२ तीमोथी 4 - पश्चिम तामाङज्यबे सम्तर् स्येत्पे जीम्मा 1 सोम्बोमातेङ् स्यीबलमाकी न्याय स्य्हेङ्जेत्परी ओसेम् जम्मइ जोरी सासन् स्य्हेङ्जेत्परी ब्योन्युटीबे येसु ख्रीस्ट्तेङ् पर्मेस्वर्की ङ्होन्सङ् ङ एत स्य्हेङ्नो थोःब पङ्ज्यीम् चु तम् कुल्ब। 2 एचे म्हीमात पर्मेस्वर्की फ्रोइ स्येतो, ज्यबतेङ् अज्यब खजु बेलोरी पङ्लेएनो टोप् तज्यीम् टीउ। म्हीमाचे अतबे तम् लसम् चेतावनी पीनो, बराको, ओसेम् धैर्यतेङ् ज्यबे तम्मा लोप्ज्यीम् आर् पीनो। 3 तलेपङ्सम् म्हीमाचे देमेन्की तम्त ङ्येन्गे अम्हेन्बे बेलोएनो खटीबल मुब। थेङ्यीमाम् र्हङ्त सेम्री ङ्यीबे तम्माकीनो ङ्येन्ब म्हइस्ये मुब, ओसेम् थेङ्यीमात तङ्न लबे तम् लोप्पे लोप्पोन्मा ङ्होत्स्ये मुब। 4 थेङ्यीमा देमेन्की तम् ग्यम्से ग्यब् दोस्ये मुब, ओसेम् दङ्बोइ म्हीमाचे पान्तीबे अर्थमा ङ्येन्स्ये मुब। 5 तर एम् खतेबे बेलोरी पङ्लेएनो कोङ्ज्यीम् टीउ। दुख नाबरी थलोङो, ज्यबे सम्तर् स्येत्पे लक् स्य्हेङो, ओसेम् एचे पर्मेस्वर् ग्यम्से यङ्बे लक् टोप् लोउ। 6 तलेपङ्सम् ङ ठा र्हङ्ले सोप्तीबे बेलो खज्यीन्बल मुब, ङइ स्यीबे बेलो खबल मुब। 7 ङचे म्हीमात पर्मेस्वर्की सम्तर् ज्यनले स्येत्पल मुब, पर्मेस्वर्चे ङत न्हङ्जेत्पे लक् ङचे बुत्नले स्य्हेङ्बल मुब, ओसेम् ङचे पर्मेस्वर्री बीस्वास् स्य्हेङ्स्यीनो टीबल मुब। 8 देरेम् पर्मेस्वर्चे ङइ लागीरी धार्मीक्ताकी क्रेःकी थेन्जेत्पल मुब। हुजु क्रेःकी ज्यनले न्याय स्य्हेङ्जेत्पे पर्मेस्वर्चे ङत कुःपीन्जेत्स्ये मुब, ओसेम् ङतकीनो अय्हीन् तर थेङ् ब्योन्युस्येकी ग्यम् च्याज्यीम् टीबलमा जम्मतनो क्रेःकी कुपीन्जेत्स्ये मुब। पावलकी ज्युकी तम्मा 9 खम्ब सम्म ए ङत खतु लबरी ग्योनले खोउ। 10 डेमासचे चु जम्बुलीङ्त म्होइज्यीम् ङत ख्लेथेन्ज्यी ओसेम् थेसलोनीकेरी य्हर्बल मुब। क्रेसेन्स पर्मेस्वर्की लक् स्य्हेङ्बरी गलातीया प्रदेस्री ङ्यीबल मुब, ओसेम् तीतस दालमातीयारी ङ्यीबल मुब 11 देरेम् ङतेङ् बक्च्य लुकाकीनो मुब। मर्कुसत म्हइज्यीम् एतेङ् बक्च्य बोउ, तलेपङ्सम् थेचे ङइ लक्री र्हो लब खम्स्ये मुब। 12 तुखीकस्त ङचे एफीसस् सहर्री पीत्पल मुब। 13 ओसेम् ङचे त्रोआस सहर्री कार्पस्ज ख्लेथेन्बे ङइ य्हुर्बे येन्, छ्येःमा ओसेम् बीसेम् लज्यीम् डीरी ब्रीबे छ्येःमा अम्लेत्नले बोउ। 14 स्हङ्मोइ लक् स्य्हेङ्बे अलेक्जेन्डर्चे ङत य्हक्को अज्यब स्य्हेङ्ज्यी। थेचे स्य्हेङ्बे लक्की खीत् प्रभुचेनो फाजेत्स्ये मुब। 15 थे ग्यम्से ए चोङ् लज्यीम् ब्रउ, तलेपङ्सम् ङ्य्हङ्माचे स्येत्पे सम्तर्त थेचे य्हक्को बीरोद् स्य्हेङ्बल मुब। 16 गोदोब्न्हङ् ङोन्ग्यम् मुद्द चल्तीबे बेलोरी ङत खल्चेएनो र्हो अस्य्हेङ्, जम्मचेनो ङत ख्लेथेन्ज्यी। हुजु लक्की दोस् थेङ्यीमात अटखइ। 17 तर यहुदी अय्हीन्बे जम्मनो म्हीमात जम्मनो ज्यबे सम्तर् स्येत्प खम्खइ पङ्ज्यीम् प्रभु ङतेङ् तज्यीम् ङत बङ् न्हङ्जेत्ज्यी। ओसेम् थेङ्चे ङत ता:की सुङ् ग्यम्से थर्न लजेत्ज्यी। 18 प्रभुचेनो ङत जम्मनो दुस्टमा ग्यम्से थर्नलजेत्स्ये मुब, ओसेम् थेङ्चेनो ङत ज्यनले स्वर्गइ य्हुल्री नोम्जेत्स्ये मुब। थेङ्त खेम पङ्लेनो महीमा तखइ! आमेन्। 19 प्रीस्कीलातेङ् अकीलास् ओसेम् ओनेसीफरसकी दीम्की म्हेम्यत ङ ग्यम्से लस्सो मुब। 20 इरास्तस् कोरीन्थरी टीबल मुब, त्रोफीमस् नबल तज्यीम् ङचे थेत मीलेटस सहर्री ख्लेथेन्बल मुब। 21 खम्ब सम्म ए सेर्क ल खब बीम ङोन्नो खोउ। युबुलस, पुडेस, लीनसतेङ् क्लौडीय ओसेम् चुरी मुबे जम्मनो बीस्वासीमाचे एत लस्सो पीत्खबल मुब। 22 प्रभु एइ आत्मातेङ् बक्च्य तखइ। ओसेम् एङ्यीमातेङ् थेङ्की अनुग्रह तखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.