२ कोरीन्थी 6 - पश्चिम तामाङ1 ङ्यीमा पर्मेस्वर्तेङ् बक्च्य लक् स्य्हेङ्बे म्हीमा तबल तज्यीम् एङ्यीमात फ्या लब, एङ्यीमाचे पर्मेस्वर् ग्यम्से यङ्बे अनुग्रहत खेर य्हर्न थलउ। 2 तलेपङ्सम् पर्मेस्वर्चे सुङब, “ङचे ठीक् बेलोरी एइ तम् ङ्येन्ज्यी, ओसेम् मुक्तीइ दीन्री ङचे एत र्हो लज्यी।” च्यागो, पर्मेस्वर्की अनुग्रह यङ्बे बेलो देरेनो य्हीन्ब, ओसेम् मुक्तीइ दीन्एनो य्हीन्ब। 3 ङ्यीमाचे पर्मेस्वर्की लागीरी स्य्हेङ्बे लक्त खल्चेएनो दोस् अपीन्खइ पङ्ज्यीम् ङ्यीमाचे खल्तएनो उन्न लबे लक् स्य्हेङ्बल अरे। 4 तर ङ्यीमाचे य्हक्को दुखमा, गारो बेलोमा, छेर्बमा जम्मनो नाज्यीम् र्हङ्तनो जम्मनो तम्तेङ् लक् ग्यम्से देमेन्नो पर्मेस्वर्की योक्पो य्हीन्ब बी ङोन्बल मुब। 5 म्हीमाचे ङ्यीमात तोबल मुब, झेल्री च्युप्पल मुब, ङ्यीमाकी बोरोद्री हुलदङ्ग स्य्हेङ्बल मुब, ङ्यीमाचे य्हक्को दुख लज्यीम् लक् स्य्हेङ्बल मुब, खेम-खेममी चब अचनले ब्रबल मुब, न्हुः अम्यङ्बल मुब। 6 ङ्यीमाचे र्हङ्की चोखो सेम्चे, ज्ञान्चे, नापे सक्तीचे, दयचे, ओसेम् ङ्यीमातेङ् स्य्हुबे पबीत्र आत्माचे, ङ्यीमाकी देमेन्की म्होइबचे, 7 देमेन्की सम्तर्चे ओसेम् पर्मेस्वर्की सक्तीचेनो ङ्यीमा थेङ्की योक्पोमा य्हीन्ब बी ङोन्ज्यी। ङ्यीमातेङ मुबे धार्मीक्तानो छेत्पतेङ् र्हङ्त जोगइतीबे लागीरी केत्तेङ ल्होम् यारी थोःबे हतीयार् य्हीन्ब। 8 डेत् म्हीमाचे ङ्यीमात स्हेस स्य्हेङ्लेनो अस्य्हेङ्लेनो, डेत् म्हीमाचे ङ्यीमात ज्यब पङ्लेएनो अपङ्लेएनो ङ्यीमामी पर्मेस्वकी सेव स्य्हेङ्ब। ओसेम् डेत्डेत् म्हीमाचे ङ्यीमात भ्यु लबे म्हीमा पङ्लेएनो ङ्यीमाचेमी देमेन्की तम्कीनो पङ्ब। 9 म्हीमाचे ङ्यीमात अस्येःब र्हङ् ललेएनो ङ्यीमात जम्मचेनो स्येःब। म्हीमाचे ङ्यीमात सेत्प म्हइलेएनो सोम्बोनो मुब, म्हीमाचे ङ्यीमात तोलेनो ङ्यीमात सेत्पलमी अरे। 10 ङ्यीमा य्हक्को छेर्लेनो तङ्बल मुब। ङ्यीमा प्रङ्न मुलेएनो य्हक्को म्हीमात बीस्वास्री बरु तनलब। ङ्यीमातेङ् तएनो अरेबेल र्हङ्ब म्रङ्लेएनो ङ्यीमातेङ् जम्म स्हेःमा मुब। 11 कोरीन्थीइ बीस्वासी र्होमा, ङ्यीमाचे एङ्यीमात सेम् य्हङ्सेनो य्हक्को म्होइब पङ्ज्यीम् ज्यनले पङ्बल मुब। 12 एङ्यीमाकी लागीरी ङ्यीमाकी म्होइब चेक् तबल अरे, बरु एङ्यीमाकी म्होइबक ङ्यीमात चेक् तबल मुब। 13 देरेम् ङ एङ्यीमात र्हङ्की कोलत र्हङ्ले पङ्ब, ङ्यीमाचे एङ्यीमात म्होइब र्हङ्ले एङ्यीमाचेएनो ङ्यीमात सेम् य्हङ्सेनो य्हक्को म्होइथोब। बीस्वास् स्य्हेङ्बलमातेङ् बीस्वास् अस्य्हेङ्बलमा 14 स मोइबे बेलोरी ग्लप्तेङ् बुङ्गुत कुम् गीःरीनो कप्ज्यीम् अम्होइब र्हङ्ले एङ्यीमाएनो ख्रीस्ट्त बीस्वास् अलबे म्हीमातेङ् कुम् गीःरी थकपो। तलेपङ्सम् धर्मीतेङ् अधर्मी खले डीःब? य्हल्तेङ् म्हुन्दुङ् तीछङ् खले डीःब? 15 ख्रीस्ट्तेङ् सैतान्की तम् खले डीःब? बीस्वास् स्य्हेङ्बलतेङ् बीस्वास् अस्य्हेङ्बलमाकी तम् खले डीःब? 16 पर्मेस्वर्की दीम्तेङ् ख्लमाकी गुङ्री ता डीःब? तलेपङ्सम् ङ्य्हङ्मामी सोम्बो पर्मेस्वर्की दीम् य्हीन्ब। पर्मेस्वर्चेनो सुङ्बल मुब, “ङ थेङ्यीमातेङ् टीस्ये मुब, ओसेम् थेङ्यीमातेङ् बक्च्य ब्रस्ये मुब। ङ थेङ्यीमाकी पर्मेस्वर् तस्ये मुब, ओसेम् थेङ्यीमामी ङइ म्हीमा तस्ये मुब।” 17 होत्तज्यीम् परमप्रभुचे सुङ्जेत्प, “थेङ्यीमाकी गुङ्से डोङ्ज्यीम् खोउ, ओसेम् थेङ्यीमा ग्यम्से फेःज्यीम् टीउ, असुद्द स्हेमा थछुउ, ओसेम् ङ एङ्यीमात ग्रहन् स्य्हेङ्स्ये मुब।” 18 “ङ एङ्यीमाकी अप तस्ये मुब, ओसेम् एङ्यीमा ङइ ज जमेमा तस्ये मुब, सक्तीसाली परमप्रभुचे सुङ्जेत्प।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.