प्रेरीत् 13 - पश्चिम तामाङबार्नाबासतेङ् साउलत दम्बल 1 एन्टीओखीया सहर्की मन्डलीरी अगमबक्तामातेङ् लोप्पोन्मा मुबल। थेङ्यीमा बारनाबासतेङ् म्लङ्तुङ् पङ्बे सीमीयोन ओसेम् कुरेनी सहरकी लुकीयसतेङ् साउल ओसेम् सासक हेरोदतेङ् बक्च्य छर्बे मनेन मुबल। 2 थेङ्यीमा ङ्यीम्बु टीज्यीम् पर्मेस्वर्त तेन्टीबे बेलोरी पबीत्र आत्माचे थेङ्यीमात, “बारनाबासतेङ् साउलत ङइ लागीरी फेःगो, ङचे थेङ्य्हीत ङइ लक् स्य्हेङ्बे लागीरी दम्बल मुब” बी सुङ्ज्यी। 3 होत्तज्यीम् थेङ्यीमाचे ङ्यीम्बु टीज्यीम् प्रार्थना स्य्हेङ्ज्यी। ओसेम् थेङ्य्हीइ जोरी या थेन्ज्यीम् प्रभुइ लक् स्य्हेङ्बरी पीत्ज्यी। साइप्रसरी बारनाबासतेङ् साऊल 4 पबीत्र आत्माचे पीत्जेत्पल तज्यीम् बारनाबासतेङ् साऊल सीलुकीयारी ङ्यीज्यी। ओसेम् हुजु ग्ला ग्यम्से थेङ्य्ही दोङ्गरी क्रेत्ज्यीम् साइप्रसक्योर् ङ्यीज्यी। 5 ओसेम् सलामीस सहर्री दोखब बीसेम् थेङ्य्हीचे यहुदीमा र्हुब तबे दीम्मारी पर्मेस्वर्की फ्रोइ स्येत्ज्यी। थेङ्य्हीत र्हो लबरी मर्कुस पङ्बे युहन्ना बक्च्य मुबल। 6 ओसेम् थेङ्यीमा समुन्द्र गुङ्की खर्बे स ग्यम्से तज्यीम् पाफोस सहर् सम्म दोःज्यी। हुजुरी थेङ्यीमाचे बार-येसु पङ्बे जादु ङोन्बे म्ही गीःत खतु तज्यी। थेचे र्हङ् अगम्बक्त य्हीन्ब पङ्ज्यीम् भ्यु पङ्ब मुबल। 7 हुजु जादु ङोन्बे म्ही साइप्रस प्रदेस्की सासक सर्गीयस पौलुस पङ्बे म्हीइ र्हो मुबल। हुजु सर्गीयस पौलुस स्येब खेबे म्ही मुबल। थेचे पर्मेस्वर्की फ्रोइ ङ्येन्बे सेम् लज्यीम् साऊलतेङ् बारनाबासत ङ्होत्परी म्ही पीत्ज्यी। 8 तर जादु ङोन्बे म्ही एलुमास्चे (ग्रीक् ग्योत्री थेइ मीन्की अर्थ चु य्हीन्ब) साऊलतेङ् बारनाबासकी तम्त बीरोद् लज्यीम् सर्गीयस पौलुसचे थेङ्य्हीइ तम्त बीस्वास् अलखइ बी गु:ब म्हइज्यी। 9 हुजु लीप्चे साऊल, थेत पावलएनो पङ्ब, थे पबीत्र आत्माचे प्लीङ्ज्यीम् हुजु जादु ङोन्बे म्हीत तकातक्ले च्याज्यीम् पङ्ज्यी, 10 “ए दुस्टइ कोल, ओसेम् जम्मनो भ्युतेङ् छल्की तम्माचे प्लीङ्बलतेङ् जम्मनो ज्यबे तम्की सत्तुर्! तले एचे पर्मेस्वर्की तङ्तङ् ग्यम्त कोक्त स्य्हेङ्ब अपीत्पल? 11 प्रभुचे एत देरेनो सजाय न्हङ्बल मुब। ए तोव बेलोसम्म कन तज्यीम् दीनीइ य्हल्एनो म्रङ्स्ये अरे!” होलेपङ्ब साच्चेनो मुक्प खज्यीम् एलुमासकी मीः गप्ज्यी। ओसेम् थेचे तेएनो म्रङ्अखम्। ओसेम् थेत खल्चेए या चुङ्ज्यीम् सेमुवा बी तोर्मोर् र्होदोक्ज्यी। 12 चोले तबल म्रङज्यी, ओसेम् प्रभुइ बारेरी लोप्पे तम्री सर्गीयस य्हक्को तेङेन् तज्यी। ओसेम् थेचे येसुत बीस्वास् स्य्हेङ्ज्यी। पावलचे एन्टीओखीया सहर्री ज्यबे सम्तर् स्येत्पल 13 पावलतेङ् थेइ र्होमा पाफोस सहर् ग्यम्से दोङ्गरी क्रेत्ज्यीम् पामफीलीया प्रदेस्की पर्गा पङ्बे सहर्री दोःज्यी। हुजुरी मर्कुस पङ्बे युहन्नाचे पावलतेङ् बारनाबासत ख्लेथेन्ज्यीम् यरुसलेमरी दोःय्हर्ज्यी। 14 पावलतेङ् बारनाबास पर्गा सहर् ग्यम्से डोङ्ज्यीम् पीसीदीया प्रदेस्की एन्टीओखीया सहर्री ङ्यीज्यी। ओसेम् थेङ्य्ही दुःब न्हबे दीन्री यहुदीमा र्हुब् तबे दीम्री ङ्यीज्यीम् टीज्यी। 15 मोसाचे ब्रीबे पर्मेस्वर्की नीयम्तेङ् अगम्बक्तमाचे ब्रीबे छ्ये खेत्ज्यीन्ब बीसेम् यहुदीमा र्हुब् तबे दीम्की ङ्हच्छ्यङ् म्हीमाचे पावलतेङ् बारनाबासत, “अले ङ्ही! एङ्य्हीतेङ् म्हीमात आर् पीन्बे फ्रोइमा मुसम् सुङ्जेतो” बी सम्तर् पीत्ज्यी। 16 होत्तज्यीम् पावल रेःज्यीम् याचे ल्हादब् लज्यीम् पङ्ज्यी, “इस्राएलकी म्हीमातेङ् पर्मेस्वर्त तेन्बे यहुदी अय्हीन्बे म्हीमा ङइ तम् ङ्येन्जेतो। 17 इस्राएलीमाकी पर्मेस्वर्चे ङ्य्हङ्की म्हेमेमात दम्जेत्ज्यी। ओसेम् मीस्र य्हुल्री टीबे बेलोरी ङ्हच्छ्यङ् तनलजेत्ज्यी। ओसेम् पर्मेस्वर्चे र्हङ्की ङ्हच्छ्यङ् सक्तीचे थेङ्यीमात मीस्र य्हुल् ग्यम्से तेत्ज्यीम् नोम्खजेत्ज्यी। 18 ओसेम् ल्हेगोर् सोम् स्यी ब्लीतीङ्सम्म उजाड-ग्लारी थेङ्यीमात स्य्हप्तो लजेत्ज्यी। 19 हुजु लीप्चे थेङ्चे कनान य्हुल्की जात ङ्यीस्की म्हीमात नास् लजेत्ज्यीम् हुजु य्हुल् ङ्य्हङ्की म्हेमेमात न्हङ्जेत्ज्यी। 20 होदे बेलो सम्मरी चार् सय पचास बर्स तज्यीन्बल मुबल। “हुजु लीप्चे पर्मेस्वर्चे थेङ्यीमाकी गुङ्री न्यायधीसमा न्हङ्जेत्ज्यी। ओसेम् न्यायधीसमाचे पालो-पालो लज्यीम् सामुएल अगम्बक्तइ बेलोसम्म न्याय स्य्हेङ्ज्यी। 21 हुजु लीप्चे म्हीमाचे ग्यल्बो र्हीत्ज्यी। होत्तज्यीम् पर्मेस्वर्चे बेन्यामीन खलक्की कीस पङ्बे म्हीइ ज साऊलत ल्हेगोर् सोम् स्यी ब्लीतीङ्सम्म थेङ्यीमाइ जोरी सासन् स्य्हेङ्पुङ्जेत्ज्यी। 22 ओसेम् लीक्यम् पर्मेस्वर्चे साऊलत तेत्लाजेत्ज्यीम् दाऊदत ग्यल्बो स्य्हेङ्जेत्ज्यी। दाऊदकी बारेरी पर्मेस्वर्चे चोले सुङ्बल मुबल, ‘ङचे यीसैकी ज दाऊदत ङइ सेम्से म्हेन्ब र्हङबनो यङ्ज्यी। ङचे थे ग्यम्से स्य्हेङ्ब म्हइबे लक्मा जम्मनो थेचे टोप्ले स्य्हेङ्स्ये मुब।’ 23 पर्मेस्वर्चे र्हङ्चे स्य्हेङ्जेत्पे बाचा अनुसार दाऊदकी सन्तान ग्यम्सेनो इस्राएलीमाकी लागीरी मुक्तीदाता येसुत पीत्युजेत्ज्यी। 24 येसुचे लक् चुःब बीम् ङोन्ग्यम् बप्तीस्मा पीन्बे युहन्ना खज्यीम् इस्राएलकी जम्म म्हीमात पाप ग्यम्से दोःज्यीम् बप्तीस्मा कीनो पङ्ज्यीम् प्रचार स्य्हेङ्ज्यी। 25 युहन्नाचे र्हङ्की लक् ज्यीन्ब म्हइबे बेलोरी चोले पङ्ज्यी, ‘एङ्यीमाचे ङत खल य्हीन्ब म्हेन्ब? एङ्यीमाचे ब्रेन्ज्यीम् टीबे म्ही ङ अय्हीन्, तर थेङ् ङ बीम् लीप्चे ब्योन्खटीब मुब। ओसेम् ङ थेङ्की पनेइ तन प्लोक्परीएनो जेःबल अरे।’ 26 “अब्राहामकी खलक्, ङइ अज्यो-अलेमा ओसेम् पर्मेस्वर्त तेन्बे यहुदी अय्हीन्बे म्हीमा, पर्मेस्वर्चे चु मुक्ती यङ्बे सम्तर् ङ्य्हङ्माकी लागीरीनो पीत्युजेत्पल मुब। 27 तर यरुसलेमरी टीबे म्हीमातेङ् थेङ्यीमाइ सासक्माचे येसुत अस्य्हे। ओसेम् थेङ्यीमाचे दुःब न्हबे दीन्मारी खेत्पे अगम्बक्तमाकी फ्रोइमा अगो। ओसेम् येसुत स्यीबे सजाय पीन्ज्यीम् अगम्बक्तमाचे पङ्बे तम् टोप्ले स्य्हेङ्ज्यी। 28 ओसेम् स्यीबे सजाय यङ्थोबे दोस् तएनो अयङ्लेएनो थेङ्यीमाचे येसुत सेत्थोब पङ्ज्यीम् पीलातसत पङ्ज्यी। 29 चोले धर्मइ छ्येःरी थेङ्की बारेरी ब्रीबे जम्म तम् टोप्ले स्य्हेङ्ब बीसेम् थेङ्यीमाचे थेङ्त क्रुस् ग्यम्से प्लोक्ज्यीम् दुरसरी थेन्ज्यी। 30 तर पर्मेस्वर्चे थेङ्त स्यीब ग्यम्से सोनलजेत्ज्यी। 31 येसु र्हङ्तेङ् बक्च्य गालील प्रदेस् ग्यम्से यरुसलेमरी खबलमातेङ् य्हक्को दीन्सम्नो म्रङ्खज्यी। ओसेम् देरेम् थेङ्यीमा इस्राएलकी म्हीमाकी लागीरी थेङ्त म्रङ्बे साक्षीमा य्हीन्ब। 32 ओसेम् पर्मेस्वर्चे ङ्य्हङ्की म्हेमेमातेङ् स्य्हेङ्जेत्पे बाचाइ बारेरी चु ज्यबे सम्तर् स्येत्परी ङ्यीमा एङ्यीमाज खबल मुब। 33 पर्मेस्वर्चे येसुत स्यीब ग्यम्से सोनलजेत्ज्यीम् ङ्य्हङ्माकी लागीरी ङ्य्हङ्की म्हेमेमातेङ् स्य्हेङ्जेत्पे बाचा टोप् स्य्हेङ्जेत्ज्यी। व्हइकी छ्येकी दोस्रो व्हइरी चोलेएनो ब्रीबल मुब, ‘ए ङइ ज य्हीन्ब, तीङी ङ एइ अप तबल मुब।’ 34 “पर्मेस्वर्चे येसुत स्यीब ग्यम्से सोनलजेत्ज्यीम् थेङ्की ल्हीःत खेमेएनो क्रम्नलअपुङ्जेत्स्येकी बारेरी चोले ब्रीबल मुब- ‘ङचे दाऊदत पीन्ल पङ्ज्यीम् बाचा स्य्हेङ्बे पबीत्र मोलम्मा ङ एङ्यीमात देमेन्नो पीन्स्ये मुब।’ 35 “ओसेम् व्हइकी छ्येःकी ल्हो-ल्हो व्हइरीएनो दाऊदचे पर्मेस्वर्त चोले पङ्बल मुब- ‘थेङ्चे र्हङ्त तेन्बे थेङ्की पबीत्र म्हीइ ल्हीत दुर्सरी क्रम्अपुङ्।’ 36 “चु तम् दाऊदचे र्हङ्की बारेरी पङ्बल अय्हीन्। तलेपङ्सम् दाऊदचे सोगदेसम्म पर्मेस्वर्चे थे ग्यम्से स्य्हेङ्ब म्हइबे लक्मा जम्मनो टोप्ले स्य्हेङ्ज्यीम् थे स्यीज्यी। ओसेम् थेत थेइ म्हेमेमातेङ् बुप्लाज्यीम् थेइ ल्ही क्रम्य्हर्ज्यी। 37 तर पर्मेस्वर्चे स्यीब ग्यम्से सोनलजेत्ज्यीम् येसुइ ल्हीःतमी क्रम्अपुङ्। 38 होत्तज्यीम् अज्यो-अलेमा, ङ्यीमा एङ्यीमात पङ्ब चु येसु ग्यम्सेनो म्हीमाकी पापमा क्षमा तब। 39 येसुत बीस्वास् स्य्हेङ्बे एङ्यीमा जम्मनो पापमा ग्यम्से थर्ज्यीम् धर्मी म्हीमा तबल मुब। मोसाचे ब्रीबे पर्मेस्वर्की नीयम् ग्यम्से एङ्यीमा धर्मी म्हीमा तअखम्। 40 होसीयार् तज्यीम् टीउ, अय्हीन् पङ्सम् अगम्बक्तचे ङोन्ग्यम्नो पङ्बे चु तम् एङ्यीमाइ जोरी खल- 41 ‘पर्मेस्वर्की फ्रोइत अखोबे म्हीमा, एङ्यीमा तेङेन् तउ, ओसेम् स्यीउ! तलेपङ्सम् एङ्यीमा मुबे बेलोरीनो ङ लक् गीः स्य्हेङ्स्ये मुब, हुजु लक्की बारेरी एङ्यीमात खल्चे स्येत्लेएनो एङ्यीमाचे खेमेएनो बीस्वास् स्य्हेङ्स्ये अरे।’” 42 पावलतेङ् बारनाबास यहुदीमा र्हुब् तबे दीम्न्हङ्चे डोङ्टीमम् म्हीमाचे “ल्हो-ल्हो दुःब न्हबे दीन्रीएनो खज्यीम् चु तम्माकी बारेरी ङ्यीमात लोप्पीनो” बी फ्या स्य्हु लज्यी। 43 सभा ज्यीन्ब बीसेम् यहुदीमातेङ् यहुदी धर्म म्हन्दीबे ल्हो-ल्हो यहुदी अय्हीन्बे य्हक्को म्हीमा पावलतेङ् बारनाबासकी लीप्चे ब्रज्यी। ओसेम् पावलतेङ् बारनाबासचे थेङ्यीमातेङ् तम् लज्यीम् थेङ्यीमात खेम पङलेएनो पर्मेस्वर्की अनुग्रहरी टीउ पङ्ज्यी। 44 ओसेम् ल्हो-ल्हो दुःब न्हबे दीन्री सहर्की जम्म म्हीमा पर्मेस्वर्की फ्रोइ ङ्येन्बरी खज्यी। 45 तर यहुदीमाचे हुजु य्हक्को म्हीमात म्रङ्ज्यीम् पावलतेङ् बारनाबासत स्हेर्ज्यी। ओसेम् थेङ्यीमाचे पावलचे पङ्बे तम्त भ्यु य्हीन्ब पङ्ज्यीम् थेत पेत्नलज्यी। 46 तर पावलतेङ् बारनाबासचे झेन् आर् लज्यीम् पङ्ज्यी, “ङ्यीमाचे पर्मेस्वर्की फ्रोइ एङ्यी यहुदीमातनो ङोन्ग्यम् स्येत्थोःबल मुबल, तर एङ्यीमाचेनो अङ्येन्। एङ्यीमा र्हङ्माचेनो खेमेएनो अबेबे जीवन् यङ्बरी अजेःबल ङोन्बल तज्यीम् देरेम् ङ्यीमा ल्हो-ल्हो यहुदी अय्हीन्बे म्हीमाज ङ्यीज्यीम् स्येत्प। 47 तलेपङ्सम् प्रभुचे ङ्यीमात चोले कुल्जेत्पल मुब- ‘जम्बुलीङ्की कुन-कुनइ म्हीमाचे मुक्ती यङ्खइ पङ्ज्यीम् ङचे एङ्यीमात ल्हो-ल्हो यहुदी अय्हीन्बे म्हीमाकी गुङ्री य्हल् बोर्बरी दम्बल मुब।’” 48 चु तम् थ्येःज्यीम् यहुदी अय्हीन्बे म्हीमा तङ्ज्यी। ओसेम् पर्मेस्वर्की फ्रोइत तोप्ज्यी। ओसेम् खेमेएनो अबेबे जीवन् यङ्बरी ङोन्नो पर्मेस्वर्चे दम्जेत्पे म्हीमा जतीचे येसु ख्रीस्ट्त बीस्वास् स्य्हेङ्ज्यी। 49 ओसेम् पर्मेस्वर्की फ्रोइ हुजु प्रदेस्की जम्म ग्लामारी ठम्ज्यी। 50 तर यहुदीमाचे पर्मेस्वर्चे कुल्बे तम् ङ्येन्बतेङ् म्हीमाचे स्हेस पीन्बे अमकोलमातेङ् सहर्की अगुवामात पावलतेङ् बारनाबासकी बीरुद्दरी फुलीइतीज्यीम् थेङ्य्हीत सहर् ग्यम्से तेत्लाज्यी। 51 होत्तज्यीम् पावलतेङ् बारनाबासचे थेङ्यीमात चेतावनीकी लागीरी र्हङ्की कङ्की बुप्फ्र तथेन्ज्यीम् आइकोनीयन् पङ्बे ग्लारी य्हर्ज्यी। 52 ओसेम् बीस्वासीमा पबीत्र आत्माचे प्लीङ्ज्यीम् य्हक्को तङ्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.