प्रेरीत् 19 - पश्चिम तामाङपावल एफीसस सहर्री 1 अप्पोल्लोस कोरीन्थ सहर्री मुबे बेलोरी पावल एसीया प्रदेस्की गुङ्से तज्यीम् एफीसस सहर्री दोखज्यी। हुजुरी पावलचे डेत्-डेत् डबमातेङ् खदु लज्यी। 2 ओसेम् पावलचे थेङ्यीमात, “एङ्यीमाचे प्रभुत बीस्वास् स्य्हेङ्बे बेलोरी पबीत्र आत्मा यङ्ज्यी?” बी ङ्योत्ज्यी। थेङ्यीमाचे थेत पङ्ज्यी, “पबीत्र आत्मा मुब बी ङ्यीमाचे थ्येःबलनो अरे।” 3 पावलचे थेङ्यीमात देबेएनो ङ्योत्ज्यी, “होलेपङ्सम् एङ्यीमाचे खजु बप्तीस्मा कीन्ज्यी?” ओसेम् थेङ्यीमाचे, “युहन्नाचे लोप्प र्हङ्बे बप्तीस्मा कीन्ज्यी” बी पङ्ज्यी। 4 ओसेम् पावलचे पङ्ज्यी, “युहन्नाचे पीन्बे बप्तीस्मा पाप ग्यम्से पस्चताप स्य्हेङ्बे लागीरी य्हीन्ब। युहन्नाचे, ‘ङ बीम लीक्यम् ब्योन्खस्येकी म्हीत बीस्वास् स्य्हेङो’ बी म्हीमात पङ्ज्यी। हुजु म्ही येसुनो मुबल।” 5 चु थ्येःब बीसेम् थेङ्यीमाचे प्रभु येसुइ छेन्री बप्तीस्मा कीन्ज्यी। 6 हुजु लीप्चे पावलचे थेङ्यीमाइ जोरी या थेन्पीन्मम् पबीत्र आत्मा थेङ्यीमाइ जोरी ब्योन्युज्यी। ओसेम् थेङ्यीमाचे अस्येःबे ग्योत्मारी अगम्बानी पङ्ब तीप्ज्यी। 7 हुजुरी थेङ्यीमा चुङ् ङ्य्हीते र्हङ्ब अपकोलमा मुबल। 8 हुजु लीप्चे पावल यहुदीमा र्हुब् तबे दीम्री ङ्यीज्यीम् अलोङ्नले ल सोम् सम्म पर्मेस्वर्की य्हुल्की बारेरी म्हीमातेङ् छ्यम् तम् ज्योप्ज्यीम् थेङ्यीमात गोन लज्यी। 9 तर डेत्-डेत् म्हीमाचेम् कोङ्बे सेम् थोज्यीम् बीस्वास् अस्य्हेङ्। ओसेम् थेङ्यीमाचे म्हीमाइ ङोन्ग्यम्नो प्रभुइ ग्यम्की बीरोद् लज्यी। होत्तज्यीम् पावलचे थेङ्यीमात ख्लेथेन्ज्यी, ओसेम् बीस्वासीमात र्हङ्तेङ् बक्च्य बोर्ज्यीम् टुरान्नस पङ्बे म्हीइ लोप्पे दीम्री दीन् र्हङ्स्यीनो प्रभुइ ग्यम्की बारेरी तम् ज्योप्ज्यीम् लोप्प तीप्ज्यी। 10 चोले ङ्य्हीत्तीङ् सम्म लोप्स्यीनो टीज्यी। ओसेम् एसीयारी टीबे जम्म म्हीमातेङ् यहुदी ओसेम् ग्रीक म्हीमाचे प्रभुइ फ्रोइ ङ्येन्ज्यी। 11 पर्मेस्वर्चे पावलकी या ग्यम्से ङ्हच्छ्यङ् तेङेन्की लक्मा स्य्हेङ्जेत्ज्यी। 12 चोदे सम्मकी म्हीमाचे रुमालमातेङ् य्हुर्बे येन्मा पावलकी ल्हीःरी छुज्यीम् नबे म्हीमाज बोर्ब मुबल। ओसेम् नबे म्हीमा फेन्बतेङ् दुस्ट आत्मा स्यप्पलमा ग्यम्से दुस्ट आत्मा डोङ्य्हर्ब मुबल। 13 ग्ला-ग्लारी कोर्ज्यीम् ब्रबे फुप्प ग्यङ्ब स्य्हेङ्बे डेत्-डेत् यहुदीमाचेएनो प्रभु येसु ख्रीस्ट्की छेन्री म्हङ्मा ल्हप्प म्हइज्यी। थेङ्यीमाचे म्हङ्मात, “पावलचे प्रचार स्य्हेङ्बे येसुइ छेन्री एङ्यीमा डोङ्ज्यीम् य्हरो!” पङ्ब मुबल। 14 स्केवास् पङ्बे यहुदी ङ्हच्छ्यङ् लम्बुइ ज ङ्यीस्चेएनो चोतेबे लक् स्य्हेङ्ब मुबल। 15 तर तीरेत् म्हङ्चे थेङ्यीमात जोहाप् पीन्ज्यीम् पङ्ज्यी, “येसुत ङचे स्येःब, ओसेम् पावलतएनो ङचे स्येःब, तर एङ्यीमाम् खल?” 16 हुजु लीप्चे म्हङ् स्यप्पे म्ही थेङ्यीमाकी जोरी छ्योङ्खज्यीम् थेङ्यीमात चुङ्ज्यीम् म्य्हज्यी। ओसेम् थेङ्यीमा क्लीङ्दो तज्यीम् ल्ही ल्हुङ्बनो म्हग नाज्यीम् हुजु दीम्चे छ्योङ्य्हर्ज्यी। 17 चु तम् एफीसस्री मुबे यहुदीमातेङ् ग्रीक म्हीमाचेएनो थ्येःज्यी। ओसेम् थेङ्यीमा जम्मनो लोङ्ज्यीम् प्रभु येसुइ छेन्त ङ्हच्छ्यङ् स्य्हेस स्य्हेङ्ज्यी। 18 ओसेम् बीस्वास् स्य्हेङ्बलमा य्हक्को खज्यीम् र्हङ्-र्हङ्की अज्यबे लक्मा स्वीकार लज्यी। 19 थेङ्यीमा न्हङ्री य्हक्को म्हीमाचे जादुगरीमातेङ् बोम्बो स्य्हेङ्बे र्हङ्-र्हङ्की छयेःमा बज्यीम् म्हीमाकी ङोन्री ख्रङ्लाज्यी। थेङ्यीमाचे ख्रङ्लाबे छ्येःमात म्हुइकी टङ पचास हजार गदे ङ्यीब मुबल। 20 चोले प्रभुइ फ्रोइ ज्यनले ठम्स्यीनो बोर्ज्यीम् सक्तीसाली तबोर्ज्यी। एफीसस सहर्री खइलबइल तबल 21 हुजु लीप्चे पावलचे माकेडोनीयातेङ् अखैया प्रदेस् तज्यीम् यरुसलेमरी ङ्यीबे सेम् लज्यी। ओसेम् पावलचे, “ङ यरुसलेमरी दोःब बीसेम् रोम् सहर्रीएनो ङ्यीनोथोःब” पङ्ज्यी। 22 ओसेम् पावलचे थेइ र्हो ङ्ही तीमोथीतेङ् इरास्तसत माकेडोनीयारी पीत्ज्यी। तर थेम् य्हक्को बेलो सम्म एसीयारीनो टीज्यी। 23 हुजु बेलोरीनो पर्मेस्वर्की ग्यम्की बारेरी खन बीबीनो प्रचार स्य्हेङ्बल तज्यीम् एफीसस्री य्हक्को खइलबइल तज्यी। 24 तलेपङ्सम् डेमेत्रीयस् मीन् मुबे म्ही गीःचे अर्तेमीस पङ्बे म्हुइकी ख्लइ ज्यीद दीम्मा स्य्हेङ्ब मुबल। चोतेबे लक् स्य्हेङ्ज्यीम् थेतेङ् थेइ लक् स्य्हेङ्बे म्हीमाचेएनो य्हक्को टङ छाब मुबल। 25 ओसेम् डेमेत्रीयस्चे ख्ल स्य्हेङ्बे लक् स्य्हेङ्बे ल्हो-ल्हो म्हीमा जम्मतनो ग्लागीरी र्हुब लज्यीम् पङ्ज्यी, “र्होमा, एङ्यीमाचे स्येःबलनो मुब, चु छोङ् ग्यम्सेनो ङ्य्हङ्माचे य्हक्को टङ स्य्हेङ्बल मुब। 26 पावलचे त पङ्टीब एङ्यीमाचेएनो म्रङ्बतेङ् थ्येःबल मुब। म्हीमाइ याचे स्य्हेङ्बे ख्लम् पर्मेस्वर् अय्हीन् पङ्टीबल मुब। थेचे एफीसरीकीनो अय्हीन् एसीयाकी जम्म ग्लामाकी य्हक्को म्हीमात र्हङ्की तम् लोप्ज्यीम् व्हम्टीबल मुब। 27 चोले ङय्हङ्माकी छोङ्तकीनो अय्हीन्, ङ्हच्छ्यङ् ख्ल आर्तेमीस्की दीम्तएनो म्लेत् बोर्स्ये मुब। ओसेम् एसीयातेङ् जम्बुलीङ्री म्हीमाचे तेन्बे ङ्हच्छ्यङ् ख्ल आर्तेमीस्तएनो तेन्ब पीत्स्ये मुब।” 28 चु थ्येःज्यीम् हुजुरी र्हुब् तबे म्हीमा जम्मनो बोमोचे न बो:यम्ज्यी। ओसेम् क्रीङ्ज्यीम्, “एफीसस्री मुबे ङ्य्हङ्माइ आर्तेमीस्की ख्ल ङ्हच्छ्यङ् य्हीन्ब!” बी पङ्ज्यी। 29 ओसेम् जम्मा सहर्मारी चोतेबे खइलबइल तज्यी। ओसेम् म्हीमा गीः तज्यीम् पावलकी र्होमा माकेडोनीयाचे खबे गायसतेङ् अरीस्तार्खस्त चुङ्ज्यीम् रङ्गसालरी बोर्ज्यी। 30 ओसेम् पावल य्हक्को म्हीमाकी ङोन्री ङ्यीबे सेम् लज्यी। तर बीस्वासीमाचे थेत ङ्यीअबुङ्। 31 एसीयाकी डेत्-डेत् सरकारी हाकीममा पावलकी र्हो मुबल। ओसेम् थेङ्यीमाचेएनो पावलत रङ्गसालन्हङ् थङ्यीउ बी पङ्ज्यीम् सम्तर् पीत्ज्यी। 32 य्हक्को म्हीमा क्रीङ्टीब मुबल। थेङ्यीमा न्हङ्री डेत्चे थो गीःइ तम् ओसेम् ल्हो-ल्होचे थो गीःइ तम् पङ्ज्यीम् क्रीङ्टीब मुबल। तर य्हक्को र्हङ्ब म्हीमाचे थेङ्यीमा तले हुजुरी र्हुब् तबल बीएनो अस्य्हेब मुबल। 33 हुजु बेलोरीनो यहुदीमाचे अलेक्जेन्डर् पङ्बे म्हीत ङोन्री तम् पङ्बरी पीत्ज्यी। ओसेम् य्हक्को म्हीमा न्हङ्री डेत्-डेत्चे अलेक्जेन्डरत हुजुरी तटीबे तम्की बारेरी स्येत्ज्यी। ओसेम् थेचे य्हक्को म्हीमात कुटी टीउ बी ल्हादब् लज्यीम् तम् पङ्ब छ्येज्यी। 34 तर म्हीमाचे थे यहुदी टीम् बी स्येःब बीसेम् घन्ट ङ्ही गदे “एफीसस्री मुबे ङ्य्हङ्माइ आर्तेमेसकी ख्ल ङ्हच्छ्यङ् य्हीन्ब!” पङ्ज्यीम् क्रीङ्स्यीनो टीज्यी। 35 लीक्यम् सहर्की हाकीम्चे म्हीमात सान्त तनलज्यीम् पङ्ज्यी, “एफीससकी म्हीमा, एफीसस सहर्मी ङ्हच्छ्यङ् आर्तेमीस् ख्लइ दीम्तेङ् मुचे तइयुबे म्हीमाचे तेन्बे युङ्बत जोगइतीज्यीम् थेन्बे ग्ला य्हीन्ब पङ्बे तम् खल्चे अस्येस्यील स्यीम्? 36 चु तम् अय्हीन् बी खल्चेएनो पङ्अखम्। होत्तज्यीम् थेङ्मा सान्तले स्य्हुगो, ओसेम् सेम्री म्हेन्ज्यीम्कीनो लक् स्य्हेङ्जेतो। 37 तलेपङ्सम् र्हङ्माचे चुङ्ज्यीम् बबे चु म्हीमाचे ख्लइ दीम् ब्येन्बल अरे, ओसेम् ङ्य्हङ्की ख्लइ बीरोदरी तएनो पङ्बल अरे। 38 डेमेत्रीयस्तेङ् थेइ लक् स्य्हेङ्बलमाचे खलइ बीरोद्री पङ्लेनो उजुरी युथोबल मुसम् अदालतमा मुनोमुब। ओसेम् न्यायधीसमाएनो मुनोमुब। हुजुरी थेङ्यीमाचे मुद्द युखइ। 39 तर थेङ्मा चु बीमएनो ल्हो-ल्हो तम् पङ्गे म्हेन्सम् ङ्यीमाचे सहर्की म्हीमा ङ्होत्ज्यीम् नीयम् अनुसार सभा टीज्यीम् हुजु तम्री छलफल स्य्हेङ्पीन्ब खम्ब। 40 तीङ्यी तबे चु हुलदङ्गइ दोस् रोमी सरकारचे ङ्यीमात ल्हइतीब खम्ब। तलेपङ्सम् म्हीमाचे स्यीत्तीरीनो खइलबइल स्य्हेङ्ज्यीम् र्हुब् तबल तज्यीम् ङ्यीमाचे तेएनो पङ्ब अखम्।” 41 हुजु लीप्चे हाकीम्चे य्हक्को म्हीमात य्हर्पुङ्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.