२ कोरीन्थी 7 - पश्चिम तामाङ1 होत्तज्यीम् म्होइबे र्होमा, पर्मेस्वर्चे ङ्य्हङ्मातेङ् चोतेबे बाचामा स्य्हेङ्जेत्पल तज्यीम् ल्हीःतेङ् आत्मात असुद्द तनलबे जम्मा तम्मा ग्यम्से ङ्य्हङ्मा थारीङ्नो टीथोब, ओसेम् पर्मेस्वर्तेङ् लोङ्ज्यीम् पुरा पबीत्र म्ही तथोब। पावल तङ्बल 2 एङ्यीमाचे ङ्यीमात सेम् य्हङ्सेनो य्हक्को म्होयो। ङ्यीमाचे खल्तएनो अज्यब स्य्हेङ्बल अरे, खल्तेएनो न्होङ्नलबल अरे। ङ्यीमाचे खल्तेएनो छल् स्य्हेङ्बल अरे। 3 एङ्यीमात दोस् पीन्बरी ङचे चु तम् पङ्बल अय्हीन्, ङ्यीमाचे एङ्यीमात सेम् य्हङ्सेनो म्होइब बी ङोन्ग्यम् य्हङ्सेनो ङचे पङ्बल य्हीन्ब। होत्तज्यीम् ङ्य्हङ्मा सोलेएनो स्यीलेनो बक्च्य टीस्ये मुब। 4 ङ एङ्यीमातेङ् ढुक्क मुब, ओसेम् ङ एङ्यीमाकी लागीरी य्हक्को गर्ब लब। एङ्यीमा ग्यम्से ङचे य्हक्को आर् यङ्बल मुब, ओसेम् ङ्यीमात य्हक्को दुखमा तलेनो ङइ सेम् य्हक्को तङ्बल मुब। 5 तलेपङ्सम् माकेडोनीयारी खब बीसेम्एनो ङ्यीमाचे दुःब न्हअम्यङ्। तर खन बीबीचेनो ङ्यीमात य्हक्को खाल्की दुखमा खज्यी, दोचेमी बङ्बतेङ् तम् ज्योप्प ओसेम् सेम्रीमी य्हक्को लोङ्बल मुबल। 6 तर सेम्री दुख तबलमात आर् न्हङ्जेत्पे पर्मेस्वर्चे तीतस्त ङ्यीमाज पीत्खजेत्ज्यीम् थे ग्यम्से आर् न्हङ्जेत्प। 7 तीतस् खज्यीम् ङचे आर् यङ्ज्यी, होदेकीनो अय्हीन् थेचे एङ्यीमा ग्यम्से आर् यङ्ज्यी रो पङ्बे तम् ग्यम्सेएनो ङचे आर् यङ्ज्यी। एङ्यीमाल ङत देबेएनो खतु लबरी य्हक्को सेम् मुब रो बी थेचे ङ्यीमात स्येत्ज्यी। एङ्यीमाचे ङइ सेम् ननलबे तम्त व्हल् लज्यीम् देरेम् एङ्यीमाकी सेम्एनो नबल मुब रो, ओसेम् ङइ पक्ष कीन्बरो पङ्बे तम् ङचे थ्येःज्यीम् ङ य्हक्को तङ्बल मुब। 8 ङचे ङोन्ग्यम् ब्रीबे चीठीइ तम्चे एङ्यीमाकी सेम्री दुख तनलबल मुब बी ङचे स्येःब, होलेतलेनो ङचे हुजु चीठी होले ब्रीब अतबल टीम् बी ङइ सेम्री दुख अम्हेन्। हुजु चीठीचे एङ्यीमात दुख तनललेएनो हुजु दुख य्हक्को बेलो सम्म एङ्यीमाकी सेम्री अटी। 9 एङ्यीमात दुख तज्यी पङ्ज्यीम् ङ तङबल अय्हीन् तर एङ्यीमाचे र्हङ् र्हङ्की सेम् पर्मेस्वर्पट्टी दोःज्यी बी तङ्बल य्हीन्ब। एङ्यीमा दुखी तज्यीम् पर्मेस्वर् पट्टी दोःज्यी, होत्तज्यीम् ङ्यीमाकी तम् ग्यम्से एङ्यीमात न्होङ्न लबल अरे। 10 तलेपङ्सम् पर्मेस्वर्त व्हल् लज्यीम् दुखी तज्यी पङ्सम् हुजुचे ङ्य्हङ्मात पस्चताप्री बज्यीम् मुक्तीइ ग्यम्री बोर्ब, ओसेम् हुजुरी तइ दुखएनो अत। तर ङ्य्हङ्माचे पर्मेस्वर्त व्हल् अलनले दुखी तज्यी पङ्सम् हुजुचे ङ्य्हङ्मात स्यीनलबे ग्यम्री बोर्ब। 11 एङ्यीमात तबे दुख ग्यम्से पर्मेस्वर्चे ता स्य्हेङ्जेत्ज्यी। हुजु व्हल् लउ, हुजु दुख ग्यम्से एङ्यीमात ठीक् लक्मा स्य्हेङ्नलज्यी, र्हङ्ल तएनो दोस् अरे बी ङोन्बरी आर् खन लज्यी, अज्यबे लक् स्य्हेङ्नलबरी एङ्यीमात बोमो रप्न लज्यी, एङ्यीमात पर्मेस्वर्तेङ् लोङ्न लज्यी, एङ्यीमात ङतेङ् खतु लबे सेम् खन लज्यी, पर्मेस्वर्की लीप्चे ब्रबरी आर् खनलज्यी, एङ्यीमाकी गुङ्री पाप स्य्हेङ्बलमात सजाय पीन्बे सेम् खन लज्यी। चु जम्मनो तम्मा ग्यम्से एङ्यीमाल दोस् अरे पङ्बे तम् ङोन्ब। 12 होत्तज्यीम् ङचे हुजु चीठी न्हा दुख पीन्बे म्हीइ लागीरी ब्रीबल न्हा दुख यङ्बे म्हीइ लागीरी ब्रीबल य्हीन्ब। तर एङ्यीमा ङ्यीमातेङ् पर्मेस्वर्की ङोन्ग्यम् गदे बीस्वासीलो मुब बी र्हङ्चेनो स्येःखइ बी ब्रीबल य्हीन्ब। 13 होत्तज्यीम् ङ्यीमात आर् यङ्बल मुब। ङ्यीमाचे आर्कीनो अय्हीन् एङ्यीमा जम्मचेनो तीतस्त तङ्नलबल तज्यीम् ङ्यीमाएनो झेन्नो तङ्बल मुब। 14 ङचे एङ्यीमाकी बारेरी तीतसतेङ् घमन्ड लबल मुबल ओसेम् हुजु तम्री एङ्यीमाचे ङत पेत्न अल। ङ्यीमाचे एङ्यीमातेङ् खेम पङ्लेनो देमेन् तम्कीनो पङ्ज्यी। होलेनो ङ्यीमाचे एङ्यीमाकी बारेरी तीतसतेङ् स्य्हेङ्बे घमन्डएनो देमेन् तज्यी। 15 एङ्यीमाचे तीतस्त लोङ्ज्यीम् स्हेस लज्यीम् स्य्हेङ्बे स्वागततेङ् थेचे पङ्बे जम्मनो तम्मा एङ्यीमाचे ङ्येन्बे तम् व्हल् लज्यीम् तीतस्चे एङ्यीमात ङोन्ग्यम् बीमएनो झेन् य्हक्को म्होइब। 16 ङ य्हक्को तङ्ब, तलेपङ्सम् ङ एङ्यीमारी ढुक्क मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.