प्रेरीत् 18 - पश्चिम तामाङपावल कोरीन्थ पङ्बे सहर्री ङ्यीबल 1 हुजु लीप्चे पावल एथेन्स् पीत्थेन्ज्यीम् कोरीन्थ सहर्री ङ्यीज्यी। 2 हुजुरी पावलचे पोन्टस पङ्बे ग्लारी न्हबे अकीलास् पङ्बे यहुदी म्ही गीःत दोज्यी। थे तोव दीन् ङोन्ग्यम्कीनो र्हङ्की म्रीङ्तेङ् बक्च्य इटालीया पङ्बे ग्लाचे खबल मुबल। तलेपङ्सम् रोम्की ग्यल्बो क्लौडीयस्चे जम्मनो यहुदीमात रोम् सहर् ख्लेथेन्ज्यीम् य्हरो बी कुल्बल मुबल। पावल थेङ्यीमात च्याबरी ङ्यीज्यी। 3 थेङ्यीमा पाल स्य्हेङ्बे लक् स्य्हेङज्यीम् चब थुङ्ब लब मुबल। होत्तज्यीम् पावलचे थेङ्यीमातेङ् टीज्यीम् लक् स्य्हेङ्ज्यी, तलेपङ्सम् थेचेएनो पाल स्य्हेङ्बे लक् स्य्हेङ्ब मुबल। 4 ओसेम् पावल दुःब न्हबे दीन् र्हङ्स्यीनो यहुदीमा र्हुब् तबे दीम्री ङ्यीज्यीम् यहुदीतेङ् ग्रीक म्हीमातेङ् तम् ज्योप्ज्यीम् थेङ्यीमात गोनलब म्हइब मुबल। 5 सीलासतेङ् तीमोथी माकेडोनीया ग्यम्से हुजुरी दोखब बीसेम् पावलचे दीन्लनो पर्मेस्वर्की फ्रोइ स्येत्पे लक्कीनो स्य्हेङ्ज्यी। ओसेम् यहुदीमात येसुनो मुक्ती न्हङ्बे ख्रीस्ट् य्हीन्ब बी स्येत्पे लक् स्य्हेङ्टीब मुबल। 6 तर थेङ्यीमाचे पावलत बीरोद् लज्यीम् खीसइतीज्यी। होत्तज्यीम् पावलचे थेङ्यीमात चेतावनीकी लागीरी र्हङ्की येन्की बुफ्र खर्ज्यीम् पङ्ज्यी, “एङ्यीमा नास् तसम् एङ्यीमाकी दोस्चेनो नास् तस्ये मुब। हुजुइ दोस् ङत फोःस्ये अरे, देरे य्हङ्से ङ यहुदी अय्हीन्बे म्हीमाज ङ्यीस्ये मुब।” 7 ओसेम् पावल यहुदीमा र्हुब् तबे दीम्से डोङ्ज्यीम् पर्मेस्वर्त तेन्बे तीतस युस्तस् मीन् पङ्बे म्हीइ दीम्री ङ्यीज्यी। थेइ दीम् यहुदीमा र्हुब् तबे दीम्की रेइरी मुबल। 8 यहुदीमा र्हुब् तबे दीम्की सासक क्रीस्पसतेङ् थेइ दीम्री मुबे म्हेम्यमा जम्मचे प्रभुत बीस्वास् स्य्हेङ्ज्यी। ओसेम् कोरीन्थइ ल्हो-ल्हो य्हक्को म्हीमाचेएनो पावलचे लोप्पल ङ्येन्ज्यीम् प्रभुत बीस्वास् स्य्हेङ्ज्यीम् बप्तीस्मा कीन्ज्यी। 9 म्हुन गीःरी प्रभुचे पावलत दर्सन न्हङ्ज्यीम् चोले सुङ्ज्यी, “थलोङो, तर ज्यबे सम्तर् स्येत्स्यीनो टीउ, ओसेम् कुटीले थटीउ। 10 तलेपङ्सम् ङ एतेङ् बक्च्य मुब, ओसेम् खल्चेएनो एत तएनो लब खम्स्ये अरे। तलेपङ्सम् चु सहर्री ङल य्हक्को म्हीमा मुब।” 11 होत्तज्यीम् पावलचे तीत्तीङ् स्यी ल डुः सम्म कोरीन्थ सह्ररी पर्मेस्वर्की फ्रोइ लोप्स्यीनो टीज्यी। 12 तर अखैया पङ्बे प्रदेस्री गलीयोन् पङ्बे म्ही सासक तबे बेलोरी यहुदीमा गीःले र्हुब तज्यीम् पावलत चुङ्ज्यी। ओसेम् रोमी सासक्की ङोन्री बोर्ज्यी। 13 ओसेम् चोले पङ्ज्यी, “चु म्हीचे ङ्य्हङ्माकी नीयम्तेङ् अथुन्नले पर्मेस्वर्त तेन्बरी म्हीमात व्हम्टीबल मुब।” 14 पावल तम् पङ्ब छ्येटीब मुबल, ओसेम् गलीयोन्चे यहुदीमात पङ्ज्यी, “यहुदीमा, चु तम् देमेन्नो अन्यायतेङ् अज्यबे लक्ल य्हीन्सम् ङचे एङ्यीमाकी तम् ङ्येन्नोथोब मुबल। 15 तर चु तम्मामी एङ्यीमाकी छीःमा, मीन्मा ओसेम् र्हङ्की नीयम्की बारेरीनो तबल तज्यीम् एङ्यीमाचे र्हङ्चेनो न्याय स्य्हेङो। ङ चु तम्की न्याय अस्य्हेङ्।” 16 चोले पङ्ज्यीम् गलीयोन्चे थेङ्यीमात अदालतचे डोङ्पुङ्ज्यी। 17 ओसेम् थेङ्यीमाचे यहुदीमा र्हुब तबे दीम्की सासक सोस्थेनेसत चुङ्ज्यीम् अदालतकी ङोन्री तोज्यी। तर गलीयोन्चे तेएनो अपङ्। पावल एन्टीओखीया सहर्री दोःखबल 18 पावल य्हक्को दीन् सम्मनो बीस्वासीमातेङ् कोरीन्थ सहर्री टीज्यी। हुजु लीप्चे पावल बीस्वासीमा ग्यम्से फेःज्यीम् प्रीस्कीलातेङ् अकीलासत बक्च्य बोर्ज्यीम् दोङ्ग क्रेत्ज्यीम् सीरीया प्रदेस्री य्हर्ज्यी। दोङ्ग क्रेत्प बीम ङोन्ग्यम् थेचे र्हङ्चे स्य्हेङ्बे भग र्हङ्लेनो कींक्रीया सहर्री र्हङ्की क्र बा खो:लाज्यी। 19 थेङ्यीमा एफीसस सहर्री दोःब बीसेम् पावलचे प्रीस्कीलातेङ् अकीलासत हुजुरीनो ख्लेथेन्ज्यी। ओसेम् थेम् यहुदीमा र्हुब तबे दीम्री ङ्यीज्यीम् यहुदीमातेङ् तम् ज्योप्ज्यी। 20 पावलत यहुदीमाचे तोव दीन्सम्म थेङ्यीमातेङ् बक्च्यनो टीउ बी फ्या लज्यी, तर थेचे अङ्येन्। 21 यहुदीमा ग्यम्से फेःज्यीम् य्हर्बे बेलोरी पावलचे थेङ्यीमात, “पर्मेस्वर्की थुः मुसम् ङ एङ्यीमाज दोःज्यीम् खल” बी पङ्ज्यीम् थे एफीसस ग्यम्से दोङ्गरी क्रेत्ज्यीम् य्हर्ज्यी। 22 पावल कैसरीया सहर्री दोःब बीसेम् यरुसलेमरी ङ्यीज्यीम् मन्डलीमाकी म्हीमातेङ् खदु लज्यी। हुजु लीप्चे पावल एन्टीओखीया सहर्मोर् ङ्यीज्यी। 23 हुजुरी तोव दीन् टीज्यी, ओसेम् पावल गलातीयातेङ् फ्रीगीयाकी जम्मनो ग्लामा तज्यीम् हुजु ग्लामारी मुबे जम्मनो बीस्वासीमात बीस्वास्री कोङ्न लबोर्ज्यीम् य्हर्ज्यी। एफीसस पङ्बे सहर्री अपोल्लोस् 24 हुजु बेलोरी अलेक्जेन्ड्रीया पङ्बे सहर्री न्हबे अपोल्लोस् पङ्बे यहुदी गीः एफीसस्री खज्यी। थे धर्म छ्येःइ बारेरी स्येःब खेबतेङ् ज्यनले तम पङ्ब खम्बे म्ही मुबल। 25 थेचे प्रभुइ ग्यम्की बारेरी थ्येःज्यीन्बल मुबल। ओसेम् थेचे सेम् य्हङ्सेनो तङ्ज्यीम् प्रभु येसुइ बारेरी ज्यनले लोप्प मुबल। होलेतलेनो थेचे युहन्नाचे पीन्बे बप्तीस्माकी बारेरीकीनो स्येःब मुबल। 26 थेचे यहुदीमा र्हुब तबे दीम्री अलोङ्नले लोप्प छ्येज्यी। थेचे लोप्पे तम् थ्येःज्यीम् प्रीस्कीलातेङ् अकीलास्चे थेत र्हङ्की दीम्री बोर्ज्यी। ओसेम् थेङ्हीचे अपोल्लोस्त पर्मेस्वर्की ग्यम्की बारेरी ज्यनले गोन लपीन्ज्यी। 27 हुजु लीप्चे अप्पोलसचे अखैया प्रदेस्री ङ्यीबे सेम् लज्यी। होत्तज्यीम् एफीसस्री मुबे बीस्वासीमाचे थेत आर् पीन्ज्यी। ओसेम् अपोल्लोस्त स्वागत स्य्हेङो पङ्ज्यीम् अखइयाकी बीस्वासीमात चीठी ब्रीज्यीम् पीत्ज्यी। थे अखइयारी दोःब बीसेम् पर्मेस्वर्की अनुग्रह ग्यम्से हुजुरी मुबे बीस्वासीमात य्हक्को र्हो लज्यी। 28 तलेपङ्सम् थेचे पर्मेस्वर्की फ्रोइ ग्यम्सेनो येसुनो मुक्ती न्हङ्बे ख्रीस्ट् य्हीन्ब पङ्ज्यीम् म्हीमाइ ङोन्ग्यम् ङोन्ज्यीम् यहुदीमाचे तेएनो पङ् अखम्न लज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.