प्रेरीत् 16 - पश्चिम तामाङपावलतेङ् सीलास तीमोथीतेङ् खदु तबल 1 पावल डर्बी सहर्से तज्यीम् लुस्त्रा सहर्रीएनो ङ्यीज्यी। लुस्त्रारी तीमोथी पङ्बे डब गीः टीब मुबल। थेइ अमएनो प्रभुत बीस्वास् स्य्हेङ्बे यहुदी मुबल। तर थेइ अपमी ग्रीक मुबल। 2 लुस्त्रातेङ् आइकोनीयन् पङ्बे ग्लारी मुबे बीस्वासीमाचे तीमोथीत ज्यबे म्ही पङ्ब मुबल। 3 पावलचे तीमोथीत बक्च्य बोर्बे सेम् लज्यी। ओसेम् पावलचे थेत बोर्ज्यीम् खतना स्य्हेङ्पीन्ज्यी, तलेपङ्सम् हुजु ग्लारी टीबे यहुदीमा जम्मचेनो थेइ अप ग्रीक् य्हीन्ब बी स्येःब मुबल। 4 हुजु लीप्चे थेङ्यीमा सहर्-सहर्मारी ङ्यीज्यी। ओसेम् थेङ्यीमाचे बीस्वासीमात यरुसलेमकी प्रेरीतमातेङ् अगुवामाचे पीन्बे नीयम्मा स्येत्ज्यी, ओसेम् थेङ्यीमात हुजु नीयम्मा र्हङ्ले ब्रउ बी पङ्ज्यी। 5 चोले मन्डलीमाइ म्हीमाकी बीस्वास् कोङ्बोर्ज्यी। ओसेम् बीस्वासीमा दीन्लनो य्हक्को तबोर्ज्यी। त्रोआस सहर्री पावलकी दर्सन 6 पबीत्र आत्माचे पावलतेङ् सीलासत एसीया प्रदेस्री प्रचार स्य्हेङ्बरी ङ्यीअबुङ्बल तज्यीम् थेङ्य्ही फ्रीगीयातेङ् गलातीया प्रदेस् तज्यीम् य्हर्ज्यी। 7 ओसेम् थेङ्यीमा माइसीयाकी सान्री दोःब बीसेम् बीथीनीयाक्योर् ङ्यीब म्हइज्यी। तर येसुइ आत्माचे थेङ्यीमात ङ्यीअबुङ्। 8 होत्तज्यीम् थेङ्यीमा माइसीया तज्यीम् त्रोआस पङ्बे ग्लामोर् ङ्यीज्यी। 9 हुजु म्हुननो पावलचे दर्सन म्रङ्ज्यी। दर्सन्री थेत माकेडोनीयाकी म्ही गीःचे रप्ज्यीम्, “माकेडोनीयारी ब्योन्खज्यीम् ङ्यीमात र्हो स्य्हेङ्जेतो” बी पङ्ज्यीम् फ्या लटीबल म्रङ्ज्यी। 10 पावलचे चोतेबे दर्सन म्रङ्ब साच्चेनो ङ्यीमा माकेडोनीयाक्योर् ङ्यीबरी छ्येज्यी। तलेपङ्सम् हुजु ग्लाकी म्हीमात ज्यबे सम्तर् स्येत्परी पर्मेस्वर्चे ङ्यीमात ङ्होत्जेत्पल य्हीन्ब पङ्बे तम् गोज्यी। लीडीया पङ्बे अमकोलइ बीस्वास् 11 ओसेम् ङ्यीमा त्रोआस ग्यम्से दोङ्ग क्रेत्ज्यीम् सामोथ्राके पङ्बे ग्लाक्योर् ङ्यीज्यी। ओसेम् न्हम्स्य्होर्हङ् नीयोपोलीस पङ्बे ग्लारी दोःज्यी। 12 ओसेम् हुजु ग्ला ग्यम्से ब्रज्यीम् माकेडोनीया प्रदेस्की फीलीप्पी पङ्बे ङ्हच्छ्यङ् सहर्री ङ्यीज्यी। हुजु सहर्री रोमीमाचे सासन् लब मुबल। हुजुरी ङ्यीमा तोवरेत् सम्म टीज्यी। 13 ओसेम् ङ्यीमा दुःब न्हबे दीन्री सहरसे डोङ्ज्यीम् स्योङ् यरी ङ्यीज्यी। ङ्यीमाचे हुजुरी यहुदीमा र्हुब् तज्यीम् प्रार्थना स्य्हेङ्बे ग्ला मुस्यील बी म्हेन्ब मुबल। ओसेम् ङ्यीमा हुजुरी टीज्यीम् र्हुब तबे डेत्-डेत् अमकोलमातेङ् तम् लब तीप्ज्यी। 14 हुजुरी ङ्यीमाइ तम् ङ्येन्बलमा न्हङ्री थीआटीरा सहरकी लीडीया पङ्बे अमकोल गीः मुबल। थेचे खवल ख पीङ् येन् छोङ् स्य्हेङ्ब मुबल। ओसेम् लीडीयाचे पर्मेस्वर्त तेन्ब मुबल। पावलचे पङ्बे तम् ज्यनले ङ्येन्ज्यीम् गोखइ बी प्रभुचे थेइ सेम् ठोङ्पीन्जेत्ज्यी। 15 हुजु लीप्चे लीडीयातेङ् थेइ दीम्की म्हेम्यमाचे बप्तीस्मा कीन्ज्यी। ओसेम् थेचे फ्या लज्यीम्, “थेङ्माचे ङत प्रभुत बीस्वास् स्य्हेङ्बे अङ म्हेन्सम् ङइ दीम्री ब्योन्खज्यीम् स्य्हुजेतो” बी पङ्ज्यीम् ङ्यीमात थेइ दीम्री ङ्यीबरी कर् लज्यी। पावलतेङ् सीलासत जेल्री च्युप्पल 16 तीरेत् ङ्यीमा प्रार्थना स्य्हेङ्बे ग्लारी य्हर्टीमम् ङ्यीमातेङ् बाना अमकोल गीः खदु तज्यी। थेत दुस्ट आत्मा स्यप्पल मुबल। ओसेम् थेचे हुजु म्हङ्की सक्ती ग्यम्से म्हुदु च्याज्यीम् थेइ न्याबोमात य्हक्को टङ छाज्यीम् पीन्ब मुबल। 17 ओसेम् हुजु अमकोल पावलतेङ् ङ्यीमाइ लीप्-लीप् खज्यीम् चोले क्रीङ्ज्यी, “चु म्हीमा गोदोब्न्हङ्की ङ्हच्छ्यङ् पर्मेस्वर्की योक्पोमा य्हीन्ब। चुमाचे एङ्यीमात मुक्ती यङ्बे ग्यम्की बारेरी स्येत्प।” 18 य्हक्को दीन्सम्म हुजु अमकोलचे होले पङ्स्यीनो टीबल तज्यीम् पावलत य्हक्को बोमो रप्ज्यी। ओसेम् पावलचे अमकोल पट्टी दोःज्यीम् हुजु दुस्ट आत्मात, “ङ एत कुल्ब, येसु ख्रीस्ट्की छेन्री चु अमकोलइ ल्ही ग्यम्से डोङ्ज्यीम् य्हरो” बी पङ्ज्यी। पावलचे होले पङ्ब साच्चेनो म्हङ् हुजु अमकोलइ ल्ही ग्यम्से डोङ्ज्यीम् य्हर्ज्यी। 19 तर योक्पो अमकोलइ न्याबोमाचे थेङ्यीमाकी टङ यङ्बे ग्यम् दुङ्बल म्रङ्ज्यीम् पावलतेङ् सीलासत चुङ्ज्यी। ओसेम् थेङ्य्हीत डुत्पोर्ज्यीम् म्हीमा र्हुब् तबे ल्हम्डरी सासक्माज बोर्ज्यी। 20 थेङ्यीमाचे पावलतेङ् सीलासत सहर्की हाकीम्माज बोर्ज्यीम् पङ्ज्यी, “चु यहुदी म्हीमाचे ङ्य्हङ्माकी सहर्की म्हीमात खइलबइल तनलटीब मुब। 21 थेङ्यीमाचे ङ्य्हङ्की रोमी नीयम्माचे स्य्हेङ्ब अतबे पे ठीम्मा लोप्टीब मुब।” 22 हुजु बेलोरीनो य्हक्को म्हीमाचे पावलतेङ् सीलासत बीरोद् लज्यी। ओसेम् सहर्की हाकीम्माचे पावलतेङ् सीलासकी येन् डेःलाज्यीम् थेङ्यीमात बेर्कचे ग्यङो पङ्ज्यीम् कुल्ज्यी। 23 थेङ्यीमाचे थेङ्य्हीत य्हक्को तोज्यीम् जेल्री च्युप्ज्यी। ओसेम् जेल्चे छ्योङ्य्हर्ब अखम्नले च्युबो पङ्ज्यीम् जेल्की हाकीम्त कुल्ज्यी। 24 चोले पङ्बल तज्यीम् जेल्की हाकीम्चे पावलतेङ् सीलासत जेल्खनइ न्हङ्पे न्हङ्की कोठरी बोर्ज्यीम् थेङ्य्हीकी कङ्री स्यीङ्की कङ्ता जङ्ज्यीम् थेन्ज्यी। 25 म्हुन गुङ्री पावलतेङ् सीलास प्रार्थना स्य्हेङ्ज्यीम् पर्मेस्वर्की व्हइ कोज्यीम् पर्मेस्वर्त तोप्टीबल मुबल। ओसेम् जेल्री च्युप्पे ल्हो-ल्हो म्हीमामी ङ्येन्टीब मुबल। 26 हुजु बेलोरीनो ङ्हच्छ्यङ् सङ्गुल् खज्यी। ओसेम् जेल्की जग्मा य्होङ्ज्यीम् म्रप्मा जम्मनो ठोङ्य्हर्ज्यी, जेल्री च्युप्लमात खीज्यीम् थेन्बे च्यल्दमाएनो प्लोक्य्हर्ज्यी। 27 ओसेम् जेल्की हाकीम् छोर्खज्यीम् च्यामम् जेल्की म्रप्मा ठोङ्बल म्रङ्ज्यी। ओसेम् जेल्री च्युप्ज्यीम् थेन्बलमा जम्मनो भाग्तीनेम् बी म्हेन्ज्यीम् र्हङ्चे र्हङ्तनो सेत्परी तर्वल तेत्ज्यी। 28 तर पावलचे बङ्ले पङ्ज्यी, “थेङ्चे र्हङ्त तएनो थलजेतो, ङ्यीमा जम्मनो चुरी मुब।” 29 चु थ्येःब बीसेम् हाकीम् मेतङ् र्हीत्ज्यीम् न्हङ्री छ्योङ्खज्यी, ओसेम् लोङ्ज्यीम् दर्-दर्ज्यीम् पावलतेङ् सीलासकी कङ्री पब्लु लज्यी। 30 हुजु लीप्चे हाकीम्चे थेङ्य्हीत दोरी बोर्ज्यीम् पङ्ज्यी, “मुक्ती यङ्बे लागीरी ङचे ता स्य्हेङ्थोःब?” 31 ओसेम् थेङ्यीमाचे, “प्रभु येसुत बीस्वास् स्य्हेङ्ज्यी पङ्सम् थेङ्तेङ् थेङ्की म्हेम्यमाचे मुक्ती यङ्स्ये मुब” बी पङ्ज्यी। 32 ओसेम् पावलतेङ् सीलासचे हाकीम्तेङ् थेइ दीम्री मुबे जम्म म्हीमात प्रभुइ फ्रोइ स्येत्ज्यी। 33 हुजु म्हुन्की म्हुन् गुङ्री जेल्की हाकीम्चे पावलतेङ् सीलासत ख्रुबे ग्लारी बोर्ज्यीम् थेङ्य्हीइ म्हग ख्रुपीन्ज्यी। होले स्य्हेङ्ब साच्चेनो थेतेङ् थेइ म्हेम्यमाचे बप्तीस्मा कीन्ज्यी। 34 हुजु लीप्चे हाकीम्चे पावलतेङ् सीलासत र्हङ्की दीम्न्हङ् बोर्ज्यीम् चब क्योङ्ज्यी। ओसेम् पर्मेस्वर्त बीस्वास् स्य्हेङ्बल तज्यीम् थेतेङ् थेइ म्हेम्यमा जम्मनो तङ्ज्यी। 35 न्हम्स्य्होर्हङ् स्य्होःरी सहर्की हाकीम्माचे पावलतेङ् सीलासत पीत्लागो पङ्ज्यीम् स्यीपाइमात जेल्की हाकीम्ज पीत्ज्यी। 36 होत्तज्यीम् जेल्की हाकीम्चे पावलत, “सहर्की हाकीम्माचे एतेङ् सीलासत पीत्लागो पङ्ज्यीम् कुल्बल मुब। होत्तज्यीम् ज्येन्ले ङ्यीउ” बी पङ्ज्यी। 37 तर पावलचे हुजु स्यीपाइमात पङ्ज्यी, “ङ्यी ङ्ही रोमी म्ही तन तननो ओसेम् तइ दोस्एनो अयङ्मेएनो म्हीमाइ ङोन्री ङ्यी ङ्हीत तोज्यी, ओसेम् जेल्री च्युप्ज्यी। देरेम् ङ्यीमात कुटीले पीत्लाब म्हइब? चोले अत, हुजु हाकीम्मानो खज्यीम् ङ्यीमात पीत्थोब।” 38 पावलतेङ् सीलासचे पङ्बे तम् स्यीपाइमाचे सहर्की हाकीम्मात स्येत्पीन्ज्यी। ओसेम् थेङ्य्ही रोमी म्ही मुबल टीम् बी थ्येःज्यीम् थेङ्यीमा लोङ्ज्यी। 39 होत्तज्यीम् थेङ्यीमा खज्यीम् थेङ्य्हीतेङ् क्षमा र्हीत्ज्यी। ओसेम् जेल्चे तेत्ज्यीम्, “ङ्यीमाइ सहर् पीत्ज्यीम् स्येगो” बी फ्या लज्यी। 40 ओसेम् जेल्चे डोङ्ब बीसेम् पावलतेङ् सीलास लीडीयाकी दीम्री ङ्यीज्यी। हुजुरी थेङ्य्हीचे बीस्वासीमातेङ् खदु लज्यीम् थेङ्यीमात आर् पीन्ज्यी, ओसेम् हुजु ग्लाचे डोङ्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.