प्रेरीत् 28 - पश्चिम तामाङपावल माल्टा टापुरी दोःबल 1 चोले ङ्यीमा यरी दोःब बीसेम् हुजु टापुइ मीन् माल्टा टीम् बी स्येःज्यी। 2 हुजु ग्लाकी म्हीमाचे ङ्यीमात य्हक्को दय लज्यीम् मे फुत्ज्यीम् दे:बुङ्ज्यी। तलेपङ्सम् नम् युज्यीम् खङ्टीब मुबल ओसेम् लाबएनो खटीब मुबल। 3 ओसेम् पावलचे ज्यीद स्यीङ्मा र्हुब्ज्यीम् मेरी युमम् मेइ लेप्चे लज्यीम् पुख्री गीः डोङ्खज्यी। ओसेम् पावलकी यारी छाज्यीम् येइज्यी। 4 हुजु ग्लाकी म्हीमाचे पावलकी यारी पुख्री येइज्यीम् टीबल म्रङ्ज्यीम् थेमान्हङ् चोले पङ्ज्यी, “चु म्ही देमेन्नो म्ही सेत्पे म्ही य्हीन्स्यील। थे समुन्द्रचे थर्ज्यीम् खलेएनो ख्लइ न्याय ग्यम्से थर् अखम्।” 5 तर पावलचे पुख्रीत मे न्हङ् खर्लाज्यी। तर थेत तएनो अत। 6 हुजु म्रङ्बे म्हीमाचेम् की देरेम् थेल ल्हीः टङ्स्ये मुब की तीख्यप्रीनो गुर्ज्यीम् स्यीस्ये मुब पङ्ज्यीम् च्यास्यीनो टीज्यी। तर तोव बेलो सम्म ब्रेन्ज्यीम् च्यामएनो पावलत तएनो अतबल म्रङ्ज्यी। ओसेम् थेङ्यीमाचे सेम् पोज्यीम् पङ्ज्यी, “चु म्हीम् ख्ल य्हीन्ब टीम्।” 7 ओसेम् हुजु टापुइ हाकीम् पब्लीयस पङ्बे म्हीइ बुम्रङ् हुजु ग्लाकी रेइरी मुबल। थेचे ङ्यीमात ङ्होत्ज्यीम् स्वागत स्य्हेङ्ज्यी। ओसेम् ङ्यीमा सोम्रेत् सम्म थेइ दीम्री डोम्बो तज्यीम् टीज्यी। 8 हुजु बेलोरी पब्लीयसकी अप छव खबतेङ् फो ज्यी:ज्यीम् न्हुटीब मुबल। ओसेम् पावल पब्लीयसकी अपत च्याबरी ङ्यीज्यीम् प्रार्थना स्य्हेङ्ज्यीम् नबइ जोरी या थेन्ज्यी। ओसेम् नबे म्ही फेन्ज्यी। 9 चोले फेन्बल था यङ्ब बीसेम् हुजु ग्लाकी नबे म्हीमा जम्मनो पावलज खज्यी। ओसेम् जम्मतनो फेन्न लज्यी। 10 हुजु ग्लाकी म्हीमाचे ङ्यीमात य्हक्को स्हेस स्य्हेङ्ज्यी। ओसेम् ङ्यीमा हुजु ग्ला पीत्ज्यीम् डोङ्बे बेलोरी थेङ्यीमाचे ङ्यीमात तोःबे स्हेमाएनो पीन्ज्यी। पावल रोम्री दोखबल 11 ओसेम् ङ्यीमाचे ल सोम् लीप्चे जउले ख्ल पङ्बे दोङ्गरी क्रेत्ज्यीम् माल्टा टापु ग्यम्से ब्रज्यी। हुजु दोङ्गम् अलेक्जेन्ड्रीया सहर्से खज्यीम् खङ्बे लरी माल्टा टापुरी टीबल टीम्। 12 ओसेम् हुजु ग्लाचे ङ्यीमा सुराकुसाइ पङ्बे सहर्री दोःज्यीम् हुजुरी सोम्रेत् सम्म टीज्यी। 13 हुजु ग्लाचे ब्रज्यीम् ङ्यीमा रेगीयन् पङ्बे सहर्री दोःज्यी। न्हम्स्य्होर्हङ् लोचे लाब खज्यी। ओसेम् ङ्यीमा पटीओली पङ्बे सहर्री दोःज्यी। 14 हुजुरी ङ्यीमाचे प्रभुत बीस्वास् स्य्हेङ्बे डेत्-डेत् अज्यो-अलेमात खदु लज्यी। थेङ्यीमाचे ङ्यीमात सत गीः सम्म थेङ्यीमातेङ् टीबीनो पङ्ज्यी। चोले ङ्यीमा रोम् सहर्री दोःज्यी। 15 ओसेम् रोम् सहर्री मुबे बीस्वासी अज्यो-अलेमाचे ङ्यीमा खटीब मुब पङ्बे तम् थ्येःज्यीम् थेङ्यीमा ङ्यीमातेङ् खदु लबरी अप्पीयस बजारतेङ् तीन-पाटी पङ्बे ग्लारी खज्यी। थेङ्यीमात म्रङ्ब बीसेम् पावलचे आर् खज्यीम् पर्मेस्वर्त व्होर्छ्ये पीन्ज्यी। पावलचे रोम् सहर्री ज्यबे सम्तर् स्येत्पल 16 ओसेम् ङ्यीमा रोम्री दोःब बीसेम् पावलतम् स्यीपाइ गीःचे रुङ्ज्यीम् गीःकीनो टीबुङ्ज्यी। 17 सोम्रेत् लीप्चे पावलचे रोम्री टीबे यहुदी अगुवामात ङ्होत्ज्यी। थेङ्यीमा र्हुब् तब बीसेम् पावलचे पङ्ज्यी, “अज्यो-अलेमा, ङचे ङ्य्हङ्की म्हीमातेङ् ङ्य्हङ्की म्हेमेमाकी पेठीम्की बीरुद्दरी तएनो स्य्हेङ्बल अरेमएनो यहुदी अज्यो-अलेमाचे ङत यरुसलेमरी चुङ्ज्यीम् रोमी म्हीमाकी यारी सोप्तीपीन्ज्यी। 18 रोमीमाचे ङत ङ्योत्प थी:ब लज्यीम् पीत्लाबे सेम् लबल मुबल। तलेपङ्सम् ङल स्यीथोःबे सजायकी दोस् तएनो अय्हङ्बल मुबल। 19 तर यहुदी अज्यो-अलेमाचे ङत पीत्लाबरी अङ्येन्बल तज्यीम् ङचे ग्यल्बो कैसरत फ्या लनोथोःज्यी। होलेतलेनो ङचे र्हङ्की यहुदी अज्यो-अलेमाकी बीरुद्दरी दोस् पीन्थोबे तम् तएनो अरेबल। 20 होत्तज्यीम् चु तम् पङ्बे लागीरी ङचे थेङ्मात ङ्होत्पल य्हीन्ब। तलेपङ्सम् इस्राएलीमाचे आस् लबे मुक्ती न्हङ्बे ख्रीस्ट्की लागीरी ङत चु च्यल्दचे खीःबल य्हीन्ब।” 21 ओसेम् थेङ्यीमाचे पावलत पङ्ज्यी, “ङ्यीमाचे एइ बारेरी यहुदीया ग्यम्से तइ चीठीएनो यङ्बल अरे। ओसेम् हुजुचे खबे अज्यो-अलेमाचेएनो एइ बीरुद्दरी अज्यबे तम् तएनो पङ्बलएनो अरे, स्येत्पलएनो अरे। 22 तर ङ्यीमात एइ तम् ए ग्यम्सेनो ङ्येन्बे सेम् मुब। तलेपङ्सम् म्हीमाचे खन बीबीनो एइ छार् समुहइ बीरुद्दरी तम् पङ्बल ङ्यीमात था मुब।” 23 हुजु लीप्चे थेङ्यीमाचे पावलकी तम् ङ्येन्बे लागीरी दीन् तेत् लज्यी। ओसेम् हुजु दीन्री य्हक्को म्हीमा पावलत थेन्बे ग्लारी खज्यीम् र्हुब् तज्यी। पावलचे थेङ्यीमात स्य्होः य्हङ्से ङ्यीस्ये सम्मनो पर्मेस्वर्की य्हुल्की बारेरी लोप्ज्यी। ओसेम् धर्मइ छ्येःरी मोसातेङ् अगम्बक्तमाचे ब्रीबे तम्मा ग्यम्से येसुइ बारेरी ज्यनले लोप्ज्यीम् थेङ्यीमात गोनलब म्हइज्यी। 24 ओसेम् गदे म्हीमाचेमी थेचे लोप्पल गोज्यीम् बीस्वास् स्य्हेङ्ज्यी। तर गदेचेम् बीस्वास् अस्य्हेङ्। 25 ओसेम् थेङ्यीमा र्हङ्न्हङ्री तम् अडीःज्यीम् य्हर्ब छ्येःबे बेलोरी पावलचे ज्युःरी चोले पङ्ज्यी, “पबीत्र आत्माचे एङ्यीमाकी अप म्हेमेमात सुङ्बे फ्रोइ देमेन् य्हीन्ब, तलेपङ्सम् यसैया अगम्बक्तचे चोले सुङ्बल मुब- 26 ‘चु म्हीमातेङ् ङ्यीज्यीम् चोले पङो’ एङ्यीमाचे थ्येःबम् थ्येःब, तर खेमेएनो गोअखम्, च्याबम् च्याब, तर खेमेएनो म्रङअखम्। 27 तलेपङ्सम् चु म्हीमाकी सेम् कोङ्ब मुब, थेङ्यीमाकी न्हबीङ् रुङ्चङ् तबल मुब, ओसेम् थेङ्यीमाचे र्हङ्की मीः च्युम् लबल मुब। अय्हीन् पङ्सम् थेङ्यीमाकी मीःचे म्रङ्स्येल, न्हबीङ्चे थ्येःस्येल ओसेम् सेम्चे गोस्येल। ओसेम् थेङ्यीमाइ सेम् ङ पट्टीचे दोःस्येल ओसेम् ङ थेङ्यीमात फेन्न लस्येल।” 28 ओसेम् पावलचे पङ्ज्यी, “होत्तज्यीम् देरेम् ङ एङ्यीमात पङ्ब, पर्मेस्वर्की चु मुक्तीइ ज्यबे सम्तर् यहुदी अय्हीन्बे म्हीमात पीत्पल मुब, ओसेम् थेङ्यीमाचे ङ्येन्स्ये मुब।” 29 [पावलचे चु तम् पङ्ब बीसेम् यहुदीमा र्हङ्न्हङ्नो अडीःज्यीम् फेःज्यीम् य्हर्ज्यी।] 30 पावल ङ्य्हीत्तीङ् सम्म र्हङ्की टङनो कोल्ज्यीम् रोम्री टीज्यी। ओसेम् र्हङ्त खदु लबरी खबलमा जम्मतनो स्वागत स्य्हेङ्ज्यी। 31 पावलचे आर् लज्यीम् पर्मेस्वर्की य्हुल्की बारेरी प्रचार स्य्हेङ्ज्यीम् येसु ख्रीस्ट्की बारेरी लोप्प मुबल। ओसेम् खल्चेएनो अर्होद्प मुबल। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.