प्रेरीत् 12 - पश्चिम तामाङपत्रुसत जेल्री च्युप्पल 1 हुजु बेलोरी हेरोद अग्रीपा पङ्बे ग्यल्बोचे मन्डलीकी डेत्-डेत् म्हीमात चुङ्ज्यीम् य्हक्को दुख पीन्ज्यी। 2 थेचे युहन्नाइ अज्यो याकुबत तर्वलचे थाज्यीम् सेत्पुङ्ज्यी। 3 हुजु लक्चे यहुदीमा तङ्बल म्रङ्ज्यीम् हेरोदचे पत्रुसतएनो चुङ्ज्यी। थेचे चोतेबे लक् नीस्तार् पर्बइ बेलोरी स्य्हेङ्बल मुबल। 4 हेरोदचे पत्रुसत चुङ्ज्यीम् जेल्न्हङ् च्युप्लाज्यीम् स्यीपाइमा चुरुत ब्ली-ब्लीले जुज्यीम् रुङ्पुङ्ज्यी। हेरोद ग्यल्बोचे नीस्तार् पर्व बुत्प बीसेम् पत्रुसत म्हीमाइ ङोन्री बज्यीम् ङ्योत्पथीब लबे सेम् लबल मुबल। 5 तर पत्रुस जेल्री मुबे बेलोरी मन्डलीचे थेइ लागीरी पर्मेस्वर्तेङ् प्रार्थना स्य्हेङ्स्यीनो टीज्यी। पत्रुस जेल्न्हङ्से डोङ्बल 6 हेरोद ग्यल्बोचे पत्रुसत म्हीमाकी ङोन्री बस्येकी दीन्की ङोन्ग्यम्की म्हुन पत्रुस स्यीपाइ ङ्य्हीइ गुङ्री म्हेर्टीब मुबल। थेत हुजु स्यीपाइ ङ्य्हीतेङ् या का-कर्टी च्यल्दचे खीःज्यीम् थेन्बल मुबल। ओसेम् स्यीपाइमाचे म्रप्री रुङ्टीबल मुबल। 7 ओसेम् तीख्यप्रीनो प्रभुइ स्वर्गदुत गीः हुजुरी रप्खज्यीम् पत्रुस मुबे कोठरी य्हल् तज्यी। स्वर्गदुतचे पत्रुसत रेइरी छुज्यीम्, “ग्योने रेःगो” पङ्ज्यीम् छ्यीङ्ज्यी। ओसेम् पत्रुसकी यारी खीबे च्यल्दमा र्हङ्नो प्लोक्य्हर्ज्यी। 8 हुजु लीप्चे स्वर्गदुतचे थेत, “एइ येन्तेङ् पनेइ येनो!” पङ्मम् थेचे येन्ज्यी। ओसेम् स्वर्गदुतचे देबेएनो, “एइ य्हुर्पे येन् य्हुर्ज्यीम् ङइ लीप्चे खोउ!” बी पङ्ज्यी। 9 ओसेम् पत्रुस जेल्न्हङ्से डोङ्ज्यीम् स्वर्गदुतकी लीप्-लीप् ब्रज्यी। स्वर्गदुतचे स्य्हेङ्बे चु लक् देमेन्नो य्हीन्ब बी पत्रुसचे अस्येबल मुबल। थेचे म्हङ् म्हङ्टीबल तल म्हेन्ज्यी 10 स्वर्गदुत्तेङ् पत्रुस जेल्न्हङ् रुङ्बे पहीलो स्यीपाइमाकी ग्लातेङ् दोस्रो ग्लारी मुबे स्यीपाइमाचे अछोर्नले डोङ्ज्यीम् सहर्न्हङ् वङ्बे फइकी म्रप्री दोःज्यी। हुजु फइकी म्रप् ठोङ्य्हर्ज्यी, ओसेम् थेङ्य्ही डोङ्ज्यीम् गल्ली गीःकी ग्यम्से तज्यीम् य्हर्ज्यी। ओसेम् स्वर्गदुतचे थेत ख्लेथेन्ज्यीम् य्हर्ज्यी। 11 पत्रुसचे चु तम्मा देमेन्नो टीम् बी हुजु बेलोरी स्येःज्यीम्, “पर्मेस्वर्चे थेङ्की स्वर्गदुत पीत्युजेत्ज्यीम् हेरोद ग्यल्बोइ या ग्यम्से ओसेम् यहुदीमाचे स्य्हेङ्ब छ्येःबे लक् ग्यम्से ङत थर्न लजेत्पल टीम्” बी पङ्ज्यी। 12 चु तम् स्येःब बीसेम् थे मर्कुस पङ्बे युहन्नाइ अम मरीयमकी दीम्री ङ्यीज्यी। हुजुरी य्हक्को म्हीमा र्हुब् तज्यीम् प्रार्थना स्य्हेङ्टीबल मुबल। 13 पत्रुसचे म्रप्री डोङ्-डोङ् लब बीसेम् रोदा पङ्बे योक्पो अमकोल म्रप् ठोङ्बरी खज्यी। 14 थेचे पत्रुसकी केत् स्येःब बीसेम् य्हक्को तङ्बल तज्यीम् म्रप्नो अठोङ्नले न्हङ्री छ्योङ्य्हर्ज्यीम्, “पत्रुस म्रप्री रप्जेत्टीब मुब” बी जम्मतनो स्येत्ज्यी। 15 हुजुरी मुबलमाचे थेत, “ए म्योज्यी वा?” बी पङ्ज्यी। तर थेचे देमेन्नो य्हीन्ब पङ्ज्यी। ओसेम् म्हीमाचे, “हुजु थेइ स्वर्गदुत य्हीन्थोब” पङ्ज्यी। 16 पत्रुसचेम् म्रप् डोङ्-डोङ् लस्यीनो टीज्यी। लीक्यम् म्रप् ठोङ्मम् पत्रुसत म्रङ्ज्यीम् थेङ्यीमा तेङेन् तज्यी। 17 तर पत्रुसचे थेङ्यीमात कुटी टीउ पङ्ज्यीम् याचे ल्हादब् लज्यी। ओसेम् पर्मेस्वर्चे थेत जेल्न्हङ्से खले तेत्जेत्ज्यी पङ्बे तम् थेङ्यीमात स्येत्ज्यी। ओसेम् पत्रुसचे “चु तम् याकुबतेङ् ल्हो-ल्हो बीस्वासीमातएनो स्येत्पीनो” बी पङ्ज्यीम् थे हुजु ग्लाचे ल्हो-ल्हो ग्लारी य्हर्ज्यी। 18 स्य्होरी मीः म्रङ्ब बीसेम् “पत्रुसत ता तज्यी” पङ्ज्यीम् स्यीपाइमान्हङ् लोङ्ज्यीम् गीःचे गीःत ङ्योत्प थी:ब लज्यी। 19 ओसेम् हेरोदचे पत्रुसत म्हइगो पङ्ज्यीम् थेङ्यीमात कुल्ज्यी। तर थेङ्यीमाचे पत्रुसत खनएनो अय्हङ्। होत्तज्यीम् हेरोदचे स्यीपाइमात ङ्योत्पथीब लज्यीम् थेङ्यीमात स्यीथोबे सजाय पीन्ज्यी। ओसेम् हेरोद यहुदीया ग्यम्से कैसरीया पङ्बे ग्लारी ङ्यीज्यीम् हुजुरीनो टीज्यी। हेरोद ग्यल्बो स्यीबल 20 हेरोद टुरोस सहरतेङ् सीदोन सहरकी म्हीमातेङ् य्हक्को बोमो रप्पल मुबल। होत्तज्यीम् हुजु सहर ङ्य्हीकी म्हीमा सेम गीः तज्यीम् हेरोद मुबे ग्लारी खज्यी। ओसेम् हेरोदकी बीस्वासीलो योक्पो बलस्तसत व्हम्ज्यीम् थेङ्यीमा ग्यल्बोतेङ् थुन्बे तम् डीज्यी। तलेपङ्सम् थेङ्यीमाचे चबे स्हेः हेरोदकी य्हुल् ग्यम्से बथोब मुबल। 21 ओसेम् तेत् लबे दीन्री हेरोदचे ग्यल्बोइ येन् येन्ज्यीम् जम्मनो म्हीमाइ ङोन्ग्यम् र्हङ्की ठीरी टीज्यीम् भासान लज्यी। 22 ओसेम् म्हीमाचे, “चु म्हीइ केत् अय्हीन् चुमी ख्लइ केत् य्हीन्ब” बी केत् ङ्हच्छ्यङ् तेत्ज्यीम् क्रीङ्ज्यी। 23 चोले हेरोदचे पर्मेस्वर्त तोप्पतेङ् स्य्हेस अपीन्बल तज्यीम् हुजु बेलोरीनो प्रभुइ स्वर्गदुत् गीचे थेत ग्यङ्ज्यी, ओसेम् थे च्योङ्लोङ् तज्यीम् स्यीज्यी। 24 तर पर्मेस्वर्की फ्रोइ झेन् य्हक्को ग्लामारी ठम्बोर्ज्यीम् बीस्वासीमा य्हक्को तबोर्ज्यी। 25 ओसेम् बारनाबासतेङ् साऊलचे यरुसलेम्री टङ सथेन्ङ्यीज्यीम् मर्कुस पङ्बे युहन्नात थेङ्य्हीतेङ् बक्च्य बज्यीम् यरुसलेम्चे दोःज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.