प्रेरीत् 17 - पश्चिम तामाङथेसलोनीके सहर्री पावलतेङ् सीलास 1 हुजु लीप्चे पावलतेङ् सीलास अम्फीपोलीसतेङ् अपोल्लोनीया सहर् ग्यम्से तज्यीम् थेसलोनीके सहर्री खज्यी। हुजुरी यहुदीमाकी यहुदीमा र्हुब् तबे दीम् गीः मुबल। 2 ङोन्ग्यम् र्हङ्लेनो पावल हुजु यहुदीमा र्हुब् तबे दीम्रीएनो ङ्यीज्यी। ओसेम् हुजुरी पावलचे सत सोम् सम्म पबीत्र दुःब न्हबे दीन् र्हङ्स्यीनो धर्म छ्येःइ तम् ग्यम्से थेङ्यीमातेङ् तम् ज्योप्ज्यी। 3 थेचे थेङ्यीमात धर्मइ छ्येः ग्यम्से, “मुक्ती न्हङ्बे ग्यल्बो ख्रीस्ट्चे दुख नाज्यीम् स्यीथोबतेङ् स्यीब ग्यम्से सोथोब मुबल, ओसेम् ङचे एङ्यीमात प्रचार स्य्हेङ्बे येसुनो हुजु मुक्ती न्हङ्बे ख्रीस्ट् य्हीन्ब” बी पङ्ज्यीम् प्रमान पीन्ज्यी, 4 थेङ्यीमा न्हङ्की डेत्-डेत् यहुदीमाचे प्रभुत बीस्वास् स्य्हेङ्ज्यी। ओसेम् पर्मेस्वर्त तेन्बे य्हक्को ग्रीकमातेङ् ङ्हच्छ्यङ् स्हेस मुबे अमकोलमाचेएनो प्रभुत बीस्वास् स्य्हेङ्ज्यीम् पावलतेङ् सीलासकी लीप्चे ब्रज्यी। 5 तर डेत्-डेत् यहुदीमाम् थेङ्यीमातेङ् स्हेरज्यीम् हुजु सहर्की न्होङ्बे म्हीमा र्हुब्ज्यीम् सहर्री खइलबइल स्य्हेङ्ज्यी। ओसेम् बोमोचे यासोन् पङ्बे म्हीइ दीम्री ङ्यीज्यीम् पावलतेङ् सीलासत य्हक्को म्हीमाकी ङोन्री बोर्ब छ्येःज्यी। 6 तर थेङ्यीमाचे पावलतेङ् सीलासत हुजुरी अयङ्। होत्तज्यीम् थेङ्यीमाचे यासोन्तेङ् डेत्-डेत् बीस्वासी अज्यो-अलेमात डुत्पोर्ज्यीम् सहर्की सासक्माज बोर्ज्यीम् क्रीङ्ज्यीम् पङ्ज्यी, “जम्बुलीङ्की खन बीबीनो दुख पीन्बे म्हीमा चु सहर्रीएनो दोखनेम्। 7 ओसेम् थेङ्यीमात यासोन्चे र्हङ्की दीम्री डोम्बोले थेन्बल मुब। थेङ्यीमा जम्मचे येसु पङ्बे ल्हो-ल्हो ग्यल्बो गीः मुब पङ्ज्यीम् रोमी ग्यल्बोइ अर्ती अङ्येन्नले ग्यल्बोइ बीरुद्दरी लक् स्य्हेङ्ब।” 8 चु थ्येःज्यीम् सहर्की सासक्मातेङ् हुजुरी र्हुब् तबे म्हीमा थोम्ज्यी। 9 ओसेम् सासक्माचे यासोन्तेङ् ल्हो-ल्हो अज्यो-अलेमात डन्ड फाबुङ्ज्यीम् पीत्लाज्यी। पावलतेङ् सीलास बेरीया सहर्री 10 बीस्वासीमाचे म्हुन तब साच्चेनो पावलतेङ् सीलासत बेरीया सहर्री पीत्लाज्यी। ओसेम् थेङ्यीमा हुजुरी दोःब बीसेम् यहुदीमा र्हुब् तबे दीम्री ङ्यीज्यी। 11 थेसलोनीकेकी म्हीमा बीम बेरीया सहर्की म्हीमा सम्तर् ङ्येन्बरी य्हक्को सेम् लब मुबल। थेङ्यीमाचे ज्यबे सम्तर् ज्यनले ङ्येन्ज्यीम् पावलचे पङ्बे तम्मा देमेन् य्हीन्ब टीम् वुइ अय्हीन्ब टीम् बी दीनइलनो धर्मइ छ्येःरी च्याब मुबल। 12 होत्तज्यीम् य्हक्को यहुदीमाचे बीस्वास् स्य्हेङ्ज्यी। ओसेम् स्हेस यङ्बे य्हक्को ग्रीक अपकोलमातेङ् अमकोलमाचेएनो बीस्वास् स्य्हेङ्ज्यी। 13 तर थेसलोनीकेकी यहुदीमाचे बेरीया सहर्रीएनो पावलचे पर्मेस्वर्की फ्रोइ स्येत्टीब मुब पङ्बे तम् थ्येःज्यी। ओसेम् थेङ्यीमा बेरीयारी ङ्यीज्यीम् हुजुरीएनो य्हक्को म्हीमात फोत्फोत् लज्यीम् पावलकी बीरोद् स्य्हेङ्पुङ्ज्यी। 14 चोतेब म्रङ्ब साच्चेनो बीस्वासी अज्यो-अलेमाचे पावलत हुजु ग्ला ग्यम्से समुन्द्रइ यक्योर् पीत्ज्यी। तर सीलासतेङ् तीमोथीम् हुजु बेरीया सहर्रीनो टीज्यी। 15 पावलत सबरी ङ्यीबलमाचे एथेन्स् सहर्सम्म सथेन्ङ्यीज्यी, ओसेम् थेङ्यीमाचे पावल ग्यम्से सीलासतेङ् तीमोथीत खम्गदे सम्म ग्योनले खोउ पङो पङ्बे सम्तर् यङ्ज्यीम् दोःज्यी। पावल एथेन्स् सहर्री दोःबल 16 पावलचे सीलासतेङ् तीमोथीत एथेन्स् सहर्री ब्रेन्ज्यीम् टीटीमम् हुजु सहर् ख्ल लुचे प्लीङ्बल म्रङ्ज्यीम् थेइ सेम्न्हङ् य्हक्को दुख तज्यी। 17 होत्तज्यीम् थेचे यहुदीमा र्हुब् तबे दीम्री ङ्यीज्यीम् पर्मेस्वर्त तेन्बे यहुदीमातेङ् यहुदी अय्हीन्बे म्हीमा ओसेम् बजार्री क्युबे म्हीमातेङ् दीन् रहङ्स्यीनो येसुइ बारेरी ङ्योत्प थी:ब लब मुबल। 18 ओसेम् जीवनकी उदेस्यकी बारेरी खेत्पे इपीक्युरीतेङ् स्तोइकीकी म्हीमान्हङ्की डेत्-डेत्चेएनो पावलत ङ्योत्प थी:ब लज्यी। थेङ्यीमा न्हङ्री डेत्-डेत्चे पङ्ज्यी, “चु म्हीचे र्हङ्चे तइ बारेरी तम् पङ्टीब बी स्येःबल अरे।” ओसेम् डेत्चेम्, “चु म्हीचे ल्हो-ल्हो य्हुल्की ख्ल लुमाकी बारेरी लोप्टीब र्हङ्ले म्रङ्मु” बी पङ्ज्यी। पावलचे येसुइ बारेरी ओसेम् थेङ् स्यीब ग्यम्से सोज्यीम् रेःबे बारेरी तम् लोप्टीबल तज्यीम् थेङ्यीमाचे चोले पङ्बल य्हीन्ब। 19 हुजु लीप्चे थेङ्यीमाचे पावलत अरीयोपागस् पङ्बे ङ्हच्छ्यङ् सभारी बोर्ज्यीम् पङ्ज्यी, “र्हङ्चे लोप्पे चु छार् तम् खतेब य्हीन्ब, ङ्यीमाचेनो गोब खम्बो स्यीम्? 20 तलेपङ्सम् एचे तेङेन्की तम्मा लोप्पल ङ्यीमाचे थ्येःबल मुब। चु तम्चे पङ्ब छ्येःबल ता? ङ्यीमाल गोबे सेम् मुब।” 21 तलेपङ्सम् एथेन्स्की म्हीमातेङ् हुजुरी टीबे ल्हो-ल्हो य्हुल्की म्हीमा छार्-छार् तम् पङ्बतेङ् ङ्येन्ज्यीम् दीन् य्हर्नलब मुबल। 22 होत्तज्यीम् पावलचे अरीयोपागसकी सभाकी ङोन्री रप्ज्यीम् चोले पङ्ज्यी, “एथेन्स् सहर्की म्हीमा, ङचे एङ्यीमाचे धर्मइ जम्मनो तम्मा ज्यनले म्हन्दीबल म्रङ्बल मुब। 23 तलेपङ्सम् ङचे चु सहर् कोर्ज्यीम् ब्रमम् एङ्यीमाकी ख्ल लुत तेन्बे ग्लामाएनो म्रङ्ज्यी। ओसेम् बेदी गीःरीम्, ‘अस्येःबे ख्लइ लागीरी’ बी ठाज्यीम् ब्रीबलएनो म्रङ्ज्यी। होत्तज्यीम् अस्येननो एङ्यीमाचे तेन्टीबे हुजु पर्मेस्वर्की बारेरी एङ्यीमात स्येत्प। 24 चु जम्बुलीङ्तेङ् जम्बुलीङ्री मुबे जम्मनो स्हेमा स्य्हेङ्जेत्पे पर्मेस्वर् जम्बुलीङ्तेङ् स्वर्गलएनो प्रभु य्हीन्ब। थेङ् म्हीमाकी याचे स्य्हेङ्बे दीम्री अस्य्हु। 25 ओसेम् म्हीमाकी याचे पीन्बे तइ स्हेएनो पर्मेस्वर्त अतो। तलेपङ्सम् थेङ्चेनो म्हीमात जीवन्तेङ् बुः ओसेम् जम्मनो स्हेमा न्हङ्जेत्प। 26 थेङ्चेनो म्ही गीः ग्यम्से जम्बुलीङ्की जम्म ग्लामारी टीबे लागीरी जम्म जातीमात स्य्हेङ्जेत्ज्यी। ओसेम् थेङ्यीमा सोबे बेलोतेङ् टीबे ग्लाएनो तेत् लपीन्जेत्ज्यी। 27 म्हीमाचे पर्मेस्वर्त म्हइखइ ओसेम् र्होदोक्ज्यीम् यङ्ब खम्खइ बी थेङ्चे चोले स्य्हेङ्जेत्पल य्हीन्ब। तर पर्मेस्वर् ङ्य्हङ्मा जम्म ग्यम्से थारीङ् अरे। 28 तलेपङ्सम् ङ्य्हङ्मा थेङ्तेङ् सोब ओसेम् थेङ्तेङ्नो तोर्मोर् ब्रब। चु तम्की बारेरी एङ्यीमाकी कबीमाचे चोले पङ्बल मुब, ‘देमेन्नो ङ्य्हङ्मा थेङ्की सन्तान्नो य्हीन्ब।’ 29 चोले ङ्य्हङ् पर्मेस्वर्की सन्तान तबल तज्यीम् पर्मेस्वर्त म्हर् म्हुइतेङ् युङ्बमाचे स्य्हेङ्बे ख्ल र्हङ्ब य्हीन्ब बी म्हेन्ब अत। हुजुमाम् म्हीचे सेम्री म्हेन्ज्यीम् थेङ्यीमाइ स्यीप्चे स्य्हेङ्बल य्हीन्ब। 30 होत्तज्यीम् ङोन्ग्यम् पर्मेस्वर्त अस्य्हेन अगोन म्हीमाचे स्य्हेङ्बे लक्मात थेङ्चे व्हल् स्य्हेङ्अजेत्। तर देरेम् पर्मेस्वर्चे जम्म म्हीमात, ‘पस्चताप स्य्हेङ्ज्यीम् पर्मेस्वर् पट्टी दोःगो’ बी कुल्जेत्पल मुब। 31 तलेपङ्सम् जम्बुलीङ्की न्याय स्य्हेङ्बे दीन् थेङ्चे तेत् लपीन्जेत्पल मुब। हुजु दीन्री थेङ्चे दम्जेत्पे म्हीचे म्हीमाल ठीक् न्याय स्य्हेङ्जेत्स्ये मुब। थेङ्चे दम्जेत्पे म्हीत न्याय स्य्हेङ्बे अधीकार् मुब बी म्हीमात ङोन्बे लागीरी पर्मेस्वर्चे थेङ्त स्यीब ग्यम्से सोनलजेत्पल मुब।” 32 स्यीब ग्यम्से सोज्यी पङ्बे तम् थ्येःज्यीम् डेत्-डेत्चे पावलत खीसइतीज्यी। तर डेत्-डेत्चेम्, “र्हङ्चे पङ्बे चु तम् ङ्यीमात देबेएनो ङ्येन्गे म्हेन्ज्यी” बी पङ्ज्यी। 33 हुजु लीप्चे पावल थेङ्यीमा ग्यम्से डोङ्ज्यीम् य्हर्ज्यी। 34 डेत्-डेत् म्हीमा थेतेङ् बक्च्य ङ्यीज्यी ओसेम् प्रभुत बीस्वास् लज्यी। थेङ्यीमा न्हङ्री अरीयोपागस् सभाकी सदस्य डीयनुसीयसतेङ् दमारीस पङ्बे अमकोल मुबल। थेङ्यीमा बीम ल्होल्होएनो डेत्-डेत्चे प्रभुत बीस्वास् स्य्हेङ्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.