२ पत्रुस 1 - पश्चिम तामाङ1 ङ प्रेरीत ओसेम् येसु ख्रीस्ट्की बान सीमोन पत्रुस ग्यम्से ङ्य्हङ्की पर्मेस्वर्तेङ् मुक्ती न्हङ्बे येसु ख्रीस्ट्की धार्मीक्त ग्यम्से ङ्यीमाचे र्हङ्ले ङ्हच्छ्यङ् बीस्वास् यङ्बलमात: 2 पर्मेस्वर्तेङ् ङ्य्हङ्की प्रभु येसुत स्येःब ग्यम्से एङ्यीमात य्हक्को अनुग्रहतेङ् सान्ती तखइ। पर्मेस्वर्की ङ्होत्जेपतेङ् दम्जेत्प 3 पर्मेस्वर्चे र्हङ्की ङ्हच्छ्यङ् सक्ती ग्यम्से ङ्य्हङ्मात थेङ्त सेम्री ङ्यीबे पबीत्र जीवन् सोबरी तोःबे स्हेमा जम्मनो न्हङ्बल मुब। तलेपङ्सम् र्हङ्की महीमातेङ् भलाइ ग्यम्से ङ्य्हङ्मात ङ्होत्जेत्पे पर्मेस्वर्त ङ्य्हङ्माचे स्येःबल मुब। 4 चोलेनो थेङ्चे बाचा स्य्हेङ्जेत्पे ङ्हच्छ्यङ् ग्लुब अखम्बे बर्दान्मा ङ्य्हङ्मात न्हङ्जेत्ज्यी। एङ्यीमा चु जम्बुलीङ्री मुबे अज्यबे सेम्की नास् लबे तम्मा ग्यम्से स्योर्ज्यीम् पर्मेस्वर्की स्वभावरी ब्रउ बी हुजु बर्दान्मा न्हङ्बल य्हीन्ब। 5 होत्तज्यीम् गदे खम्ब होदेनो एङ्यीमाकी बीस्वास्री ज्यबे बानी बेहोर् कबो ओसेम् ज्यबे बनी बेहोर्री ज्ञान् कबो, 6 ओसेम् ज्ञान्री र्हङ्की सेम् दुल्ब, र्हङ्की सेम् दुल्बरी धैर्य, धैर्यरी पर्मेस्वर्त सेम्री ङ्यीबे लक् कबो, 7 ओसेम् पर्मेस्वर्त सेम्री ङ्यीबे लक्री अज्यो अलेमाकी वास्त, अज्यो अलेमाकी वास्तरी म्होइब कबो। 8 तलेपङ्सम् चोतेबे तम्मा एङ्यीमातेङ् य्हक्को मुज्यी पङ्सम् ङ्य्हङ्की प्रभु येसु ख्रीस्ट्की ज्ञान्री एङ्यीमाचे य्हक्को लक्मा स्य्हेङ्बतेङ् रोःरो रोःस्ये मुब। 9 तर चोतेबे तम्मा अरेबे म्हीम् चेक्पजकी क्योर्की स्हेएनो अम्रङ्बे कन म्ही र्हङ्ब य्हीन्ब। थेङ्यीमाचे र्हङ्की ङोन्ग्यम्की पाप्मा ख्रुबलएनो म्लेत्ज्यीन्बल तब। 10 होत्तज्यीम् बीस्वासी र्होमा, पर्मेस्वर्चे एङ्यीमात ङ्होत्जेत्पलतेङ् दम्जेत्पल य्हीन्ब पङ्बे तम् पक्कले ङोनो। तलेपङ्सम् चु तम्मा स्य्हेङ्सम् एङ्यीमा बीस्वास्री खेमेएनो गुर्स्ये अरे। 11 ओसेम् ङ्य्हङ्की प्रभुतेङ् मुक्तीदाता येसु ख्रीस्ट्की खेम पङ्लेनो टीबे य्हुल्री वङ्बे बेलोरी एङ्यीमात ङ्हच्छ्यङ् स्वागत स्य्हेङ्जेत्स्ये मुब। 12 होत्तज्यीम् एङ्यीमाचे चु जम्मा तम्मा स्येःलेएनो ओसेम् एङ्यीमाचे यङ्बे देमेन्री कोङ्नले टीलेएनो ङ एङ्यीमात खेम पङ्लेनो चु तम्मा ह्वल् लपीन्स्ये मुब। 13 ङ सोगदे सम्म चु तम्मा खेम पङ्लेनो एङ्यीमात ह्वल् लपीन्स्यीनो टीब ज्यब बी ङचे म्हेन्ब। 14 तलेपङ्सम् ङचे ङइ सेप्रइ ल्ही ग्योन्नो पीत्थेन्स्ये मुब पङ्बे तम् ङत ङ्य्हङ्की प्रभु येसु ख्रीस्ट्चे ज्यनले ङोन्पीन्जेत्पल मुब। 15 ओसेम् ङ स्यीज्यीम् य्हर्लेएनो चु तम्मा ह्वल् लब खमो पङ्ज्यीम् ङचे गदे खम्ज्यी होदे एङ्यीमात गोनलस्ये मुब। ख्रीस्ट्की महीमाकी साक्षी 16 तलेपङ्सम् ङ्य्हङ्की प्रभु येसु ख्रीस्ट् ङ्हच्छ्यङ् महीमातेङ् सक्तीरी दोःज्यीम् ब्योन्युजेत्स्ये मुब पङ्बे तम् ङ्यीमाचे एङ्यीमात म्हीमाचे स्य्हेङ्बे अर्तमा ग्यम्से पङ्बल अय्हीन्। तर ङ्यीमाकी र्हङ्की मीःचेनो थेङ्की ङ्हच्छ्यङ् महीमा म्रङ्बल तज्यीम् चु तम् पङ्बल य्हीन्ब। 17 पर्मेस्वर् अप ग्यम्से थेङ्चे स्हेसतेङ् महीमा यङ्ज्यी। ओसेम् “चु ङइ म्होइबे ज य्हीन्ब, ङ थेतेङ् य्हक्को तङ्बल मुब” पङ्बे केत् जम्मन्हङ्री ङ्य्हच्छ्यङ् पर्मेस्वर् ग्यम्से युज्यी। 18 ङ्यीमा थेङ्तेङ् पबीत्र गङ्री मुबे बेलोरी स्वर्ग ग्यम्से युबे हुजु केत् ङ्यीमा र्हङ्चेनो थ्येःबल मुबल। 19 होत्तज्यीम् अगम्बक्तमाचे स्येत्पे फ्रोइ देमेन् य्हीन्ब बी ङ्य्हङ्माचे ज्यनले स्येःबल मुब। स्य्होःरी मीः छीरीरीले अम्रङ्गदे ओसेम् एङ्यीमाकी सेम्री स्य्होकी सार् अफ्यागदे म्हुन्तुङ्री लुम्टीबे मेतङ्त र्हङ्ले एङ्यीमाचे हुजु फ्रोइत र्हङ्की सेम्री ज्यनले थेन्ज्यी पङ्सम् ज्यब तस्ये मुब। 20 गोदोब्न्हङ् ङोन्ग्यम् एङ्यीमाचे चु तम् गोथोब, की धर्म छ्येःरी अगम्बक्तचे पङ्बे तम् थेङ्यीमाचे र्हङ्की सेम्चे म्हेन्ज्यीम् पङ्बल अय्हीन्। 21 तलेपङ्सम् अगम्बक्तमाचे पङ्बे तम् म्हीइ सेम्चे म्हेन्ज्यीम् पङ्बल अय्हीन्, तर पर्मेस्वर्की फ्रोइ म्हीमाचे पबीत्र आत्मा ग्यम्से स्येत्पल य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.