२ कोरीन्थी 5 - पश्चिम तामाङ1 तलेपङ्सम् ङ्य्हङ्माचे स्येःब, स्हीःज्यीम् य्हर्बे गोर र्हङ्बे ङ्य्हङ्माकी चु स्यतेङ् काःकी ल्हीः नास् तज्यीम् य्हर्स्ये मुब। तर पर्मेस्वर्चे ङ्य्हङ्मात स्वर्गरी न्हङ्जेत्स्येकी ल्हीःमी म्हीइ याचे स्य्हेङ्बे कम्जोर् दीम् र्हङ्ब अरे। तर खेमेएनो नास् अतनले टीबे दीम् र्हङ्ब मुब। 2 देमेन्नो ङ्य्हङ्मा चु ल्हीःरी दुखरी मुब। ङ्य्हङ्मामी स्वर्गरी मुबे हुजु ल्हीःत येन् येन्ब र्हङ्ले येन्बरी य्हक्को सेम् लटीबल मुब। 3 तलेपङ्सम् ङ्य्हङ्माचे हुजु येन् येन्ज्यी पङ्सम् ङ्य्हङ्मा क्लीङ्दो तस्ये अरे। 4 ङ्य्हङ्मा चु जम्बुलीङ्री चु ल्हीःरी टीगदे य्हक्को दुखमाचे दुःज्यीम् ह्वुइ तप्थोलेएनो चु ल्हीः ख्लाबे सेम् अल। तर चु स्यीज्यीम् य्हर्बे ल्हीः पोब बीसेम् पर्मेस्वर्चे न्हङ्जेत्स्येकी जुक्नो टीबे स्वर्गइ ल्हीः यङ्बरी ङ्य्हङ्माचे य्हक्को सेम् लब। 5 देरेम् ङ्य्हङ्मात चु तम्की लागीरी पर्मेस्वर्चेनो टोप् स्य्हेङ्पीन्जेत्पल य्हीन्ब, थेङ्चे बाचा स्य्हेङ्जेत्पलमा जम्मनो ङ्य्हङ्माचे यङ्स्ये मुब बी ङ्य्हङ्माकी सेम्री पबीत्र आत्मा बैना न्हङ्जेत्पल मुब। 6 होत्तज्यीम् ङ्य्हङ्मा खेम पङ्लेनो आर्ले ब्रब। ओसेम् ङ्य्हङ्माचे स्येःब, ङ्य्हङ्मा चु ल्हीःरी तगदे प्रभु ग्यम्से फेःबल तब। 7 तलेपङ्सम् ङ्य्हङ्मा बीस्वास् ग्यम्से सोब, तर मीःचे म्रङ्बलत च्याज्यीम् अय्हीन्। 8 ङ्य्हङ्मा आर्ले टीथोब, चु ल्हीःरी टीब बीमम् स्वर्गइ जुक्नो टीबे ल्हीः यङ्ज्यीम् प्रभुतेङ् बक्च्य प्रभुइ दीम्री टीबनो य्हक्को ज्यब य्हीन्ब बी म्हेन्ब। 9 होत्तज्यीम् ङ्य्हङ्मा चु जम्बुलीङ्री टीलेएनो, स्वर्गरी टीलेएनो ङ्य्हङ्माचे प्रभुत तङ्नलबे सेम् थोब। 10 तलेपङ्सम् ङ्य्हङ्मा जम्मनो तीरेत् न्यायकी लागीरी ख्रीस्ट्की ङोन्री रप्थोब। जम्मचेनो चु जीवन्री ज्यबतेङ् अज्यब तात लक् स्य्हेङ्बल मुब, हुजु अनुसार्की न्याय यङ्स्ये मुब। ख्रीस्ट् ग्यम्से पर्मेस्वर्तेङ् थुन्बल 11 प्रभुचे तीरेत् जम्मनो म्हीमाकी न्याय स्य्हेङ्जेत्स्ये मुब पङ्बे तम् स्येःज्यीम् ङ्यीमाचे ल्हो-ल्हो म्हीमातएनो पर्मेस्वर्त बीस्वास् स्य्हेङो बी आर् पीन्ब। पर्मेस्वर्चे ङ्यीमात ज्यनले खेम्जेत्प, ओसेम् एङ्यीमाचेएनो ङ्यीमा खतेबे म्हीमा बी ज्यनले स्येःब पङ्बे तम्री ङचे आस् लबल मुब। 12 ङ्यीमाचे देबेएनो एङ्यीमाकी ङोन्री र्हङ्तनो तोप्प म्हइबल अय्हीन्, तर ङ्यीमाकी बारेरी एङ्यीमात घमन्ड स्य्हेङ्बे मौक पीन्टीब मुब। ओसेम् म्हीइ सेम्की तम्री अय्हीन् तर मीःचे म्रङ्बे तम्री घमन्ड स्य्हेङ्बे म्हीमात एङ्यीमाचे जोहब् पीन्ब खम्बल तस्ये मुब। 13 ङ्यीमाकी लो ठेगन्री अरेब र्हङ्ब म्रङ्ब पङ्सम् हुजु पर्मेस्वर्की लागीरी य्हीन्ब। ओसेम् ङयीमाकी लो ठेगन्री मुज्यी पङ्सम् हुजु एङ्यीमाकी लागीरीनो य्हीन्ब। 14 ख्रीस्ट्की म्होइबचे ङ्यीमात खीःब, तलेपङ्सम् ङ्यीमाचे ज्यनले स्येःब, जम्मनो म्हीमाकी लागीरी म्ही गीः स्यीपीन्जेत्पल तज्यीम् जम्मनो स्यीज्यी। 15 ओसेम् ख्रीस्ट् जम्मइ लागीरी स्यीपीन्जेत्ज्यी, होत्तज्यीम् सोबलमा देरेम् र्हङ्की लागीरी सोब अय्हीन्, तर थेङ्यीमाकी लागीरी स्यीज्यीम् सोजेत्पे ख्रीस्ट्की लागीरी सोथोब। 16 देरे य्हङ्से ङ्यीमाचे खल्तएनो जम्बुलीङ्की म्हीमाचे म्हेन्ब र्हङ्ले म्हेन्ज्यीम् अच्या। य्हीन्बरीम् तीख्यप्की बेलोरी ङ्यीमाचेएनो ख्रीस्ट्त जम्बुलीङ्की म्हीमाचे म्हेन्ब र्हङ्ले म्हेन्ज्यीम् च्याब मुबल, तर देरे य्हङ्से थेङ्त होले म्हेन्ज्यीम् च्यास्ये अरे। 17 होत्तज्यीम् खल्चे पङ्लेनो ख्रीस्ट्त बीस्वास् स्य्हेङ्ज्यी पङ्सम् थे छार् म्ही तब। पुरानो जीवन् म्हबल मुब, देरेम् छार् जीवन् सुरु तबल मुब। 18 चु जम्मनो पर्मेस्वर् ग्यम्से तबल य्हीन्ब। पर्मेस्वर्चेनो ङ्य्हङ्मात ख्रीस्ट् ग्यम्से र्हङ्तेङ् थुन्न लजेत्ज्यी, ओसेम् ङ्य्हङ्मात ल्हो-ल्हो म्हीमातएनो थेङ्तेङ् थुन्नलबे लक् न्हङ्जेत्ज्यी। 19 पर्मेस्वर्चे म्हीमाचे स्य्हेङ्बे पाप्माकी हीसाब अथेन्नले येसु ख्रीस्ट् ग्यम्से जम्मनो म्हीमात थुन्नलजेत्टीब मुबल। ओसेम् थुन्नलजेत्पे सम्तर् ल्हो-ल्हो म्हीमात स्येत्परी थेङ्चे ङ्यीमात दम्जेत्पल य्हीन्ब। 20 होत्तज्यीम् ङ्यीमा ख्रीस्ट्की फ्रोइ स्येत्पे चवमा य्हीन्ब, ओसेम् पर्मेस्वर्चे ङ्यीमा ग्यम्से तज्यीम् एङ्यीमात फ्या लजेत्टीब मुब। ङ्यीमा ख्रीस्ट्की छेन्री एङ्यीमात फ्या लज्यीम् पङ्ब, “पर्मेस्वर्तेङ् थुनो” 21 तलेपङ्सम् ङ्य्हङ्मात ख्रीस्ट् ग्यम्से पर्मेस्वर्की ङोन्ग्यम् धर्मी तनलबरी ख्रीस्ट्चे खेमेएनो तइ पाप् स्य्हेङ्अजेत्लएनो पर्मेस्वर्चे ङ्य्हङ्माकी जम्मनो पाप्मा ख्रीस्ट्की जोरी कल्पीन्जेत्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.