२ कोरीन्थी 3 - पश्चिम तामाङछार् करार्की योक्पोमा 1 ङ्यीमाचे देबेएनो र्हङ्चे र्हङ्तनो तोप्प म्हइबल अय्हीन्। ल्हो-ल्हो डेत्-डेत् म्हीमात सीफारीस् तोःब र्हङ्ले ङ्यीमाचे एङ्यीमात ओसेम् ङ्यीमात एङ्यीमाचे ल्हो-ल्होमात ङोन्बरी सीफारीस्की चीठी ब्रीअतो। 2 जम्मचेनो स्येःबतेङ् खेत्प खम्बे लागीरी एङ्यीमानो ङ्यीमाकी सेम्री ब्रीबे सीफारीस्की चीठी य्हीन्ब। 3 देमेन्नो एङ्यीमा ख्रीस्ट्चे ब्रीजेत्पे चीठीइ रोःरोमा य्हीन्ब। चु चीठी युङ्बइ फलेक्री वुइ मसीचे ब्रीबे चीठी अय्हीन्, तर सोम्बो पर्मेस्वर्की आत्माचे सेम्री ब्रीबे चीठी य्हीन्ब। 4 ङ्यीमाचे चोले पङ्ब तलेपङ्सम् ख्रीस्ट् ग्यम्से पर्मेस्वर्की ङोन्री ङ्यीमा ढुक्क मुब। 5 तइ लक् पङ्लेनो र्हङ्चेनो स्य्हेङ्ब खम्ब बी पङ्बरी ङ्यीमा जेःबल अरे, तर ङ्यीमाचे लक् स्य्हेङ्बे सक्ती पर्मेस्वर् ग्यम्से यङ्ब। 6 थेङ्चे ङ्यीमात थेङ्की छार् करार्की सेव स्य्हेङ्बे म्हीमा तबरी जेःनलजेत्ज्यी। चु करार् ङोन्ग्यम् ब्रीबे नीयम् ग्यम्से अय्हीन्, तर पबीत्र आत्मा ग्यम्से य्हीन्ब। तलेपङ्सम् ङोन्ग्यम्की नीयम्चेम् स्यीब बब, तर पबीत्र आत्माचे जीवन् न्हङ्ब। छार् करार्की महीमा 7 स्यीब बबे ङोन्ग्यम्की नीयम्की छीःमा युङ्बरी ठाबल मुबल। हुजु नीयम् पीन्बे बेलोरी पर्मेस्वर्की ङ्हच्छ्यङ् महीमा म्रङ्खज्यी, हुजु ङ्हच्छ्यङ् महीमाकी य्हल्चे लज्यीम् इस्राएलीमाचे मोसइ लीः च्यास्यीनो टीब अखम्, होलेतलेनो हुजु य्हल्की सर्ब म्हबोर्टीब मुबल। स्यीनलबे नीयम् ङ्हच्छ्यङ् महीमारी खज्यी पङ्सम्, 8 पबीत्र आत्माचे बबे ज्यबे सम्तर्की य्हल्मी झेन् गत्ते य्हक्को महीमल तल? 9 तलेपङ्सम् दोसी तनलबे नीयम् महीमाचे प्लीङ्बल मुबल पङ्सम् ङ्य्हङ्मात धर्मी तनलबे ज्यबे सम्तर्मी झेन् गदे य्हक्को महीमाचे प्लीङ्बल तल? 10 तलेपङ्सम् छार् करार्की य्हल्की महीमात ङोन्ग्यम्की ङ्हच्छ्यङ् महीमातेङ् ह्वबतेङ् हुजु ङोन्ग्यम्की ङ्हच्छ्यङ् महीमामी तएनो अय्हीन्। 11 य्हम्की लागीरी खबे ङोन्ग्यम्की ङ्हच्छ्यङ् महीमा चोत्ते महीमारी खबल मुबल पङ्सम्, खेम पङ्लेनोइ लागीरी खबे छार् करार्की य्हल्मी झेन् य्हक्को महीमाचे प्लीङ्ब। 12 ङ्यीमाल चोतेबे आस् मुबल तज्यीम् ङ्यीमात य्हक्को आर् खबल मुब। 13 ङ्यीमामी मोसा र्हङ्ब अय्हीन्, थेचेम् म्हबोर्टीबे महीमाकी ज्युःकी य्हल् एस्राएलीमाचे अम्रङ्खइ बी र्हङ्की लीः क्रकुचे गप्प मुबल। 14 तर थेङ्यीमाकी सेम् कोङ्बल मुबल, ओसेम् तीङ्यीइ दीन्सम्मनो पुरानो करार् खेत्पल थ्येःबतेङ् थेङ्यीमाचे हुजु क्रकुचे लीः गप्ब। हुजु क्रकु ख्रीस्ट् ग्यम्सेकीनो ख्लाब खम्ब। 15 य्हीन्बनो, तीङ्यी सम्मनो मोसाचे ब्रीबे छ्येः खेत्पल थ्येःबतेङ् थेङ्यीमाकी सेम्त क्रकुचे गप्पल तब। 16 तर खेम म्हीमा प्रभुपट्टी दोःब, प्रभुचे हुजु क्रकु ख्लालाजेत्प। 17 तलेपङ्सम् प्रभु आत्मा य्हीन्ब, ओसेम् खन प्रभुइ आत्मा तब हुजुरी स्वतन्त्र तब। 18 ङ्य्हङ्मा जम्मचेनो क्रकुचे लीः अगप्नले प्रभुइ महीमात ङोन्बल मुब। प्रभु आत्मा य्हीन्ब, ओसेम् थेङ् ग्यम्से खबे महीमाकी य्हल्चे ङ्य्हङ्मात थेङ् र्हङ्बनो स्य्हेङ्बोर्ज्यीम् झेन् य्हक्को महीमीत् तनलजेत्प। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.