२ पत्रुस 3 - पश्चिम तामाङप्रभु दोःज्यीम् ब्योन्युब पङ्बे बाचा 1 म्होइबे र्होमा, ङचे एङ्यीमात ब्रीबे चु चीठी ङ्य्हीख्यप् कुनोल य्हीन्ब। चु चीठी ङ्य्ही ग्यम्सेनो एङ्यीमात चु तम्मा ज्यनले व्हल्लपीन्ज्यीम् एङ्यीमाकी सेम्री चोखो तम्मा म्हेन्बरी आर् पीन्बल मुब। 2 दङ्बोइ पबीत्र अगम्बक्तमाचे पङ्बे तम् ओसेम् एङ्यीमाकी प्रेरीत्मा ग्यम्से स्येत्पे ङ्य्हङ्की प्रभुतेङ् मुक्तीदाताचे कुल्जेत्पे फ्रोइत एङ्यीमाचे खेम पङ्लेनो व्हल् लथोब। 3 ओसेम् गोदोब्न्हङ् ङोन्ग्यम् एङ्यीमाचे चु तम् गोथोब, ज्युकी दीन्मारी र्हङ्की अज्यबे सेम्चे म्हेन्ब र्हङ्ले ब्रबे म्हीमा डोङ्स्ये मुब। ओसेम् थेङ्यीमाचे एङ्यीमात ङो:ज्यीम्, 4 “ख्रीस्ट्चे दोःज्यीम् युबे बाचा स्य्हेङ्जेत्पल अय्हीनो स्यीम? खइ थेङ् खन य्हर्ज्यी? तलेपङ्सम् ङ्य्हङ्माकी सुरुकी ख्रीस्टीयन् अगुवामा स्यीज्यीम् य्हर्ज्यी, तर जम्बुलीङ् स्य्हेङ्बे बेलो य्हङ्से मुबे तम् देरेएनो होतेबनो मुब।” 5 पर्मेस्वर्चे र्हङ्की फ्रोइ ग्यम्सेनो स्वर्गमातेङ् जम्बुलीङ् स्य्हेङ्जेत्ज्यी ओसेम् जम्बुलीङ् यी ग्यम्से स्य्हेङ्जेत्ज्यीम् यी ग्यम्सेनो डोङ्नलजेत्ज्यी पङ्बे तम् थेङ्यीमाचे स्येःज्यीम्एनो अस्येःब र्हङ् लब। 6 ओसेम् हुजु यी ग्यम्सेनो हुजु बेलोइ जम्बुलीङ् दीम्ज्यीम् नास् तज्यी। 7 तर देरे मुबे स्वर्गमातेङ् जम्बुलीङ्एनो मे ग्यम्से नास् स्य्हेङ्बरी पर्मेस्वर्की हुजु फ्रोइचेनो जोगइतीज्यीम् थेन्जेत्पल मुब। ओसेम् पर्मेस्वर्की फ्रोइ अङ्येन्बे म्हीमात न्याय स्य्हेङ्ज्यीम् नास् स्य्हेङ्बे दीन् सम्म स्वार्गमातेङ् जम्बुलीङ् तस्यीनो टीस्ये मुब। 8 तर म्होइबे र्होमा, एङ्यीमाचे चु तम् गीः व्हल् लथोब। प्रभुइ लागीरी तीरेत् हजार बर्स र्हङ्ब ओसेम् हजार बर्स तीरेत र्हङ्ब तब। 9 र्हङ्चे स्य्हेङ्जेत्पे बाचा टोप् लबरी प्रभुचे गेःजेत्प बी डेत्डेत् म्हीमाचे पङ्लेनो थेङ् गेःअजेत, बरु एङ्यीमान्हङ्री खलेएनो नास् अतखइ, तर जम्मचेनो र्हङ्की पाप्की पस्चताप स्य्हेङ्खइ पङ्बे थुः थेङ्ल मुबल तज्यीम् थेङ्चे एङ्यीमात ब्रेन्जेत्टीब मुब। 10 तर प्रभुइ दीन्मी म्हीमाचे सेम्चेनो अम्हेन्बे बेलोरी य्हो खब र्हङ्ले खस्ये मुब। हुजु दीन्री ङ्हच्छ्यङ् केत् डोङ्ज्यीम् मु म्हज्यीम् य्हर्स्ये मुब। ओसेम् मुरी मुबे जम्मनो स्हेमा क्रोज्यीम् नास् तस्ये मुब। जम्बुलीङ्तेङ् जम्बुलीङ्री मुबे जम्मनो स्हेमा नास् तस्ये मुब। 11 जम्मनो स्हेमा चोले नास् स्य्हेङ्स्ये तबल तज्यीम् एङ्यीमाचे र्हङ् खतेबे म्ही तथोब? एङ्यीमा पबीत्रतेङ् पर्मेस्वर्त सेम्री ङ्यीबे लक् स्य्हेङ्ज्यीम् ब्रबे म्ही तथोब। 12 एङ्यीमाचे ख्रीस्ट् दोःज्यीम् ब्योन्युबे दीन् ब्रेन्बतेङ् हुजु ग्योनेनो तखइ पङ्ज्यीम् स्य्हेङ्थोबे लक् स्हेङो। हुजु बेलोरी मु क्रोज्यीम् नास् तस्ये मुब, ओसेम् मुरी मुबे स्हेमा जम्मनो मेइ व्हप्चे ङ्य्हुज्यीम् य्हर्स्ये मुब। 13 तर ङ्य्हङ्मा पर्मेस्वर्चे बाचा स्य्हेङ्जेत्पे छार् स्वर्गमातेङ् छार् जम्बुलीङ्की ग्यम् च्याज्यीम् ब्रेन्ब। हुजुरी धार्मीक्ताकीनो तस्ये मुब। 14 होत्तज्यीम् म्होइबे र्होमा, हुजु दीन् ब्रेन्बतेङ् पर्मेस्वर्की ङोन्री पबीत्रतेङ् तइ दागएनो अरेबल तबरी ओसेम् थेङ्तेङ् सान्तीले टीबरी बङ् लो। 15 ओसेम् ङ्य्हङ्की प्रभुइ धैर्यमी म्हीमा थर्खइ बी न्हङ्बे मौक य्हीन्ब बी म्हेनो। ङ्य्हङ्की म्होइबे अले पावलचेएनो पर्मेस्वर् ग्यम्से यङ्बे बुद्दी ग्यम्से चु तम् एङ्यीमात ब्रीबल मुबल। 16 थेइ जम्मनो चीठीमारी चु तम्की बारेरी ब्रीबल मुबल। हुजुरी गदे तम्ममी गोबरी गारो मुब। अलोप्पतेङ् बीस्वास्री अकोङ्बे म्हीमाचे हुजु तम्की अर्थ न्होङ्नलब। थेङ्यीमाचे ल्हो-ल्हो धर्म छ्येमालएनो होलेनो अर्थ ल्हइतीब, ओसेम् थेङ्यीमाचे र्हङ्तनो नास् तनलब। 17 तर म्होइबे र्होमा, एङ्यीमाचे चु तम् ङोन्नो स्येःज्यीन्बल मुब। चोङ्ले टीउ, होत्तज्यीम् पर्मेस्वर्की फ्रोइत अङ्येन्बे म्हीमाचे एङ्यीमात थोम्न लम्यङ्स्ये अरे, ओसेम् एङ्यीमाचे र्हङ्की कोङ्बे बीस्वास् पीत्स्ये अरे। 18 तर खेम पङ्लेनो ङ्य्हङ्की प्रभुतेङ् मुक्तीदाता येसु ख्रीस्ट्की अनुग्रहतेङ् ज्ञान्री य्हक्को तस्यीनोबोरो। देरे ओसेम् खेम पङ्लेनो थेङ्तनो तोप्प तखइ। आमेन्! |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.