प्रेरीत् 27 - पश्चिम तामाङपावल रोम्री ङ्यीबल 1 ओसेम् फेसतस्चे समुन्द्रइ ग्यम्से तज्यीम् इटालीया य्हुल्री ङ्यीबे तम् पङ्ब बीसेम् थेङ्यीमाचे पावलतेङ् ल्हो-ल्हो कैदीमात ग्यल्बो अगस्टस्की कप्तान युलीयस्की यारी सोप्तीपीन्ज्यी। 2 एड्रामीटेनोस सहर् ग्यम्से एसीया प्रदेस्की दोङ्ग थेन्बे ग्लामा तज्यीम् ङ्यीबे दोङ्गरी ङ्यीमा क्रेत्ज्यी। ओसेम् हुजु दोङ्गरी अरीस्तार्खस् मीन् मुबे म्ही गीःएनो ङ्यीमातेङ् मुबल। थे माकेडोनीया प्रदेस्की थेसलोनीकी सहर्की म्ही मुबल। 3 न्हम्स्य्होर्हङ् ङ्यीमा सीदोन सहर्री दोःज्यी। हुजु ग्लारी कप्तान युलीयस्चे पावलत दय लज्यीम् थेत तोःबे स्य्हेमा कीन्बरी र्होमातेङ् खदु लबरी ङ्यीपुङ्ज्यी। 4 हुजु ग्लासे ङ्यीमाइ दोङ्ग देबेएनो ब्रब छ्येज्यी। ओसेम् लाब दोङ्गइ ग्यप्सोल्ले खबल तज्यीम् लाबचे अग्यङ्बे साइप्रस टापुइ ग्ला पट्टीचे तज्यीम् ङ्यीमा ङ्यीज्यी। 5 ओसेम् ङ्यीमा कीलीकीयातेङ् पामफीलीयाकी समुन्द्रइ क्योम्सङ् दोःब बीसेम् ङ्यीमा लुकीयाकी माइरा पङ्बे सहर्री फप्ज्यी। 6 हुजुरी कप्तान युलीयस्चे अलेक्जेन्ड्रीया सहर् ग्यम्से इटालीया य्हुल्री ङ्यीबे दोङ्ग गीः स्यप्ज्यीम् ङ्यीमात हुजु दोङ्गरी क्रेतो पङ्ज्यीम् कुल्ज्यी। 7 ङ्यीमा य्हक्को दीन्सम्मनो दोङ्ग गोलेले ब्रज्यीम् य्हक्को दुखले क्नीडस सहर्की रेइरी दोःज्यी। हुजुरी दोःमएनो लाबचे ङ्यीमात ङोन्ग्यम् य्हर्अपुङ्। होत्तज्यीम् ङ्यीमा क्रेट टापुइ लाबचे अग्यङ्बे ग्ला पट्टी सालमोने पङ्बे ग्लाचे य्हर्ज्यी। 8 य्हक्को गारोले समुन्द्रइ य-यचे तज्यीम् ङ्यीमा दोङ्ग थेन्बे ज्यबे ग्लारी दोखज्यी। हुजु ग्ला ग्यम्से लासीया सहर् ज्यदङ् मुबल। 9 य्हक्को बेलो य्हर्ज्यीन्बल मुबल। ओसेम् समुन्द्र ग्यम्से ब्रबरीएनो य्हक्को लोङ्बल तबल मुबल। ओसेम् पस्चताप् स्य्हेङ्ज्यीम् ङ्यीम्बु टीबे बेलोएनो य्हर्ज्यीन्बल तज्यीम् पावलचे थेङ्यीमात पङ्ज्यी, 10 “र्होमा, चु समुन्द्रइ ग्यम्री दोङ्गतेङ् स्य्हेमाकीनो नास् तस्ये अय्हीन्, तर ङ्य्हङ्माकी ल्हीएनो य्हर्ल र्हङ् ङचे म्रङ्ज्यी।” 11 तर कप्तान्चे पावलकी तम्त बीम दोङ्ग चल्तीबे म्हीतेङ् दोङ्गइ न्याबोत य्हक्को पतइतीज्यी। 12 खङ्बे बेलोरी चु दोङ्ग थेन्बे ग्लारी टीब ज्यब अतबल तज्यीम् य्हक्को र्हङ्ब म्हीमाचे खले पङ्लेएनो फोनीक्स सहर्री दोःथोःब पङ्ज्यीम् सल्लह पीन्ज्यी। फोनीक्समी क्रेट टापुकी लो न्हुब् ओसेम् ज्यङ् न्हुब्चे ङ्होन्बे दोङ्ग थेन्बे ग्ला मुबल। हुजुरी खङ्बे बेलो थाथोब मुबल। समुन्द्ररी लाबलुङ् खबल 13 लो ग्यम्से लाब गोलेले स्यङ्ब बीसेम् थेङ्यीमाचे देरेम् ङ्य्हङ्मा य्हर्ब खम्ब बी म्हेन्ज्यी, ओसेम् दोङ्ग चुङ्बे फइकी कोक्त डुत्ज्यीम् दोङ्गत क्रेट टापुइ य-यचे तज्यीम् बोर्ज्यी। 14 तर य्हम्ब गीःरीनो हुजु टापु ग्यम्से ङ्हच्छ्यङ् लाब लुङ् खज्यी। हुजुम् ज्यङ्-स्यर् पङ्बे लाबलुङ् मुबल। 15 ओसेम् दोङ्गत लाबलुङ्चे उप्ज्यी। हुजु लाब लुङ्त तएनो लअखम्ज्यीम् ङ्यीमाचे दोङ्ग खनचे य्हर्लेनो य्हर्खइ पङ्ज्यीम् पीत्लाज्यी। 16 क्लौडा पङ्बे ज्यीद टापुइ लो पट्टीक्योर दोःब बीसेम् टापुचे लाबलुङ्त थोःपीन्ज्यी। ओसेम् हुजुरीएनो ङ्हच्छ्यङ् दोङ्गइ ग्यप्री खीःज्यीम् थेन्बे ज्यीत दोङ्गत य्हक्को गारोले ज्येन्ले थेन्खम्ज्यी। 17 दोङ्ग चल्तीबलमाचे हुजु ज्यीत दोङ्गत छेङ्ज्यीम् जेप्प दोङ्गन्हङ् युज्यीम् कोङ्नले खीःज्यी। ओसेम् ङ्हच्छ्यङ् दोङ्गत ङ्हच्छ्यङ् छो:तमाचे खीःज्यी। सीरटीस पङ्बे ग्लाकी बालुव ग्लारी दोङ्ग गाल बी लोङ्ज्यीम् दोङ्गइ पालमा न्हङ्री गीः प्लोक्लाज्यी। ओसेम् दोङ्गत लाबचेनो इबोर्ज्यी। 18 लाब लुङ्तेङ् छाल्चे दोङ्गत ग्यङ्स्यीनो टीज्यी। होत्तज्यीम् थेङ्यीमाचे न्हम्स्य्होर्हङ् दोङ्गरी मुबे स्हेःमाएनो ख्लाब तीप्ज्यी। 19 ओसेम् रेःनी र्हङ् थेङ्यीमाचे दोङ्ग चल्तीबरी तोःबे स्हेमाएनो र्हङ्की याचेनो तेत्ज्यीम् ख्लाज्यी। 20 य्हक्को दीन्सम्मनो न्ह दीनी म्रङ्ज्यी, न्ह सार्मा म्रङ्ज्यी, ओसेम् लाबलुङ् खस्यीनो टीबचेम् ङ्यीमाल सोबे आस्एनो म्हज्यीम् य्हर्ज्यी। 21 थेङ्यीमाचे चब अचज्यीम् य्हक्को दीन् तबल मुबल। ओसेम् पावलचे जम्मइ ङोन्री रप्ज्यीम् पङ्ज्यी, “अज्यो-अलेमा, क्रेट ग्यम्से दोङ्ग अचल्तीबल पङ्सम् ङ्य्हङ्माचे चोतेबे दुख अय्हङ्स्येल, ओसेम् स्हेमाएनो अन्होङ्स्येल। थेङ्माचे ङइ तम् ङ्येन्जेत्थोब मुबल। 22 तर ङ पङ्ब, सेम् कोङ्नलउ, ङ्य्हङ्मा खलेएनो स्यीस्ये अरे, दोङ्गकीनो नास् तस्ये मुब। 23 तलेपङ्सम् तील ङ्येस्ये ङचे तेन्बे पर्मेस्वर्चे पीत्युजेत्पे स्वर्गदुत् गीः ङइ रेइरी रप्ज्यीम् पङ्ज्यी, 24 ‘पावल, थलोङो, ए ग्यल्बो कैसर्की ङोन्री ङ्यीज्यीम् रप्नोथोब। ओसेम् एतेङ् दोङ्गरी मुबे म्हीमात पर्मेस्वर्चे सोनलजेत्स्ये मुब।’ 25 होत्तज्यीम् अज्यो-अलेमा, सेम् कोङ्नलउ, तलेपङ्सम् पर्मेस्वर्चे सुङ्बे चु तम् तस्येनो मुब पङ्ज्यीम् ङत बीस्वास् मुब। 26 ओसेम् ङ्य्हङ्माकी दोङ्गम् खन पङलेनो टापु गीःरी थोक्स्ये मुब।” दोङ्ग छ्यक्छ्यीक् तबल 27 ओसेम् ङ्यीमाइ दोङ्ग लाबलुङ्चे लज्यीम् एड्रीयास पङ्बे समुन्द्ररी तोर् य्होङ् मोर् य्होङ् तज्यीम् य्हर्टीबल दीन् चुप्ली तज्यीन्बल मुबल। ओसेम् म्हुन् डेत् क्योर् दोङ्ग चल्तीबे म्हीमाचे खर्ब ग्ला गीःकी ज्यदङ् दोःय्हम्बल अङ्सर् थाज्यी। 28 होत्तज्यीम् थेङ्यीमाचे समुन्द्ररी यी गदे नुप्पे टीम् बी दप् च्यामम् एक सय बीस् फीट् नुप्पल टीम् बी था यङ्ज्यी। ओसेम् चेक्पजकी क्योर् दप्मम् नब्बे फीट् नुप्पल यङ्ज्यी। 29 ओसेम् दोङ्ग युङ्बरी ठोक्ल बी लोङ्ज्यीम् दोङ्गइ ग्यप् पट्टीइ फइकी कोक्त ब्ली फप्पीत्ज्यीम् दोङ्ग र्होद्ज्यी। ओसेम् स्य्हो अतगदे सम्म प्रार्थना स्य्हेङ्ज्यीम् टीज्यी। 30 दोङ्ग चल्तीबे म्हीमाचे ङ्हच्छ्यङ् दोङ्गइ ङोन् पट्टीइ फइकी कोक्त फप्पीत्पे ङ्युङ्री ज्यीत दोङ्गत फप्पीत्ज्यी। ओसेम् थेङ्यीमा भाग्तीब म्हइज्यी। 31 तर पावलचे कप्तान्तेङ् स्यीपाइमात पङ्ज्यी, “चु दोङ्ग चल्तीबे म्हीमा य्हर्ज्यी पङ्सम् थेङ्मा खलएनो थर्स्ये अरे।” 32 चु तम् थ्येःज्यीम् स्यीपाइमाचे ज्यीत दोङ्गइ छो:मा ग्योन्-ग्योन्नो थालाज्यीम् दोङ्गत यीचे बोर्नलज्यी। 33 स्य्होःरी मीः छीरीरीले म्रङ्ब बीसेम् पावलचे म्हीमात पङ्ज्यी, “तइ चबे स्हे पङ्लेनो सोलो, तएनो अस्होल्नले लोङ्-लोङ्ज्यीम् स्य्हुबल तीङ्यीम् दीन् चुप्ली तज्यीन्ज्यी। 34 होत्तज्यीम् थेङ्मात ङ पङ्ब ता पङ्लेनो सोल्जेतो। तलेपङ्सम् बङ् यङ्ज्यीम् सोम्बो टीबे लागीरी चब सोल्थोःब। ओसेम् थलोङ्जेतो, खल्लएनो क्रइ बाकीएनो तइस्ये अरे।” 35 हुजु लीप्चे पावलचे ग्येङ् कीन्ज्यीम् जम्मइ ङोन्री पर्मेस्वर्त व्होर्छ्ये पीन्ज्यीम् चब तीप्ज्यी। 36 ओसेम् हुजुरी मुबलमा जम्मचेनो आर् खज्यीम् चब चज्यी। 37 हुजु दोङ्गरी जम्म दुइ सय छयहत्तर म्हीमा मुबल। 38 थेङ्यीमाचे म्रेन्ब सम्म चब बीसेम् दोङ्गत यङ्ज तनलबरी व्हत समुन्द्ररी ख्लापीत्ज्यी। 39 स्य्होरी य्हल् तमएनो थेङ्यीमाचे खजु ग्ला बी स्येःब अखम्। तर थेङ्यीमाचे खर्बे ग्लाकी बालुव मुबे य म्रङ्ज्यीम् दोङ्गत हुजु ग्लारी बोर्बे सेम् लज्यी। 40 ओसेम् थेङ्यीमाचे फइकी कोक्तमारी खीःबे छो:मा थालाज्यीम् फइकी कोक्तमात समुन्द्ररीनो पीत्थेन्ज्यी। ओसेम् दोङ्गत चल्तीबे क्यबत खीःबे छो:माएनो प्लोक्लाज्यी। ङोन्ग्यम्क्योर्की पालमात सेन्ब बीसेम् लाबचे दोङ्गत यक्योर् बोर्ज्यी। 41 तर यीन्हङ् मुबे बालुवरी दोङ्गइ ङोन् पट्टीइ न बुप्ज्यीम् ब्रब अखम्। ओसेम् ग्यप् पट्टीइ नरीम् यीइ छाल्चे प्रुङ्ज्यीम् दोङ्ग स्य्हीबोर्ज्यी। 42 ओसेम् दोङ्गरी मुबे स्यीपाइमाचे कैदीमा ग्ये क्यल्ज्यीम् भाग्तील म्हेन्ज्यीम् थेङ्यीमात सेत्पे सेम् लज्यी। 43 तर कप्तान्चे पावलत जोगइतीबे सेम् लज्यीम् थेङ्यीमात खल्तएनो सेत् अपुङ्। ओसेम् ग्ये क्यल्ब स्येःबमात ग्ये क्यल्ज्यीम् पकरी ङ्यीउ बी पङ्ज्यीम् कुल्ज्यी। 44 ओसेम् ग्ये क्यल्ब अस्येःबमातम् दोङ्गइ स्यीङ्मा चुङ्ज्यीम् यरी ङ्यीउ बी कुल्ज्यी। चोले जम्मनो ज्यनले यरी दोःज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.