२ कोरीन्थी 12 - पश्चिम तामाङपावलचे म्रङ्बे दर्सन् 1 ङचे घमन्ड स्य्हेङ्नोथोब। खल्तेएनो तेएनो फाइद अतलेनो प्रभुचे ङत न्हङ्जेत्पे दर्सन्मातेङ् ङोन्जेत्पे तम्माकी बारेरी ङ पङ्ब। 2 ल्हेःगोर् गीः स्यी ङ्य्हीत्तीङ् ङोन्ग्यम्की तम् य्हीन्ब। ङचे स्येःबे ख्रीस्ट्त बीस्वास् स्य्हेङ्बे म्ही गीःत पर्मेस्वर्चे र्हङ् स्य्हुजेत्पे स्वर्गइ ग्लारी नोम्जेत्ज्यी। ओसेम् हुजु म्हीत ल्हीःतेङ्नो नोम्जेत्ज्यी वुइ आत्मकीनो नोम्जेत्ज्यी हुजु ङचे अस्य्हे, पर्मेस्वर्चेनो खेम्जेत्प। 3 ङ देबेएनो पङ्ब, हुजु म्ही ल्हीःरीनो स्वर्गरी नोम्जेत्पल वुइ दर्सन्कीनो म्रङ्बल ङचे हुजु अस्य्हे, चु तम् पर्मेस्वर्चेनो खेम्जेत्प। तर ङचे स्येःब, 4 हुजु म्ही स्वर्गरीनो नोम्जेत्ज्यी ओसेम् हुजुरी थेचे छीःरी स्येत्प अतपे तम्मा थ्येःज्यी, म्हीमाकी सुङ् ग्यम्से पङ्अबुङ्बे तम्मा थ्येःज्यी। 5 ङ हुजु म्हीइ बारेरी घमन्ड लब। तर ङइ र्हङ्की बारेरीमी र्हङ्की कम्जोरीरी बीम ल्हो-ल्हो तम्री ङ घमन्ड अल। 6 ङचे घमन्ड लबे सेम् ललेएनो ङ मुर्खमी तस्ये अरे, तलेपङ्सम् ङ देमेन्की तम् पङ्ब। तर ङचे घमन्ड स्य्हेङ्स्ये अरे, होत्तज्यीम् म्हीमाचे ङत ङचे स्य्हेङ्बल म्रङ्बतेङ् पङ्बल थ्येःब बीम य्हक्को खल्चेएनो अम्हेन्खइ। 7 ङचे ङ्हच्छ्यङ् अचम्मइ स्हेःमा म्रङ्बल तज्यीम् ङ ङ्हच्छ्यङ् दोःज्यीम् ब्रल बी पर्मेस्वर्चे सैतान्त ङइ ल्हीःरी पुजुचे ब्लोःबे दुख न्हङ्बुङ्जेत्ज्यी। हुजु पुजु सैतान्की चव य्हीन्ब, ओसेम् ङत चोस् चोस् ब्लोज्यीम् दुख पीन्टीब। 8 सोम्ख्यप् सम्म ङचे प्रभुत, चु दुख ग्यम्से ङत फेःपीन्जेत बी फ्या लज्यी। 9 तर थेङ्चे ङत सुङ्ज्यी, “ङइ अनुग्रह एइ लागीरी योःब सम्मनो मुब, तलेपङ्सम् ए कम्जोर् तबे बेलोरी ङइ सक्तीनो ङ्हच्छ्यङ् तब।” होत्तज्यीम् ख्रीस्ट्की सक्ती ङतेङ् तखइ पङ्ज्यीम् ङ कम्जोर् तबे बेलोरी झेन् य्हक्को तङ्ज्यीम् घमन्ड स्य्हेङ्ब। 10 होत्तज्यीम् ख्रीस्ट्की लागीरी ङ कम्जोर् तलेएनो, म्हीमाचे पेत्नललेनो, गारो बेलोमा खलेनो, म्हीमाचे ङत य्हक्को दुखमा पीन्लेनो ओसेम् लोङ्बे बेलोमा खलेनो ङ तङ्ब। तलेपङ्सम् ङ कम्जोर् तबे बेलोरी थेङ्चे न्हङ्जेत्पे सक्तीचे बङ्ज्येन् तब। कोरीन्थीमात पावलकी वास्त 11 ङ मुर्ख तबल मुब। एङ्यीमाचे ङत होले स्य्हेङ्नलज्यी, तलेपङ्सम् एङ्यीमाचे ङइ बारेरी तोप्थोब मुबल। तलेपङ्सम् ङ तएनो अय्हीन्लेएनो हुजु र्हङ्चे र्हङ्त ङ्हच्छ्यङ् प्रेरीत्मा य्हीन्ब पङ्बे प्रेरीत्मा बीमम् ज्यीद अरे। 12 ङचे एङ्यीमाकी गुङ्री मुबे बेलोरी धैर्य लज्यीम्, चीनोमा, अचम्मइ लक्मातेङ् सक्तीसाली लक्मा स्य्हेङ्ज्यीम् ङ प्रेरीत य्हीन्ब पङ्बे तम् ङोन्बल मुब। 13 ङचे एङ्यीमात खजु तम्री ल्हो-ल्हो मन्डलीमात बीम अज्यबे ब्यबहार् ङोन्ज्यी? य्हीन्बनो, तम् गीः मुब हुजुरी एङ्यीमाचे ङत क्षम पीन्थोब, ङचे एङ्यीमात टङ अर्हीत्। 14 देरेम् सोम्ख्यप्की पलोरीएनो ङ एङ्यीमाज खबरी टोप् लटीब मुब। चु पलोरीएनो ङ एङ्यीमात दुख पीन्स्ये अरे, तलेपङ्सम् ङत एङ्यीमातेङ् मुबे स्हेमा अय्हीन् तर एङ्यीमानो तोःबल मुब। तलेपङ्सम् ज-जमेचे अप अमइ लागीरी सम्पत्ती र्हुब् लअथो, तर अप-अमचेका ज-जमेइ लागीरी र्हुब् लथोब। 15 एङ्यीमाकी लागीरी ङ जम्मनो स्हेमा तङ्-तङ्ज्यीम् पीन्स्ये मुब, ओसेम् र्हङ्की जीवनएनो पीन्स्ये मुब। ङचे एङ्यीमात य्हक्को म्होइब तर एङ्यीमाचेम् ङत चेक्कीनो म्होइबल र्हङ्ब म्रङ्ब। 16 ङचे एङ्यीमात दुख अपीन् पङ्बे तम् एङ्यीमाचे स्येःब, तर ङचे बाठो दोःज्यीम् एङ्यीमा ग्यम्से फाइद कीन्बरी लुज्यी बी डेत्डेत् म्हीमाचे पङ्ल। 17 ता ङचे एङ्यीमाज पीत्खबे म्हीमा ग्यम्से तज्यीम् एङ्यीमा ग्यम्से तेए फाइद कीन्बल मुब स्यीम्? 18 ङचे तीतसत एङ्यीमाज ङ्यीथोब बी फ्या लज्यी, ओसेम् थेतेङ् ल्हो-ल्हो अलेतेएनो पीत्ज्यी। तीतस्चे एङ्यीमा ग्यम्से तेए फाइद अकीन् ओसेम् ङ्यीमाचे सेम् गीः लज्यीम् खाल् गीःकी लक्नो स्य्हेङ्ज्यी। 19 चु बेलो सम्मनो जम्मनो तम्मा ङ्यीमाचे र्हङ्त जोगइतीबरी पङ्बल बी एङ्यीमाचे थम्हेनो। ङ्यीमाचे ख्रीस्ट्री बीस्वासी तज्यीम् पर्मेस्वर्की ङोन्री पङ्टीब मुब। म्होइबे र्होमा, ङ्यीमाचे स्य्हेङ्बे जम्मनो तम्मा एङ्यीमाकी बीस्वास्त कोङ्न लबे लागीरी य्हीन्ब। 20 तलेपङ्सम् ङ हुजुरी खबे बेलोरी ङचे आस् लबल बीम् एङ्यीमा ल्होल्होनो तल, ओसेम् एङ्यीमाचे आस् लबल बीम ल्हो-ल्हो ङ तल बी लोङ्बल मुब। एङ्यीमाकी गुङ्री बङ्ब छेत्प स्य्हेङ्बल, स्य्हेर्बल, बोमो लबल, र्हङ्लकीनो ज्यब तखइ पङ्बल, केत्पल, र्होइ तङ्मेन् लबल, घमन्ड लबल ओसेम् लडाइ स्य्हेङ्बलमा यङ्ल बी ङ लोङ्बल मुब। 21 एङ्यीमात खदु लबरी ङ देबेएनो खबतेङ् ङइ पर्मेस्वर्चे ङत एङ्यीमाकी ङोन्री ज्यीद तनलजेत्स्ये मुब बी ङ लोङ्बल मुब, तलेपङ्सम् एङ्यीमान्हङ्री य्हक्को र्हङ्बचेनो ङोन्ग्यम्की पाप्मा स्य्हेङ्ब पीत्पल अरे। हुजु असुद्द लक् स्य्हेङ्बल, ब्याभीचार् स्य्हेङ्बल ओसेम् सेम्री ता म्हेन्ज्यी हुजुनो स्य्हेङ्बलमाचे पस्चाताप् स्य्हेङ्ज्यीम् पर्मेस्वर्पट्टी अदोःबल तज्यीम् ङइ सेम्री य्हक्को दुख तस्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.