२ युहन्ना 1 - पश्चिम तामाङ1 ङ एल्डर ग्यम्से पर्मेस्वर्चे दम्जेत्पे अमकोलतेङ् थेइ जम्मनो ज जमेमात ब्रीटीब, थेङ्यीमात ङ देमेन्नो म्होइब। ङचेकीनो अय्हीन् देमेन्त स्येःबलमा जम्मचेनो एत म्होइब, 2 तलेपङ्सम् देमेन् ङ्य्हङ्मातेङ् मुब, ओसेम् खेम पङ्लेनो ङ्य्हङ्मातेङ् तस्ये मुब। 3 पर्मेस्वर् अपतेङ् थेङ्की ज येसु ख्रीस्ट्चे ङ्य्हङ्मात अनुग्रह, कृपातेङ् सान्ती न्हङ्खइ। जम्मनो देमेन्तेङ् म्होइबरी चुमा ङ्य्हङ्ल तखइ। देमेन्तेङ् म्होइब 4 एइ कोलमान्हङ्री डेत्डेत् पर्मेस्वर् अपचे ङ्य्हङ्त कुल्जेत्प र्हङ्ले देमेन्री ब्रबल म्रङ्ज्यीम् ङ य्हक्को तङ्ज्यी। 5 म्होइबे अमकोल, ङ एत कुल्ब ङ्य्हङ्मा गीःचे गीःत म्होइगे, चु ङचे एत ब्रीटीबलम् छार् तम् कुल्बल अय्हीन्, चुम् ङ्य्हङ्माचे ङोन्ग्यम् य्हङ्सेनो स्य्हेङ्टीब मुबल। 6 परमेस्वरचे कुल्जेत्पे अर्ती ङ्येन्ज्यीम् ब्रबनो म्होइब य्हीन्ब। एङ्यीमा गी:चे गी:त म्होइथोबनो एङ्यीमाचे ङोन्ग्यम् य्हङ्सेनो ङ्येन्बे अर्ती य्हीन्ब। 7 येसु ख्रीस्ट् म्हीइ ल्ही तज्यीम् युबल अय्हीन् पङ्ज्यीम् लुबे म्हीमा य्हक्कोनो जम्बुलीङ्री खबल मुब। चोतेबे म्हीमाम् लुबलमातेङ् ख्रीस्ट् बीरोधीमा य्हीन्ब। 8 होत्तज्यीम् चोङ्ले टीउ, एङ्यीमाचे ता यङ्बे लागीरी लक् स्य्हेङ्टीब हुजु इनाम् म्हनले अय्हीन् तर जम्मनो यङ्नले टीउ। 9 खल पङ्लेनो ख्रीस्ट्चे लोप्जेत्पे चु तम्री अटीबलमातेङ् पर्मेस्वर् स्य्हुअजेत्, तर थेङ्चे लोप्पे तम्री टीबलमातेङ् अपतेङ् ज ङ्य्हीनो स्य्हुजेत्प। 10 खलपङ्लेनो एइ दीम्री खबे बेलोरी चु तम् बीम ल्हो-ल्हो तम् लोप्ज्यी पङ्सम् थेत एइ दीम्री थवङ्पुङो, ओसेम् थेत लस्सोएनो थस्य्हेङो। 11 तलेपङ्सम् थेत लस्सो पङ्बनो थेत दुस्ट लक् स्य्हेङ्बरी र्हो स्य्हेङ्ब य्हीन्ब। 12 ङतेङ् एङ्यीमात पङ्थोबे तम् य्हक्कोनो मुब, तर हुजुमा मसीतेङ् स्योस्यो ग्यम्से ब्रीबे सेम् अरे, एङ्यीमातेङ् खतु लज्यीम् पङ्ल। ओसेम् ङ्य्हङ्मा य्हक्को तङ्स्ये मुब। 13 पर्मेस्वर्चे दम्जेत्पे चुरी मुबे एइ अङइ कोलमाचे एङ्यीमात लस्सो पीत्खबल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.