प्रेरीत् 21 - पश्चिम तामाङपावल यरुसलेमरी ङ्यीबरी डोङ्बल 1 थेङ्यीमातेङ् फेःज्यीम् ङ्यीमा दोङ्गरी क्रेत्ज्यीम् कोस पङ्बे टापुरी दोःज्यी। ओसेम् न्हम्स्य्होर्हङ् रोडस टापुरी दोःज्यी, ओसेम् हुजु ग्ला ग्यम्से पटारा पङ्बे ग्लारी दोःज्यी। 2 ओसेम् हुजुरी ङ्यीमाचे फोनीकेरी ङ्यीबे दोङ्ग गीः स्यप्ज्यीम् हुजु दोङ्गरी क्रेत्ज्यीम् य्हर्ज्यी। 3 ओसेम् ङ्यीमाचे साइप्रस टापु म्रङ्ब बीसेम् हुजु टापुइ ज्यङ् पट्टीचे तज्यीम् सीरीया प्रदेस्क्योर् य्हर्ज्यी। ओसेम् ङ्यीमा टुरोस्री दोङ्गचे फप्ज्यी। तलेपङ्सम् दोङ्गइ स्हेमा हुजुरी फप्थोब मुबल। 4 ओसेम् हुजु ग्लाकी डबमात खदु लबरी ङ्यीज्यीम् सत गीः थेङ्यीमातेङ् टीज्यी। ओसेम् पबीत्र आत्मा ग्यम्से अगुवाइ यङ्ज्यीम् थेङ्यीमाचे पावलत यरुसलेमरी थङ्यीउ पङ्ज्यी। 5 हुजुरी सत गीः टीब बीसेम् ङ्यीमा थेङ्यीमातेङ् फेःज्यीम् डोङ्ज्यी। ओसेम् डबमा, थेङ्यीमाकी म्रीङमातेङ् कोलमा जम्मनो ङ्यीमात सबरी सहर्की फीर्च्योर् समुन्द्रइ य सम्म ङ्यीज्यी। ओसेम् हुजुरी ङ्यीमा जम्मचेनो समुन्द्रइ यरी पुइ जुःज्यीम् प्रार्थना स्य्हेङ्ज्यी। 6 हुजु लीप्चे ङ्यीमा थेङ्यीमातेङ् फेःज्यीम् दोङ्गरी क्रेत्ज्यी। ओसेम् थेङ्यीमाम् र्हङ्की दीम्री दोःज्यीम् य्हर्ज्यी। 7 ओसेम् टुरोस ग्यम्से य्हर्ज्यीम् ङ्यीमा टोलेमाइस सहर्री दोःज्यी। ङ्यीमा हुजुरी प्रभुत बीस्वास् स्य्हेङ्बे अज्यो-अलेमात दोबरी ङ्यीज्यीम् तीरेत् थेङ्यीमातेङ् टीज्यी। 8 न्हम्स्य्होर्हङ् ङ्यीमा हुजु ग्लाचे डोङ्ज्यीम् कैसरीया सहर्री ङ्यीज्यीम् प्रचारकी लक् स्य्हेङ्बे फीलीपकी दीम्री टीज्यी। फीलीप यरुसलेमरी सेव स्य्हेङ्बरी दम्बे म्ही ङ्यीस् न्हङ्री गीः मुबल। 9 थेल भ्या अस्य्हेङ्बे जमेमा ब्ली मुबल। ओसेम् थेङ्यीमाचे अगम्बानी पङ्ब मुबल। 10 ङ्यीमा हुजुरी तोव दीन् सम्म टीमम् यहुदीया ग्यम्से अगाबस पङ्बे अगम्बक्त गीः खज्यी। 11 ओसेम् थेचे पावलकी केः कीन्ज्यीम् र्हङ्की यातेङ् कङ् खीःज्यीम् पङ्ज्यी, “पबीत्र आत्माचे चोले सुङ्ब, ‘चु केः इ न्याबोत यरुसलेमकी यहुदीमाचे चोलेनो खीःज्यीम् यहुदी अय्हीन्बे म्हीमाइ यारी सोप्तीपीन्स्ये मुब।’” 12 चु तम् थ्येःब बीसेम् ङ्यीमातेङ् हुजु ग्लाकी म्हीमा जम्मचेनो थेत यरुसलेमरी थेङ्यीउ पङ्ज्यीम् फ्या लज्यी। 13 तर पावलचे, “एङ्यीमा तले क्राज्यीम् ङइ सेम् टङ्नलब? तलेपङ्सम् जेल्री च्युप्परीकीनो अय्हीन्, तर ङ यरुसलेमरी प्रभु येसुइ लागीरी स्यीबरीएनो तयार मुब” बी पङ्ज्यी। 14 पावलचे अङ्येन्ब बीसेम् ङ्यीमाचे “प्रभुइ थुः टोप् तखइ” पङ्ज्यीम् कुटी टीज्यी। 15 हुजु लीप्चे ङ्यीमाएनो र्हङ्की स्हेमा जङ्ज्यीम् यरुसलेम्क्योर् ङ्यीज्यी। 16 ओसेम् कैसरीयासे डेत्-डेत् डबमाएनो ङ्यीमातेङ् बक्च्य ङ्यीज्यी। थेङ्यीमाचे ङ्यीमात साइप्रस टापु ग्यम्से खज्यीम् टीबे ङोन्ग्यम् य्हङ्सेइ डब मनासोन पङ्बे म्ही गीःकी दीम्री बोर्ज्यी। ओसेम् ङ्यीमा हुजुरी र्येःथोब मुबल। पावल यरुसलेमरी दोःबल 17 ओसेम् ङ्यीमा यरुसलेम दोःमम् हुजु ग्लाकी बीस्वासीमाचे ङ्यीमात तङ्ज्यीम् स्वागत स्य्हेङ्ज्यी। 18 न्हम्स्य्होर्हङ् पावलचे ङ्यीमात बोर्ज्यीम् याकुबज ङ्यीज्यी। याकुबकी दीम्री मन्डलीइ एल्डर्मा जम्मनो र्हुब् तबल मुबल। 19 पावलचे थेङ्यीमात लस्सो स्य्हेङ्ब बीसेम् थेचे यहुदी अय्हीन्बे म्हीमाकी गुङ्री सेवकाइ स्य्हेङ्बे बेलोरी पर्मेस्वर्चे स्य्हेङ्जेत्पे जम्म लक्माकी बारेरी थेङ्यीमात स्येत्ज्यी। 20 पावलचे चोले पङ्बल थेङ्यीमाचे थ्येःब बीसेम् पर्मेस्वर्त तोप्ज्यी। हुजु लीप्चे थेङ्यीमाचे पावलत, “एचे म्रङ्बलनो मुब, चुरीएनो हजार-हजार यहुदीमाचे येसुत बीस्वास् स्य्हेङ्बल मुब। ओसेम् थेङ्यीमाचे मोसाचे ब्रीबे नीयम्माएनो ज्यनले ङ्येन्ज्यीम् ब्रटीब मुब। 21 तर थेङ्चे यहुदी अय्हीन्बे म्हीमाकी गुङ्री टीबे यहुदीमात, ‘मोसाचे ब्रीबे नीयम्मा ङ्येन्अतो ओसेम् कोलमाल खतना स्य्हेङअतो ओसेम् यहुदी पे म्हन्दीअतो’ पङ्ज्यीम् लोप्प रो पङ्बे तम् यरुसलेमरी मुबे यहुदी बीस्वासीमाचे थ्येःबल मुब। 22 होत्तज्यीम् ङ्यीमाचे ता स्य्हेङ्स्ये? देरेम् थेङ् चुरी ब्योन्खबल मुब पङ्बे तम् थेङ्यीमाचे थ्येःस्ये मुब। 23 होत्तज्यीम् ङ्यीमाचे पङ्ब र्हङ्ले स्य्हेङ्जेतो। चुरी पर्मेस्वर्तेङ् भक स्य्हेङ्बे म्हीमा ब्ली ङ्यीमातेङ् मुब। 24 देरेम् थेङ् थेङ्यीमातेङ् बक्च्य पर्मेस्वर्की दीम्री स्येःज्यीम् सुद्द तजेतो। ओसेम् थेङ्यीमाकी क्र बा ब्रेःबे टङ फापीन्जेतो। हुजु लीप्चे थेङ्चे मोसाचे ब्रीबे नीयम्मा ङ्येन्बल म्रङ्ज्यीम् थेङ्त ल्हइतीबे दोस् भ्यु टीम् बी थेङ्यीमा जम्मचे स्येःस्ये मुब। 25 ओसेम् ङ्यीमाचे यहुदी अय्हीन्बे बीस्वासीमात ‘ख्लत पीन्बे चब, का, खार ङ्य्हेप्ज्यीम् सेत्पे जन्तुइ स्य थचउ ओसेम् ब्यभीचार् थस्य्हेङो’ पङ्ज्यीम् चीठी ब्रीज्यीम् पीत्ज्यीन्बल मुब।” 26 न्हम्स्य्होर्हङ् पावलचे हुजु म्ही ब्लीत बोर्ज्यीम् थेङ्यीमातेङ् बक्च्य र्हङतएनो सुद्द स्य्हेङ्ज्यी। ओसेम् सुद्द स्य्हेङ्बे दीन् खेम बुत्प पङ्बे तम्तेङ् थेङ्यीमाचे म्ही र्हङ्स्यीनो पीन्थोबे ठाकी तम् स्येत्परी पावल पर्मेस्वर्की दीम्न्हङ् वङ्ज्यी। पावलत पर्मेस्वर्की दीम्री चुङ्बल 27 भक स्य्हेङ्बे दीन् ङ्यीस् बेयम्बल मुबल। हुजु बेलोरी एसीया प्रदेस् ग्यम्से खबे यहुदीमाचे पावलत पर्मेस्वर्की दीम्री म्रङ्ज्यी। ओसेम् थेङ्यीमाचे य्हक्को म्हीमात फुलीइतीज्यीम् पावलत चुङ्ज्यी। 28 ओसेम् थेङ्यीमा चोले पङ्ज्यीम् क्रीङ्ज्यी, “ओ इस्राएलकी म्हीमा, ङ्यीमात र्हो लउ। खन बीबीनो ङ्यीज्यीम् इस्राएलकी म्हीमाकी बीरोद् स्य्हेङ्बतेङ् मोसाचे ब्रीबे पर्मेस्वर्की नीयम् थङ्येनो ओसेम् ङ्य्हङ्की चु पर्मेस्वर्की दीम्त बीरोद् लज्यीम् लोप्पे म्ही चुनो य्हीन्ब। होदेकीनो अय्हीन् चु म्हीचे यहुदी अय्हीन्बे म्हीमात पर्मेस्वर्की दीम्री वङ्पुङ्ज्यीम् दीम्न्हङ्की पबीत्र ग्लात असुद्द स्य्हेङ्बल मुब।” 29 तलेपङ्सम् थेङ्यीमाचे एफीसस ग्यम्से खबे त्रोफीमसत पावलतेङ् बक्च्य सहर्री म्रङ्बल मुबल। ओसेम् पावलचे थेत पर्मेस्वर्की दीम्न्हङ् बस्यील बी थेङ्यीमाचे म्हेन्बल मुबल। 30 चु तम्चे सहर्की जम्म ग्लामारी खइलबइल तज्यी, ओसेम् म्हीमा खन बीबीचेनो हुजुरी र्हुब् तखज्यी। थेङ्यीमाचे पावलत चुङ्ज्यीम् डुत्पोर्ज्यीम् पर्मेस्वर्की दीम्न्हङ्चे दोरी तेत्लाज्यी। होले तेत्लाब साच्चेनो पर्मेस्वर्की दीम्की म्रप् दुङ्लाज्यी। 31 थेङ्यीमाचे पावलत सेत्प म्हइटीब मुबल। हुजु बेलोरीनो यरुसलेम सहर्री सेत्प तुप्प तब म्हइटीब मुब पङ्बे सम्तर् रोमी सेनपतीचे थ्येःज्यी। 32 हुजु थ्येःब साच्चेनो थे स्यीपाइमातेङ् कप्तान्मात बोर्ज्यीम् य्हक्को म्हीमा मुबे ग्लारी छ्योङ्बोर्ज्यी। थेङ्यीमा खबल म्रङ्ज्यीम् म्हीमाचे पावलत तोब पीत्लाज्यी। 33 हुजु लीप्चे सेनपतीचे पावलत चुङ्ज्यीम् च्यल्द ङ्य्हीचे खीःबुङ्ज्यी। ओसेम् म्हीमात, “चु म्ही खल य्हीन्ब? चु म्हीचे ता लज्यी?” पङ्ज्यीम् ङ्योत्ज्यी। 34 तर य्हक्को म्हीमा न्हङ्चे म्हीइ र्हङ्स्यीनो ल्हो-ल्हो तम् पङ्ज्यी। चोले तज्यीम् थेङ्यीमाचे पङ्बे तम् खजुम् देमेन् बी सेनपतीचे गोअखम्। होत्तज्यीम् पावलत ब्यारेक्री बोरो बी सेनपतीचे स्यीपाइमात कुल्ज्यी। 35 स्यीपाइमाचे पावलत बोर्टीबे बेलोरी य्हक्को म्हीमा थेङ्यीमाइ लीप्-लीप् ङ्यीज्यी। पावल ब्यरेक्की च्यीमोरी दोखबे बेलोरी म्हीमाचे सेत्प म्होइज्यी। होत्तज्यीम् स्यीपाइमाचे थेत कोत्ज्यीम् बोर्ज्यी। 36 तलेपङ्सम् य्हक्को म्हीमाचे क्रीङ्ज्यीम् “थेत सेतो” पङ्ज्यीम् लीप्-लीप् ब्रटीबल मुबल। पावलचे म्हीमात पङ्बल 37 पावल ब्यारेक् न्हङ् दोःब म्हइबे बेलोरी थेचे सेनपतीत ग्रीक ग्योत्री, “ङ थेङ्त तइ तम्ए पङ्ब खम्ब?” बी पङ्ज्यी। सेनपतीचे ङ्योत्ज्यी, “एचे ग्रीक ग्योत्एनो स्येब? 38 एचे दोलो बीद्रोह स्हेङ्ज्यीम् हजार ब्ली मीस्री डाकुमात उजाड-ग्लारी बोर्बल अय्हीनो स्यीम्?” 39 पावलचे पङ्ज्यी, “अय्हीन्, ङ कीलीकीयकी टार्सस सहररी न्हबे यहुदी य्हीन्ब। ङ मीन् चल्तीबे सहरकी म्ही य्हीन्ब। ङत दय स्हेङ्ज्यीम् चु म्हीमात तम् चेक् पङ्पुङ्जेतो।” 40 सेनपतीचे थेत तम् पङ्पुङ्ज्यी। ओसेम् पावल च्यीमोरी रप्ज्यीम् म्हीमात याचे ल्हादब् लज्यी। म्हीमा सान्तले टीब बीसेम् पावलचे हीब्रु ग्योत्री तम् पङ्ब तीप्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.