प्रेरीत् 26 - पश्चिम तामाङ1 हुजु लीप्चे अग्रीपास्चे पावलत, “देरे एचे र्हङ्की बारेरी तम् पङ्खम्ब” बी पङ्ज्यी। ओसेम् पावलचे या स्येल् लज्यीम् र्हङत ल्हइतीबे दोस्की बीरुद्दरी पङ्ज्यी 2 “ग्यल्बो अग्रीपास्, यहुदीमाचे ङत दोस् ल्हइतीबे जम्मनो तम्माकी बारेरी तीङ्यी थेङ्की ङोन्ग्यम् पङ्म्यङ्बल तज्यीम् ङ ङत ङ्हो मुबे म्ही म्हेन्ब। 3 यहुदीमाकी पेठीम्तेङ् थेङ्यीमाकी अथुन्बे तम् थेङ्चे ज्यनले खेम्जेत्पल मुब। होत्तज्यीम् ङ थेङ्त फ्या लब, देरे ङइ तम् ज्यनले सेन्जेतो। 4 “ङ कोल य्हङ्सेनो ङइ य्हुल्तेङ् यरुसलेम सहर्री छर्बल य्हीन्ब। होत्तज्यीम् यहुदीमा जम्मचे ङ खले छर्ज्यी बी ज्यनले स्येबल मुब। 5 ङोन्ग्यम् ङ फारीसी पङ्बे कोङ्बे धार्मीक् समुहरी टीज्यीम् कोङ्बे पेठीम् म्हन्दीज्यीम् ब्रब मुबल। थेङ्यीमाचे पङ्बे सेम् लसम् चु तम्मी थेङ्यीमाचेएनो पङ्खम्ब। 6 ओसेम् पर्मेस्वर्चे ङ्य्हङ्की म्हेमेमातेङ् स्य्हेङ्जेत्पे बाचारी आस् थेन्बल तज्यीम् ङ तीङ्यी थेङ्माकी ङोन्ग्यम् रप्टीबल मुब। 7 हुजु बाचा यङ्बे आसरी ङ्य्हङ्की खलक् चुङ्ङ्य्हीचेनो दीन् म्हुन् सेम् गी तज्यीम् पर्मेस्वर्त तेन्बल य्हीन्ब। ग्यल्बो अग्रीपास्, ङचेएनो हुजु आस् थेन्बल य्हीन्ब, होले तलेएनो यहुदीमाचे ङत दोस् ल्हइतीबल मुब। 8 पर्मेस्वर्चे स्यीबलमात सोनलजेत्प पङ्बे तम्त थेङ्माचे तले बीस्वास् अलबल? 9 “य्हीन्बरीम् ङचेएनो नासरतकी येसुइ बीरोद् लथोब बी म्हेन्ब मुबल। 10 यरुसलेम्री ङचेएनो होले बीरोद् स्य्हेङ्ज्यी। ङचे ङ्हच्छ्यङ् लम्बुमा ग्यम्चे अधीकार् यङ्ज्यीम् येसुत बीस्वास् स्य्हेङ्बे य्हक्कोत जेल्री च्युप्ज्यी। ओसेम् ङचे थेङ्यीमात सेत्पे लक्रीएनो र्हो स्य्हेङ्ज्यी। 11 ङचे य्हक्को खेप् थेङ्यीमात यहुदीमा र्हुब् तबे जम्मनो दीम्मारी बोरज्यीम् येसुत बीस्वास् अलखइ बी सजाय पीन्पुङ्ज्यी। ङ थेङ्यीमातेङ् य्हक्को बुमो रप्पल तज्यीम् ल्हो-ल्हो य्हुल्की सहर्मारीएनो ङ्यीज्यीम् ङचे थेङ्यीमात दुख पीन्ज्यी। पर्मेस्वर्चे पावलकी जीवन्री स्य्हेङ्जेत्पे लक् ( प्रेरीत् ९:१-१९ ; २२:६-१६ ) 12 “तीरेत् ङचे ङ्हच्छ्यङ् लम्बुमा ग्यम्से अधीकारतेङ् चुङ्म्यङ्बे स्योस्यो यङ्ज्यीम् दमस्कस सहररी ङ्यीटीब मुबल। 13 ग्यल्बो अग्रीपास्, हुजु दीन् दीन्गुङ्री ङ ग्यम्री य्हर्टीमम् स्वर्ग ग्यम्चे दीनीइ य्हल् बीमाएनो य्हक्को सर्बे य्हल् ङतेङ् ङइ र्होमाकी कोरोरो सर्ज्यी। 14 ङ्यीमा जम्मनो सरी गुर्बे बेलोरीनो हीब्रु ग्योत्री ङचे चोले पङ्बे केत् थ्येःज्यी, ‘साउल, साउल एचे ङत तले नर्पल? ग्लब्चे र्हङ्की न्याबोइ बेर्करी लेक्पचे प्रुङ्ब र्हङ्ले एचे ङत नर्ज्यीम् र्हङ्चे र्हङ्तनो दुख पीन्टीब मुब।’ 15 ओसेम् ङचे ‘प्रभु, थेङ् खल य्हीन्ब?’ बी ङ्योत्ज्यी। थेङ्चे सुङ्ज्यी, ‘ङ एचे नर्टीबे येसु य्हीन्ब। 16 देरे रेःज्यीम् एइ कङ्री रपो, तलेपङ्सम् एचे म्रङ्बे ङइ लक्तेङ् ङचे एत ङोन्स्येकी लक्मा स्येत्पे योक्पो तबे लागीरी एत दम्बरी ङ एज म्रङ्खबल य्हीन्ब। 17 ङ एत यहुदीमातेङ् यहुदी अय्हीन्बे म्हीमा ग्यम्चे थर्न लस्ये मुब। ङ एत थेङ्यीमाज, 18 थेङ्यीमाकी मी म्रङ्न लपीन्बरी पीत्प। होत्तज्यीम् थेङ्यीमा म्हुन्दुङ्ग्यम्से य्हल्री, सैतान्की सक्ती ग्यम्चे पर्मेस्वर्पट्टी दोखइ। ओसेम् थेङ्यीमाकी पापमा क्षमा तस्ये मुब, ओसेम् ङत बीस्वास् स्य्हेङ्बल तज्यीम् पर्मेस्वर्चे दम्जेत्पलमाकी गुङ्री थेङ्यीमाचेएनो ग्ला यङ्स्ये मुब।’ 19 “होत्तज्यीम् ग्यल्बो अग्रीपास्, स्वर्ग ग्यम्चे म्रङ्बे हुचु दर्सन्त ङचे अङ्येन्नले टीअखम्। 20 तर ङोन्ग्यम् दमस्कस्तेङ् यरुसलेम्री ओसेम् जम्मनो यहुदीया य्हुल्तेङ् यहुदी अय्हीन्बे म्हीमाजाएनो ङ्यीज्यीम् पस्चताप स्य्हेङ्ज्यीम् पर्मेस्वर्ज दोःगो बी प्रचार स्य्हेङ्ज्यी। ओसेम् पर्मेस्वर्पट्टी दोःबल मुब पङ्बे तम् र्हङ्की लक् ग्यम्चे ङोन्थोब बी लोप्ज्यी। 21 होत्तज्यीम् यहुदीमाचे ङत पर्मेस्वर्की दीम्री चुङ्ज्यीम् सेत्प म्हइज्यी। 22 तर तीङ्यीसम्म ङचे पर्मेस्वर्की र्हो यङ्बल मुब। होत्तज्यीम् ङ चुरी ज्यीत ङ्हच्छ्यङ् जम्मकी ङोन्री ङचे म्रङ्बे तम्मा स्येत्ज्यीम् रप्टीबल मुब। अगम्बक्तमातेङ् मोसाचे लीक्क्यम् टोप तस्ये मुब पङ्बे तम् बीम ल्हो-ल्हो ङचे तएनो पङ्बल अरे। 23 थेङ्यीमाचे मुक्ती न्हङ्बे ख्रीस्ट्चे दुख नाज्यीम् स्यीस्ये मुब, थेङ् स्यीबलमा न्हङ्री गोदोब्न्हङ् ङोन्ग्यम् सोबल तस्ये मुब। ओसेम् थेङ्चे पर्मेस्वर्की य्हल् यहुदीमातेङ् यहुदी अय्हीन्बे म्हीमाकी गुङ्री ङोन्स्ये मुब बी अगम्बक्तमाचे पङ्ज्यीन्बल मुबल।” 24 पावलचे पङ्बे चु तम् थ्येःज्यीम् फेस्तसचे क्रीङ्ज्यीम् पङ्ज्यी, “पावल ए म्योनेम्, य्हक्को खेत्पल तज्यीम् ए म्योनेम्।” 25 तर पावलचे पङ्ज्यी, “माननीया फेस्तस्, ङ म्योबल अरे, ङचे देम्मेन्की तम्तेङ् तबे तम् पङ्टीब मुब। 26 ग्यल्बो अग्रीपास्चे चु तम्म जम्मनो खेम्बल मुब, चु तम्मा ङ थेङ्त अलोङ्नले पङ्ब खम्ब। चु तम्मा ग्यल्बो अग्रीपास् ग्यम्चे छुम्बल अरे तलेपङ्सम् चु तम्म अम्रङ्बे गु:री तबे तम् अय्हीन्। 27 ग्यल्बो अग्रीपास्, थेङ्चे अगम्बक्तमात बीस्वास् अस्य्हेङ्जेतो स्यीम्? ङत था मुब थेङ्चे स्य्हेङ्जेत्प।” 28 ओसेम् अग्रीपास्चे पावलत पङ्ज्यी, “चोदे जाकी बेलोरी एचे ङत ख्रीस्टीयन् स्य्हेङ्ब बी म्हेन्ब?” 29 ओसेम् पावलचे पङ्ज्यी, “चेक् बेलोरी तखइ की य्हक्को बेलोरी तखइ, ङइ यारी खीःबे चु च्यल्दमा बीम एकीनो अय्हीन्, तर ङइ तम् ङ्येन्टीबलमा जम्मनो ङ र्हङ्ब तखइ बी ङ पर्मेस्वर्तेङ् प्रार्थना स्य्हेङ्ब।” 30 हुजु लीप्चे ग्यल्बो अग्रीपासतेङ् हाकीम् ओसेम् बरनीकीतेङ् हुजुरी टीबल जम्मनो फत्फोत् रेःज्यी। 31 ओसेम् थेङ्यीमा दोरी ङ्यीज्यीम् र्हङ्न्हङ् चोले तम् लज्यी, “चु म्हीचे जेल्री च्युप्थोबलतेङ् स्यीथोबे सजाय यङ्बे लक् तएनो स्य्हेङ्बल अरे।” 32 हुजु लीप्चे अग्रीपास्चे फेस्तस्त पङ्ज्यी, “चु म्हीचे रोमी कैसरतेङ् फ्या अलबल य्हीन्सम् पीत्लालेनो तस्ये मुबल।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.