प्रेरीत् 25 - पश्चिम तामाङपावलचे रोमी ग्यल्बोत फ्या लबल 1 फेस्तस् र्हङ्की प्रदेस्री खज्यीम् सोम्रेत् तब बीसेम् थे कैसरीया ग्यम्चे यरुसलेम्री ङ्यीज्यी। 2 हुजुरी थेत ङ्हच्छ्यङ् लम्बुमातेङ् यहुदी अगुवामाचे पावलकी बीरोदरी थेङ्यीमाकी तम् स्येत्ज्यी। 3 थेङ्यीमाचे पावलत यरुसलेम्री पीत्लाखोउ पङ्ज्यीम् फेस्तस्त फ्या लज्यी। तलेपङ्सम् थेङ्यीमाचे पावलत ग्यम्री खटीबे बेलोरीनो सेत्पे तम डीःटीब मुबल। 4 तर फेस्तसचे थेङ्यीमात पङ्ज्यी, “पावलत कैसरीयरी जेल्री च्युप्ज्यीम् थेन्बल मुब, ओसेम् ङएनो हुजुरी ग्योन्नो ङ्यीटीब मुब। 5 एङ्यीमान्हङ्री खल पङ्लेनो अगुवामात ङतेङ् बक्च्य ङ्यीपुङो। पावलचे अतबे लक् स्य्हेङ्सम् थेङ्यीमाचे हुजुरीनो उजुरी युब खम्ब।” 6 ब्रेत्रेत् च्यीरेत् गदे यरुसलेम्री टीब बीसेम् फेस्तस् कैसरीयरी दोय्हर्ज्यी। न्हम्स्य्होर्हङ् थे न्याय स्य्हेङ्बे ग्लारी टीज्यीम् पावलत हुजुरी बोउ बी कुल्ज्यी। 7 ओसेम् पावलत म्रङ्ब बीसेम् यरुसलेम् ग्यम्से खबे यहुदी अगुवामाचे पावलकी कोरोरो रप्ज्यीम् थोचे थोइ दोस् ल्हइदीज्यी। तर थेङ्यीमाचे खजु दोस्लएनो दस्यी पीन्ब अखम्। 8 हुजु लीप्चे पावलचे पङ्ज्यी, “ङचे यहुदीमाइ धर्मइ छ्येःतेङ् पर्मेस्वर्की दीम्की बीरोद्री ओसेम् रोमी सरकारकी बीरोद्री तएनो अतबे लक् स्य्हेङ्बल अरे।” 9 यहुदीमात तङ्न लबे सेम् लज्यीम् फेस्तसचे पावलत पङ्ज्यी, “ता ए यरुसलेम्री ङ्यीज्यीम् हुजुरी ङइ ङोन्री चु तम्माकी न्याय स्य्हेङ्सम् म्हेन्ब?” 10 पावलचे पङ्ज्यी, “ङ कैसर्की न्याय स्य्हेङ्बे ग्लाकी ङोन्ग्यम् रप्टीबल मुब, चुरी ङइ न्याय तथोब। थेङ्चेनो खेम्बल मुब, ङचे यहुदीमाकी बीरोद्री अतबे लक् तएनो स्य्हेङबल अरे। 11 ङचे स्यीथोबे डन्ड यङ्बे लक् स्य्हेङ्बल मुज्यी पङ्सम् ङ स्यीबरीएनो तयार मुब। तर यहुदीमाचे ल्हइतीबे खजु दोस्एनो देम्मेन् अय्हीन्ज्यी पङ्सम् ङत थेङ्यीमाकी यारी सोप्तीब खल्चेएनो अखम्। ङ ग्यल्बो कैसरत फ्या लब।” 12 हुजु लीप्चे फेस्तसचे थेइ र्होमातेङ् तम् डीःज्यीम् पावलत पङ्ज्यी, “एचे ग्यल्बो कैसरत फ्या लज्यी, ए ग्यल्बो कैसरजनो य्हरो।” फेस्तसचे ग्यल्बो अग्रीपासतेङ् तम् डीःबल 13 तोव दीन् लीप्चे फेस्तास्त स्वागत् लबरी ग्यल्बो अग्रीपासतेङ् थेइ अङ बरनीकी कैसरीयारी ङ्यीज्यी। 14 हुजुरी थेङ्यीमा य्हक्को दीन् टीब बीसेम् फेस्तस्चे थेङ्यीमात पावलकी तम् चोले स्येत्ज्यी, “फेलीकस्चे जेल्री च्युप्पे म्ही गी चुरी मुब। 15 ङ यरुसलेमरी ङ्यीबे बेलोरी यहुदीमाकी ङ्हच्छ्यङ् लम्बुमातेङ् अगुवामाचे थेइ बीरोद् लज्यीम् दोस् ल्हइदीज्यीम् थेत सजाय पीन्थोब बी पङ्बल मुबल। 16 ङचे थेङ्यीमात पङ्ज्यी, ‘दोसी म्हीचे दोस् ल्हइतीबे म्हीतेङ् खतु तज्यीम् थेत ल्हइतीबे दोस्की बारेरी तम् अपङ्ननो सजाय पीन्बे पे रोमी सरकारल अरे।’ 17 ओसेम् थेङ्यीमा र्हुब लज्यीम् चुरी खब बीसेम् ङचे अगेनले न्हम्स्य्हो र्हङ्नो पावलत न्याय स्य्हेङ्बे दीम्री बोउ बी कुल्ज्यी। 18 पावलत दोस् ल्हइतीबलमा रेज्यीम् ङचे सेम्री म्हेन्बल र्हङ्बे अज्यबे लक्की दोस् तेएनो ल्हइतीब अखम्। 19 थेङ्यीमा पावलतेङ् अथुन्बलम् थेङ्यीमाकी धर्मतेङ् स्यीज्यीन्बे येसु पङ्बे म्हीइ बारेरीकीनो टीम्। पावलचेमी स्यीबे येसु सोबल मुब बी पङ्ब टीम्। 20 चु तम्की बारेरी ङचे ङ्योत्प थी:प लअखम्। होत्तज्यीम् ङ्चे पावलत चु तम्की न्यायकी लागीरी एत यरुसलेम्री ङ्यीबे सेम् मुब बी ङ्योत्ज्यी। 21 तर पावलचे सम्राट ग्यम्से न्याय यङो बी फ्या लज्यी। ओसेम् ङचे थेत सम्राटज अपीत्गदे सम्म चुरीनो ज्यनले रुङ्ज्यीम् थेनो बी कुल्बल मुब।” 22 हुजु लीप्चे अग्रीपास्चे फेस्तस्त, “ङ र्हङ्चेनो थेइ तम् ङ्येन्गे म्हेन्ज्यी” पङ्ज्यी। ओसेम् फेस्तसचे, “न्हम्स्य्हो थेङ्चे ङ्येन्जेतो” बी पङ्ज्यी। पावल अग्रीपास्की ङोन्री 23 न्हम्स्य्होर्हङ् अग्रीपासतेङ् बरनीकी ङ्हच्छ्यङ् स्य्हेस यङ्ज्यीम् न गङ्ले खज्यी, ओसेम् सेनपतीमातेङ् सहरकी ङ्हच्छ्यङ् म्हीमातेङ् बक्च्य सभा दीम्री वङ्ज्यी। ओसेम् फेस्तसचे पावलत सभारी बोउ बी कुल्ब बीसेम् बज्यी। 24 हुजु लीप्चे फेस्तसचे पङ्ज्यी, “ग्यल्बो अग्रीपासतेङ् चुरी र्हुब तबे जम्मनो स्येब खेबेमा, यहुदीमा जम्मचेनो चु म्ही स्यीथोब पङ्ज्यीम् यरुसलेम्री ओसेम् चुरीएनो क्रीङ्बल मुब। 25 तर ङचे चु म्हीचे स्यीथोबे सजाय यङ्बे लक् तएनो स्य्हेङ्बल अय्हङ्। ओसेम् थेचेएनो रोमी सम्राटत फ्या लम्यङो पङ्बल तज्यीम् ङ थेत रोम्री पीत्परी तयार तज्यी। 26 तर ङचे थेत दोस् ल्हइतीबे बारेरी सम्राटत तेएनो ब्रीब अखम्। होत्तज्यीम् ङचे थेत थेङ्माकी ङोन्ग्यम् बीसेस लज्यीम्, थेङ् ग्यल्बो अग्रीपास्की ङोन्ग्यम् बबे सेम् लबल य्हीन्ब। थेङ्माचे चु म्हीइ बारेरी ङ्योत्प थी:ब लब बीसेम् ङचे ब्रीबरी तम् यङ्स्ये मुब बी म्हेन्बल मुब। 27 तलेपङ्सम् दोस् ता य्हीन्ब बी अङोन्नले थेत पीत्प ङत ज्यब अम्हेन्।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.