२ कोरीन्थी 13 - पश्चिम तामाङज्युःकी चेतावनी 1 ङ एङ्यीमाज खटीबल चु पालोमी सोम्ख्यप् तब। धर्म छ्येःरी चोले ब्रीबल मुब, “म्ही ङ्य्ही वुइ सोम् साक्षीमा ग्यम्सेकीनो दोसी य्हीन्ब वुइ अय्हीन् पङ्ज्यीम् प्रमानीत् स्य्हेङ्थोब।” 2 ङ ङ्य्हीख्यप्कुनो एङ्यीमाज खबे बेलोरी ङचे एङ्यीमात चेतावनी पीन्बल र्हङ्ले देरेम् ङ हुजुरी अरेलेएनो ङ एङ्यीमात चेतावनी पीन्टीब। ङ देबेएनो खबतेङ् ङोन्ग्यम् पाप् स्य्हेङ्बलमा ओसेम् ल्हो-ल्होमा खल्तेएनो सजाय पीन्बरी बाकी पीत्स्ये अरे। 3 ख्रीस्ट्चे ङ ग्यम्से तज्यीम् फ्रोइ लजेत्प वुइ अल पङ्बे तम्री एङ्यीमाचे म्हइबे प्रमान् यङ्स्येनो मुब। थेङ् एङ्यीमाकी गुङ्री लक् स्य्हेङ्बे बेलोरी कम्जोर् अय्हीन् तर सक्तीसाली मुब। 4 तलेपङ्सम् थेङ् कम्जोर् तज्यीम् क्रुस्री स्यीजेत्ज्यी तर पर्मेस्वर्की सक्तीचे थेङ् सोम्बो तजेत्ज्यी। ङ्यीमाएनो थेङ् र्हङ्लेनो कम्जोर् तबल मुब, तर पर्मेस्वर्की लक् एङ्यीमाकी गुङ्री स्य्हेङ्बे बेलोरी ङ्यीमा ख्रीस्ट्तेङ् सोस्ये मुब, ओसेम् पर्मेस्वर्की सक्ती ङ्यीमातेङ् तस्ये मुब। 5 एङ्यीमाचे ख्रीस्ट्त देमेन्नो बीस्वास् स्य्हेङ्बल मुब वुइ अरे बी र्हङ्चेनो जाच्तीज्यीम् च्यागो। होले जाच्तीज्यीम् च्याबतेङ् येसु ख्रीस्ट्त एङ्यीमातेङ् स्य्हुजेत्पल अयङ्ज्यी पङ्सम् एङ्यीमाचे थेङ्त देमेन्लेनो बीस्वास् स्य्हेङ्बल अरेम् बी स्येःथोब। 6 ओसेम् ङचे आस् थेन्ब की ङ्यीमामी लक् अतबलमा अय्हीन् पङ्ज्यीम् एङ्यीमाचे स्येस्ये मुब। 7 एङ्यीमाचे अज्यबे लक्मा अस्य्हेङ्खइ बी ङ्यीमाचे पर्मेस्वर्तेङ् प्रार्थना स्य्हेङ्ब। ङ्यीमाचे र्हङ्तनो ज्यब ङोन्बे लागीरी चोले प्रार्थना स्य्हेङ्बल अय्हीन्, तर ङ्यीमा लक् अतबे म्हीमा र्हङ्ब म्रङ्लेनो एङ्यीमाचेम् ज्यबे लक् स्य्हेङ्ब खम्खइ बी प्रार्थना स्य्हेङ्ब। 8 तलेपङ्सम् ङ्यीमाचे देमेन्की बीरुद्दरी तेएनो स्य्हेङ्ब अखम्, तर देमेन्की लागीरीकीनो लक् स्य्हेङ्ब। 9 ङ्यीमा कम्जोर् तबतेङ् हुजुचे एङ्यीमात बङ्ज्येन् तबल ङोन्सम् ङ्यीमा तङ्ब। ङ्यीमाचेम् एङ्यीमा बीस्वास्री कोङ्खइ बी प्रार्थना स्य्हेङ्ब। 10 होत्तज्यीम् एङ्यीमा ग्यम्से थारीङ् मुबे बेलोरी ङ चु तम् ब्रीब, ङ हुजुरी खबतेङ् प्रभुचे ङत न्हङ्जेत्पे अधीकार् कडाले कोल्अथोखइ। प्रभुचे ङत हुजु अधीकार् एङ्यीमात न्होङ्नलबे लागीरी अय्हीन् तर एङ्यीमात कोङ्नलबे लागीरी न्हङ्जेत्पल य्हीन्ब। 11 ज्युःरी, बीस्वासी र्होमा, तङो। एङ्यीमाचे सेम् य्हङ्सेनो प्रभुइ फ्रोइ ङ्येन्ज्यीम् ब्रबे सेम् थोःगो। ङचे फ्या लबे तम् ङ्येनो, गीःचे गीःत पङ्बल ङ्येन्ज्यीम् थुन्ज्यीम् टीउ। ओसेम् एङ्यीमात सान्तीतेङ् म्होइब न्हङ्जेत्पे पर्मेस्वर् एङ्यीमातेङ् स्य्हुजेत्स्ये मुब। 12 गीःचे गीःत म्होइज्यीम् लस्सो लउ। 13-14 चुरी मुबे जम्मनो बीस्वासीमाचे एङ्यीमात लस्सो पीत्खबल मुब। प्रभु येसु ख्रीस्ट्की अनुग्रह, पर्मेस्वर्की म्होइब ओसेम् पबीत्र आत्माइ सङ्गती एङ्यीमातेङ् तखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.