प्रेरीत् 2 - पश्चिम तामाङपबीत्र आत्मा ब्योन्युबल 1 पेन्तीकोस् पङ्बे पर्बइ दीन्री येसुत बीस्वास् स्य्हेङ्बे म्हीमा जम्मनो तीत्छङ् र्हुब तबल मुबल। 2 ओसेम् तीक्कुरीनो स्वर्ग ग्यम्से लाबलुङ् स्यङ्ब र्हङ्बे केत् युज्यी। हुजु केत् थेङ्यीमा टीबे दीम्की जम्मनो ग्लारी थ्येःज्यी। 3 हुजु बेलोरीनो थेङ्यीमाचे लेमा र्हङ्बे मे ल्हम् म्रङ्ज्यी, ओसेम् हुजु मे ल्हम् प्रज्यीम् हुजुरी मुबे जम्म म्हीमाइ जोरी टीज्यी। 4 ओसेम् थेङ्यीमा जम्मनो पबीत्र आत्माचे प्लीङ्ज्यी। थेङ्यीमात पबीत्र आत्माचे ल्हो-ल्हो ग्योत्मा पङ्ब खम्न लब र्हङ्लेनो पङ्ब तीप्ज्यी। 5 हुजु बेलोरी पर्मेस्वर्त तेन्बे यहुदीमा जम्बुलीङ्की जम्मनो य्हुल्मा ग्यम्से यरुसलेमरी खज्यीम् टीबल मुबल। 6 चोतेबे केत् थ्येःब बीसेम् हुजुरी य्हक्को म्हीमा र्हुब् तज्यी। ओसेम् थेङ्यीमा जम्मनो तेङेन् तज्यी, तलेपङ्सम् येसुत बीस्वास् स्य्हेङ्बलमा जम्मचे र्हङ्-र्हङ्की ग्योत् पङ्टीब थ्येःज्यी। 7 ओसेम् थेङ्यीमा य्हक्को तेङेन् तज्यीम् पङ्ज्यी, “चु तम् पङ्टीबलमा गालील प्रदेस्की म्हीमा अय्हीनो स्यीम्? 8 थेङ्यीमा जम्मचे ङ्य्हङ्माकी र्हङ्की ग्योत्री तम् पङ्टीबल ङ्य्हङ्माचे खले थ्येःब? 9 ङ्य्हङ्मा पार्थीइ म्हीमा, मादीइ म्हीमा, एलामीइ म्हीमा, मेसोपोटामीयाकी म्हीमा, यहुदीया प्रदेस्की म्हीमा, कापाडोकीया प्रदेस्की म्हीमा, पोन्टस प्रदेस्की म्हीमा, एसीया प्रदेस्की म्हीमा, 10 फ्रीगीया प्रदेस्की म्हीमा, पामफीलीया प्रदेस्की म्हीमा, ओसेम् मीस्र य्हुल्की म्हीमातेङ् लीबीया य्हुल्की कुरेनी सहर्की रेइ-रेइकी प्रदेस्माकी म्हीमा ओसेम् रोम् सहर्चे खबे 11 यहुदीतेङ् यहुदी धर्म म्हन्दीबे म्हीमा, ओसेम् क्रेटतेङ् अरब् य्हुल्चे खबे म्हीमा य्हीन्ब। ओसेम् थेङ्यीमाचे ङ्य्हङ्माकी र्हङ्की ग्योत्रीनो पर्मेस्वर्की ङ्हच्छ्यङ् लक्माकी बारेरी तम् पङ्टीबल ङ्य्हङ्माचे थ्येःटीब मुब।” 12 चोले थेङ्यीमा जम्मनो तेङेन् तज्यीम् थोम्ज्यी। ओसेम् र्हङ्-र्हङ्न्हङ्रीनो गीःचे गीःत, “चुइ अर्थ ता?” बी ङ्योत्ज्यी। 13 तर ल्हो-ल्होमाचेम् ङ्येत्ज्यीम्, “थेङ्यीमा अङ्गुर्की छार् नीङ्गुचे ङ्य्हेबल मुब” बी पङ्ज्यी। पत्रुसचे म्हीमात गोनलबल 14 तर पत्रुस चुख्रीत प्रेरीतमातेङ् बक्च्य रप्ज्यीम् ङ्हच्छ्यङ् केत् तेत्ज्यीम् पङ्ज्यी, “यहुदीयाकी म्हीमातेङ् यरुसलेम्री टीबे म्हीमा, ङ एङ्यीमात चु ता तटीबल बी स्येत्स्ये मुब, ङइ तम् ङ्येन्जेतो। 15 तलेपङ्सम् एङ्यीमाचे म्हेन्ब र्हङ्ले थेङ्यीमा ङ्य्हेबल अय्हीन्। स्य्होरी नौ बजेनो खल्चेएनो अङ्गुर्की नीङ्गु ङ्य्हेनले अथुङ्। 16 तर चु तम्मा तस्ये मुब बी योएल अगम्बक्तचे ब्रीबे छ्येरी ब्रीबल मुबल- 17 पर्मेस्वर्चे सुङ्जेत्प, ‘ज्युकी दीन्मारी ङ ङइ आत्मा जम्म म्हीमाइ जोरी पीत्युस्ये मुब, ओसेम् एङ्यीमाकी ज-जमेमाचे अगम्बानी पङ्स्ये मुब एङ्यीमाकी ठीटमाचे दर्सन म्रङ्स्ये मुब, ओसेम् एङ्यीमाकी म्हेमेमाचे म्हङ्मा म्रङ्स्ये मुब। 18 हुजु दीन्मारी ङइ स्य्हप्तो स्य्हेङ्बे अमकोलमातेङ् अपकोलमातएनो ङ ङइ आत्मा पीत्युस्ये मुब ओसेम् थेङ्यीमाचे अगम्बानी पङ्स्ये मुब। 19 ङचे नम्तीङ् मुरी तेङेन्की चीनोमा ङोन्स्ये मुब, ओसेम् दुङ्री जम्बुलीङ्री तेङेन्की लक्मा स्य्हेङ्स्ये मुब। हुजुमा का, मेतेङ् मीङ्गुइ बोन् तस्ये मुब। 20 प्रभु ब्योन्युस्येकी महीमीत दीन् खब बीम ङोन्ग्यम् दीनी म्हुन्दुङ् तस्ये मुब ओसेम् लनी का र्हङबे वल तस्ये मुब। 21 ओसेम् परमप्रभुइ छेन्री थर्नलपीनो पङ्बलमा थर्स्ये मुब।’ 22 “ओ इस्राएलकी म्हीमा एङ्यीमाचे चु तम्एनो ङ्येनो। पर्मेस्वर्चे येसु ग्यम्से एङ्यीमाकी गुङ्री ङ्हच्छ्यङ्-ङ्हच्छ्यङ् लक्माकी तेङेन्की चीनोमा ङोन्जेत्पल एङ्यीमाचे स्येबलनो मुब। हुजु चीनोमा ग्यम्सेनो नासरतकी येसुत पर्मेस्वर्चेनो पीत्युजेत्पल य्हीन्ब बी ङोन्बल मुब। 23 पर्मेस्वर्चे र्हङ्चे थुः लजेत्पतेङ् ङोन्ग्यम्नो खेम्जेत्प अनुसार् येसुत एङ्यीमाकी यारी न्हङ्जेत्ज्यी। ओसेम् एङ्यीमाचे येसुत यहुदी अय्हीन्बे म्हीमाकी यारी सोप्तीज्यीम् क्रुस्री च्योज्यीम् सेत्पुङ्ज्यी।” 24 “तर पर्मेस्वर्चे येसुत स्यीब ग्यम्से सोनलजेत्ज्यी। तलेपङ्सम् येसुत स्यीबे सक्तीचे स्यीबलम् स्यीबनो लब अखम्ब मुबल। 25 दाऊद ग्यल्बोचेएनो थेङ्की बारेरी चोले पङ्बल मुबल- ‘ङचे प्रभुत खेम पङ्लेनो ङइ ङोन्री म्रङ्ज्यी, ङ य्हङ्य्होङ् तस्ये अरे, तलेपङ्सम् थेङ् ङइ केत्पट्टीचे स्य्हुबल मुब। 26 होत्तज्यीम् ङ सेम् य्हङ्सेनो तङ्बल मुब। ओसेम् ङइ सुङ् ग्यम्से प्रभुत तोप्प। ओसेम् ङत देमेन्नो था मुब, थेङ्चे ङइ ल्हीत देबेएनो सोनलजेत्स्ये मुब। 27 तलेपङ्सम् थेङ्चे ङत स्यीबलमा टीबे ग्लारी ख्लेथेन्स्ये अरे, ओसेम् थेङ्चे थेङ्की पबीत्र म्हीइ ल्हीत दुर्सरी क्रम्पुङ्जेत्स्ये अरे। 28 थेङ्चे ङत जीवन्की ग्यम् ङोन्जेत्पल मुब। ओसेम् थेङ् ङतेङ् बक्च्य तज्यीम् ङत य्हक्को तङ्नलजेत्स्ये मुब।’ 29 “ङइ अज्यो-अलेमा, ङ एङ्यीमात ङ्य्हङ्की म्हेमे दाऊदकी बारेरी देमेन्नो पङ्ब, म्हेमे दाऊद स्यीज्यी ओसेम् थेइ ल्ही दुर्सरी थेन्ज्यी। हुजु दुर्स दबम् सम्मनो ङ्य्हङ्माइ रेइक्योर् मुब। 30 तर दाऊद अगम्बक्त तबल तज्यीम् पर्मेस्वर्चे थेइ सन्तान न्हङ्चेनो गीःत थेइ ठीःरी थेन्जेत्स्ये मुब बी सपथ स्य्हेङ्बल थेत था मुबल। 31 पर्मेस्वर्चे लीक्यम् स्य्हेङ्जेत्स्येकी लक् दाऊदचे ङोन्ग्यम्नो म्रङ्बल मुबल। होत्तज्यीम् थेचे मुक्ती न्हङ्बे ख्रीस्ट्की बारेरी चोले पङ्बल मुब, ‘थेङ्त स्यीबलमा मुबे ग्लारी ख्लेथेन्स्ये अरे। ओसेम् थेङ्की ल्ही क्रम्पुङ्स्येएनो अरे।’ 32 “ओसेम् येसुत पर्मेस्वर्चे सोनलजेत्ज्यी, चु तम् म्रङ्बल ङ्यीमा जम्मनो य्हीन्ब। 33 पर्मेस्वर् अपचे येसुत स्हेस न्हङ्ज्यीम् थेङ्की केत्पट्टीचे थेन्जेत्ज्यी। ओसेम् र्हङ्चे स्य्हेङ्जेत्पे बाचा अनुसार येसुत पबीत्र आत्मा न्हङ्जेत्ज्यी। येसुचे हुजु पबीत्र आत्मा ङ्य्हङ्मात पीत्युजेत्पल मुब, तीन्हम्स्यो एङ्यीमाचे म्रङ्बतेङ् थ्येःबे चु तम्मा हुजुनो य्हीन्ब। 34 तलेपङ्सम् दाऊद र्हङ् स्वर्गरी अङ्य्हीलेनो चोले पङ्ज्यी परमप्रभुचे ङइ प्रभुत सुङ्ज्यी, ‘ए ङइ केत् या पट्टीचे टीउ, 35 ङचे एइ सत्रुमात एइ कङ् थीङ्री अथेन्गदे।’ 36 “होत्तज्यीम् इस्रएलकी जम्मा म्हीमाचे चु तम् स्येःनोथोब- एङ्यीमाचे क्रुस्री च्योज्यीम् सेत्पे येसुतनो पर्मेस्वर्चे प्रभुतेङ् मुक्ती न्हङ्बे ख्रीस्ट् ङ्हीनो स्य्हेङ्जेत्ज्यी।” 37 पत्रुसचे पङ्बे चु तम् थ्येःज्यीम् थेङ्यीमाकी सेम्री य्हक्को दुख तज्यी। ओसेम् थेङ्यीमाचे पत्रुसतेङ् ल्हो-ल्हो प्रेरीतमात, “अज्यो-अलेमा, देरेम् ङ्यीमाचे तालथोब?” पङ्ज्यीम् ङ्योत्ज्यी। 38 ओसेम् पत्रुसचे थेङ्यीमात पङ्ज्यी, “देरेम् एङ्यीमा जम्मचेनो र्हङ्-र्हङ्की पापमाकी क्षमाकी लागीरी पस्चताप स्य्हेङो ओसेम् येसु ख्रीस्ट्की छेन्री बप्तीस्मा कीनो। ओसेम् एङ्यीमाचे पबीत्र आत्माइ बक्सीस् यङ्स्ये मुब। 39 चु बाचाम् एङ्यीमातेङ् एङ्यीमाइ कोलमाकी लागीरी य्हीन्ब। ओसेम् प्रभु पर्मेस्वर्चे ङ्होत्जेत्पे थारीङ्-थारीङ्की म्हीमाइ लागीरीएनो य्हीन्ब।” 40 ओसेम् पत्रुसचे थेङ्यीमात य्हक्को तम्मा ग्यम्से लोप्ज्यी। ओसेम् थेङ्यीमात अर्ती पीन्ज्यीम्, “तीन्हम्स्य्होइ नेइबे म्हीमाइ जोरी खस्येकी सजाय ग्यम्से जोगइतीज्यीम् टीउ” बी पङ्ज्यी। 41 हुजु लीप्चे य्हक्को म्हीमाचे थेचे पङ्बे तम्त बीस्वास् लज्यीम् बप्तीस्मा कीन्ज्यी। हुजु दीन्कुनो थेङ्यीमातेङ् हजार सोम्गदे म्हीमा कप्ज्यी। 42 ओसेम् थेङ्यीमा खेम पङ्लेएनो प्रेरीतमातेङ् लोप्परी, सङ्गती स्य्हेङ्बरी, डोन् चबरी ओसेम् प्रार्थना स्य्हेङ्बरी बक्च्य तस्यीनो टीब मुबल। बीस्वासीमाकी सङ्गती 43 प्रेरीतमाचे य्हक्कोनो तेङेन्की चीनोमा ङोन्बल तज्यीम् म्हीमा जम्मनो तेङेन् तज्यी। 44 ओसेम् बीस्वासीमा जम्मनो ग्ला गीरी र्हुप् तब मुबल। थेङ्यीमातेङ् मुबे स्हेमा जम्मइ कुङ्ल पङ्ज्यीम् कोल्ब मुबल। 45 थेङ्यीमाचे र्हङ्की सम्पतीमातेङ् स्हेमा चुङ्ज्यीम् खल्त ता तोज्यी हुजु म्हीमात जुज्यीम् पीन्ब मुबल। 46 थेङ्यीमा दीन्लनो सेम् गीः तज्यीम् पर्मेस्वर्की दीम्री र्हुब् तब मुबल। ओसेम् थेङ्यीमा दीम्-दीम्री र्हुब तज्यीम् प्रभु डोन् चब मुबल। ओसेम् थेङ्यीमा तङ्ज्यीम् ज्यबे सेम् थोज्यीम् 47 पर्मेस्वर्त तोप्प मुबल। ओसेम् ल्हो-ल्हो म्हीमाचे थेङ्यीमात ज्यबे म्ही पङ्ब मुबल। ओसेम् प्रभुचे थर्ब यङ्बे म्हीमा थेङ्यीमातेङ् दीन्लनो कप्पीन्जेत्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.