प्रेरीत् 24 - पश्चिम तामाङपावलत ङ्हच्छ्यङ् हाकीम् फेलीक्स्की ङोन्री बबल 1 ओसेम् ङ्हरेत् लीप्चे जम्मा न्हङ्की ङ्हच्छ्यङ् लम्बु हननीयातेङ् डेत् धर्म-लोप्पोन्मा तर्तुल्लस् पङ्बे वकीलत बज्यीम् कैसरीयारी खज्यी। थेङ्यीमाचे पावलकी बीरुद्दरी सरकारकी ङोन्री मुद्द युज्यी। 2 पावलत हुजुरी बब बीसेम् तर्तुल्लस्चे चोले पङ्ज्यीम् बीरोद् स्य्हेङ्ब तीप्ज्यी- “माननीया फेलीक्स्, थेङ्चे ङ्यीमात य्हक्को बेलो य्हङ्सेनो सान्ती न्हङ्जेत्पल मुब, ओसेम् ङ्यीमाकी लागीरी क्योन्थोःबलमाएनो थेङ् ग्यम्से तटीबल मुब। 3 चु तम्त ङ्यीमा खेम पङ्लेनो खन बीबीनो व्होर्छ्ये पीन्ज्यीम् म्हन्दीब। 4 तर ङ थेङ्की बेलो य्हक्को अकीन्, ङ फ्या लब, थेङ्चे दय लज्यीम् ङइ तम् य्हम्बकी ङ्येन्जेतो। 5 ङ्यीमाचे स्येःबे चु म्हीचे खन बीबीनो दुख पीन्ज्यीम् जम्बुलीङ्की जम्मा यहुदीमाकी गुङ्री खइलबइल स्य्हेङ्बल यङ्ज्यी। ओसेम् थेत नासरी पङ्बे समुहकी गुन्ड नाइके रुप्री यङ्बल मुब। 6 ओसेम् थेचे पर्मेस्वर्की दीम्त असुद्द स्य्हेङ्बएनो म्हइब मुबल। होत्तज्यीम् ङ्यीमाचे थेत चुङ्ज्यी। 7 [तर सेनपती लुसीयस खज्यीम् स्यीपाइकी बङ्की तोर्चे थेत ङ्यीमाकी या ग्यम्से बेन्ज्यीम् बोर्ज्यी। ओसेम् चु म्हीइ बीरुद्दरी मुद्द युबे ङ्यीमात थेङ्ज ङ्यीउ पङ्ज्यीम् कुल्जेत्ज्यी।] 8 देरेम् थेङ्चेनो चु म्हीत ङ्योत्जेत्ज्यी पङ्सम् ङ्यीमाचे थेत युबे मुद्दइ तम्मा थे ग्यम्सेनो खेम्स्ये मुब।” 9 ओसेम् ल्हो-ल्हो यहुदीमाचेएनो हुजु तम् देमेन् य्हीन्ब बी पङ्ज्यी। ङ्य्हच्छ्यङ् हाकीम फेलीक्स्की ङोन्री पावलचे तम् स्येत्पल 10 पावलत ङ्य्हच्छ्यङ् हाकीम्चे तम् पङो पङ्ज्यीम् ल्हादब् लब बीसेम् पावलचे चोले पङ्ज्यी, “ङत था मुब, थेङ् य्हक्को बर्स य्हङ्सेनो चु य्हुल्की न्याय स्य्हेङ्टीबे म्ही य्हीन्ब, होत्तज्यीम् ङ थर्बे लागीरी थेङ्की ङोन्री तम् पङ्बरी तङ्बल मुब। 11 ङ यरुसलेमरी पर्मेस्वर्त तेन्बरी ङ्यीबल दीन् चुङ् ङ्ही बीम य्हक्को तबल अरे, चु तम् थेङ्चे ग्योनेनो खेम्ब खम्ब। 12 ङत पर्मेस्वर्की दीम्री खल्तेङ्एनो बोमोले अतबे तम् पङ्ज्यीम् टीबल खजु यहुदीचेएनो म्रङ्बल अरे, न्ह थेङ्यीमाचे ङत पर्मेस्वर्की दीम्तेङ् यहुदीमा र्हुब् तबे दीम्मारी ओसेम् सहर्री म्हीमात खइलबइल तनलबल म्रङ्बल मुब। 13 न्ह थेङ्यीमाचे ङत देरे ल्हइतीबे दोस्की प्रमान् पीन्ब खम्ब। 14 ङ चु तम्मी पङ्ब, ङ ङ्य्हङ्की म्हेमेमाचे तेन्बे पर्मेस्वर्की ग्यम्री ब्रब, थेङ्यीमाचेमी चुत भ्युकी ग्यम् पङ्ब। तर ङ अगम्बक्तमाचे ब्रीबे धर्म-छ्येतेङ् मोसाचे ब्रीज्यीम् पीन्बे पर्मेस्वर्की नीयम्री मुबे जम्मनो तम्मात बीस्वास् स्य्हेङ्ब। 15 ओसेम् धर्मीतेङ् अधर्मीमा ङ्हीनो पुनरुत्थान तब पङ्ज्यीम् थेङ्यीमाचे बीस्वास् स्य्हेङ्ब र्हङ्ले ङलएनो पर्मेस्वर्री आस् मुब। 16 होत्तज्यीम् ङ म्हीमातेङ् पर्मेस्वर्की ङोन्री खेम पङ्लेनो सेम् न्हङ्सेनो ज्यबकीनो म्हेन्ब म्हइब। 17 “य्हक्को बर्स लीप्चे ङ यरुसलेमरी ङइ म्हीमात टङ पीन्बरी ओसेम् पर्मेस्वर्त भेटी पीन्बरी खबल मुबल। 18 ओसेम् चु लक् स्य्हेङ्टीबे बेलोरी थेङ्यीमाचे ङत पर्मेस्वर्की दीम्री दोज्यी। होदे बेलोरी ङ्चे सुद्द तबे पेठीम् पुरा स्य्हेङ्ज्यीन्बल मुबल, हुजुरी य्हक्को म्हीमाएनो अरेबल, ओसेम् तइ खइलबइलएनो अरेबल। 19 तर हुजुरी एसीयाकी डेत्-डेत् यहुदीमा मुबल, थेङ्यीमाचेम् ङइ बीरुद्दरी तइ तमे मुज्यी पङ्सम् चुरी थेङ्की ङोन्री खज्यीम् मुद्द युब खम्स्ये मुबल। 20 अय्हीन् पङ्सम् ङ ङ्हच्छ्यङ् सभाकी ङोन्री रप्पे बेलोरी ङल खतेबे दोस् यङ्ज्यी चुरी मुबे म्हीमाचेनो पङ्खइ। 21 ङचे थेङ्यीमाकी गुङ्री क्रीङ्ज्यीम्, ‘स्यीबलमा पुनरुत्थान तब पङ्बे बारेरी तीङ्यी थेङ्माकी ङोन्री ङल मुद्द तटीब मुब’” पङ्बे तम्रीकीनो थेङ्यीमाचे ङत दोस् पीन्ब खम्ल। 22 फेलीक्स्त चु ग्यम्की बारेरी ज्यनले था मुबल तज्यीम् थेचे चु तम् ङ्येन्ब बीसेम्, “सेनपती लुसीयस ब्योन्खबतेङ् ङ एङ्यीमाकी मुद्द टङ्पीन्ल” बी पङ्ज्यीम् थेङ्यीमात पीत्ज्यी। 23 ओसेम् फेलीकस्चे कप्तान्त “पावलत रुङ्बरी स्यीपाइमा थेनो, तर थेत तोःबे स्य्हेमा पीन्बे र्होमात थर्होदो। ओसेम् य्हक्को कडा थस्य्हेङो” पङ्ज्यीम् कुल्ज्यी। फेलीक्सतेङ् द्रुसील्लाकी ङोन्री पावल 24 तोव दीन् लीप्चे फेलीक्स् थेइ यहुदी म्रीङ् द्रुसील्लत बक्च्य बज्यीम् खज्यी। ओसेम् पावलत ङ्होत्ज्यीम् येसु ख्रीस्ट्त बीस्वास् स्य्हेङ्बे बारेरी पावल ग्यम्से ङ्येन्ज्यी। 25 तर पावलचे थेत धार्मीक्ताकी बारेरी, र्हङ्चे र्हङ्तनो दुल्थोःबे बारेरी, ओसेम् पर्मेस्वर्चे न्याय स्य्हेङ्जेत्स्येकी दीन् खटीब पङ्ज्यीम् स्येत्मम् फेलीक्स् लोङ्ज्यी। ओसेम् थेचे पावलत पङ्ज्यी, “तीङ्यीइ लागीरी यो:ज्यी, देरेम् ए ङ्यीउ, ल्होङ्गोम् यङ्बतेङ् देबेएनो ङ एत ङ्होत्ल।” 26 ओसेम् पावलचे टङ पीन्मुवा बी फेलीकस्चे आस् लबल मुबल। होत्तज्यीम् थेचे पावलत य्हम्चे य्हम्रीनो ङ्होत्ज्यीम् तम् लब मुबल। 27 तर ङ्हीत्तीङ् लीप्चे फेलीक्स्की ग्लारी पर्कीअस फेस्तस् खज्यी। ओसेम् फेलीकस्चे यहुदीमात तङ्नलबे लागीरी पावलत जेल्रीनो थेन्ज्यीम् य्हर्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.