२ कोरीन्थी 11 - पश्चिम तामाङपावलतेङ् भ्युकी प्रेरीत्मा 1 देरेम् ङचे एङ्यीमात पङ्ब छ्येःटीबे तम्री ङ चेक्पजकी मुर्ख तलेएनो एङ्यीमाचे ङत नापीन्सम् तस्येल! ङ फ्या लब एङ्यीमाचे नापीनो। 2 पर्मेस्वर्चे एङ्यीमात स्हेर्जेत्प र्हङले ङएनो एङ्यीमाकी लागीरी स्हेर्बल मुब। गीःकीनो र्हेम्बोइ पबीत्र दुलहीकी रुप्री ङचे एङ्यीमात ख्रीट्तेङ् भ्य्ह स्य्हेङ्पीन्बरी बाचा स्य्हेङ्बल मुब। 3 तर सैतान्चे पुख्रीइ रुप् कीन्ज्यीम् चलाख भ्यु तम्मा ग्यम्से हब्बत छल् लब र्हङ्ले एङ्यीमाकी ख्रीस्ट्री मुबे सोझोतेङ् चोखो सेम्त न्होङ्न लल पङ्ज्यीम् ङ लोङ्बल मुब। 4 तलेपङ्सम् खल पङ्लेनो गीः खब, ओसेम् ङ्यीमाचे प्रचार स्य्हेङ्बे येसु बीम् ल्हो-ल्हो येसुइ बारेरी प्रचार स्य्हेङ्ज्यी पङ्सम् एङ्यीमाचे तङ्तङ्ज्यीम् ग्रहन् स्य्हेङ्स्य्हेटीम्। एङ्यीमाचे ङोन्ग्यम् यङ्बे आत्मातेङ् ज्यबे सम्तर् बीम ल्हो-ल्हो आत्मातेङ् ज्यबे सम्तर्तएनो ङ्येन्स्ये टीम्। 5 र्हङ्चे र्हङ्त ङ ङ्हच्छ्यङ् प्रेरीत् य्हीन्ब बी पङ्बे हुजु प्रेरीत्मा बीम ङ तारीएनो ज्यीद अरे। 6 ज्यनले तम् पङ्ब अस्येलेनो ज्ञान्री ङ ज्यीद अरे। चु तम् ङ्यीमाचे खेम पङ्लेनो ओसेम् खतेबे बेलोरी पङ्लेनो एङ्यीमात ज्यनले गोनलबल मुब। 7 ङचे र्हङ्त ज्यीद स्य्हेङ्ज्यीम् एङ्यीमात ङ्हच्छ्यङ् स्य्हेङ्बे लागीरी पर्मेस्वर्की ज्यबे सम्तर् ओलेनो स्येत्मम् ता ङचे न्होर्बे लक् स्य्हेङ्ज्यी स्यीम्? 8 ङचे एङ्यीमात र्हो लबे लागीरी ल्हो-ल्हो मन्डलीमाचे र्हो लबे टङ कीन्ज्यीम् ङचे ल्हो-ल्हो मन्डलीमात ठग्तीबल र्हङ्ब तज्यी। 9 ङ एङ्यीमातेङ् मुबे बेलोरी ङत अयोब अख्युप्प तबे बेलोरी ङचे एङ्यीमा खल्तएनो दुख अपीन्। तलेपङ्सम् माकेडोनीया ग्यम्से खबे अलेमाचे ङत तोःबे स्हेमा पीन्ज्यी। होले ङचे एङ्यीमात दुख अपीन्, ओसेम् लीक्यम्एनो ङ एङ्यीमात दुख पीन्स्ये अरे। 10 ङतेङ् ख्रीस्ट्की देमेन् मुब गदे अखैया प्रदेस्री खल्चेएनो ङइ चु तम्की गर्बत र्होद्प खम्स्ये अरे। 11 ङचे एङ्यीमाचे पीन्बे टङ अकीन्बल तज्यीम् ता एङ्यीमात ङचे अम्होइबल बी म्हेन्ब? ङचे एङ्यीमात गदे म्होइब पङ्बे तम् पर्मेस्वर्चे खेम्जेत्प! 12 हुजु र्हङ्चे र्हङ्त कोत्ज्यीम् प्रेरीत् पङ्बे म्हीमाचे ङ्यीमाचे र्हङ्बे लक् स्य्हेङ्ज्यी पङ्ज्यीम् घमन्ड लअम्यङ्खइ बी ङचे स्य्हेङ्टीबे लक् ङ स्य्हेङ्स्यीनो टीस्ये मुब। 13 तलेपङ्सम् होतेबे म्हीमामी भ्युकी प्रेरीत्मा य्हीन्ब ओसेम् लुबे लक् स्य्हेङ्बलमा य्हीन्ब, ओसेम् थेङ्यीमामी ख्रीस्ट्की गोइल येन्ज्यीम् ब्रबलमाकीनो य्हीन्ब। 14 तर चु अचम्मइ तम् अय्हीन्, तलेपङ्सम् सैतान्चेएनो म्हीमात लुबे लागीरी य्हल्की स्वर्गदुत्ल र्हङ्बे गोइल येन्ज्यीम् खब। 15 होत्तज्यीम् सैतान्की स्य्हप्तो स्य्हेङ्बे म्हीमाचे पर्मेस्वर्की ङोन्ग्यम् धर्मी म्हीमाल र्हङ्बे गोइल येन्ब पङ्बे तम् अचम्मइ तम् अय्हीन्। ज्युरी थेङ्यीमाचे स्य्हेङ्बे लक् अनुसार्की सजाय थेङ्यीमाचे नास्ये मुब। पावलचे नाबे दुख 16 ङ देबेएनो पङ्ब, ङत खल्चेएनो मुर्ख म्ही अम्हेन्खइ। तर एङ्यीमाचे मुर्खनो म्हेन्ब पङ्सम् ङत मुर्खत र्हङ्लेनो ग्रहन् लउ, होले लसम् ङचे चेक् पङ्लेनो घमन्ड स्य्हेङ्म्यङ्स्ये मुब। 17 ङचे चोले घमन्ड लज्यीम् प्रभु येसुचे र्हङ्ले अय्हीन्, तर मुर्खचे र्हङ्ले तम् पङ्टीब मुब। 18 तलेपङ्सम् जम्बुलीङ्की म्हीमाचे घमन्ड लब र्हङ्ले ङचेएनो घमन्ड लब। 19 एङ्यीमाचे र्हङ्तनो य्हक्को बुद्दी मुबे म्हीमा म्हेन्ब। तर एङ्यीमाचे मुर्ख म्हीमाकी तम्माएनो तङ्ज्यीम् नाप! 20 तलेपङ्सम् म्हीमाचे एङ्यीमात बान स्य्हेङ्लेनो, ठग्तीलेनो, एङ्यीमा ग्यम्से फाइद कीन्लेनो, एङ्यीमात धम्की पीन्लेनो ओसेम् एङ्यीमाकी ग्रम्बरी पातल्चे ग्यङ्लेनो एङ्यीमाचेम नाप टीम्। 21 ङ पेत्ज्यीम् स्वीकार् लब की एङ्यीमात थेङ्यीमाचे स्य्हेङ्ब र्हङ्ले स्य्हेङ्बरी ङ्यीमाचे आर् लब अखम्! तर खल्चे पङ्लेनो तइ तम्री य्हीन्लेनो घमन्ड स्य्हेङ्सम्, ङएनो हुजु तम्री घमन्ड स्य्हेङ्ब। य्हीन्बनो, ङ मुर्ख म्ही र्हङ्ले तम् पङ्टीब। 22 ता थेङ्यीमा हीब्रु म्हीमा य्हीन्ब? ङएनो य्हीन्ब। थेङ्यीमा इस्राएली म्हीमा य्हीन्ब? ङएनो य्हीन्ब। ता थेङ्यीमा अब्राहामकी ज-जमे य्हीन्ब? ङएनो य्हीन्ब। 23 ता थेङ्यीमा ख्रीस्ट्की योक्पोमा य्हीन्ब? ङचे म्योबे म्हीचे र्हङ्ले तम् पङ्ब, तर ङ थेङ्यीमा बीम य्हक्को ज्यबे योक्पो य्हीन्ब। थेङ्यीमाचे बीम ङचे झेन् य्हक्को ज्यनले ख्रीस्ट्की लक् स्य्हेङ्बल मुब। ङत य्हक्को ख्यप् जेल्री च्युप्ज्यी, य्हक्को ख्यप् कोर्रचे ग्यङ्ज्यी ओसेम् ङचे य्हक्को ख्यप्नो स्यील र्हङ्नो तबे दुख नाज्यी। 24 यहुदीमाचे ङत ङ्ह ख्यप्मम् खल् गीः स्यी चुर्कु ख्यप् कोर्रचे ग्यङ्ज्यी। 25 रोमी म्हीमाचे ङत सोम्ख्यप् बेर्कचे ग्यङ्ज्यी। तीख्यप्मी म्हीमाचे ङत युङ्बचे प्रुङ्ज्यीम् सेत्प म्हइज्यी। सोङ्ख्यप्मी ङ क्रेत्पे दोङ्गनो न्होङ्ज्यी ओसेम् दीन् गीः म्हुन गीः ङचे समुन्द्ररीनो टीथोज्यी। 26 ङचे ग्ला ग्लामारी ङ्यीबे बेलोरी भल् युबे स्योङ्मा तार्तीबे जोखीम्, डाकुमाकी जोखीम्, र्हङकी जातीतेङ् यहुदी अय्हीन्बे म्हीमाकी जोखीम्मा नाज्यी। ओसेम् सहर्मारी, उजाड ग्लामारी, समुन्द्रमारी, ओसेम् भ्युकी अलेमा ग्यम्सेएनो जोखीम्मा नाथोब मुबल। 27 ङचे न्हुन अन्हुनले य्हक्को दुखले लक् स्य्हेङ्ज्यी, गदे ख्यप्मी ख्रेन्बतेङ् फीःब नाज्यीम् ब्रज्यी, ओसेम् खेममी म्रेन्नले चब चअम्यङ्। ओसेम् खेमम् ङचे डोनले येन्बरी योःब सम्म येनेएनो अय्हङ्। 28 होदेकीनो अय्हीन्, पर्मेस्वर्की जम्मनो मन्डलीमाकी लागीरी ङइ सेम्री दीनइलनो सुर्त खस्यीनो टीब मुबल। 29 खल पङ्लेनो बीस्वास्री अकोङ्बल म्रङज्यी पङ्सम् थेइ लागीरी ङइ सेम्एनो नब, ओसेम् खल्चे पङ्लेनो गीःत पाप् स्य्हेङनलज्यी पङ्सम् ङइ सेम् दुखचे क्रोब। 30 ङचे गर्ब स्य्हेङ्नोथोःज्यी पङ्सम् ङत अकोङ्बल ङोन्बे तम्मारीनो गर्ब स्य्हेङ्ब। 31 ङचे पङ्बे तम्मा भ्यु अय्हीन् बी ङ्य्हङ्की प्रभु येसुइ पर्मेस्वर्तेङ् अप खेम पङ्लेनो तोप्परी जेःबे पर्मेस्वर्चे खेम्जेत्प। 32 ङ दमस्कस्री मुबे बेलोरी ग्यल्बो अरीतसकी ङ्हच्छ्यङ् हाकीम्चे ङत चुङ्बे लागीरी सहर्की जम्मनो ग्लामारी स्यीपाइमात पीत्पल मुबल। 33 तर ङत दगरी युज्यीम् पर्खलकी झ्याल्चे छोः तज्यीम् दुङ्री पीत्ज्यी, ओसेम् ङ हुजु ग्यल्बोइ या ग्यम्से स्योर्म्यङ्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.