२ कोरीन्थी 4 - पश्चिम तामाङसेप्रइ तङ्लोरी थेन्बे आत्माइ धन् 1 होत्तज्यीम् पर्मेस्वर्चे कृपा लज्यीम् ङ्यीमात चु लक् न्हङ्जेत्पल तज्यीम् ङ्यीमाचे आस् लब अपीत्। 2 ङ्यीमाचे पेत्नलबतेङ् ला-लाज्यीम् स्य्हेङ्बे अज्यबे लक्मा स्य्हेङ्ब पीत्प। ङ्यीमाचे लुबे लक्मा अस्य्हेङ्, पर्मेस्वर्की फ्रोइत कप्पतेङ् स्याबे लक् अस्य्हेङ्। ङ्यीमाचे पर्मेस्वर्की ङोन्ग्यम् देमेन्की छीःमाकीनो पङ्ब, ओसेम् जम्मनो म्हीमाचे म्रङ्खइ बी ङ्यीमाचे ज्यबे जीवन् सोब। 3 ङ्यीमाचे स्येत्पे ज्यबे सम्तर् गप्पल मुसम् नास् तस्येलमाकी लागीरीकीनो गप्पल मुब। 4 चु जम्बुलीङ्की सासक् सैतान्चे येसुत बीस्वास् अस्य्हेङ्बलमाकी सेम्की गोब खम्बे सक्तीत गप्पीन्बल मुब। बीस्वास् अस्य्हेङ्बलमाचे ख्रीस्ट्की महीमाकी ज्यबे सम्तर्की बारेरी अम्रङ्खइ पङ्ज्यीम् सैतान्चे थेङ्यीमात कन तनलपीन्बल मुब। ख्रीस्ट् पर्मेस्वर्की स्वरुप् य्हीन्ब। 5 ङ्यीमाचे र्हङ्चे र्हङ्की बारेरी प्रचार् अस्य्हेङ्, तर येसु ख्रीस्ट्नो प्रभु य्हीन्ब पङ्बे तम् प्रचार् स्य्हेङ्ब। ओसेम् येसुइ लागीरी ङ्यीमामी एङ्यीमाकी योक्पो य्हीन्ब। 6 तलेपङ्सम् “म्हुन्दुङ् ग्यम्से य्हल् सर्खइ” बी सुङ्जेत्पे पर्मेस्वर्चेनो ङय्हङ्माकी सेम्न्हङ् थेङ्की य्हल् सर्नलजेत्पल मुब। हुजु य्हल् ग्यम्सेनो ख्रीस्ट्की लीःरी सर्बे पर्मेस्वर्की महीमाकी ज्ञान्की य्हल् ङ्य्हङ्मात स्येनलज्यी। 7 ङ्य्हङ्माकी सेम्री चु य्हल्की सर्ब मुब, तर ङ्य्हङ्मामी सेप्रइ तङ्लो र्हङ्ब य्हीन्ब, हुजुरी चु आत्मीक् सम्पती थेन्बल मुब। चु ग्यम्से स्येःबकी ङ्य्हङ्माकी जम्मनो सक्ती पर्मेस्वर् ग्यम्से खब, ङ्य्हङ्मा र्हङ् ग्यम्सेनो अय्हीन्। 8 ङ्यीमा य्हक्को दुखमाचे प्लेबल मुब, तर हुजु दुखमाचे ङ्यीमा छ्यक्-छ्यीक् तबल अरे, ओसेम् ता लब बी अस्येलेनो ङ्यीमाकी आस् म्हबल अरे। 9 म्हीमाचे ङ्यीमात य्हक्को दुख पीन्बल मुलेएनो पर्मेस्वर्चे ङ्यीमात ख्लाजेत्पल अरे, ओसेम् म्हीमाचे य्हक्को तोब ग्यङ्ब स्य्हेङ्लेनो ङ्यीमा नास् तबल अरे। 10 येसुइ जीवन् ङ्यीमाकी ल्हीःरीएनो म्रङ्खइ पङ्ज्यीम् येसुचे स्यीब बीम् ङोन्ग्यम् नाजेत्प र्हङ्बे दुख खेम पङ्लेनो ङ्यीमाचे ल्हीःरी नाज्यीम् ब्रब। 11 तलेपङ्सम् येसुइ जीवन् ङ्यीमाकी स्यीज्यीम् य्हर्बे ल्हीःरी म्रङ्खइ पङ्ज्यीम् येसुइ लागीरी ङ्यीमाचे खेम पङ्लेनो स्यीब सम्मइ दुःखमाएनो नाब। 12 चोले ङ्यीमाचे स्यीबगदेनो तनलबे दुख नाज्यीम् ब्रटीब, तर चोले स्य्हेङ्बल तज्यीम् एङ्यीमाचेम् खेमेएनो अबेबे जीवन् यङ्बल मुब। 13 धर्म छ्येरी, “ङचे बीस्वास् स्य्हेङ्बल मुब, होत्तज्यीम् ङ तम् पङ्ब” बी ब्रीबे म्हीतेङ् मुबे बीस्वास् स्य्हेङ्बे आत्मा ङ्यीमातेङ्एनो मुब, होत्तज्यीम् ङ्यीमाएनो बीस्वास् स्य्हेङ्ब ओसेम् तम् पङ्ब। 14 पर्मेस्वर्चेनो प्रभु येसुत स्यीब ग्यम्से सोनलजेत्ज्यी बी ङ्यीमाचे स्येःब। ओसेम् पर्मेस्वर्चे येसुत फेःरी सोनलजेत्प र्हङ्ले ङ्य्हङ्मातएनो येसुतेङ् बक्च्य सोनलजेत्स्ये मुब, ओसेम् एङ्यीमातेङ् ङ्यीमा जम्मतनो थेङ्की ङोन्री नोम्जेत्स्ये मुब। 15 ङ्यीमाचे नाबे चु जम्मनो दुखमा एङ्यीमाकी लागीरी तबल य्हीन्ब, तलेपङ्सम् म्हीमाचे गत्ते य्हक्को पर्मेस्वर्की अनुग्रह यङ्ब, होदेनो य्हक्को थेङ्यीमाचे पर्मेस्वर्की महीमाकी लागीरी व्होर्छ्ये पीन्स्ये मुब। बीस्वास्की जीवन् 16 होत्तज्यीम् ङ्यीमा खेमेएनो आस् लब अपीत्नले ब्रस्यीनो टीब। ङ्यीमाकी चु ल्हीः क्रम्ज्यीम् य्हर्लेनो ङ्यीमाकी आत्मामी दीनइलनो छार् तस्यीनोबोर्टीब मुब। 17 तलेपङ्सम् ङ्यीमाचे देरे य्हम्की लागीरी नाबे दुखमी लीक्यम् यङ्स्येकी ङ्य्हक्को ङ्हच्छ्यङ्तेङ् खेमेएनो अबेबे महीमत व्हल् लज्यीम्मी देमेन्नो तेएनो अय्हीन्। 18 ङ्यीमाचे मीःचे म्रङ्बे स्हेमा अय्हीन् तर मीःचे अम्रङ्बे स्हेमारी सेम् पीन्ब। तलेपङ्सम् मीःचे म्रङ्बे स्हेमा य्हम्की लागीरी तब, तर मीःचे अम्रङ्बे स्हेमामी जुक्नो तब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.