२ कोरीन्थी 9 - पश्चिम तामाङ1 यरुसलेम्री मुबे बीस्वासीमात र्हो लबे टङइ बारेरी एङ्यीमात ङचे ब्रीटीथोब बी अम्हेन्। 2 तलेपङ्सम् एङ्यीमाचे थेङ्यीमात र्हो लबरी य्हक्को सेम् लब पङ्बे तम् ङचे स्येःब। ओसेम् एङ्यीमाल होतेबे सेम् मुबल तज्यीम् ङचे चु तम्की बारेरी तीयुङ् य्हङ्सेनो एङ्यी अखैया प्रदेस्री मुबे म्हीमात र्हो लबरी तयारी मुब बी ङचे माकेडोनीया प्रदेस्की म्हीमात गर्ब लज्यीम् पङ्बल मुबल। एङ्यीमाचे सेम् य्हङ् लज्यीम् पीन्बे बारेरी थ्येःज्यीम् थेङ्यीमान्हङरी य्हक्को म्हीमाचे र्हो लबरी य्हक्को सेम् लबल मुब। 3 देरेम् ङचे हुजु अले ङ्य्हीतेङ् तीतसत पीत्खटीबल मुब, ओसेम् एङ्यीमाकी बारेरी ङ्यीमाचे घमन्ड स्य्हेङ्बल खेर अय्हर्खइ, तर ङचे पङ्ब अनुसार् एङ्यीमा टोप् तज्यीम् टीउ। 4 माकेडोनीयाकी म्हीमा खल पङ्लेनो ङतेङ् बक्च्य खज्यी पङ्सम् ओसेम् एङ्यीमाचे टङ टोप् लज्यीम् थेन्बल थेङ्यीमाचे अयङ्ज्यी पङ्सम् ङ्यीमामी पेत्स्ये मुब, ओसेम् एङ्यीमाएनो पेत्स्ये मुब, तलेपङ्सम् एङ्यीमा टोप्ले टीबल मुब पङ्बे तम्री ङ्यीमा य्हक्को ढुक्क मुबल। 5 होत्तज्यीम् ङ खब बीम ङोन्ग्यम्नो चु अलेमात एङ्यीमाज पीत्खब ज्यब तल बी ङचे म्हेन्ज्यी। होले एङ्यीमाचे र्हो लबरी पीन्ब पङ्ज्यीम् पङ्बे टङ रेन्ज्यीम् टोप्ले थेन्स्ये मुब, ओसेम् चु टङ कर्ले अय्हीन् तर सेम् य्हङ्स्ये तङ्ज्यीम् पीन्बल तस्ये मुब। 6 तर चु तम् व्हल् लउ, चेक्कीनो ब्लुत्पलचे चेक्कीनो ओसेम् य्हक्को ब्लुत्पलचे य्हक्कोनो अन्न दुत्प। 7 एङ्यीमा म्ही र्हङ्स्यीनो र्हङ्की सेम्चे गदे पीन्गे म्हेन्ज्यी, होदेनो पीनो। ओसेम् कर्ले अय्हीन्, र्हङ्की सेम् य्हङ्सेनो पीनो, तलेपङ्सम् सेम् य्हङ्सेनो तङ्ज्यीम् पीन्बे म्हीत पर्मेस्वर्चे म्होइजेत्प। 8 पर्मेस्वर्चे एङ्यीमात जम्मनो स्य्हेमा य्हक्को तबसम्म न्हङ्जेत्प खम्ब, होत्तज्यीम् एङ्यीमात खेम पङ्लेनो जम्मनो स्हेःमा योस्ये मुब, ओसेम् ल्होल्होमाकी लागीरीएनो ज्यबे लक्मा य्हक्को स्य्हेङ्ब खम्स्ये मुब। 9 धर्म छ्येःरी चोले ब्रीबल मुब, “थेचे प्रङनमात सेम् य्हङ् लज्यीम् पीन्ब, थेचे स्य्हेङ्बे ज्यबे लक्मा जुक्नो टीस्ये मुब।” 10 पर्मेस्वर्चे ब्लुत्पे म्हीमात ब्लु ओसेम् चबरी चब न्हङ्जेत्प। होलेनो थेङ्चे एङ्यीमातएनो ब्लु न्हङ्जेत्स्ये मुब, ओसेम् ब्लु झेन् य्हक्को तनलजेत्स्ये मुब, ओसेम् एङ्यीमाचे सेम् य्हङ् लज्यीम् पीन्स्येल तज्यीम् एङ्यीमाकी ज्यबे लक्चे य्हक्को ज्यबे रोःरो रोःनलजेत्स्ये मुब। 11 एङ्यीमाचे खेम पङ्लेनो सेम् य्हङ् लज्यीम् पीन्ब खम्नले पर्मेस्वर्चे एङ्यीमात खेम पङ्लेनो बरु तनलजेत्स्ये मुब। एङ्यीमाचे पीन्बे टङइ भेटीमी ङ्यीमाचे ल्हो-ल्हो मन्डलीमारी तोःबलमात जुपीन्बतेङ् थेङ्यीमाचे पर्मेस्वर्त व्होर्छ्ये पीन्स्ये मुब। 12 एङ्यीमाचे पीन्बे भेटी ग्यम्से पर्मेस्वर्की म्हीमात तोःबे स्हेमा टार्तीबकीनो अय्हीन्, तर चु ग्यम्से य्हक्को म्हीमाचे पर्मेस्वर्त व्होर्छ्ये पीन्स्यीनो टीस्ये मुब। 13 एङ्यीमाचे स्य्हेङ्बे हुजु ज्यबे लक् ग्यम्से एङ्यीमा खतेबे म्हीमा बी ल्हो-ल्होमात ङोन्ब। एङ्यीमाचे ख्रीस्ट्की ज्यबे सम्तर् बीस्वास् लज्यीम् हुजु अनुसार् ब्रबे तम्, ओसेम् एङ्यीमातेङ् मुबे स्हे सेम् य्हङ् लज्यीम् थेङ्यीमा ओसेम् जम्मतनो जुपीन्बल म्रङ्ज्यीम् थेङ्यीमाचे पर्मेस्वर्त तोप्प। 14 ओसेम् पर्मेस्वर्की ङ्हच्छ्यङ् अनुग्रह एङ्यीमातेङ् मुबे ग्यम्से थेङ्यीमाचे सेम् य्हङ्सेनो एङ्यीमाकी लागीरी प्रार्थना स्य्हेङ्स्ये मुब। 15 सेइ लज्यीम् अखम्बे पर्मेस्वर्की बर्दान्की लागीरी थेङ्त व्होर्छ्ये तखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.