२ पत्रुस 2 - पश्चिम तामाङभ्युकी तम् लोप्पे लोप्पोन्मा 1 दङ्बो इस्राएलीमाकी गुङ्री भ्युकी तम् लोप्पे अगम्बक्तमा डोङ्ज्यी, होलेनो एङ्यीमाकी गुङ्रीएनो भ्युकी तम् लोप्पे लोप्पोन्मा डोङ्स्ये मुब। थेङ्यीमाचे न्होङ्नलबे भ्युकी तम्मा न्हङ्न्हङ्री लोप्स्ये मुब, ओसेम् थेङ्यीमाचे र्हङ्त थर्नलजेत्पे प्रभुत बीस्वास् स्य्हेङ्ब पीत्स्ये मुब। होत्तज्यीम् थेङ्यीमाचे ग्योनेनो र्हङ्की जोरी र्हङ्चेनो नास् बस्ये मुब। 2 ओसेम् य्हक्को म्हीमा थेङ्यीमाचे लोप्पे तम् ङ्येन्ज्यीम् अज्यबे ग्यम्री ब्रस्ये मुब। ओसेम् थेङ्यीमाचे लज्यीम् ल्हो-ल्हो म्हीमाचे देमेन्की ग्यम्त बीरोद् स्य्हेङ्स्ये मुब। 3 थेङ्यीमा लोभ्चे प्लीङ्बल तज्यीम् र्हङ्चे म्हेन्बे भ्युकी तम् लोप्ज्यीम् एङ्यीमा ग्यम्से फाइद कीन्स्ये मुब। तर पर्मेस्वर्चे थेङ्यीमात दङ्बोनो दोसी ङोन्ज्यीन्बल मुब, ओसेम् थेङ्यीमा नास् तस्येनो मुब। 4 तलेपङ्सम् पर्मेस्वर्चे पाप स्य्हेङ्बे स्वर्गदुत्मात खल्तेएनो थेनअजेत्। थेङ्चे थेङ्यीमात नर्करी ख्लापीत्जेत्ज्यी, ओसेम् न्यायकी दीन् सम्म थेङ्यीमात म्हुन्तुङ्री च्यल्तचे खीःज्यीम् थेन्बल मुब। 5 पर्मेस्वर्चे दङ्बो जम्बुलीङ्की म्हीमातएनो अथेन्। पर्मेस्वर्की फ्रोइ अङ्येन्बलमात पर्मेस्वर्चे नम्की भल् ग्यम्से नास् लजेत्ज्यी। तर धार्मीक्ताकी प्रचार् स्य्हेङ्बे नोआतेङ् थेइ म्हेम्यमा ङ्यीस् थर्ज्यी। 6 ओसेम् पर्मेस्वर्चे सदोम्तेङ् गमोरा पङ्बे सहर्मातएनो दोस् ङोन्जेत्ज्यीम् मेचे नास् स्य्हेङ्जेत्ज्यी। चोले पर्मेस्वर्चे थेङ्की फ्रोइत अङ्येन्बलमात खतेब स्य्हेङ्ब बी थेङ्यीमा ग्यम्से नमुन गीः ङोन्जेत्ज्यी। 7 तर पर्मेस्वर्चे थेङ्की ङोन्री धर्मी मुबे लोत्त थर्नलजेत्ज्यी। लोत् म्हीमाकी अज्यबतेङ् नेइबे ब्यबहार्मा म्रङ्ज्यीम् दुखी तबल मुबल। 8 धर्मी म्ही लोत हुजु म्हीमाकी गुङ्री टीबल मुबल, ओसेम् दीनइलनो थेङ्यीमाकी होतेबे अज्यबे ब्यबहार्मा म्रङ्बतेङ् थ्येःज्यीम् थेइ सेम्री य्हक्को दुख तटीबल मुबल। 9 होत्तज्यीम् थेङ्की फ्रोइ ङ्येन्ज्यीम् ब्रबलमात दुख ग्यम्से जोगइतीबरी ओसेम् थेङ्की फ्रोइत अङ्येन्नले ब्रबलमात सजाय पीन्बरी न्यायकी दीन्सम्म खले थेन्थोब बी पर्मेस्वर्चे खेम्जेत्प। 10 खास् लज्यीम् थेङ्चे अज्यबे सेम् थोःज्यीम् नेइबे ब्यबहार् स्य्हेङ्बलतेङ् पर्मेस्वर्की अधीकार्त हेल स्य्हेङ्बलमात न्यायकी दीन्सम्म थेन्जेत्स्ये मुब। चोतेबे म्हीमाकी सेम् युङ्ब र्हङ्ले कोङ्बल तब ओसेम् र्हङ्चे र्हङ्त ङ्हच्छ्यङ् म्हेन्ब, ओसेम् थेङ्यीमा स्वर्गरी मुबलमाकी नीन्द स्य्हेङ्बरी अलोङ्। 11 तर स्वार्गदुत्मा स्वर्गरी मुबलमा बीमएनो य्हक्को बङ्ज्येन्तेङ् सक्तीसाली य्हीन्लेएनो थेङ्यीमाचे प्रभुइ ङोन्री स्वर्गरी मुबलमात दोस् ल्हइअती। 12 तर चु म्हीमा र्हङ्चेनो अगोबे तम्माकी नीन्द स्य्हेङ्ब। थेङ्यीमा बुद्दी अरेबे सेम्ज्येन्मा र्हङ्ब मुब, ओसेम् र्हङ्की सेम्चे म्हेन्बलकीनो स्य्हेङ्ब। थेङ्यीमा चुङ्ज्यीम् सेत्थोःबे र्हीइ सेम्ज्येन्मा र्हङ्ब मुब, ओसेम् थेङ्यीमाएनो र्हीइ सेम्ज्येन्मा र्हङ्ले नास् स्य्हेङ्बल तस्ये मुब। 13 थेङ्यीमाचे स्य्हेङ्बे अज्यबे लक्की सजाय थेङ्यीमाचेनो नाथोःस्ये मुब। थेङ्यीमाचे दीनीरीनो मनमोज्यी लज्यीम् टीबनो तङ्बे तम् य्हीन्ब बी म्हेन्ब। थेङ्यीमातेङ् बक्च्य चब थुङ्बरी टीबनो एङ्यीमाकी लागीरी पेत्पतेङ् न य्हर्बे तम् य्हीन्ब। थेङ्यीमा खेम पङ्लेनो ल्हो-ल्होत छल् स्य्हेङ्बरी तङ्ब। 14 थेङ्यीमाकी सेम् ब्यभीचार्चे प्लीङ्बल तब, ओसेम् थेङ्यीमा गदे पाप स्य्हेङ्लेनो अयो:बल तब। थेङ्यीमाचे बीस्वास्री अकोङ्बे म्हीमात पाप स्य्हेङ्बरी व्हम्ब, ओसेम् थेङ्यीमाकी सेम् लोभ्चे प्लीङ्बल तब। थेङ्यीमात पर्मेस्वर्की केम्लङ् फोःब! 15 थेङ्यीमा ज्यबे ग्यम् पीत्ज्यीम् अज्यबे ग्यम्री ब्रब। ओसेम् थेङ्यीमा अज्यबे लक् स्य्हेङ्ज्यीम् टङ छाबरी म्होइबे बओर्की ज बालामकी लीप्चे ब्रबल मुब। 16 तर बालामत पर्मेस्वर्चे थेचे स्य्हेङ्बे पापकी लागीरी बराजेत्पल मुबल, ओसेम् म्हीचे र्हङ्ले केत् तेत्ज्यीम् बुङ्गुचे थेइ पर्बे लक्त र्होद्पल मुबल। 17 चोतेबे म्हीमामी यी खर्बे यी म्रुःमातेङ् लापलुङ्चे नाबोर्बे मुक्प र्हङ्ब य्हीन्ब। थेङ्यीमाकी लागीरी पर्मेस्वर्चे य्हक्को म्हुन्दुङ् ग्ला थेन्जेत्पल मुब। 18 तलेपङ्सम् थेङ्यीमाचे र्हङ्चे र्हङ्त ङ्हच्छ्यङ् म्हेन्ज्यीम् लक् अतबे तम्मा य्हक्को पङ्ब, ओसेम् थेङ्यीमाचे देरेक अज्यबे ग्यम् पीत्ज्यीम् खबे म्हीमात ल्हीःकी अज्यबतेङ् नइबे लक्मा स्य्हेङ्बरी व्हम्ज्यीम् फसइतीब। 19 थेङ्यीमाचे स्वतन्त्र स्य्हेङ्पीन्ब पङ्ज्यीम् बाचा लब, तर थेङ्यीमा र्हङ्नो पाप्की बान तबल तब, तलेपङ्सम् खजु तम्चे म्हीत डाब थेङ्यीमा हुजुलनो बान तब। 20 तर थेङ्यीमाचे ङ्य्हङ्की प्रभुतेङ् मुक्तीदाता येसु ख्रीस्ट्त स्येःज्यीम् जम्बुलीङ्की अज्यबे लक्मा स्य्हेङ्ब पीत्लाज्यीम्एनो देबे दोःज्यीम् हुजु अज्यबे लक्मा स्य्हेङ्ज्यी पङ्सम् थेङ्यीमाकी लीक्यम्की गती ङोन्ग्यम्ल बीमएनो झेन् अज्यब तब। 21 तलेपङ्सम् पर्मेस्वर्चे कुल्जेत्पे पबीत्र तम् थेङ्यीमाचे स्येःज्यीम्एनो हुजु तम् र्हङ्ले ब्रबरी अङ्येन्ब बीमम् बरु थेङ्यीमाचे धार्मीक्ताकी ग्यम् खेमेएनो अस्येःबल य्हीन्सम् ज्यब तस्येल। 22 थेङ्यीमामी “नीकीचे र्हङ्चे रुत्पे रुत् दोःज्यीम् र्हङ्चेनो चब” ओसेम् “तीलीत गदे ख्रुइ लपीन्लेनो दोःज्यीम् तेलेरीनो ङ्यीब” बी पङ्बे उखान् र्हङ्ब य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.