प्रेरीत् 10 - पश्चिम तामाङकर्नेलीयसतेङ् पत्रुस 1 कैसरीया पङ्बे ग्लारी कर्नेलीयस पङ्बे म्ही गीः मुबल। थे रोमी स्यीपाइमाकी इटालीया पङ्बे पल्टनकी कप्तान मुबल। 2 थेतेङ् थेइ दीम्की म्हेम्यमा जम्मनो पर्मेस्वर्त तेन्बे म्ही मुबल। थेचे प्रङ्न म्हीमात सेम् य्हङ्सेनो पीन्ज्यीम् खेम पङ्लेएनो पर्मेस्वर्तेङ् प्रार्थना स्य्हेङ्ब मुबल। 3 तीरेत् कर्नेलीयस्चे दीनीइ प्रोः बेलोक्योर् दर्सन्री पर्मेस्वर्की स्वर्गदुत गीः थेज खटीबल म्रङ्ज्यी। ओसेम् हुजु स्वर्गदुत्चे थेत, “कर्नेलीयस!” पङ्ज्यीम् ङ्होत्पल थ्येःज्यी। 4 कर्नेलीयस लोङ्ज्यी, ओसेम् स्वर्गदुत्त च्याज्यीम्, “प्रभु सुङो!” बी पङ्मम् स्वर्गदुत्चे पङ्ज्यी, “एचे स्य्हेङ्बे प्रार्थनातेङ् एचे प्रङ्नमात पीन्बे चब थुङ्ब पर्मेस्वर्त सेम्री ङ्यीबे ठा र्हङ्ब तबल मुब। 5 देरे एचे योप्पा सहर्री सीमोन पत्रुस पङ्बे म्हीत ङ्होत्परी म्हीमा पीतो। 6 पत्रुस डीइ लक् स्य्हेङ्बे सीमोनतेङ् बक्च्य टीबल मुब। सीमोनकी दीम् समुन्द्रइ रेइरी मुब।” 7 चोदे पङ्ब बीसेम् स्वर्गदुत् य्हर्ज्यी। हुजु लीप्चे कर्नेलीयस्चे योक्पोमा ङ्हीतेङ् पर्मेस्वर्त तेन्बे स्यीपाइ गीःत ङ्होत्ज्यी। कर्नेलीयस्चे थेत स्य्हप्तो स्य्हेङ्बे स्यीपाइमान्हङ्चे हुजु स्यीपाइत दम्बल य्हीन्ब। 8 ओसेम् थेङ्यीसोम्त जम्मनो तम् स्येत्ज्यीम् योप्पा सहर्री पीत्ज्यी। 9 न्हम्स्य्होर्हङ् थेङ्यीमा दीन् गुङ्क्योर् योप्पा सहर्की ज्यदङ् दोःज्यी। हुजु बेलोरी पत्रुस प्रार्थना स्य्हेङ्बरी दीम्की कौसीरी ङ्यीज्यी। 10 थे प्रार्थना स्य्हेङ्न-स्य्हेङ्ननो ख्रेन्ज्यीम् थेचे चब चबे सेम् लज्यी। तर दीम्की म्हीमाचे योप्त स्य्हेङ्टीबे बेलोरी थे म्ही ज्यी:बएनो डेत् अज्यी:बएनो डेत् तज्यीम् 11 स्वर्ग ठोङ्बल म्रङ्ज्यी। ओसेम् स्वर्ग ग्यम्से न ब्लीरीनो खीबे जेप्प खती र्हङ्ब जम्बुलीङ्री पीत्युटीबल म्रङ्ज्यी। 12 हुजु खतीरी या कङ् ब्ली मुबे जम्मा थोइ जन्तुमातेङ् स्य्होलोक्ज्यीम् ब्रबे जन्तुमा ओसेम् ङ्यम्ङ्यमा मुबल। 13 ओसेम्, “पत्रुस, ए रेःज्यीम् चुमा सेत्ज्यीम् चउ” बी पङ्बे केत् पत्रुसचे थ्येःज्यी। 14 तर पत्रुसचे, “अय्हीन् प्रभु, ङचे चोतेबे चोखो अय्हीन्बे स्हे खेमेएनो चबल अरे” बी पङ्ज्यी। 15 तर थेचे देबेएनो चोतेबे केत् थ्येःज्यी, “पर्मेस्वर्चे चोखो स्य्हेङ्ज्यीन्बे स्हेत एचे चोखो अय्हीन्बे स्हे थपङो।” 16 सोम्ख्यप् सम्म चोतेब तब साच्चेनो हुजु खती स्वर्गतोर् नोम्ज्यी। 17 ओसेम् पत्रुस र्हङ्चे म्रङ्बे दर्सन्री ङोन्बल ता य्हीन्ज्यी बी सेम्न्हङ् थोम्टीबल मुबल। हुजु बेलोरीनो कर्नेलीयस्चे पीत्खबे म्हीमा सीमोनकी दीम् म्हइज्यीम् दोइ म्रप्की ङोन्री रप्खज्यी। 18 ओसेम् थेङ्यीमाचे, “पत्रुस पङ्बे सीमोन चुरी टीबल मुब वुइ अरे?” बी बङ्ले ङ्योत्ज्यी। 19 हुजु बेलोरी पत्रुसमी र्हङ्चे म्रङ्बे दर्सन्की तम् सेम्री म्हेन्टीब मुबल। पबीत्र आत्माचे थेत सुङ्ज्यी, “च्यागो एत म्ही सोम्चे म्हइटीब मुब, 20 रेःज्यीम् दुङ्री ङ्यीउ। ओसेम् सेम्री तेए अम्हेन्नले थेङ्यीमातेङ् बक्च्य ङ्यीउ। तलेपङ्सम् थेङ्यीमा ङचे पीत्खबल य्हीन्ब।” 21 होत्तज्यीम् पत्रुस दुङ्री य्हर्ज्यीम् हुजु म्ही सोम्त पङ्ज्यी, “थेङ्माचे म्हइजेत्पे म्ही ङनो य्हीन्ब। थेङ्मा चुरी तले ब्योन्खबल?” 22 थेङ्यीमाचे पत्रुसत पङ्ज्यी, “कर्नेलीयस पङ्बे कप्तान्चे ङ्यीमात पीत्खजेत्पल य्हीन्ब। थे ज्यबे म्ही ओसेम् पर्मेस्वर्त तेन्बे म्ही य्हीन्ब। यहुदीमा जम्मचेनो थेत स्हेस लब। थेइ दीम्री एत ङ्होत्ज्यीम् र्हङ्चे पङ्बे तम्मा ङ्येनो बी पर्मेस्वर्की स्वर्गदुत्चे थेत कुल्जेत्पल मुब।” 23 होत्तज्यीम् थेङ्यीमात न्हङ्री ङ्होत्ज्यीम् पत्रुसचे क्योङ्ज्यी। ओसेम् हुजु म्हुन् हुजुरीनो टीज्यी। न्हम्स्य्होर्हङ् पत्रुसतेङ् योप्पा सहर्की डेत्-डेत् बीस्वासीमाएनो थेङ्यीमातेङ् बक्च्य ङ्यीज्यी। 24 रेःनीर्हङ् थेङ्यीमा कैसरीया दोःज्यी। कर्नेलीयस्मी थेइ म्हेम्यमातेङ् र्होमात थेतेङ् बक्च्य ङ्होत्ज्यीम् पत्रुसङ्यीमात ब्रेन्टीबल मुबल। 25 पत्रुस कर्नेलीयस्की दीम्री दोखब बीसेम् कर्नेलीयस्चे पत्रुसकी कङ्री पब्लु लज्यीम् तेन्ज्यी। 26 तर पत्रुसचे थेत सेन्ज्यीम्, “रेगो, ङएनो म्हीनो य्हीन्ब” पङ्ज्यी। 27 ओसेम् पत्रुस कर्नेलीयसतेङ् तम लज्यीम् दीम्न्हङ् वङ्ज्यी। पत्रुसचे हुजुरी य्हक्को म्हीमा र्हुब् तबल यङ्ज्यी। 28 ओसेम् पत्रुसचे थेङ्यीमात पङ्ज्यी, “ङ्य्हङ् यहुदीमाकी पेठीम् अनुसार यहुदी अय्हीन्बे म्हीमात खदु लबतेङ् थेङ्यीमाकी दीम्री वङ्ज्यीम् टीब अत पङ्बे तम् थेङ्माचे खेम्बलनो मुब। तर खल म्हीतएनो चोखो अय्हीन्बे म्ही अम्हेन्खइ बी पर्मेस्वर्चे ङत ङोन्जेत्पल मुब। 29 होत्तज्यीम् थेङ्माचे ङत ङ्होत्परी पीत्खबे म्हीतेङ् ङ तएनो अम्हेन्नले थेङ्माज खज्यी। देरेम् सुङो, र्हङ्माचे ङत तले ङ्होत्जेत्पल?” 30 कर्नेलीयस्चे पङ्ज्यी, “ब्लीरेत् ङोन्री दीनीइ तीन् बजेक्योर् ङ दीम्रीनो प्रार्थना स्य्हेङ्टीबल मुबल। होदे बेलोरी सर्बे येन् येन्बे म्ही गीः ङइ ङोन्री रप्युज्यीम् सुङ्ज्यी, 31 ‘कर्नेलीयस, पर्मेस्वर्चे एइ प्रार्थना सेन्जेत्पल मुब। ओसेम् एचे प्रङ्नमात चब थुङ्ब पीन्बल थेङ्चे व्हल् लजेत्पल मुब। 32 देरे एचे योप्पा सहर्री सीमोन पत्रुस पङ्बे म्हीत ङ्होत्परी म्हीमा पीतो। पत्रुस डीइ लक् स्य्हेङ्बे सीमोनतेङ् बक्च्य टीबल मुब। सीमोनकी दीम् समुन्द्रइ रेइरी मुब।’ 33 हुजु थ्येःब साच्चेनो ङचे थेङ्त कीन्बरी म्हीमा पीत्खज्यी। थेङ्चे ङ्यीमाइ लागीरी दुख स्य्हेङ्ज्यीम् चुरी ब्योन्खजेत्ज्यी। देरेम् प्रभुचे थेङ्त कुल्जेत्पे जम्मनो फ्रोइमा ङ्येन्बे लागीरी ङ्यीमा जम्मनो चुरी पर्मेस्वर्की ङोन्री र्हुब् तबल मुब।” पत्रुसचे ज्यबे सम्तर् स्येत्पल 34 हुजु लीप्चे पत्रुसचे पङ्ज्यी, “देमेन्नो पर्मेस्वर्चे जम्मनो म्हीमात च्योच्यो म्हेन्जेत्प। चु तम् देरे ङचे म्रङ्ज्यी। 35 खजु जात्की म्ही य्हीन्लेएनो पर्मेस्वर्त स्य्हेस स्य्हेङ्ज्यीम् ओसेम् थेङ्की फ्रोइ ङ्येन्ज्यीम् ज्यबे लक् स्य्हेङ्बलमातेङ् पर्मेस्वर् तङ्जेत्प। 36 येसु ख्रीस्ट् ग्यम्से इस्राएलीमाकी गुङ्री पर्मेस्वर्चे पीत्खजेत्पे सान्ती यङ्बे ज्यबे सम्तर् एङ्यीमाचे स्येःबलनो मुब। हुजु येसुनो जम्मइ प्रभु य्हीन्ब। 37 युहन्नाचे बप्तीस्माकी बारेरी स्येत्प बीसेम् गालील य्हङ्से चुःज्यीम् यहुदीयाकी जम्मनो ग्लामारी तबे तम्मा एङ्यीमात स्येःबलनो मुब, 38 ओसेम् पर्मेस्वर्चे नासरतकी येसुइ जोरी पबीत्र आत्मातेङ् सक्ती न्हङ्जेत्ज्यी। हुजु लीप्चे येसु खन बीबीनो स्येःज्यीम् ज्यबे लक्मातेङ् म्हङ्चे ननलबे म्हीमात फेन्न लजेत्ज्यी। तलेपङ्सम् पर्मेस्वर् थेङ्तेङ् बक्च्य मुबल। 39 यरुसलेम सहर्तेङ् यहुदीमाकी ग्लामारी येसुचे स्य्हेङ्जेत्पे जम्मनो लक् ङ्यीमाचे म्रङ्बल मुब। थेङ्त यहुदीमाचे क्रुस्री च्योलाज्यीम् सेत्ज्यी। 40 तर सोम्रेत्कुनो पर्मेस्वर्चेनो थेङ्त स्यीब ग्यम्से सोनलजेत्ज्यी। ओसेम् म्हीमाचे येसुत म्रङ्म्यङ्नलजेत्ज्यी। 41 थेङ्त म्ही जम्चेमी अम्रङ्, तर थेङ् स्यीब ग्यम्से सोब बीसेम् थेङ्तेङ् बक्च्यनो चब थुङ्ब स्य्हेङ्ज्यीम् ब्रबे म्ही ङ्यीमाचेकीनो म्रङ्ज्यी। तलेपङ्सम् चु तम् स्येत्पे लागीरी ङोन्ग्यम्नो पर्मेस्वर्चे ङ्यीमात दम्जेत्पल य्हीन्ब। 42 ओसेम् ज्यबे सम्तर् स्येत्परीतेङ् येसुत सोम्बोमातेङ् स्यीबलमाकी न्याय स्य्हेङ्बरी पर्मेस्वर्चे दम्जेत्पल य्हीन्ब पङ्बे तम् स्येतो बी ङ्यीमात येसुचे कुल्जेत्पल मुब। 43 ओसेम् येसुरी बीस्वास् स्य्हेङ्बे जम्म म्हीमाइ पाप थेङ्की छेन्री क्षम यङ्ब बी अगम्बक्तमा जम्मचेनो पङ्बल मुबल।” 44 पत्रुसचे तम् पङ्न-पङ्ननो पत्रुसकी तम् थ्येःबे म्हीमा जम्मइ जोरी पबीत्र आत्मा ब्योन्युज्यी। 45 यहुदी अय्हीन्बे म्हीमाइ जोरी पबीत्र आत्मा पीत्युजेत्पल म्रङ्ज्यीम् पत्रुसतेङ् बक्च्य योप्पा सहर् ग्यम्से खबे यहुदी बीस्वासीमा तेङेन् तज्यी। 46 तलेपङ्सम् थेङ्यीमाचे अगोबे ग्योत्मारी पर्मेस्वर्त तोप्टीबल थ्येःज्यी। ओसेम् पत्रुसचे पङ्ज्यी, 47 “ङ्य्हङ्माचे र्हङ्लेनो थेङ्यीमाचेएनो पबीत्र आत्मा यङ्बल मुब। देरे थेङ्यीमात यीचे बप्तीस्मा कीन्बरी खल्चे र्होद्ल?” 48 होत्तज्यीम् पत्रुसचे थेङ्यीमात “येसु ख्रीस्ट्की छेन्री बप्तीस्मा कीनो” बी कुल्ज्यी। ओसेम् थेङ्यीमाचे पत्रुसत तोव दीन्सम्म ङ्यीमातेङ् बक्च्य स्य्हुगो पङ्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.