२ तीमोथी 3 - पश्चिम तामाङज्युकी दीन्मा 1 ज्युकी दीन्मारी दुखइ बेलोमा खस्ये मुब बी एचे स्येथोःब। 2 तलेपङ्सम् हुजु बेलोइ म्हीमा र्हङ्तकीनो म्होइबल, टङइ लोभ स्य्हेङ्बल, ओसेम् र्हङ्चे र्हङ्त ङ्हच्छ्यङ् म्हेन्बल, अभीमानी, र्होकी नीन्द स्य्हेङ्बल, र्हङ्की अप-अमइ अर्ती अङ्येन्बल, र्हङ्त र्हो लपीन्बे म्हीत व्हल् अलबल ओसेम् अपबीत्र तस्ये मुब। 3 थेङ्यीमा र्होत अम्होइबल, क्षम अपीन्बल, ल्हो-ल्होकी बारेरी अज्यब पङ्बल, र्हङ्चे र्हङ्त अदुल्बल, र्होत य्हक्को दुख पीन्बे सेम् थोःबल ओसेम् ज्यबे तम्त अखोबल तस्ये मुब। 4 थेङ्यीमा ल्हो-ल्होत धोक पीन्बल, र्हङ्चे र्हङ्त ङ्हच्छ्यङ् म्हेन्ज्यीम् त म्हेन्ब हुजुनो स्य्हेङ्बल ओसेम् पर्मेस्वर्त बीमम् मन मोज्यीत म्होइबल तस्ये मुब। 5 थेङ्यीमाचे पर्मेस्वर्त तेन्बम् स्य्हेङ्स्ये मुब, तर थेङ्की सक्तीत थेङ्यीमाकी ल्हीरी लक्मी स्य्हेङ्अपुङ्। चोतेबे लक् स्य्हेङ्बे म्हीमा ग्यम्से ए थारीङ् टीउ। 6 थेङ्यीमा न्हङ्री डेत् डेत्मी म्हीमाकी दीम्मारी ङ्यीज्यीम् य्हक्को पापचे प्ले:बे ओसेम् अज्यबे लक्मा स्य्हेङ्बे सेम्चे खीज्यीम् न्होङ्बे अमकोलमात र्हङ्की अधीन्री थेन्ब। 7 हुजु अमकोलमाचे खेम पङ्लेनो छार् तम् लोप्परीम् लोप्प म्हइब, तर देमेन्मी खमेएनो स्येअखम्। 8 यन्नेसतेङ् यम्ब्रेस्चे मोसाइ बीरोद् स्य्हेङ्ब र्हङ्लेनो हुजु म्हीमाचे देमेन्की सम्तर्त बीरोद् स्य्हेङ्ब। थेङ्यीमाल लो न्होङ्बल मुब, ओसेम् बीस्वास् म्हबल मुब। 9 तर थेङ्यीमाचे खेम पङ्लेनो चोले स्य्हेङ्स्यीनो टीस्ये अरे, तलेपङ्सम् यन्नेस्तेङ् यम्ब्रेस्की मुर्खत जम्मचे स्येःब र्हङ्ले थेङ्यीमाकी मुर्खत स्येःस्ये मुब। पावल्चे तीमोथीत लोप्पल 10 तर ङचे लोप्पे तम्मा, ङ पर्मेस्वर्की फ्रोइ ङ्येन्ज्यीम् ब्रबल, ङचे ङइ जीवन्री स्य्हेङ्ब म्हइबे लक्मा, ङइ बीस्वास्, ङचे नाज्यीम् टीबल, ङइ म्होइब ओसेम् दुखइ बेलोरी ङ य्हङ्य्होङ् अतबल एचे म्रङ्बल मुब। 11 एन्टीओखीया, आइकोनीयन्तेङ् लुस्त्रा पङ्बे सहर्मारी ङत म्हीमाचे पीन्बे दुखमा एचे स्येःबल मुब। तर प्रभुचे ङत हुजुमा जम्मा ग्यम्से थर्न लजेत्ज्यी। 12 येसु ख्रीस्ट्त बीस्वास् स्य्हेङ्ज्यीम् पर्मेस्वर्त सेम्री ङ्यीबे जीवन् सोबलमात म्हीमाचे दुख पीन्स्ये मुब। 13 तर दुस्ट लक्तेङ् र्होत भ्यु लुबे म्हीमाचेम् ल्हो-ल्होमात ठग्तीस्ये मुब, ओसेम् ल्हो-ल्होमाचे थेङ्यीमात ठग्तीज्यीम् थेङ्यीमा झेन् य्हक्को न्होङ्बोर्स्ये मुब। 14 तर एम् र्हङ्चे लोप्पतेङ् बीस्वास् स्य्हेङ्बे तम्री ब्रस्यीनो टीउ। खल खल ग्यम्से लोप्ज्यी हुजुम् एचे स्येबल मुब। 15 एचे कोल य्हङ्सेनो पबीत्र धर्म छ्येइ फ्रोइमा स्येःबल मुब। हुजुचेनो येसु ख्रीस्ट्री बीस्वास् स्य्हेङ्बतेङ् यङ्बे मुक्तीइ बारेरी गोबे ज्ञान पीन्ब। 16 जम्मनो धर्म छ्येः पर्मेस्वर्की प्रेरना ग्यम्से ब्रीबल य्हीन्ब, चु ङ्य्हङ्मात लोप्परी, ओसेम् ङ्य्हङ्माचे ङ्य्ङ्माकी अज्यबमा था यङ्न लबरी, ङ्य्हङ्मा अज्यबे म्ही तबे बेलोरी ज्यबे म्ही तनलबरी ओसेम् ङ्य्हङ्मात धार्मीक्ताकी जीवन सोज्यीम् ब्रनलबरी य्हक्को ज्यबल मुब। 17 पर्मेस्वर्की म्हीमाचे जम्मनो ज्यबे लक्मा स्य्हेङ्ब खम्खइ पङ्ज्यीम् धर्म छ्येः पीन्बल य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.