२ थेस्लोनीकी 2 - पश्चिम तामाङपर्मेस्वर्की नीयम्त अङ्येन्बे म्ही 1 र्होमा, ङ्य्हङ्की प्रभु येसु ख्रीस्ट् दोःज्यीम् ब्योन्युजेत्स्ये मुब, ओसेम् ङ्य्हङ्मा थेङ्त खदु लबरी र्हुब् तस्ये मुब। होत्तज्यीम् ङ्यीमा एङ्यीमात चु तम्की बारेरी फ्या लब, 2 एङ्यीमात खल्चे पङ्लेनो प्रभु ब्योन्युबे दीन् खबल मुब बी ङ्यीमाचे र्हङ्ले अगम्बानी ग्यम्से पङ्लेनो, प्रचार ग्यम्से पङ्लेनो, चीठी ग्यम्से पङ्लेनो एङ्यीमा थलोङो ओसेम् थथोमो। 3 तर एङ्यीमात खल्चेएनो खले लज्यीमएनो अलुखइ। तलेपङ्सम् पर्मेस्वर्की बीरुद्दरी अज्यबे ङ्य्हच्छ्यङ् लक्मा अतगदे ओसेम् पर्मेस्वर्की नीयम्त अङ्येन्बे नास् तथोबे म्ही अडोङ्गदे प्रभुइ दीन् खस्ये अरे। 4 ओसेम् हुजु म्हीचे र्हङ्चे र्हङ्तनो ङ्य्हच्छ्यङ् स्य्हेङ्ज्यीम् म्हीमाचे पर्मेस्वर् पङ्ज्यीम् तेन्बे जम्मनो स्हेमात बीरोद् स्य्हेङ्स्ये मुब। होदेकीनो अय्हीन् थेचे पर्मेस्वर्की दीम्री टीज्यीम् र्हङ्चे र्हङ्तनो पर्मेस्वर् पङ्स्ये मुब। 5 एङ्यीमात व्हल् अरे? ङ एङ्यीमातेङ् बक्च्य मुबे बेलोरी चु तम्मा ङचे एङ्यीमात पङ्बल मुबल। 6 हुजु दुस्ट् म्हीत खजु तम्चे देरे सम्म र्हङ्की बेलो खबतेङ्कीनो म्रङ्खखइ बी रोक्तीज्यीम् थेन्बल मुब, हुजु एङ्यीमाचे स्येःबलनो मुब। 7 तलेपङ्सम् पर्मेस्वर्की नीयम्त अङ्येन्बे हुजु म्हीइ सक्तीचे न्हङ्-न्हङ् र्हङ्की लक्मा स्य्हेङ्ब तीप्ज्यीन्बल मुब। तर थेत रोक्तीज्यीम् थेन्बे सक्तीचे थेत अपीत् गदे थेइ दुस्ट लक्मा दोरी म्रङ्स्ये अरे। 8 हुजु लीप्चे पर्मेस्वर्की नीयम्त अङ्येन्बे हुजु म्ही म्रङखस्ये मुब। ओसेम् प्रभु येसु ख्रीस्ट् ब्योन्युजेत्प बीसेम् र्हङ्की य्हल्की सक्तीतेङ् बु: गीःचेनो थेत नास् स्य्हेङ्जेत्स्ये मुब। 9 पर्मेस्वर्की नीयम्त अङ्येन्बे हुजु म्हीचे सैतान्की सक्ती बज्यीम् खस्ये मुब, ओसेम् थेचे जम्म थोइ भ्युकी चीनोमातेङ् अचम्मइ लक्मा स्य्हेङ्स्ये मुब। 10 ओसेम् नास् तस्येलमा जम्मात नइनलबे जम्मनो छल्मा स्य्हेङ्स्ये मुब, तलेपङ्सम् थेङ्यीमाचे मुक्ती न्हङ्बे देमेन्त अम्होइ ओसेम् सेम्री अङ्यी। 11 होत्तज्यीम् थेङ्यीमाचे भ्यु तम्रीनो बीस्वास् स्य्हेङ्खइ पङ्ज्यीम् पर्मेस्वर्चे थेङ्यीमाज थोम्नलबे ङ्य्हच्छ्यङ् सक्ती गीः पीत्खजेत्स्ये मुब। 12 थेङ्यीमाचे देमेन्त बीस्वास् अस्य्हेङ्नले य्हक्को पापमा स्य्हेङ्बरीनो तङ्बल तज्यीम् थेङ्यीमात सजाय न्हङ्बरी पर्मेस्वर्चे चोले स्य्हेङ्जेत्पल य्हीन्ब। कोङ्ज्यीम् टीउ 13 प्रभुचे म्होइजेत्पे र्होमा, एङ्यीमाकी लागीरी ङ्यीमाचे खेम पङ्लेनो पर्मेस्वर्त व्होर्छ्ये पीन्थोब, तलेपङ्सम् जम्बुलीङ् ठुङ्ब बीम ङोन्ग्यम् य्हङ्सेनो पबीत्र आत्माइ पबीत्र स्य्हेङ्बे लक् ग्यम्से ओसेम् देमेन्त स्य्हेङ्बे बीस्वास् ग्यम्से थर्बे लागीरी पर्मेस्वर्चे एङ्यीमात दम्जेत्ज्यी। 14 चुइ लागीरी ङ्यीमाचे स्येत्पे ज्यबे सम्तर् ग्यम्सेनो पर्मेस्वर्चे एङ्यीमात ङ्होत्जेत्ज्यी। ङ्य्हङ्की प्रभु येसु ख्रीस्ट्की महीमा एङ्यीमाचेएनो यङ्खइ पङ्ज्यीम् थेङ्चे एङ्यीमात ङ्होत्जेत्ज्यी। 15 होत्तज्यीम् र्होमा, ङ्यीमाचे एङ्यीमात सुङ् ग्यम्से ओसेम् चीठी ग्यम्से लोप्पे देमेन्की तम्मात ङ्येन्स्यीनो टीज्यीम् कोङ्नले टीउ। 16 ङ्य्हङ्की प्रभु येसु ख्रीस्ट् ओसेम् अप पर्मेस्वर्चे ङ्य्हङ्मात म्होइजेत्ज्यी, ओसेम् थेङ्की अनुग्रह ग्यम्से खेमेएनो अबेबे आर्तेङ् ज्यबे आस् न्हङ्जेत्ज्यी। 17 एङ्यीमाचे स्य्हेङ्बे ज्यबे लक्मातेङ् पङ्बे तम्मारी आर्तेङ् बङ् न्हङ्जेत्खइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.