२ कोरीन्थी 8 - पश्चिम तामाङसेम् य्हङ् लज्यीम् पीन्थोब 1 ङइ बीस्वासी र्होमा, माकेडोनीया प्रदेस्की मन्डलीमात पर्मेस्वर्चे न्हङ्जेत्पे अनुग्रहकी बारेरी एङ्यीमात स्येत्पे सेम् ङ्यीमाल मुब। 2 ल्हो-ल्हो म्हीमाचे य्हक्को दुख पीन्लेएनो थेङ्यीमा य्हक्को तङ्बल मुब। ओसेम् थेङ्यीमा र्हङ् य्हक्को प्रङ्न मुलेएनो ल्हो-ल्होत सेम् य्हङ् लज्यीम् पीन्ब। 3 थेङ्यीमाचे र्हङ्चे पीन्ब खम्ब बीमएनो य्हक्को तङ् तङ्ज्यीम् पीन्ज्यी पङ्बे तम् ङ एङ्यीमात स्येत्प। 4 थेङ्यीमाचे यरुसलेम्री मुबे पर्मेस्वर्की म्हीमात र्हो लबे मौक थेङ्यीमातएनो पीनो पङ्ज्यीम् ङ्यीमात य्हक्को ख्यप् फ्या लज्यी। 5 थेङ्यीमाचे ङ्यीमाचे म्हेन्ब बीमएनो य्हक्को पीन्ज्यी। ङोन्ग्यम् थेङ्यीमाचे र्हङ्तनो प्रभुइ फ्यारी थेन्ज्यी, ओसेम् पर्मेस्वर्की थुः अनुसार् र्हङ्तनो ङ्यीमाकी यारीएनो सोप्तीज्यी। 6 होत्तज्यीम् तीतसचे ङोन्ग्यम् य्हङ्सेनो एङ्यीमाचे पीन्बे टङ दुत्पे लक् तीप्पल तज्यीम् हुजु लक् पुरा स्य्हेङ्खइ पङ्ज्यीम् ङ्यीमाचे थेतनो एङ्यीमाज पीखत्ज्यी। 7 एङ्यीमा बीस्वास् स्य्हेङ्बरी, लोप्परी, ज्ञान्री, ल्हो-ल्होत आर् पीन्बरी ओसेम् ङ्यीमाचे एङ्यीमात म्होइब र्हङ्ले ल्हो-ल्हो म्हीमात म्होइबरी जम्मनो लक्मारी ज्यब र्हङ्ले चु टङ पीन्ज्यीम् र्हो लबे लक्एनो य्हक्को स्य्हेङ्बे सेम् लउ बी ङ्यीमाचे म्हेन्ब। 8 ङचे चु एङ्यीमाचे स्य्हेङ्नोथोःब बी कुल्बल अय्हीन्। तर ल्हो-ल्होमाचे य्हक्को र्हो लबे सेम् लज्यीम् पीन्ब र्हङ्ले एङ्यीमाचेएनो पीन्ज्यी पङ्सम् एङ्यीमाचे ल्हो-ल्होत स्य्हेङ्बे म्होइब देमेन् य्हीन्ब बी ङोन्बरी ङचे चु तम् ब्रीबल य्हीन्ब। 9 ङ्य्हङ्की प्रभु येसु ख्रीस्ट्चे स्य्हेङ्जेत्पे अनुग्रह एङ्यीमाचे स्येःबलनो मुब। थेङ् बरु मुबल, होलेतलेनो एङ्यीमाकी लागीरी प्रङ्न तजेत्ज्यी। तलेपङ्सम् र्हङ् प्रङ्न तज्यीम् एङ्यीमात बरु तनलबरी थेङ्चे चोले स्य्हेङ्जेत्पल य्हीन्ब। 10 एङ्यीमाचे तीयुङ् तीप्पे टङ पीन्बे लक् बुत्नलब एङ्यी माकी लागीरी ज्यब य्हीन्ब। तलेपङ्सम् एङ्यीमा पीन्बरीकीनो ङोन्ग्यम् अय्हीन्, तर सेम् य्हङ्सेनो र्हो लबरीएनो ङोन्ग्यम् मुबल। 11 देरेम् एङ्यीमाचे तीप्पे लक् टोप् लथोब। हुजु बेलोरी एङ्यीमाल पीन्बे सेम् य्हक्को मुबल, हुजु अनुसार् र्हङ्चे खम्ब गदे पीन्ज्यीम् र्हङ्की लक् टोप् लउ। 12 एङ्यीमाल पीन्बे सेम् य्हक्को मुसम् एङ्यीमातेङ् ता मुब, हुजु ग्यम्सेनो पीन्बे स्हेरी पर्मेस्वर् तङ्जेत्प, तर एङ्यीमातेङ् अरेबे स्हे पर्मेस्वर्चे म्हइअजेत्। 13 एङ्यीमात ल्हीबे दोत् नाबुङ्ज्यीम् ल्हो-ल्होमात यङ्ज दोत् नाबुङ्बे सेम् ङल अय्हीन्, तर जम्मतनो बराबर् दोत् तखइ पङ्ज्यीम् पङ्बल य्हीन्ब। 14 देरे एङ्यीमातेङ् य्हक्को मुब ओसेम् एङ्यीमाचे अरेबलमात पीन्ब खम्ब। होलेनो लीक्यम् थेङ्यीमातेङ् य्हक्को मुबे बेलोरी एङ्यीमात तोःज्यी पङ्सम् पीन्ब खम्ब। एङ्यीमाचे चोले स्य्हेङ्ज्यी पङ्सम् जम्मतनो बराबर् तब। 15 धर्म छ्येःरी चोले ब्रीबल मुब, “य्हक्को दुत्पलमातएनो य्हक्को अत ओसेम् चेक्कीनो दुत्पलमातएनो चेक् अत।” तीतसतेङ् थेइ र्होमा 16 तर पर्मेस्वर्त व्होर्छ्ये तखइ, तलेपङ्सम् एङ्यीमात र्हो लबे लागीरी पर्मेस्वर्चे तीतसतएनो ङल र्हङ्बे सेम् न्हङ्बल मुब। 17 तलेपङ्सम् तीतसचे ङ्यीमाचे फ्या लबे तम् ङ्येन्ज्यीम्कीनो अय्हीन्, तर र्हङ्नो सेम् य्हङ्सेनो खइ म्हेन्ज्यीम् एङ्यीमाज खटीब मुब। 18 ओसेम् ज्यबे सम्तर् स्येत्पे लक्री मन्डलीमान्हङ्री य्हक्को मीन् चल्तीबे अले गीःत ङ्यीमाचे तीतसतेङ् बक्च्य पीत्खटीब मुब। 19 होदेकीनो अय्हीन्, र्हुब् लबे टङमा यरुस्लेम्की बीस्वासीमाज सबरी ङ्यीमातेङ् बक्च्य ङ्यीबे लागीरी हुजु अलेत मन्डलीमाचेनो दम्बल य्हीन्ब। चु लक् ङ्यीमाचे प्रभुत तोप्परी ओसेम् ङ्यीमाल ल्हो-ल्होमात र्हो लबे सेम् मुब बी ङोन्बरी स्य्हेङ्ब। 20 होले एङ्यीमाचे सेम् य्हङ् लज्यीम् पीन्बे टङ ङ्यीमाचे ठीक्ले कोल्बतेङ् खल्चेएनो ङ्यीमात दोस् अपीन्खइ पङ्बे सेम् ङ्यीमाल मुब। 21 तलेपङ्सम् प्रभुइ ङोन्ग्यम्कीनो अय्हीन्, तर म्हीमाकी ङोन्ग्यम्एनो ज्यबे लक् स्य्हेङ्बरी ङ्यीमाचे सेम् लबल मुब। 22 होत्तज्यीम् ल्हो-ल्हो अले गीःतएनो थेङ्यीमातेङ् बक्च्य पीत्खटीब मुब। ङ्यीमाचे हुजु अलेत य्हक्को ख्यप्नो छोत् च्याज्यी, ओसेम् ङ्यीमाचे थेत खेम पङ्लेनो प्रभुइ लक् स्य्हेङ्बरी तङ्बल म्रङ्ज्यी। हुजुइ जोरीएनो देरेम् थे एङ्यीमारी य्हक्को ढुक्क तबल टीम् ओसेम् एङ्यीमात र्हो लबरी झेन्नो तङ्बल मुब। 23 तीतसमी ङइ र्हो य्हीन्ब, ओसेम् ङतेङ् बक्च्य एङ्यीमात र्हो लबे लक् स्य्हेङ्ब। ओसेम् हुजु ल्हो-ल्हो अले ङ्य्हीमी मन्डलीमाचे पीत्खबल य्हीन्ब। थेङ्य्हीनो ख्रीस्ट्त स्हेस लज्यीम् थेङ्त तोप्पे म्हीमा य्हीन्ब। 24 होत्तज्यीम् एङ्यीमाचे थेङ्यीमात र्हङ्की म्होइब ङोनो, ओसेम् ङ्यीमाचे एङ्यीमाकी बारेरी तले गर्ब लबल टीम् पङ्बे तम् जम्मनो मन्डलीमाचे म्रङ्ब खम्खइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.