब। 28 होत्तज्यीम् ङ्यीमा जम्मनो म्हीमात ख्रीस्ट्की बारेरी स्येत्प। ओसेम् ङ्यीमाचे पर्मेस्वर्चे न्हङ्जेत्पे जम्मनो बुद्दीचे म्हीमात चेतावनी पीन्ज्यीम् लोप्प। जम्मतनो ख्रीस्ट्री च्यीप्नलज्यीम् पर्मेस्वर्ज बोर्बरी ङ्यीमाचे चोले स्य्हेङ्ब। 29 ख्रीस्ट्चे ङन्हङ् न्हङ्जेत्पे ङ्य्हच्छ्यङ् सक्तीचेनो चु लक् खम्ब सम्मइ बङ् तेत्ज्यीम् स्य्हेङ्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.