३ युहन्ना 1 - पश्चिम तामाङ1 ङचे देमेन्नो म्होइबे ङइ खोबे र्हो गायसत ङ एल्डर् ग्यम्से चु चीठी ब्रीटीब। 2 म्होइबे र्हो, एत जम्म तम्रीनो ज्यब तबोर्खइ पङ्ज्यीम् ङ प्रार्थना स्य्हेङ्ब। एइ आत्मा ज्यब र्हङ्लेनो एइ ल्हीएनो ज्यब तखइ। 3 गदे बीस्वासीमा ङइज खज्यीम् ए देमेन्री बीस्वासीलो तज्यीम् खेम पङ्लेनो देमेन् अनुसार ब्रबे तम् स्येत्पल मुब, हुजु थ्येःज्यीम् ङ य्हक्को तङ्बल मुब। 4 ङइ कोलमा देमेन्रीनो ब्रटीब बी थेःब बीम ङ्हच्छ्यङ् तङ्ब ङत ल्हो-ल्हो ता तब खम्ब? 5 म्होइबे र्हो, एइज खबे एचे स्येनो अस्येबे बीस्वासीमात र्हो लज्यीम् बीस्वासीलो लक् स्य्हेङ्ज्यी। 6 थेङ्यीमाचे मन्डलीकी ङोन्री एइ म्होइबइ बारेरी तम् लबल मुब। थेङ्यीमात ग्यम्री ब्रबरी तो:बे स्हेमा पीन्ज्यीम् एङयीमाचे ज्यबे लक् स्हेङ्स्ये मुब, तलेपङ्सम् चुजे पर्मेस्वर्त तङ्न लब। 7 तलेपङ्सम् थेङ्यीमा ख्रीस्ट्की छेन्री ज्यब सम्तर् स्येत्परी डोङ्बल य्हीन्ब, ओसेम् प्रभुत बीस्वास् अस्य्हेङ्बलमा ग्यम्से तएनो अकीन्नले खबल य्हीन्ब। 8 होत्तज्यीम् ङ्य्हङ्माचे चोतेबे म्हीमात र्हो स्य्हेङ्थोःब, ओसेम् चोले ङ्य्हङ्मा थेङ्यीमाचे स्येत्पे देमेन्की र्हो तब खम्ब। 9 ङचे मन्डलीत चुइ बारेरी ब्रीबल मुबल। तर एङ्यीमाइ गुङ्री र्हङ्चे र्हङ्त अगुवा तब म्हइबे डीयोत्रीफसचे ङइ तम् ङ्येन्नो अङ्येन्। 10 होत्तज्यीम् ङ हुजुरी खबे बेलोरी एङ्यीमा जम्मतनो थेचे ङ्यीमाकी बीरोद्री स्य्हेङ्बे अज्यबे लक्मा स्येत्पीन्स्ये मुब। होदेकीनो अय्हीन्, थेचे पर्मेस्वर्की लक् स्य्हेङ्ज्यीम् ब्रबे ल्हो-ल्हो बीस्वासीमात स्वागत् अस्य्हेङ्, ओसेम् थेङ्यीमाचे स्वागत् स्य्हेङ्ब म्हइबलमातएनो स्य्हेङ्अपुङ्ज्यीम् मन्डली ग्यम्से तेत्लाब। 11 म्होइबे र्हो, अज्यबे लक् खल ग्यम्सेएनो थलोपो, तर ज्यबे लक्कीनो लोपो। ज्यबे लक् स्य्हेङ्बल पर्मेस्वर्की म्ही य्हीन्ब, अज्यबे लक् स्य्हेङ्बलचे पर्मेस्वर्त खेमेएनो म्रङ्बलनो अरे। 12 डेमेत्रीयस्तमी जम्मचेनो ज्यबे म्ही पङ्बल मुब, ओसेम् पर्मेस्वर्की देमेन्चेएनो होलेनो पङ्ब। ङ्यीमाचेएनो थेत ज्यबे म्ही पङ्ब, ओसेम् एचे स्येबल मुब, ङ्यीमाचे पङ्बे तम् देमेन् य्हीन्ब। 13 ङचे पङ्थोबे तम्म य्हक्को मुबल, तर कलम्तेङ् मसी ग्यम्से ङ ब्रीइ अम्हेन्। 14 तर ग्योनेनो एतेङ् खतु लबे सेम् मुब, ओसेम् ङ्होन्सङ्नो तम् पङ्स्ये मुब। 15 एत सान्ती तखइ। चुरी मुबे जम्मनो एइ र्होमाचे लस्सो पीत्खबल मुब, ओसेम् हुजुरी मुबे जम्मनो ङ्य्हङ्की र्होमात लस्सो पङ्पीनो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.