२ थेस्लोनीकी 3 - पश्चिम तामाङप्रार्थना स्य्हेङ्पीनो पङ्बल 1 ज्युरी, र्होमा, एङ्यीमाकी गुङ्री तब र्हङ्लेनो प्रभुइ ज्यबे सम्तर् खन बीबीनो झेन् य्हक्को ग्योनले ठम्ज्यीम् ङ्हच्छ्यङ् स्य्हेस तखइ पङ्ज्यीम् ङ्यीमाकी लागीरी प्रार्थना स्य्हेङ्पीनो। 2 ओसेम् पर्मेस्वर्चे ङ्यीमात अज्यबे सेम् थोबे म्हीमातेङ् दुस्ट लक् स्य्हेङ्बे म्हीमा ग्यम्से जोगइतीबे लागीरी प्रार्थना स्य्हेङ्पीन्जेतो। तलेपङ्सम् जम्मनो म्हीमाचे बीस्वास् स्य्हेङ्बल अरे। 3 तर प्रभुमी बीस्वासीलो मुबल तज्यीम् थेङ्चे एङ्यीमात बङ्ज्येन् तनलजेत्स्ये मुब, ओसेम् सैतान् ग्यम्से थर्नलजेत्स्ये मुब। 4 ङ्यीमाचे कुल्बे अर्तीमा एङ्यीमाचे ङ्येन्ज्यीम् ब्रटीबल मुब, ओसेम् लीक्यम्एनो हुजु अर्ती ङ्येन्ज्यीम् ब्रस्ये मुब बी ङ्यीमाचे प्रभुरी भर् थेन्बल मुब। 5 पर्मेस्वर्चे एङ्यीमात स्य्हेङ्जेत्पे म्होइबत गोबरी प्रभुचेनो एङ्यीत र्हो स्य्हेङ्जेत्खइ, ओसेम् एङ्यीमात ख्रीस्ट्चे नाप खम्बे सक्ती न्हङ्खइ पङ्ज्यीम् ङ्यीमाचे प्रार्थना स्य्हेङ्ब। ब्लेकुमाकी बीरुद्दरी चेतावनी 6 र्होमा, ङ्य्हङ्की प्रभु येसु ख्रीस्ट्की छेन्री ङ्यीमा एङ्यीमात कुल्ब, ङ्यीमाचे लोप्पे तम् अङ्येन्नले ब्रबे म्हीमातेङ् जम्मनो ब्लेकु बीस्वासीमा ग्यम्से फेःज्यीम् टीउ। 7 तलेपङ्सम् ङ्यीमाचे स्य्हेङ्ब र्हङ्लेनो एङ्यीमाचेएनो स्य्हेङ्थोब पङ्बे तम् एङ्यीमाचे स्येब। ङ्यीमा एङ्यीमातेङ् बक्च्य मुबे बेलोरी ब्लेकु तज्यीम् अटी। 8 एङ्यीमात दुख अतखइ बी ङ्यीमाचे दीन् म्हुन्नो य्हक्को लक् स्य्हेङ्ज्यी। ङ्यीमाचे टङ अफानले खलइजएनो चब अच। 9 एङ्यीमा ग्यम्से ङ्यीमात र्हो यङ्बे हक् अरेबल तज्यीम् अय्हीन्, तर एङ्यीमाकी लागीरी नमुन ङोन्बे लागीरी चोले स्य्हेङ्ज्यी। 10 एङ्यीमातेङ् बक्च्य मुबे बेलोरीनो ङ्यीमाचे एङ्यीमात कुल्बल मुबल, “खल्चे पङ्लेनो लक् अस्य्हेङ्ज्यी पङ्सम् चबएनो अचखइ।” 11 एङ्यीमान्हङ्री गदे म्हीमामी ब्लेकु तज्यीम् टीबल रो पङ्बल ङ्यीमाचे थ्येःज्यी। थेङ्यीमा र्हङचेमी तइ लक्एनो अस्य्हेङ् तर र्होइ लक्रीम् या जङ्ज्यीम् ब्रब रो। 12 होतेबे म्हीमात ङ्यीमा प्रभु येसु ख्रीस्ट्की छेन्री कुल्ब, थेङ्यीमाचे कुटीले र्हङ्की लक् स्य्हेङ्खइ ओसेम् र्हङ्की फो र्हङ्चेनो न्हखइ। 13 तर अज्यो-अलेमा, एङ्यीमामी ज्यबे लक् स्य्हेङ्बरी खेमेएनो थदुगो। 14 एङ्यीमान्हङ्री खल्चे पङ्लेनो ङ्यीमाचे चु चीठीरी ब्रीबे तम् अङ्येन्ज्यी पङ्सम् हुजु म्हीत स्येज्यीम् थेइ सङ्गत थस्येङो। होले स्य्हेङ्ज्यी पङ्सम् थे र्हङ्नो पेत्स्ये मुब। 15 तर थेत सत्तुर् थम्हेनो, ओसेम् बीस्वासी र्होमात र्हङ्ले चेतावनी पीनो। ज्युकी लस्सो 16 देरेम् ङ्य्हङ्त सान्ती न्हङ्बे प्रभु र्हङ्चेनो खेमपङ्लेनो ओसेम् खले लज्यीम् पङ्लेनो एङ्यीमात सान्ती न्हङ्खइ। ओसेम् प्रभु एङ्यीमा जम्मतेङ् बक्च्य तखइ। 17 ङ पावलचे र्हङ्की याचेनो लस्सो ब्रीटीब मुब। ङचे ब्रीबे जम्म चीठीमाकी चीनो चुनो य्हीन्ब। ओसेम् चोलेनो ब्रीब। 18 ङ्य्हङ्की प्रभु येसु ख्रीस्ट्की अनुग्रह एङ्यीमा जम्मतेङ्नो तखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.