प्रेरीत् 11 - पश्चिम तामाङपत्रुस यरुसलेमरी दोःबल 1 यहुदी अय्हीन्बे म्हीमाचेएनो पर्मेस्वर्की फ्रोइत स्वीकार स्य्हेङ्ज्यी पङ्बे तम् यहुदीयारी मुबे प्रेरीतमातेङ् ल्हो-ल्हो बीस्वासीमाचे थ्येःज्यी। 2 ओसेम् पत्रुस यरुसलेमरी दोखब बीसेम् खतना स्य्हेङ्नोथोब पङ्बे यहुदी बीस्वासीमाचे पत्रुसत चोले बीरोद् लज्यी, 3 “एचेमी खतना अस्य्हेङ्बे म्हीमाकी दीम्री टीज्यीम् चब थुङ्ब स्य्हेङ्ज्यी रो।” 4 ओसेम् पत्रुसचे थेङ्यीमात जम्मनो तम् तङ्रले स्येत्ज्यी। 5 “ङ योप्पा सहर्री मुबे बेलोरी प्रार्थना स्य्हेङ्टीब मुबल। हुजु बेलोरी ज्यी:ब डेत् अज्यी:ब डेत् तज्यीम् ङचे दर्सन्री न ब्लीरीनो खीबे जेप्प खती र्हङ्ब स्वर्गसे दुङ्री पीत्युजेत्टीबल म्रङ्ज्यी। हुजु ङइ रेइरी युज्यीम् छ्याज्यी। 6 हुजु खतीरी च्यामम् या कङ् ब्ली मुबे दीम्री न्हबे जन्तुमातेङ् र्हीरी टीबे जन्तुमा, स्य्होलोक्ज्यीम् ब्रबे जन्तुमा ओसेम् ङ्यम्ङ्यमा म्रङ्ज्यी। 7 ओसेम् ङचे चोतेबे केत् थ्येःज्यी, ‘पत्रुस, ए रेःज्यीम् चुमा सेत्ज्यीम् चउ।’ 8 ङचे ‘अय्हीन् प्रभु, चोतेबे चोखो अय्हीन्बे स्हे खेमेएनो चबल अरे’ बी पङ्ज्यी। 9 देबेएनो स्वर्ग ग्यम्से हुजु केत् थ्येःज्यी, ‘पर्मेस्वर्चे चोखो स्य्हेङ्जेत्पे स्हेत एचे चोखो अय्हीन्बे स्हे थपङो!’ 10 सोम्ख्यप् सम्म चोतेब तज्यी। ओसेम् हुजु जम्मनो स्हेमा स्वर्गतोर् नोम्ज्यी। 11 हुजु बेलोरीनो कैसरीया पङ्बे ग्लाचे ङत ङ्होत्परी पीत्खबे म्ही सोम् ङ टीबे दीम्री दोखज्यी। 12 पबीत्र आत्माचे ङत तएनो अम्हेन्नले थेङ्यीमातेङ् बक्च्य ङ्यीउ बी सुङ्ज्यी। ओसेम् ङतेङ् मुबे बीस्वासी अज्यो-अलेमा डुएनो ङतेङ् बक्च्य ङ्यीज्यी। ओसेम् ङ्यीमा जम्मनो कर्नेलीयस्की दीम्न्हङ् वङ्ज्यी। 13 ओसेम् कर्नेलीयस्चे थेइ दीम्री स्वर्गदुत गीः रप्युजेत्पल म्रङ्ज्यी रो बी ङ्यीमात स्येत्ज्यी। हुजु स्वर्गदुतचे कर्नेलीयासत चोले पङ्ज्यी रो, ‘एचे योप्पा सहर्री पत्रुस पङ्बे सीमोनत ङ्होत्परी म्ही पीतो। 14 थेचे एत ज्यबे सम्तर् स्येत्स्ये मुब। हुजु सम्तर् ग्यम्से एतेङ् एइ दीम्री मुबे जम्मनो म्हेम्यमा थर्स्ये मुब।’ 15 “ओसेम् ङचे थेङ्यीमातेङ् तम् पङ्ब तीप्प बीसेम् ङोन्ग्यम् ङ्य्हङ्माइ जोरी पबीत्र आत्मा ब्योन्युब र्हङ्लेनो थेङ्यीमाइ जोरीएनो पबीत्र आत्मा ब्योन्युज्यी। 16 ओसेम् ‘युहन्नाचे एङ्यीमात यीचे बप्तीस्मा पीन्ज्यी। तर देरे एङ्यीमा पबीत्र आत्मा ग्यम्से बप्तीस्मा तस्ये मुब’ बी प्रभुचे सुङ्बल ङत व्हल् खज्यी। 17 ङ्य्हङ्माचे प्रभु येसु ख्रीस्ट्त बीस्वास् स्य्हेङ्ब बीसेम् पर्मेस्वर्चे ङ्य्हङ्मात पबीत्र आत्मा न्हङ्ब र्हङ्लेनो यहुदी अय्हीन्बे म्हीमातएनो थेङ्चे न्हङ्ज्यी। चोले पर्मेस्वर्चेनो पबीत्र आत्मा न्हङ्जेत्प पङ्सम् पर्मेस्वर्त रहोद्पे म्ही ङ खल य्हीन्ब?” 18 चु तम् थ्येःब बीसेम् यहुदी बीस्वासी अज्यो-अलेमाचे पत्रुसत बीरोद् लब पीत्ज्यी। ओसेम् “देरेम् पर्मेस्वर्चे यहुदी अय्हीन्बे म्हीमातएनो पाप ग्यम्से दोःज्यीम् खेमेएनो अबेबे जीवन यङ्बे मौक न्हङ्जेत्पल टीम्” बी पङ्ज्यीम् पर्मेस्वर्त तोप्ज्यी। एन्टीओखीया सहर्की मन्डली 19 स्तीफनस्त सेत्प बीसेम् लीक्यम् बीस्वासीमात य्हक्को दुख पीन्बल तज्यीम् थेङ्यीमा य्हक्को ग्लामारी छर्छुर् तय्हर्ज्यी। ओसेम् थेङ्यीमा डेत् फोनीके पङ्बे ग्ला, डेत् साइप्रस पङ्बे ग्ला ओसेम् डेत्-डेत् एन्टीओखीया सहर्रीएनो दोःज्यी। थेङ्यीमाचे हुजुरी यहुदीमातकीनो पर्मेस्वर्की फ्रोइ स्येत्ज्यी। 20 तर डेत्-डेत् बीस्वासीमा साइप्रस पङ्बे ग्लातेङ् कुरेनी पङ्बे ग्लाचे एन्टीओखीया पङ्बे ग्लारी ङ्यीज्यीम् यहुदी अय्हीन्बे म्हीमातएनो प्रभु येसुइ ज्यबे सम्तर् स्येत्ज्यी। 21 पर्मेस्वर्की सक्ती थेङ्यीमातेङ् मुबल तज्यीम् य्हक्को म्हीमाचे बीस्वास् स्य्हेङ्ज्यीम् प्रभुरी दोःज्यी। 22 चु सम्तर् यरुसलेम्री मुबे मन्डलीचे थ्येःज्यी। होत्तज्यीम् थेङ्यीमाचे बारनाबासत एन्टीओखीयारी पीत्ज्यी। 23 बारनाबास एन्टीओखीया दोखब बीसेम् पर्मेस्वर्चे म्हीमात मोलम् न्हङ्बल म्रङ्ज्यीम् य्हक्को तङ्ज्यी। ओसेम् थेङ्यीमात खेम पङ्लेनो सेम् य्हङ्सेनो प्रभुत बीस्वास् लज्यीम् टीउ पङ्ज्यीम् आर् पीन्ज्यी। 24 बारनाबास पबीत्र आत्माचे प्लीङ्बतेङ् बीस्वास्री कोङ्बे ज्यबे म्ही मुबल। थेचे लज्यीम् य्हक्को म्हीमाचे प्रभुत बीस्वास् स्य्हेङ्ज्यी। 25 हुजु लीप्चे बारनाबास सउलत म्हइबरी टार्सस पङ्बे सहररी ङ्यीज्यी। 26 ओसेम् थेचे साउलत दोज्यीम् एन्टीओखीयारी बज्यी। थेङ्य्ही एन्टीओखीयाकी मन्डलीरी तीत्तीङ् सम्मनो टीज्यीम् य्हक्को म्हीमात लोप्ज्यी। एन्टीओखीयारीनो गोदोब्न्हङ् ङोन्ग्यम् बीस्वासीमात ख्रीस्टीयन् पङ्बल य्हीन्ब। 27 हुजु बेलोरी डेत्-डेत् अगम्बक्तमा यरुसलेम ग्यम्चे एन्टीओखीयारी खज्यी। 28 हुजु अगम्बक्तमा न्हङ्की अगाबस पङ्बे अगम्बक्त रेःज्यी ओसेम् पबीत्र आत्माइ सक्तीचे जम्मनो ग्लारी अनीकल् खय्हम्बल मुब बी पङ्पुङ्ज्यी। (हुजु अनीकल् क्लौडीयस पङ्बे ग्यल्बोचे सासन् स्य्हेङ्बे बेलोरी टोप् तज्यी।) 29 ओसेम् एन्टीओखीयारी मुबे डबमाचे र्हङ्-र्हङ्चे गत्ते खम्ज्यी होदे यहुदीयारी मुबे बीस्वासीमात र्हो लबरी टङ पीत्पे तम् डीःज्यी। 30 चोले थेङ्यीमाचे टङ र्हुब्ज्यी। ओसेम् बारनाबासतेङ् साउलकी या ग्यम्से यरुसलेमकी मन्डलीइ अगुवामाज पीत्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.