२ तीमोथी 1 - पश्चिम तामाङ1 येसु ख्रीस्ट्री मुबे जीवनकी बाचा अनुसार पर्मेस्वर्की थुः ग्यम्से येसु ख्रीस्ट्की प्रेरीत् तबरी दम्बे ङ पावल ग्यम्से 2 ङइ देमेन्की ज र्हङ्बे तीमोथीत चु चीठी ब्रीटीब। पर्मेस्वर् अपतेङ् ङ्य्हङ्की प्रभु येसु ख्रीस्ट्चे एत अनुग्रहतेङ् कृपा ओसेम् सान्ती न्हङ्खइ। बीस्वासीलो तटीबरी आर् पीन्बल 3 ङ ङइ अप म्हेम्हेमाचे र्हङ्लेनो ज्यबे सेम् थोज्यीम् पर्मेस्वर्की सेवा स्य्हेङ्ब। ओसेम् थेङ्तनो ङ एइ लागीरी व्होर्छ्ये पीन्ब ओसेम् दीन् म्हुन् एत ङचे प्रार्थनारी व्हल् स्य्हेङ्ब। 4 ङ एइ मीख्लीत व्हल् लब, ङल एतेङ् खतु लबे सेम् य्हक्को मुब। एतेङ् खतु तज्यी पङ्सम् ङ य्हक्को तङ्स्येल। 5 एचे स्य्हेङ्बे ज्यबे बीस्वास् ङचे व्हल् लब। ङोन्ग्यम् एइ मम् लोइस्तेङ् अम युनीयस्चेएनो ज्यबे बीस्वास् स्य्हेङ्बल मुबल। ओसेम् होतेबे बीस्वास् एतेङएनो मुब बी ङचे बीस्वास् लबल मुब। 6 होत्तज्यीम् ङ एत व्हल् लपीन्ब, ङचे एइ जोरी या थेन्मम् एचे यङ्बे पर्मेस्वर्की बर्दान्त ज्यनले थेन्स्यीनो टीउ। 7 तलेपङ्सम् पर्मेस्वर्चे ङ्य्हङ्त लोङ्बे आत्मा अय्हीन् तर सक्तीतेङ् म्होइब ओसेम् र्हङ्चे र्हङ्त दुल्बे आत्मा न्हङ्जेत्पल मुब। 8 होत्तज्यीम् ङ्य्हङ्की प्रभुइ सम्तर् स्येत्परी थपेतो, ओसेम् ङतेङएनो थपेतो, ङचे थेङ्की बारेरी प्रचार स्य्हेङ्बल तज्यीम् ङ जेल्री दोःबल य्हीम्ब, बरु एचेएनो पर्मेस्वर् ग्यम्से बङ् यङ्ज्यीम् ज्यबे सम्तर् स्येत्परी दुख नाको। 9 पर्मेस्वर्चेनो ङ्य्हङ्त थर्ब न्हङ्ज्यीम् पबीत्र जीवन् सोबरी ङ्होत्जेत्ज्यी। ङ्य्हङ्चे स्य्हेङ्बे लक्चे लज्यीम् अय्हीन् तर थेङ्की थुःतेङ् अनुग्रहचे लज्यीम् य्हीन्ब। चु अनुग्रह ङ्य्हङ्मात येसु ख्रीस्ट्री जम्बुलीङ् ठुङ्ब बीम ङोन्ग्यम्नो न्हङ्जेत्पल मुबल। 10 देरेम् हुजु अनुग्रह ङ्य्हङ्की मुक्ती न्हङ्बे येसु ख्रीस्ट् ब्योन्खजेत्ज्यीम् ङोन्जेत्पल मुब। थेङ् स्यीबे सक्ती ग्यम्से डाजेत्ज्यी, ओसेम् ज्यबे सम्तर् ग्यम्से खेमेएनो अस्यीबे जीवन् ङोन्जेत्ज्यी। 11 पर्मेस्वर्चे ङत चु ज्यबे सम्तर् प्रचार स्य्हेङ्बे म्हीतेङ् प्रेरीत् ओसेम् लोप्पे लक् स्य्हेङ्बरी दम्जेत्पल य्हीन्ब। 12 होत्तज्यीम् ङचे चु तम्माकी दुख नाटीब मुब। तर ङ अपेत् तलेपङ्सम् ङचे खलत बीस्वास् स्य्हेङ्बल हुजु ङचे स्येःबल मुब। पर्मेस्वर्चे ङत सोप्तीबे तम्त थेङ्चेनो ख्रीस्ट् दो:युजेत्पे दीन् सम्मइ लागीरी ज्यनले थेन्जेत्स्ये मुब पङ्ज्यीम्एनो ङचे स्येब। 13 ओसेम् येसु ख्रीस्ट्री मुबे बीस्वासतेङ् म्होइबरी ङचे एत लोप्पे देमेन्की तम्माकी नमुन तज्यीम् ब्रउ। 14 एत सोप्तीपीन्बे देमेन्की तम्मात ङ्य्हङ्न्हङ्रीनो स्य्हुजेत्पे पबीत्र आत्माइ सक्तीचे जोगइतीज्यीम् थेनो। 15 एचे स्येबलनो मुब एसीयारी टीबलमा जम्मनो ङ ग्यम्से ग्यब् दोज्यीम् य्हर्बल मुब, थेङ्यीमा न्हङ्री फुगेलसतेङ् हर्मोगेनस य्हीन्ब। 16 ओनेसीफरसकी दीम्की म्हेम्यतेङ् प्रभुइ कृपा तखइ, तलेपङ्सम् थेचे ङत य्हक्को ख्यप् आर् पीन्बल मुब। ओसेम् ङत जेल्री च्युप्पे बेलोरी थे अपेत्। 17 तर थे रोम् सहररी खब साच्चेनो ङत य्हक्को नासेन्ले म्हइज्यीम् खतु लज्यी। 18 प्रभु ब्योन्युस्येकी दीन्री थेत प्रभुचे कृपा न्हङ्खइ। एचे स्येबलनो मुब, एफीसस्रीएनो थेचे ङइ स्य्हप्तो स्य्हेङ्ब मुबल। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.