२ तीमोथी 2 - पश्चिम तामाङयेसु ख्रीस्ट्की ज्यबे स्यीपाइ 1 होत्तज्यीम् तीमोथी, ए ङइ देमेन्की ज र्हङ्ब य्हीन्ब, येसु ख्रीस्ट्चे न्हङ्जेत्पे अनुग्रहचे ए बङ्ज्येन् तउ। 2 एचे य्हक्को म्हीमाकी ङ्होन्सङ् ङ ग्यम्से थ्येःबे तम्मा ल्होल्होमातएनो लोप्प खम्बे बीस्वासीलो म्हीमात लोपो। 3 येसु ख्रीस्ट्की ज्यबे स्यीपाइ र्हङ्ब तज्यीम् एचेएनो दुख नाको। 4 स्यीपाइ ल्हो-ल्हो लक्मारी उन्ज्यीम् अटी, तलेपङ्सम् थेचे र्हङ्की हाकीम्त तङ्न लबकीनो म्हइब। 5 पुरस्कार् यङ्बे लागीरी छ्योङ्बे म्हीचे नीयम् अनुसार अछ्योङ्ज्यी पङ्सम् थेचे डाबे पुरस्कार् यङ्स्ये अरे। 6 दुख लज्यीम् म्रङ्री लक् स्य्हेङ्बे म्हीचेनो ङोन्ग्यम् अन्नइ बो यङ्थोब। 7 ङचे पङ्बे चु तम्मारी एचे म्हेन्लु स्यरो, तलेपङ्सम् प्रभुचेनो एत हुजु तम्म गोब खम्न लजेत्स्ये मुब। 8 दाऊद ग्यल्बोइ छकोन् स्यीब ग्यम्से सोजेत्पे येसु ख्रीस्ट्त व्हल् लो, ङचे प्रचार स्य्हेङ्बे ज्यबे सम्तर् चुनो य्हीन्ब। 9 हुजु ज्यबे सम्तर् स्येत्पल तज्यीम् ङचे दुख नाटीबल य्हीन्ब, होदेकीनो अय्हीन् ङत अज्यबे लक् स्य्हेङ्बे म्हीत र्हङ्ले च्यल्दचे खीःबल मुब। तर पर्मेस्वर्की फ्रोइमी च्यल्दचे खीःबल अरे। 10 होत्तज्यीम् पर्मेस्वर्चे दम्जेत्पलमा येसु ख्रीस्ट् ग्यम्से थर्ज्यीम् खेमेएनो अबेबे महीमीत् जीवन् यङ्खइ पङ्ज्यीम् ङचे चु जम्मनो तम्मा नापल य्हीन्ब। 11 चु तम् देमेन् य्हीन्ब- “ङ्य्हङ्मा थेङ्तेङ् बक्च्य स्यीज्यी पङ्सम् लीक्क्यम् थेङ्तेङ्नो सोस्ये मुब। 12 ङ्य्हङ्माचे दुख नास्यीनो टीज्यी पङ्सम् ङ्य्हङ्माचेएनो थेङ्तेङ् बक्च्य सासन् स्य्हेङ्स्ये मुब, ङ्य्हङ्माचे थेङ्त इन्कार् स्य्हेङ्ज्यी पङ्सम् थेङ्चेएनो ङ्य्हङ्मात इन्कार् स्य्हेङ्स्ये मुब। 13 ङ्य्हङ्मा बीस्वासीलो अतलएनो थेङ्मी बीस्वासीलो तजेत्स्यीनो टीब, तलेपङ्सम् थेङ्चे र्हङ्चे र्हङ्त इन्कार् स्य्हेङ्अखम्।” थो ङ्य्हीइ लोप्पोन् 14 एइ म्हीमात चु तम् व्हल् लपीनो, छीः र्हङ्स्यीनो छेत्प बङ्ब थस्य्हेङो पङ्ज्यीम् थेङ्यीमात एचे पर्मेस्वर्की ङ्होन्सङ् पङो। छेत्प बङ्बचे तएनो ज्यब अस्य्हेङ्, चुचेम् थ्येःबलमातएनो न्होङ्न लब। 15 देमेन्की फ्रोइत ज्यनले लोप्पे ओसेम् पेत् अथोबे लक् स्य्हेङ्बे म्ही र्हङ्ले पर्मेस्वर्की ङोन्री ग्रहन् तबे लक् स्य्हेङ्ब म्हइगो। 16 अतोबे तम्मा ज्योप्पतेङ् पर्मेस्वर्त सेम्री अङ्यीबे तम्मा ग्यम्से थारीङ् टीउ। चोतेबे तम्माचेम् म्हीमात पर्मेस्वर् ग्यम्से झेन् य्हक्को थारीङ् तन लब। 17 होतेबे तम्मामी क्रम्ज्यीम् जेब्ब तबोर्बे म्हग र्हङ्ब तब। हुमेनीयसतेङ् फीलेतस पङ्बे म्ही ङ्य्हीचे लोप्पे तमएनो होतेब य्हीन्ब। 18 थेङ्यीमाचे देमेन्की ग्यम्त पीत्पल मुब, ओसेम् पुनरुत्थान ङोन्नो तज्यीन्बल मुब बी लोप्ज्यीम् डेत् डेत् म्हीमाकी बीस्वासत न्होङ्न लबल मुब। 19 तर पर्मेस्वर् र्हङ्चेनो स्य्हेङ्जेत्पे जग कोङ्ब ओसेम् हुजुरी चोले ब्रीबल मुब- “प्रभुचे र्हङ्लमात खेम्जेत्प” ओसेम् “प्रभुइ छेन् कीन्बलमा अज्यबे लक्मा ग्यम्से थारीङ् टीथोब।” 20 बरु म्हीइ दीम्री म्हर्तेङ् म्हुइकी तङ्लोमाकीनो अय्हीन् स्यीङ्तेङ् सेप्प्रइ तङ्लोमाएनो तब। डेत्डेत्मी य्हक्को स्हेस यङ्बे लक्मारी कोल्ब ओसेम् डेत्डेत्मी चेक् स्हेस यङ्बे लक्मारी कोल्ब। 21 खल पङ्लेएनो जम्मनो अज्यबे लक्मा ग्यम्से फेज्यीम् टीज्यी पङ्सम् थे ङ्हच्छ्यङ् स्हेस यङ्बे लक्री कोल्बे तङ्लो र्हङ्ब तस्ये मुब। तलेपङ्सम् थेचे र्हङ्त अज्यबे लक्मा ग्यम्से चोखो थेन्बल तज्यीम् खजु ज्यबे लक्री पङ्लेनो मालीक्चे कोल्ब तब। 22 ब्योन्की बेलोरी खबे अज्यबे लक्मा स्य्हेङ्गे म्हेन्बे सेम् ग्यम्से थारीङ् टीउ, ओसेम् ज्यबे सेम् थोज्यीम् प्रभुइ छेन् कीन्बलमातेङ् बक्च्य धार्मीक्ता, बीस्वास् ओसेम् म्होइबतेङ् सान्तीरी ब्रस्यीनो टीउ। 23 तर मुर्ख तम्मातेङ् अतोबे तम्मा ज्योप्प ग्यम्से फेज्यीम् टीउ। एचे स्येबल मुब होतेबे तम्माचे छेत्प बङ्बकीनो स्य्हेङ्ब। 24 प्रभुइ योक्पोचे छेत्प बङ्ब स्य्हेङ्ब अत। थे जम्मतनो दय स्य्हेङ्ब खम्बल, ओसेम् ल्हो-ल्होत लोप्प खम्बलतेङ् नाप खम्बल तथोब। 25 बीरोद् स्य्हेङ्बलमात थेचे ज्यबे ग्यम्चे लोप्प खम्थोब, होले स्य्हेङ्बतेङ् पर्मेस्वर्चे थेङ्यीमात पस्चताप स्य्हेङ्बे सेम्तेङ् देमेन्त गोब खम्बे सेम् न्हङ्जेत्ल। 26 चोले थेङ्यीमा म्ही ज्यीज्यीम् सैतान्की व ग्यम्से स्योर्ब खम्स्ये मुब, तलेपङ्सम् थेङ्यीमात सैतान्चे म्हेन्ब र्हङ्ले ब्रबरी सैतान्चे चुङ्ज्यीम् थेन्बल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.