Biblia Todo Logo
Bìoball air-loidhne

- Sanasan -

प्रेरीत् 20 - पश्‍चिम तामाङ


पावल माकेडोनीयातेङ् ग्रीसरी ङ्‌यीबल

1 हुजु खइलबइल म्‍हब बीसेम् पावलचे बीस्‍वासीमात ङ्‌होत्‍ज्‍यीम् थेङ्‌यीमात आर् पीन्‍ज्‍यी। ओसेम् थेङ्‍यीमा ग्‍यम्‍से फेःज्‍यीम् पावल माकेडोनीयाक्‍योर् य्‍हर्‌ज्‍यी।

2 हुजु ग्‍ला-ग्‍लामा तज्‍यीम् य्‍हर्‌बे बेलोरी बीस्‍वासीमात य्‍हक्‍को तम्‍मा ग्‍यम्‍से आर् पीन्‍ज्‍यी। हुजु लीप्‍चे थे ग्रीस पङ्‍बे ग्‍लारी य्‍हर्‌ज्‍यी।

3 हुजुरी पावल ल सोम् सम्‍म टीज्‍यी। ओसेम् दोङ्‍गरी क्रेत्‍ज्‍यीम् सीरीया पङ्‍बे ग्‍लारी ङ्‍यीब म्‍हइबे बेलोरी यहुदीमाचे थेत सेत्‍परी ज्‍यप्‍टीबल मुब पङ्‍बे तम् थ्‍येःज्‍यी। होत्‍तज्‍यीम् थेचे दोःज्‍यीम् माकेडोनीया ग्‍यम्सेनो ङ्‌यीबे सेम् लज्‍यी।

4 ओसेम् पावलतेङ् बक्‍च्‍य बेरीया सहर्‌री टीबे पुरसकी ज सोपात्रोस, थेसलोनीके सहर्‌री टीबे अरीस्‍तार्‌खसतेङ् सीकन्‍दस, डर्‌बी सहर्‌री टीबे गायसतेङ् तीमोथी ओसेम् एसीया प्रदेस्‍चे खबे तुखीकसतेङ् त्रोफीमस् ङ्‌यीबल मुबल।

5 थेङ्‍यीमाम् ङ्‌यीमा बीम ङोन्‍ग्‍यम्‍नो ङ्‌यीज्‍यीम् त्रोआस्‍री ब्रेन्‍टीब मुबल।

6 ङ्‌यीमाम् नीस्‍तार पर्‌व म्‍हन्‍दीब बीसेम् फीलीप्‍पी सहर् ग्‍यम्‍से समुन्‍द्रचे तज्‍यीम् ङ्‍यीज्‍यी। ओसेम् ङ्‍ह रेत् लीप्‍चे ङ्‌यीमा त्रोआस सहर्‌री दोःज्‍यी। हुजुरी ङ्‌यीमा सत गीः टीज्‍यी।


युटीकसत सोनलबल

7 अइतबारकी ङ्‍येस्‍येरी ङ्‌यीमा जम्‍मनो गेङ् क्‍युत्‍ज्‍यीम् चबरी र्‌हुब तज्‍यी। ओसेम् पावलचे न्‍हम्‍स्‍य्‍होर्‌हङ् य्‍हर्‌बे सेम् लबल तज्‍यीम् म्‍हुन् डेत् सम्‍म तम् लस्‍यीनो टीज्‍यी।

8 ङ्‌यीमा र्‌हुब् तबे दीम्‍की जोइ तलरी य्‍हक्‍को मेतङ्मा लुम्‍टीबल मुबल।

9 ओसेम् कर्‌खुङ्‌री युटीकस पङ्‍बे ठीट गीः टीटीबल मुबल। पावलचे तम् लस्‍यीनो टीबे बेलोरी हुजु ठीट न्‍हुटज्‍यीम् र्‌हल्‍ज्‍यी। चोले र्‌हल्‍टीबे बेलोरी ठीट तल सोम् जोसे दुङ्‌री तइय्‍हर्‌ज्‍यी। म्‍हीमा थेत सेन्‍बरी ङ्‌यीमम् स्‍यीबल यङ्‌ज्‍यी।

10 ओसेम् पावल दुङ्‌री फप्‍ज्‍यीम् हुजु ठीटइ जोरी पब्‍लु लज्‍यीम् तङ् युज्‍यी। ओसेम् म्‍हीमात, “एङ्‍यीमा थछेरो, ठीट सोम्‍बोनो मुब” बी पङ्‍ज्‍यी।

11 हुजु लीप्‍चे पावल तल जोरी ङ्‍यीज्‍यी, ओसेम् थेङ्‍यीमा जम्‍मनो डीःज्‍यीम् ग्‍येङ् क्‍युत्‍ज्‍यीम् चज्‍यी। ग्‍येङ् क्‍युत्‍ज्‍यीम् चब बीसेम् पावलचे य्‍हल् अतगदे सम्‍म थेङ्‍यीमातेङ् तम् लस्‍यीनो टीज्‍यी। ओसेम् पावल थेङ्‍यीमा ग्‍यम्‍से फेःज्‍यीम् य्‍हर्‌ज्‍यी।

12 ओसेम् थेङ्‍यीमाचे हुजु ठीटत सोम्‍बोनो दीम्‍री सथेन्‍ङ्‍यीज्‍यी, हुजु ठीट सोबल तज्‍यीम् जम्‍मचेनो आर् यङ्‌ज्‍यी।


त्रोआस सहर् य्‍हङ्‍से मीलेटस सहर् सम्‍म ङ्‌यीबल

13 ओसेम् ङ्‌यीमा त्रोआस ग्‍यम्‍से दोङ्‍ग क्रेत्‍ज्‍यीम् अस्‍सोस् सहर्‌री ङ्‍यीज्‍यी। तर पावलमी दोङ्‍गरी अक्रेत्, तलेपङ्‍सम् थे अस्‍सोसरीकीनो दोङ्‍गरी क्रेत्‍पे सेम् लज्‍यीम् अस्‍सोस् सम्‍म ब्रज्‍यीम्नो ङ्‌यीबे सेम् लज्‍यी।

14 पावलचे ङ्‍यीमात अस्‍सोस्‍री दोब बीसेम् थेत ङ्‌यीमातेङ् बक्‍च्‍य दोङ्‍गरी क्रेत्‍पुङ्‌ज्‍यीम् मीतीलेनेरी ङ्‍यीज्‍यी।

15 न्‍हम्‍स्‍य्‍होर्‌हङ् ङ्‌यीमा समुन्‍द्रइ ग्‍यम् तज्‍यीम् खीयस पङ्‍बे टापुइ रेइरी दोःज्‍यी। ओसेम् रेनीर्‌हङ् सामोसरी दोःज्‍यी। ओसेम् हुजु ग्‍लासे ल्‍हो-ल्‍हो दीन्‍री मीलेटसरी दोःज्‍यी।

16 पावलचे देरेम् ल्‍हो-ल्‍हो बेलो एसीयाकी प्रदेस्‍री टीबे सेम् अल। होत्‍तज्‍यीम् एफीसस सहर्‌री ङ्‌यीबे सेम् अल, तलेपङ्‍सम् थे पेन्‍तीकोस्‍की दीन्‍री यरुसलेमरी दोःबे लागीरी अत्‍तुरी तटीब मुबल।


पावल एफीससकी मन्‍डलीइ अगुवामातेङ् फेःबल

17 पावलचे मीलेट सहर् ग्‍यम्‍से एफीसस सहर्‌की मन्‍डलीइ एल्‍डर्‌मात ङ्‍होत्‍परी म्‍ही पीत्‍ज्‍यी।

18 ओसेम् थेङ्‍यीमा दोखब बीसेम् पावलचे पङ्‍ज्‍यी, “ङ एसीयारी खबे दीन् य्‍हङ्‌सेनो ङचे एङ्‌यीमातेङ् बक्‍च्‍य टीज्‍यीम् खले बेलो थाज्‍यी एङ्‍यीमाचे स्‍येबलनो मुब।

19 ओसेम् यहुदीमाचे सेत्‍प म्‍हइबे तम्‍माचे लज्‍यीम् य्‍हक्‍को ख्‍यप् ङ ङ्‍हच्‍छ्‍यङ् दुखरी दोःज्‍यी। होलेतलेनो ङ नम्र तज्‍यीम् ओसेम् ङइ मीचे मीख्‍ली य्‍हर्‌पुङ्‍ज्‍यीम् ङचे प्रभुइ लक् स्‍य्‍हेङ्‌ज्‍यी।

20 एङ्‌यीमात ज्‍यब तबे तम्‍मा म्‍हीमाइ ङोन्‍री स्‍येत्‍पे लक्‍तेङ् एङ्‌यीमाकी दीम्-दीम्‍री ङ्‌यीज्‍यीम् लोप्‍पे लक्‍री ङ ग्‍यप्‍चे सार् अती।

21 ङचे यहुदीमातेङ् ग्रीक म्‍हीमात पस्‍चताप स्‍य्‍हेङ्‌ज्‍यीम् पर्‌मेस्‍वर् पट्‍टी दोःगो, ओसेम् प्रभु येसुत बीस्‍वास् स्‍य्‍हेङो पङ्‍ज्‍यी।

22 “देरेम् ङ पबीत्र आत्‍माचे सुङ्‌ब र्‌हङलेनो ङ्‌येन्‍ज्‍यीम् यरुसलेमरी ङ्‍यीटीब मुब। ङत हुजुरी ता तस्‍ये बी ङचे स्‍येबल अरे।

23 तर जम्‍मनो सहर्‌मारी म्‍हीमाचे ङत दुख पीन्‍बतेङ् जेल्‍री च्‍युप्‍स्‍ये मुब पङ्‍बे तम्‍कीनो पबीत्र आत्‍माचे सुङ्‌बल मुब।

24 तर ङ ङइ जीवन ङइ लागीरी तइ सेइलएनो अम्‍हेन्। ङचे चोदेकीनो म्‍हेन्‍ब की ङत प्रभु येसुचे स्‍य्‍हेङो बी न्‍हङ्‌जेत्‍पे पर्‌मेस्‍वर्‌की अनुग्रहइ ज्‍यबे सम्‍तर् स्‍येत्‍पे लक् टोप् लब खम्‍खइ।

25 ओसेम् ङचे एङ्‌यीमाकी गुङ्‍री पर्‌मेस्‍वर्‌की य्‍हुल्‍की बारेरी प्रचार् स्‍य्‍हेङ्ज्‍यीम् ब्रज्‍यी, देरेम् एङ्‍यीमाचे ङत खेमेएनो म्रङ्‌स्‍ये अरे पङ्‍बे तम् ङत था मुब।

26 होत्‍तज्‍यीम् ङ तीङ्‌यी एङ्‌यीमाइ ङोन्‍री पङ्‍ब, एङ्‍यीमान्‍हङ्‌री खल नास् तलेएनो ङचे हुजुइ दोस् यङ्‌स्‍ये अरे।

27 तलेपङ्‍सम् पर्‌मेस्‍वर्‌चे ङ्‌य्‍हङ्‌माकी उद्‍दार्‌की लागीरी स्‍य्‍हेङ्‍जेत्‍पलतेङ् स्‍य्‍हेङ्‍जेत्‍स्‍येकी लक्‍की बारेरी तइ तम्‍एनो बाकी अथेन्‍नले ङचे जम्‍मनो एङ्‌यीमात स्‍येत्‍ज्‍यीन्‍बल मुब।

28 देरेम् एङ्‌यीमा र्‌हङ्‌की स्‍य्‍हप्‍तो र्‌हङ्‌चेनो स्‍य्‍हेङो। ओसेम् पबीत्र आत्‍माचे एङ्‌यीमात सोप्‍तीपीन्‍जेत्पे बगेल्‍मातएनो स्‍य्‍हप्‍तो स्‍य्‍हेङो। पर्‌मेस्‍वर्‌की मन्‍डलीइ ज्‍यबे गोर्‌तेन् तउ, तलेपङ्‍सम् हुजु म्‍हीमात थेङ्‌की काचे ग्‍लुजेत्‍पल य्‍हीन्‍ब।

29 ङत था मुब, ङ य्‍हर्‌ब बीसेम् लोङ्‍बे फरमा एङ्‌यीमाइ गुङ्‍री वङ्‌ज्‍यीम् बगेल्‍मात दुख पीन्‍स्‍ये मुब।

30 ओसेम् एङ्‍यीमा र्‌हङ्‌न्‍हङ्‍चेनो भ्‍यु तम् लोप्‍पे म्‍हीमा डोङ्‍स्‍ये मुब। ओसेम् थेङ्‍यीमाचे बीस्‍वासीमात थेङ्‌यीमाइ लीप्‍चे ब्रन लब म्‍हइस्‍ये मुब।

31 होत्‍तज्‍यीम् चोङ्‌ले टीउ, ओसेम् ङचे सोम्‍तीङ् सम्‍म दीन्तेङ् म्‍हुन् मीख्‍ली तइ-तइज्‍यीम् एङ्‍यीमा जम्‍मत पीन्‍स्‍यीनो टीबे चेतावनीत ह्‍वल् लज्‍यीम् टीउ।

32 “देरेम् ङ एङ्‌यीमात पर्‌मेस्‍वर्‌तेङ् थेङ्‌की अनुग्रहकी फ्रोइरी सोप्‍तीपीन्‍ब। हुजु फ्रोइचेनो एङ्‌यीमाकी बीस्‍वासत कोङ्‍न लब, ओसेम् पर्‌मेस्‍वर्‌चे पबीत्र स्‍य्‍हेङ्‌जेत्‍पलमाकी गुङ्‍री एङ्‌यीमात हक् पीन्‍ब खम्‍ब।

33 ङचे खलइ म्‍हर्-म्‍हुइ ओसेम् येन्‍की लोभ स्‍य्‍हेङ्‌बल अरे।

34 ओसेम् एङ्‍यीमाचे स्‍येःबलनो मुब, ङचे ङइ याचेनो लक् स्‍य्‍हेङ्‌ज्‍यीम् ङतेङ् ङइ र्‌होमात तोःबे स्‍हेमा पुरा स्‍य्‍हेङ्‌बल मुब।

35 ङचे एङ्‌यीमात जम्‍मनो लक्‍मा स्‍य्‍हेङ्‌ज्‍यीम् ङोन्‍बल मुब, एङ्‌यीमाचेएनो होलेनो य्‍हक्‍को दुख स्‍य्‍हेङ्‌ज्‍यीम् प्रङ्‌नमात र्‌हो स्‍य्‍हेङ्‍थोब। ओसेम् प्रभु येसुचे ‘कीन्‍ब बीमम् पीन्‍ब ज्‍यब’ बी सुङ्‍बे फ्रोइत ह्‍वल् लथोब।”

36 चोते पङ्‍ब बीसेम् पावलचे पुइ जुःज्‍यीम् थेङ्‍यीमा जम्‍मतेङ् प्रार्‌थना स्‍य्‍हेङ्‌ज्‍यी।

37 ओसेम् थेङ्‌यीमा जम्‍मनो क्राज्‍यीम् पावलत तङ्‌चे बेन्‍ज्‍यीम् च्‍योक्‍ज्‍यी।

38 पावलचे थेङ्‌यीमात, “देरेम् एङ्‍यीमाचे ङइ लीः खेमेएनो म्रङ्‌स्‍ये अरे” पङ्‍बे तम्‍चे थेङ्‌यीमात य्‍हक्‍को दुख तज्‍यी। हुजु लीप्‍चे थेङ्‍यीमा पावलत सबरी दोङ्‍ग मुबे ग्‍ला सम्‍म ङ्‍यीज्‍यी।

© 2024 (Active), Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan