२ कोरीन्थी 2 - पश्चिम तामाङ1 होत्तज्यीम् एङ्यीमात बराबरी देबेएनो दोःज्यीम् एङ्यीमाज अख बी ङइ सेम्चे पक्क लज्यी। 2 तलेपङ्सम् ङचे एङ्यीमाकी सेम् ननलज्यी पङ्सम् ङत तङ्न लबरी एङ्यीमा बीमा ल्हो-ल्हो खलएनो अरे। 3 होत्तज्यीम् ङ खबतेङ् ङत तङ्न लबे म्हीमा ग्यम्सेनो ङइ सेम् अनखइ पङ्ज्यीम् ङचे हुजु चीठी ब्रीज्यी। तलेपङ्सम् ङइ सेम् तङ्बतेङ् एङ्यीमएनो जम्मनो तङ्ब पङ्बे तम्री ङत पक्क बीस्वास् मुब। 4 ङचे एङ्यीमाकी सेम् ननलबरी अय्हीन्, तर ङचे एङ्यीमात य्हक्को म्होइब बी एङ्यीमाचे स्येःखइ पङ्ज्यीम् ङचे ङइ सेम्री य्हक्को दुख तज्यीम् ङ य्हक्को क्राज्यीम् मीख्ली य्हर्पुङ्पुङ्ज्यीम् हुजु चीठी ब्रीबल मुबल। पाप् स्य्हेङ्बलत क्षमा 5 खल्चे खल्ल पङ्लेनो सेम् ननलज्यी पङ्सम् थेचे ङलकीनो अय्हीन् तर एङ्यीमा जम्मलनो झेन् य्हक्को सेम् ननलबल य्हीन्ब। चेक्कीनो तलेएनो ङचे चु तम् एङ्यीमातेङ् ङइ सेम् अकोङ्बल ङोन्बरी पङ्बल य्हीन्ब। 6 होतेबे म्हीतमी एङ्यीमान्हङ्की य्हक्को म्हीमा गीः तज्यीम् पीन्बे सजायनो य्हक्को तबल मुब। 7 तर देरेम् एङ्यीमाचे थेत क्षम पीन्ज्यीम् सान्त्वना पीन्थोब, अय्हीन् पङ्सम् य्हक्को दुखचे लज्यीम् थेचे झेन् बीस्वास् स्य्हेङ्बनो पीत्ल। 8 होत्तज्यीम् एङ्यीमाचे थेत सेम् य्हङ्सेनो म्होइब पङ्बे तम् थेचे स्येःनलउ बी ङ एङ्यीमात फ्या लब। 9 तलेपङ्सम् एङ्यीमात छोत् च्याबे लागीरी, ओसेम् ङचे पङ्बे जम्मनो तम्मा एङ्यीमाचे ङ्येन्बटीम् वुइ अङ्येन्बटीम् बी च्याबे लागीरी ङचे हुजु चीठी ब्रीबल मुबल। 10 एङ्यीमाचे क्षमा पीन्बे म्हीत ङचेएनो क्षमा पीन्ब। ङचे खल्त पङ्लेनो तइ तम्री पङ्लेनो क्षमा पीन्थोसम् ङचे क्षमा पीन्बतेङ् ख्रीस्ट्की ङोन्ग्यम् एङ्यीमात ज्यब तबे लागीरी क्षमा पीन्ब। 11 होले स्य्हेङ्बतेङ् सैतान्चे ङ्य्हङ्मा ग्यम्से मौक कीन्म्यङ्स्ये अरे। तलेपङ्सम् थेइ दुस्ट योजनामाकी बारेरी ङ्य्हङ्माचे स्येःबल मुब। त्रोआस्री पावल छेर्बल 12 ख्रीस्ट्की बारेरी ज्यबे सम्तर् स्येत्परी ङ त्रोआस्री खबे बेलोरी प्रभुचेनो ङत हुजुरी थेङ्की लक् स्य्हेङ्बे मौक न्हङ्जेत्ज्यी। 13 तर ङइ बीस्वासी अले तीतस्त खतु अतज्यीम् ङ छेर्बल मुबल। होत्तज्यीम् थेङ्यीमा ग्यम्से फेःज्यीम् ङ माकेडोनीयाक्योर् ङ्यीज्यी। ख्रीस्ट् ग्यम्से यङ्बे डाब 14 तर पर्मेस्वर्त व्होर्छ्ये तखइ, तलेपङ्सम् थेङ्चे ङ्य्हङ्मात ख्रीस्ट्तेङ् खेम पङ्लेनो डाबे ग्यम्री नोम्जेत्प। ओसेम् ज्यबे मोर्थङ् ठम्ब र्हङ्ले ख्रीस्ट्की बारेइ ज्ञान् ङ्य्हङ्मा ग्यम्से जम्मनो ग्लामारी ठम्नलजेत्प। 15 तलेपङ्सम् पर्मेस्वर्की लागीरी थर्ब यङ्टीबलमातेङ् नास् तयम्टीबलमाकी गुङ्रीएनो ङ्य्हङ्मा ख्रीस्ट्की ज्यबे मोर्थङ् य्हीन्ब। 16 थर्ब यङ्टीबलमाकी लागीरी ङ्य्हङ्मा जीवन्की ज्यबे मोर्थङ् य्हीन्ब ओसेम् नास् तयम्टीबलमाकी लागीरी स्यीबइ अज्यबे थङ् य्हीन्ब। ओसेम् चु तम्की लागीरी खल जेःबल मुब? 17 य्हक्को म्हीमाचे र्हङ्ले ङ्यीमाचे पर्मेस्वर्की फ्रोइकी छोङ् अस्य्हेङ्, तर पर्मेस्वर्चे पीत्खजेत्पे छल् अस्य्हेङ्बे म्हीचे र्हङ्ले ङ्यीमाचे ख्रीस्ट्री पर्मेस्वर्की ङोन्ग्यम् तम् पङ्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.