प्रेरीत् 15 - पश्चिम तामाङयरुसलेमकी सभा 1 पावलतेङ् बारनाबास एन्टीओखीयारी मुबे बेलोरी डेत्-डेत् म्हीमा यहुदीया प्रदेस् ग्यम्से हुजुरी खज्यीम् बीस्वासीमात, “एङ्यीमाचे मोसाचे ब्रीबे पर्मेस्वर्की नीयम् अनुसार् खतना अस्य्हेङ्गदे सम्म एङ्यीमाचे मुक्ती अय्हङ्” पङ्ज्यीम् लोप्टीब मुबल। 2 ओसेम् पावलतेङ् बारनाबास थेङ्यीमाकी तम्तेङ् अथुन्ज्यीम् थेङ्यीमातेङ् य्हक्को तम् ज्योप्ज्यी। होत्तज्यीम् एन्टीओखीयाकी मन्डलीचे बारनाबासतेङ् पावल ओसेम् डेत्-डेत् बीस्वासीमात चु तम्की बारेरी ङ्योत्परी यरुसलेमरी मुबे प्रेरीतमातेङ् अगुवामाज पीत्परी दम्ज्यी। 3 ओसेम् मन्डलीकी म्हीमाचे थेङ्यीमात हुजु ग्ला ग्यम्से पीत्ज्यी। थेङ्यीमा फोनीकेतेङ् सामरीया पङ्बे ग्ला तज्यीम् ङ्यीबे बेलोरी हुजु ग्लामारी मुबे बीस्वासीमात यहुदी अय्हीन्बे म्हीमाचेएनो पर्मेस्वर्त बीस्वास् लज्यी पङ्बे तम् स्येत्ज्यी। चु तम् थ्येःज्यीम् हुजु ग्लामारी मुबे बीस्वासीमा य्हक्को तङ्ज्यी। 4 थेङ्यीमा यरुसलेम दोखब बीसेम् हुजुरी मुबे मन्डलीमातेङ् प्रेरीतमा ओसेम् एल्डरमाचे थेङ्यीमात स्वागत स्य्हेङ्ज्यी। ओसेम् पावलतेङ् बारनाबासचे पर्मेस्वर्चे थेङ्य्ही ग्यम्से स्य्हेङ्जेत्पे जम्मा लक्माइ बारेरी हुजुरी र्हुब तबलमात स्येत्पीन्ज्यी। 5 तर फरीसी समुहकी डेत्-डेत् बीस्वासीमाचे रप्ज्यीम्, “यहुदी अय्हीन्बे बीस्वासीमातएनो मोसाचे ब्रीबे पर्मेस्वर्की नीयम् अनुसार् खतना स्य्हेङ्पुङ्थोल” बी पङ्ज्यी। 6 ओसेम् फरीसीमाचे पङ्बे चु तम् ज्योप्परी प्रेरीतमातेङ् मन्डलीइ अगुवामा र्हुब तज्यी। 7 थेङ्यीमान्हङ्री य्हक्को तम् ज्योप्प बीसेम् पत्रुसचे रप्ज्यीम् पङ्ज्यी, “अज्यो-अलेमा, थेङ्माचे स्येःबलनो मुब, तोव बेलो ङोन्ग्यम् यहुदी अय्हीन्बे म्हीमाचेएनो ज्यबे सम्तर् थ्येःज्यीम् मुक्ती यङ्खइ बी पर्मेस्वर्चे ङत र्हङ्मा न्हङ्चे दम्जेत्पल मुब। 8 ओसेम् जम्मानो म्हीमाइ सेम्की तम् खेम्जेत्पे पर्मेस्वर्चे ङ्य्हङ्मात न्हङ्जेत्प र्हङ्लेनो यहुदी अय्हीन्बे म्हीमातएनो पबीत्र आत्मा न्हङ्जेत्ज्यी। चोले पर्मेस्वर्चे ग्रहन् स्य्हेङ्ज्यीम् थेङ्यीमातएनो र्हङ्ल बी ङोन्जेत्ज्यी। 9 “पर्मेस्वर्चे यहुदीमातेङ् यहुदी अय्हीन्बे म्हीमाकी गुङ्री सो-सो स्य्हेङ्अजेत्। तर थेङ्यीमाचे स्य्हेङ्बे बीस्वास् ग्यम्सेनो थेङ्यीमाकी सेम्त चोखो स्य्हेङ्ज्यी। 10 होत्तज्यीम् तले यहुदी अय्हीन्बे बीस्वासीमात चु दोत् कल्पीन्ज्यीम् पर्मेस्वर्त बोमो रप्न लब? तलेपङ्सम् चु दोत् न्ह ङ्य्हङ्की अखी म्हेमेमाचे नाखम्ज्यी न्ह ङ्य्हङ्माचे। 11 होले स्य्हेङ्ब अत, थेङ्यीमाएनो ङ्य्हङ्माचे र्हङ्लेनो बीस्वास् स्य्हेङ्ज्यीम् प्रभु येसुइ अनुग्रह यङ्ज्यीम् थर्बलमा य्हीन्ब।” 12 चु तम् थ्येःज्यीम् हुजुरी र्हुब् तबलमा जम्मनो कुटी टीज्यी। ओसेम् पावलतेङ् बारनाबासचे यहुदी अय्हीन्बे म्हीमाइ गुङ्री पर्मेस्वर्चे थेङ्य्ही ग्यम्से स्हेङ्बे जम्मनो तेङेन्की लक्मा स्येत्मम् हुजुरी र्हुब तबलमाचे ङ्येन्ज्यीम् टीज्यी। 13 पावलतेङ् बारनाबासचे पङ्ज्यीन्ब बीसेम् याकुबचे रेःज्यीम् चोले पङ्ज्यी, “अज्यो-अलेमा ङइ तम् ज्यनले ङ्येन्जेतो, 14 पर्मेस्वर्चे यहुदी अय्हीन्बे म्हीमात दम्ज्यीम् र्हङ्की म्ही स्य्हेङ्जेत्ज्यी। चु तम्मी सीमोन पत्रुसचे दोलोनो स्येत्ज्यीन्ज्यी। 15 चु तम्तेङ् अगम्बक्तमाकी फ्रोइएनो डीःबल मुब। ओसेम् अगम्बक्तमाकी छ्येरी चोले ब्रीबल मुब- 16 ‘चु लीप्चे ङ दोःज्यीम् युस्ये मुब, ओसेम् दाऊदकी फुप्पे दीम् देबेएनो स्य्हेङ्स्ये मुब। ङ हुजु दीम् देबेएनो स्य्हेङ्ज्यीम् कोङ्न लस्ये मुब। 17 होलेनो ल्हो-ल्हो म्हीमातेङ् यहुदी अय्हीन्बे म्हीमा जम्मचेनो ङत म्हइखइ, थेङ्यीमा जम्मतनो ङचे ङइ म्ही तबरी ङ्होत्पल मुब।’ 18 चु तम् परमप्रभुचे दङ्बो य्हङ्सेनो म्हीमात स्येन लजेत्पल मुब। 19 “होत्तज्यीम् पर्मेस्वर्पट्टी खबे यहुदी अय्हीन्बे म्हीमात ङ्य्हङ्चे दुख पीन्ब अत पङ्बे सेम् ङल मुब। 20 बरु थेङ्यीमात चु तम्मा ब्रीज्यीम् पीत्के- ‘ख्लत पीन्ज्यीम् असुद्द तबे चब थचउ, ब्यभीचार् थस्य्हेङो ओसेम् खार ङ्य्हेप्ज्यीम् सेत्पे सेम्ज्येन्की स्य थचउ ओसेम् तइलेएनो का थचउ।’ 21 तलेपङ्सम् सहर्मा जम्मरीनो यहुदीमा र्हुब् तबे दीम्मारी दीनइलनो दुःब न्हबे दीन्मारी दङ्बो य्हङ्सेनो मोसाचे ब्रीबे पर्मेस्वर्की नीयम्मा लोप्टीबल मुब।” यहुदी अय्हीन्बे बीस्वासीमात ब्रीबे चीठी 22 हुजु लीप्चे प्रेरीतमातेङ् अगुवामा ओसेम् मन्डलीइ म्हीमा जम्मनो डीःज्यीम् म्ही ङ्हीत दम्ज्यीम् पावलतेङ् बारनाबासतेङ् बक्च्य एन्टीओखीयारी पीत्पे सेम् लज्यी। हुजु दम्बल ङ्हीमी यहुदा पङ्बे बारनाबासतेङ् सीलास मुबल। थेङ्य्हीनो मन्डलीइ अगुवा मुबल। 23 ओसेम् थेङ्यीमातेङ् चोतेबे चीठी ब्रीज्यीम् पीत्ज्यी- “एन्टीओखीयातेङ् सीरीया ओसेम् कीलीकीयारी मुबे एङ्यी यहुदी अय्हीन्बे बीस्वासीमात ङ्यीमा प्रेरीतमातेङ् अगुवामा ओसेम् एङ्यीमाइ अज्यो-अलेमा ग्यम्से फ्याफुल्ल। 24 ङ्यीमाचे लोपो अपङ्ननो ङ्यीमान्हङ्चे डोङ्बे डेत्-डेत् म्हीमाचे एङ्यीमात अतबे तम्मा लोप्ज्यीम् य्हक्को दुख पीन्बल मुब रो बी ङ्यीमाचे थ्येःबल मुब। तर हुजु म्हीमात ङ्यीमाचे पीत्खबल अय्हीन्। 25 होत्तज्यीम् ङ्यीमा जम्मनो र्हुब् तज्यीम् डीःज्यीम् डेत्-डेत् म्हीमात दम्ज्यीम् पावलतेङ् बारनाबासतेङ् बक्च्य एङ्यीमाज पीत्खब ज्यब म्हेन्ज्यी। 26 चु म्ही ङ्य्हीचेम् प्रभु येसु ख्रीस्ट्की लागीरी र्हङ्की ल्हीएनो पीन्ब छ्येबल मुबल। 27 होत्तज्यीम् ङ्यीमाचे यहुदातेङ् सीलासतएनो एङ्यीमाज पीत्खबल मुब। थेङ्य्हीचेएनो चु ब्रीबे तम्मा एङ्यीमात स्येत्स्ये मुब। 28 तलेपङ्सम् ङ्येन्नोथोबे तम्मा बीम् ल्हो-ल्हो तम्मा एङ्यीमात नाअबुङ्ब ज्यब तब बी ङ्यीमातेङ् पबीत्र आत्माचे म्हेन्ज्यी। 29 एङ्यीमाचे ङ्येन्थोबे तम्मा चुनो य्हीन्ब- एङ्यीमाचे ख्लत ठा पीन्बे तइ स्हेएनो थचउ, तइलेनो का थचउ, खारी ङ्य्हेप्ज्यीम् सेत्पे जन्तुइ स्य थचउ ओसेम् ब्यभीचार् थस्य्हेङो। चु तम्मा ङ्येन्ज्यी पङ्सम् एङ्यीमात ज्यब तब। देरेम् एङ्यीमात पङ्थोबल चोतेनो य्हीन्ब, फ्याफुल्ल।” 30 हुजु लीप्चे थेङ्यी ब्लीनो एन्टीओखीयारी ङ्यीज्यी। हुजुरी थेङ्यीमाचे जम्मनो बीस्वासीमा ग्ला गीरी र्हुब्ले ङ्होत्ज्यीम् हुजु चीठी थेङ्यीमात पीन्ज्यी। 31 ओसेम् बीस्वासीमाचे हुजु चीठीरी ब्रीबे आर् यङ्बे तम् खेत्प बीसेम् थेङ्यीमा य्हक्को तङ्ज्यी। 32 यहुदातेङ् सीलासएनो अगम्बक्तमा मुबल। थेङ्य्हीचे बीस्वासीमात आर् पीन्ज्यीम् थेङ्यीमाकी बीस्वास् कोङ्नलज्यी। 33 थेङ्यीमा हुजुरी तोवरेत् टीब बीसेम् हुजुरी मुबे बीस्वासीमाचे थेङ्यीमात थेङ्यीमा पीत्खबे ग्लारी ज्यनले दोःज्यीम् स्येगो पङ्ज्यीम् पीत्ज्यी। 34 [तर सीलासचेम् हुजुरी टीबे सेम् लज्यी।] 35 तर पावलतेङ् बारनाबासमी एन्टीओखीयारीनो टीज्यी। ओसेम् थेङ्य्हीचे ल्हो-ल्हो म्हीमातेङ् बक्च्य प्रभुइ फ्रोइ प्रचार स्य्हेङ्ज्यीम् म्हीमात लोप्ज्यी। पावलतेङ् बारनाबास फेःबल 36 तोवरेत् लीप्चे पावलचे बारनाबासत पङ्ज्यी, “ब्रे, ङ्य्हङ्चे ङोन्ग्यम् प्रभुइ फ्रोइ स्येत्पे सहर्माकी बीस्वासीमात खदु लबरी ङ्यीइ। ओसेम् थेङ्यीमा ता लटीब टीम् च्याङ्यीइ।” 37 बारनाबासचे मर्कुस पङ्बे युहन्नात बक्च्य बोर्बे सेम् लज्यी। 38 तर पावलचेम् मर्कुसत बक्च्य बोर्ब ज्यब अत म्हेन्ज्यी। तलेपङ्सम् मर्कुसचे लक् अबुत्ननो थेङ्यीमात पामफीलीया प्रदेस्री ख्लेथेन्ज्यीम् दोःखबल मुबल। 39 चु तम्री थेङ्य्ही य्हक्को अथुन्ज्यीम् फेःज्यी। ओसेम् बारनाबासचे मर्कुसत बोर्ज्यीम् दोङ्गरी क्रेत्ज्यीम् साइप्रस पङ्बे ग्लारी य्हर्ज्यी। 40 तर पावलचेम् सीलासत दम्ज्यी। हुजु लीप्चे बीस्वासीमाचे थेङ्यीमात प्रभुइ अनुग्रहरी सोप्तीपीन्ब बीसेम् थेङ्यीमा य्हर्ज्यी। 41 पावलतेङ् सीलास सीरीयातेङ् कीलीकीयारी मुबे मन्डलीमात बीस्वास्री कोङ्नलबोर्ज्यीम् य्हर्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.