प्रेरीत् 14 - पश्चिम तामाङआइकोनीयन् सहर्री पावलतेङ् बारनाबास 1 ओसेम् आइकोनीयन् सहर्री पावलतेङ् बारनाबासचे यहुदीमा र्हुब तबे दीम्री ङ्यीज्यीम् पर्मेस्वर्की फ्रोइ गोनले स्येत्ज्यी। ओसेम् यहुदीमातेङ् ल्हो-ल्हो म्हीमा य्हक्कोचेनो येसुत बीस्वास् स्य्हेङ्ज्यी। 2 तर बीस्वास् अस्य्हेङ्बे यहुदीमाचेम् यहुदी अय्हीन्बे म्हीमात फुलीइतीज्यीम् बीस्वासीमाकी बीरोद् स्य्हेङ्पुङ्ज्यी। 3 ओसेम् पावलतेङ् बारनाबास तोव दीन्सम्मनो हुजुरी टीज्यी। थेङ्य्हीचे प्रभुरी भर् लज्यी, ओसेम् प्रभुइ बारेरी आर् लज्यीम् स्येत्स्यीनो टीज्यी। ओसेम् प्रभुचे थेङ्य्हीत तेङेन्की लक्मातेङ् चीनोमा स्य्हेङ्बे सक्ती न्हङ्ज्यीम् थेङ्य्हीचे स्येत्पे अनुग्रहकी फ्रोइ देमेन्नो य्हीन्ब बी ङोन्जेत्ज्यी। 4 तर हुजु सहर्की म्हीमा थीज्यीम् डेत् यहुदीमा पट्टी, डेत् प्रेरीतमा पट्टी ङ्यीज्यी। 5 हुजु लीप्चे यहुदीमातेङ् ल्हो-ल्हो यहुदी अय्हीन्बे म्हीमाचे पावलतेङ् बारनाबासत अज्यबे व्यहोर् स्य्हेङ्ज्यीम् युङ्बचे प्रुङ्बरी थेङ्यीमाकी सासक्मातेङ् तम् डीःज्यी। 6 ओसेम् थेङ्य्हीचे चु तम् था यङ्ज्यीम् लुकोनीयाकी सहर्मा लुस्त्रा, डार्बी ओसेम् रेइ-रेइकी प्रदेस्मारी य्हर्ज्यी। 7 ओसेम् थेङ्य्हीचे हुजुरी प्रचार स्य्हेङ्स्यीनो टीज्यी। पावलतेङ् बारनाबास लुस्त्रातेङ् डर्बी सहर्री 8 लुस्त्रा सहर्री स्हेलेन्दी म्ही गीः मुबल। थे न्हब य्हङ्सेनो स्हेलेन्दी मुबल तज्यीम् खेमेएनो ब्रबल अरेबल। 9 पावलचे पङ्बे तम्मा थेचे ज्यनले ङ्येन्टीब मुबल। पावलचे थेइ लीःरी ज्यनले च्याज्यी। ओसेम् हुजु म्हीतेङ् थे फेन्ब खम्ब पङ्बे बीस्वास् म्रङ्ज्यी। 10 ओसेम् पावलचे केत् ङ्हच्छ्यङ् तेत्ज्यीम्, “एइ कङ् जुःज्यीम् रपो” बी पङ्ज्यी। ओसेम् हुजु म्ही फोत् रेःज्यीम् ब्रब तीप्ज्यी। 11 ओसेम् पावलचे चोतेबे लक् स्य्हेङ्बल म्रङ्ज्यीम् म्हीमाचे लुकानीयाकी ग्योत्री क्रीङ्ज्यीम्, “ख्लमा म्हीइ रुप्री ङ्य्हङ्माज खनेम्” बी पङ्ब तीप्ज्यी। 12 थेङ्यीमाचे बारनाबासत जीउस पङ्बे ख्ल ओसेम् पावलत हर्मेस् पङ्बे ख्ल पङ्ब छ्येज्यी। तलेपङ्सम् पावल तम पङ्बे ङ्हच्छ्यङ् म्ही मुबल। 13 सहर्की रेइरी जीउस ख्लइ दीम् मुबल। हुजु ख्लइ दीम्की लम्बुचे म्हेन्दो मालातेङ् ग्लबमा बज्यीम् सहर्की म्रप्री खज्यी। तलेपङ्सम् हुजुरी मुबे म्हीमातेङ् डीःज्यीम् थेङ्यीमाचे ठा पीन्बे सेम् लज्यी। 14 तर प्रेरीतमा बारनाबासतेङ् पावलचे चु तम् स्येःब बीसेम् थेङ्य्हीचे र्हङ्-र्हङ्की येन् डेःज्यीम् म्हीमाइ गुङ्री छ्योङ्य्हर्ज्यीम् क्रीङ्ज्यीम् चोले पङ्ज्यी, 15 “एङ्यीमाचे चोतेब तले स्य्हेङ्बल? ङ्यीमाएनो एङ्यीमा र्हङ्बे म्हीनो य्हीन्ब। एङ्यीमाचे चु अतबे लक्मा ख्लाज्यीम् सोम्बो पर्मेस्वर्पट्टी दोःखइ बी ज्यबे सम्तर् स्येत्परी ङ्यीमा चुरी खबल य्हीन्ब। हुजु पर्मेस्वर्चेनो स्वर्ग, जम्बुलीङ् ओसेम् समुन्द्रतेङ् हुजुरी मुबे जम्मा स्हेमा स्य्हेङ्जेत्ज्यी। 16 दङ्बो पर्मेस्वर्चे जम्मनो जात्की म्हीमात र्हङ्-र्हङ्की पेठीम् अनुसारनो ब्रबुङ्जेत्ज्यी। 17 तर पर्मेस्वर्चे खेमेएनो र्हङ्की ज्यबे लक् स्य्हेङ्ब अपीत्नले मु ग्यम्से नम् पीत्युजेत्ज्यीम् बेलोरीनो य्हक्को अन्नमा रोःनलजेत्ज्यी। ओसेम् य्हक्को चबे स्हे न्हङ्ज्यीम् म्हीमाकी सेम् तङ्नलजेत्ज्यी। चु लक्चेनो पर्मेस्वर्की साक्षी पीन्बल मुब।” 18 चु तम्मा पङ्लेनो पावलतेङ् बारनाबासचे म्हीमाचे थेङ्य्हीत पीन्ब म्हइबे ठा ग्यम्से य्हक्को गारोले र्होद् खम्ज्यी। 19 हुजु लीप्चे एन्टीओखीयातेङ् आइकोनीयन् पङ्बे ग्लाचे डेत्-डेत् यहुदीमा हुजुरी खज्यी। ओसेम् पावलत युङ्ब प्रुङो पङ्ज्यीम् थेङ्यीमाचे हुजुरी मुबे य्हक्को म्हीमात फुलीइतीज्यी। ओसेम् म्हीमाचे पावलत युङ्बचे प्रुङ्ज्यी। थेङ्यीमाचे पावलत स्यीज्यी पङ्ज्यीम् सहर् ग्यम्से फीर्च्योर् डुत्पोर्ज्यीम् ख्लाथेन्ज्यी। 20 तर बीस्वासीमा पावलकी कोरोरो र्हुब् तमम् थे रेःज्यीम् ज्यीद सहर्न्हङ् दोःय्हर्ज्यी। ओसेम् न्हम्स्य्होर्हङ् थे बारनाबासतेङ् बक्च्य डर्बी सहर्री ङ्यीज्यी। सीरीया प्रदेस्की एन्टीओखीया सहर्री दोःज्यीम् ङ्यीबल 21 पावलतेङ् बारनाबासचे डर्बी पङ्बे सहर्री य्हक्को म्हीमात ज्यबे सम्तर् स्येत्ज्यीम् प्रभुरी बज्यी। हुजु लीप्चे थेङ्य्ही लुस्त्रातेङ् आइकोनीयन् ग्यम्से तज्यीम् पीसीदीयाकी एन्टीओखीया सहर्री दोःज्यीम् ङ्यीज्यी। 22 थेङ्य्हीचे हुजु ग्लामारी मुबे बीस्वासीमात बीस्वास्री कोङ्नलज्यीम् खेम पङ्लेनो बीस्वास्री टीउ बी आर् पीन्ज्यीम् पङ्ज्यी। ओसेम्, “पर्मेस्वर्की य्हुल्री वङ्ब बीम ङोन्ग्यम् ङ्य्हङ्चे दुख नाथोब” पङ्बे तम् थेङ्यीमात लोप्ज्यी। 23 ओसेम् पावलतेङ् बारनाबासचे मन्डली र्हङ्स्यीनो अगुवामा दम्ज्यी। ओसेम् ङ्यीम्बु टीज्यीम् प्रार्थना स्य्हेङ्ज्यीम् थेङ्यीमात र्हङ्चे बीस्वास् स्य्हेङ्बे प्रभुइ फ्यारी सोप्तीपीन्ज्यी। 24 हुजु लीप्चे थेङ्य्ही पीसीदीया प्रदेस् तज्यीम् पामफीलीया प्रदेस्री खज्यी। 25 ओसेम् पर्गा पङ्बे ग्लारी पर्मेस्वर्की फ्रोइ स्येत्ज्यीम् अटालीया पङ्बे सहर्री य्हर्ज्यी। 26 थेङ्य्ही अटालीया ग्यम्से दोङ्ग क्रेत्ज्यीम् एन्टीओखीया सहर्री दोःखज्यी। हुजु सहर्रीनो बीस्वासीमाचे पावलतेङ् बारनाबासत पर्मेस्वर्की अनुग्रहरी सोप्तीज्यीम् पर्मेस्वर्की फ्रोइ स्येत्पे लक्री पीत्पल मुबल। ओसेम् हुजु लक् बुत्ज्यीम् थेङ्य्ही हुजुरीनो दोःखज्यी। 27 एन्टीओखीयारी दोखब बीसेम् पावलतेङ् बारनाबासचे मन्डलीकी म्हीमा जम्मत र्हुब्ले ङ्होत्ज्यी। ओसेम् पर्मेस्वर्चे थेङ्य्ही ग्यम्से स्य्हेङ्जेत्पे लक्मातेङ् थेङ्चेनो यहुदी अय्हीन्बे म्हीमाचेएनो बीस्वास् स्य्हेङ्बे ग्यम् ङोन्पीन्जेत्ज्यी बी थेङ्यीमात स्येत्ज्यी। 28 ओसेम् थेङ्यीमा हुजुरीनो बीस्वासीमातेङ् बक्च्य य्हक्को दीन् सम्मनो टीज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.