प्रेरीत् 23 - पश्चिम तामाङ1 ओसेम् पावलचे ङ्हच्छ्यङ् सभाकी कोरोरो च्याज्यीम् पङ्ज्यी, “अज्यो-अलेमा, तीङ्यीइ दीन्सम्म ङचे पर्मेस्वर्की ङोन्री सेम् न्हङ्सेनो ज्यबकीनो म्हेन्ज्यीम् ब्रबल मुब।” 2 पावलचे चोले पङ्बल थ्येःज्यीम् जम्मा न्हङ्की ङ्हच्छ्यङ् लम्बु हननीयाचे पावलकी रेइरी रप्टीबे म्हीमात थेइ सुङ्री ग्यङो पङ्ज्यीम् कुल्ज्यी। 3 तर पावलचे हननीयात पङ्ज्यी, “ओ तर् सेप्र स्य्हल्बे ङ्हर! एतएनो पर्मेस्वर्चे ग्यङ्जेत्स्ये मुब। ए मोसाचे ब्रीबे नीयम् अनुसार ङत न्याय स्य्हेङ्बरी टीज्यीमएनो मोसाचे ब्रीबे नीयम्त ख्लाज्यीम् ङत ग्यङो पङ्ज्यीम् तले कुल्ब?” 4 ओसेम् पावलकी रेइरी रप्टीबलमाचे पङ्ज्यी, “एचे तले पर्मेस्वर्चे दम्जेत्पे जम्म न्हङ्की ङ्हच्छ्यङ् लम्बुतएनो स्हेस अस्य्हेङ्बल?” 5 पावलचे पङ्ज्यी, “अज्यो-अलेमा थेङ् जम्म न्हङ्की ङ्हच्छ्यङ् लम्बु य्हीन्ब बी ङत था अरेबल। ओसेम् धर्मइ छ्येःरी, ‘एचे र्हङ्की म्हीमाकी सासक्त अज्यब थपङो’” बी ब्रीबल मुब। 6 तर पावलचे हुजु ङ्हच्छ्यङ् सभारी फरीसीतेङ् सदुकी म्हीमा टीबल मुब पङ्बे तम् स्येःज्यीम् केत् ङ्हच्छ्यङ् तेत्ज्यीम् पङ्ज्यी, “अज्यो-अलेमा, ङ फरीसीमाकी ज फरीसीनो य्हीन्ब। ङचे स्यीबलमा पुनरुत्थान तब पङ्बे तम्त आस् थेन्बल तज्यीम् चुरी ङल मुद्द तटीब।” 7 पावलचे चोले पङ्ब बीसेम् सदुकीतेङ् फरीसीमाकी गुङ्री तम् अडीःज्यीम् सभाकी म्हीमा थीज्यी। 8 तलेपङ्सम् सदुकीमाचे म्ही स्यीज्यीम् लीक्यम् पुनरुत्थान तब पङ्बे तम्री बीस्वास् अस्य्हेङ्ब मुबल। ओसेम् स्वर्गदुत्तेङ् आत्मा तएनो अत पङ्ब मुबल। तर फरीसीमाचेम् चु जम्मनो तम्री बीस्वास् स्य्हेङ्ब मुबल। 9 होत्तज्यीम् ङ्हच्छ्यङ् सभारी य्हक्को नर्सु तज्यी। फरीसीमाकी डेत्-डेत् धर्म-लोप्पोन्माचे रप्ज्यीम् सदुकीमाकी बीरोद्री चोले पङ्ज्यी, “ङ्यीमाचे चु म्हील तइ दोस्एनो अय्हङ्। आत्मातेङ् स्वर्गदुतचे चु म्हीतेङ् तम् पङ्बल य्हीन्ब खम्ब।” 10 हुजुरी थेङ्यीमाकी तम् अडीःज्यीम् य्हक्को बङ्बल तज्यीम् पावलत तोर् छेङ् मोर् छेङ् लज्यीम् सेत्ल बी सेनपती लोङ्ज्यी। ओसेम् सेनपतीचे दुङ्री ङ्यीज्यीम् पावलत थेङ्यीमाकी गुङ्से बङ्सेनो तेत्ज्यीम् ब्यारेक्री बोउ बी स्यीपाइमात कुल्ज्यी। 11 हुजु म्हुननो प्रभुचे पावलकी रेइरी रप्जेत्ज्यीम् सुङ्ज्यी, “आर् लउ, तलेपङ्सम् एचे खले यरुसलेमरी ङइ बारेरी स्येत्ज्यी होलेनो एचे रोमरीएनो स्येत्थोःब।” पावलत सेत्परी तम् डीःबल 12 न्हम्स्य्होर्हङ् स्य्होरी यहुदीमा र्हुब् तज्यीम् पावलत सेत्परी तम् डीःज्यी। ओसेम् थेङ्यीमाचे चोले पङ्ज्यीम् सपथ चज्यी, “पावलत असेत्गदे ङ्य्हङ्माचे तएनो चस्ये अरे ओसेम् यीकीएनो थुङ्स्ये अरे।” 13 चोले सेत्परी तम् डीःज्यीम् सपथ चबे म्हीमा खल् ङ्य्ही बीमएनो य्हक्को मुबल। 14 ओसेम् थेङ्यीमा ङ्हच्छ्यङ् लम्बुमातेङ् अगुवामाज ङ्यीज्यीम् पङ्ज्यी, “ङ्यीमाचे पावलत असेत्गदे सम्म तएनो अच पङ्ज्यीम् सपथ चबल मुब। 15 होत्तज्यीम् थेङ्मातेङ् ङ्हच्छ्यङ् सभा डीःज्यीम् सेनपतीत ‘ङ्यीमाचे पावलकी मुद्दइ बारेरी दबम् ज्यनले च्याथोस्ये मुब’ बी भ्यु पङ्ज्यीम् थेत ब्यरेक्चे तेत्जेतो। ओसेम् थे ङ्हच्छ्यङ् सभारी दोखब बीम ङोन्ग्यम्नो सेत्परी ङ्यीमा टोप्ले टीस्ये मुब।” 16 तर पावलकी अङइ जचे चु तम् था यङ्ज्यीम् ब्यारेक् न्हङ् ङ्यीज्यीम् पावलत स्येत्पीन्ज्यी। 17 ओसेम् पावलचे कप्तान गीःत ङ्होत्ज्यीम् पङ्ज्यी, “चु ठीटत सेनपतीज सपीन्जेतो, तलेपङ्सम् चु ठीटल थेङ्तेङ् तम् पङ्थोस्ये मुब।” 18 होत्तज्यीम् कप्तान्चे पावलकी कोन्त सेनपतीज बोर्ज्यीम् पङ्ज्यी, “जेल्री च्युप्पे पावलचे ङत ङ्होत्ज्यीम् चु ठीटत थेङ्ज बोरो पङ्बल तज्यीम् चुत थेङ्ज बबल मुब। तलेपङ्सम् चु ठीटल थेङ्तेङ् पङ्थोस्येकी तम् मुब रो।” 19 सेनपतीचे हुजु ठीटइ या चुङज्यीम् तोव क्योर् बोर्ज्यीम् ङ्योत्ज्यी, “एचे ङत पङ्थोस्येकी तम् ता य्हीन्ब?” 20 हुजु ठीटचे पङ्ज्यी, “यहुदीमाचे पावलकी बारेरी दबम् ज्यनले ङ्योत्थोःबे तम् मुब बी भ्यु पङ्ज्यीम् पावलत ङ्हच्छ्यङ् सभारी बबीनो बी थेङ्ज पङ्बरी खस्येल मुब। 21 तर थेङ्चे थेङ्यीमाकी तम् थसेन्जेतो। तलेपङ्सम् खल् ङ्य्ही बीमएनो य्हक्को म्हीमाचे पावलत असेत् गदे तएनो अच पङ्ज्यीम् सपथ चज्यीम् पावलत सेत्परी ज्यब्ज्यीम् टीबल मुब। देरेम् थेङ्यीमा थेङ्की तम्त ब्रेन्टीब मुब।” 22 चु तम् थ्येःब बीसेम् सेनपतीचे ठीटत चोले कुल्ज्यीम् पीत्ज्यी, “ङत चु तम् एचे स्येत्पल य्हीन्ब बी खलतएनो थपङो।” स्यीपाइमाचे पावलत कैसरीया सहर्री पीत्पल 23 हुजु लीप्चे सेनपतीचे कप्तान्मा न्हङ्री ङ्हीत ङ्होत्ज्यीम् पङ्ज्यी, “कैसरीया ङ्यीबरी दुइ सय स्यीपाइमा, खल् सोम् स्यी च्यी त क्रेत्पलमा ओसेम् दुइ सय बर्च थोबे स्यीपाइमा टोप् लउ। थेङ्यीमा तीङ्यी म्हुननो नौ बजे ब्रबरी टोप्ले थेनो। 24 ओसेम् पावल क्रेत्पे लागीरीएनो तमाएनो टोप् लउ। ओसेम् थेत ज्यनले हाकीम् फेलीक्सज सथेन्ङ्यीउ।” 25 हुजु लीप्चे सेनपतीचे चोले चीठी ब्रीज्यी- 26 “माननीया हाकीम् फेलीक्स्, ङ क्लौडीयास लुसीयस ग्यम्से लस्सो! 27 चु म्हीत यहुदीमाचे सेत्परी चुङ्नेम्। तर ङचे ङइ स्यीपाइमा बोर्ज्यीम् थेत थेङ्यीमा ग्यम्से तेत्ज्यीम् बज्यी। तलेपङ्सम् थे रोमी म्ही टीम् पङ्बे तम् ङचे थ्येःबल मुबल। 28 ओसेम् ङचे थेत म्हीमाचे तइ तम्री दोस् ल्हइतीबल टीम् बी ङ्योत्प थी:ब लबरी यहुदीमाकी ङ्हच्छ्यङ् सभारीएनो बज्यी। 29 ङचे थेत थेङ्यीमाकी यहुदीमाकी नीयम्की बारेरी दोस् ल्हइतीबल यङ्ज्यी। तर थेचे सेत्नो थोबे सजायतेङ् जेल्री युथोबे सजाय यङ्थोबे दोस् ङचे तएनो अयङ्। 30 यहुदीमाचे चु म्हीत सेत्प म्हइटीब पङ्बे तम् ङचे थ्येःबल तज्यीम् थेत ङचे थेङ्ज पीत्खटीब मुब। थेत दोस् ल्हइतीबे यहुदीमातएनो थेङ्जनो उजुरी युङ्यीउ पङ्ज्यीम् कुल्बल मुब।” 31 होत्तज्यीम् कप्तान्तेङ् स्यीपाइमाचे सेनपतीचे कुल्ब र्हङ्लेनो पावलत बोर्ज्यीम् हुजु म्हुनरीनो एन्टीपाट्रीस सहर्सम्म सथेन्ङ्यीज्यी। 32 न्हम्स्य्होर्हङ् त क्रेत्पे म्हीमात पावलतेङ् ङ्यीबरी पीत्थेन्ज्यीम् स्यीपाइमाम् दोःखज्यी। 33 ओसेम् त क्रेत्पे स्यीपाइमा कैसरीयारी दोःब बीसेम् थेङ्यीमाचे सेनपतीचे पीत्खबे चीठीतेङ् पावलत ङ्हच्छ्यङ् हाकीम्की यारी सोप्तीपीन्ज्यी। 34 हुजु चीठी खेत्प बीसेम् ङ्हच्छ्यङ् हाकीम्चे पावलत, “ए खजु प्रदेस्ल?” बी ङ्योत्ज्यी। पावलचे, “कीलीकीया प्रदेस्ल” बी पङ्ज्यी। 35 ओसेम् हाकीम्चे “एत मुद्द युबे म्हीमा चुरी दोखबतेङ् एइ तम् ङ्येन्ल” बी पङ्ज्यी। हुजु लीप्चे ङ्हच्छ्यङ् हाकीम्चे पावलत हेरोदचे स्य्हेङ्बे दर्बार्की जेल्न्हङ् ज्यनले थेनो पङ्ज्यीम् कुल्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.