२ कोरीन्थी 10 - पश्चिम तामाङ1 एङ्यीमान्हङ्की डेत्डेत् म्हीमाचे पङ्ब, एङ्यीमाकी ङ्होन्सङ् ङ नम्र तब, तर एङ्यीमा ग्यम्से थारीङ् तबतेङ्मी कठोर् तब। देरेम्, ङ पावलचेनो एङ्यीमात ख्रीस्ट्की नम्रतेङ् दय ग्यम्से फ्या लज्यीम् पङ्ब, 2 ङ एङ्यीमाज खबतेङ् ङचे एङ्यीमात बराअथोखइ, तलेपङ्सम् ङ्यीमाचे अज्यबे सेम् थोःज्यीम् लक् स्य्हेङ्ब पङ्बे म्हीमातमी ङचे बराब। 3 य्हीन्बनो, ङ्य्हङ्मा जम्बुलीङ्री मुब, तर जम्बुलीङ्की म्हीमाचे र्हङ्ले ङ्यीमाचे बङ्ब छेत्प अस्य्हेङ्। 4 तलेपङ्सम् ङ्यीमाचे बङ्ब छेत्परी थोःबे हतीयार्मामी जम्बुलीङ्ल अय्हीन्, तर चुमामी पर्मेवस्वर्चे न्हङ्जेत्पे सक्तीसाली हतीयार्मा य्हीन्ब। चु हतीयार्मामी सैतान्की सक्तीतेङ् भ्य्हुकी तम्मात नास् लब खम्बे पर्मेस्वर्की सक्ती य्हीन्ब। 5 पर्मेस्वर्त स्येःब ग्यम्से थारीङ् तनलबे घमन्डचे बबे जम्मनो तम्मात ङ्यीमाचे नास् लब, ओसेम् सेम्चे म्हेन्बे जम्मनो अज्यबे तम्मात ङ्यीमाचे ख्रीस्ट्चे कुल्जेत्पे फ्रोइ ङ्येन्ज्यीम् ब्रनलब। 6 एङ्यीमाचे ख्रीस्ट्चे लोप्जेत्पे फ्रोइ ङ्येन्ज्यीम् ब्रब बी ङोन्बतेङ् ख्रीस्ट्की फ्रोइत अङ्येन्बलमातमी सजाय पीन्बरी ङ्यीमा तयार्ले टीस्ये मुब। 7 एङ्यीमाचेम् मीःचे म्रङ्बे स्य्हेमात च्यागो। एङ्यीमान्हङ्री खल्चे पङ्लेनो थे ख्रीस्ट्की म्ही य्हीन्ब बी पुरा बीस्वास् थेन्बल मुसम् होतेबे म्हीचे चु तम् गोथोब की ङ्यीमाएनो थे र्हङ्लेनो ख्रीस्ट्की म्हीमानो य्हीन्ब। 8 तलेपङ्सम् ङ्यीमाकी अधीकार्की बारेरी ङचे य्हक्कोनो घमन्ड लज्यी पङ्लेनो ङ पेत्थोस्ये अरे, तलेपङ्सम् चु एङ्यीमात न्होङ्नलबरी अय्हीन्, तर एङ्यीमात बीस्वास्री कोङ्नलबरी प्रभुचे न्हङ्जेत्पल य्हीन्ब। 9 ङचे एङ्यीमात ब्रीटीबे चु चीठीमा एङ्यीमात लोङ्नलबे लागीरी ब्रीबल बी थम्हेनो। 10 तलेपङ्सम् डेत्-डेत्चे, “थेइ चीठीमामी य्हक्को हक् लज्यीम् कडाले ब्रीबल तब, तर थे ङ्य्हङ्माकी ङोन्री खबतेङ्मी कम्जोर् ओसेम् खले ज्यनले तम् पङ्थोब अस्ये” बी पङ्ब। 11 होतेबे म्हीमाचेमी गोथोब की ङ्यीमाचे एङ्यीमात थारीङ् ग्यम्से चीठीरी ता ब्रीज्यी हुजुनो एङ्यीमाज खबतेङ्एनो स्य्हेङ्स्ये मुब। 12 र्हङ्चे र्हङ्तनो ङ्हच्छ्यङ् बी म्हेन्बे म्हीमातेङ् ङ्यीमाचे र्हङ्चे र्हङ्त व्हज्यीम् च्याबे आर् अल। तर थेङ्यीमाचे र्हङ् र्हङ्न्हङ्री गीःचे गीःतेङ् व्हब ओसेम् र्हङ्चे र्हङ्तनो दप्पतेङ् थेङ्यीमामी तेएनो अगोबे मुर्ख म्हीमा तब। 13 तर पर्मेस्वर्चे ङ्यीमात लक् स्य्हेङ्बरी न्हङ्जेत्पे अधीकार् बीम फीर्च्योर् य्हर्ज्यीम् ङ्यीमाचे घमन्ड अल। पर्मेस्वर्चे ङ्यीमात एङ्यीमा सम्म दोःबे लक् स्य्हेङ्बे अधीकार् न्हङ्जेत्पल मुब, ओसेम् हुजुइ बारेरीकीनो घमन्ड लब। 14 ङ्यीमाचे यङ्बे अधीकार् गदेकीनो एङ्यीमाज खबल मुबल। तलेपङ्सम् एङ्यीमाज ख्रीस्ट्की बारेरी ज्यबे सम्तर् स्येत्परी गोदोब्न्हङ् ङोन्ग्यम् ङ्यीमा खज्यी। 15 ङ्यीमाचे ल्होल्होचे स्य्हेङ्बे लक्री घमन्ड अस्य्हेङ्। होले स्य्हेङ्ज्यी पङ्सम् पर्मेस्वर्चे न्हङ्जेत्पे अधीकार बीम फीर्च्योर् य्हर्बल तब। तर ङ्यीमाकी ङ्हच्छ्यङ् आस्मी एङ्यीमाकी बीस्वास् कोङ्स्यीनो बोर्खइ ओसेम् एङ्यीमाकी गुङ्री ङ्यीमाकी लक्एनो झेन्नो य्हक्को तस्यीनो बोर्खइ पङ्बनो य्हीन्ब। 16 चोलेनो एङ्यीमा बीम ल्हो-ल्हो य्हुल्मारीएनो ङ्यीमाचे ज्यबे सम्तर् स्येत्प खम्स्ये मुब। चोले स्य्हेङ्बतेङ् ल्हो-ल्होमाचे लक् स्य्हेङ्बे ग्लारी लक् स्य्हेङ्ज्यीम् ङ्यीमाचे घमन्ड स्य्हेङ्अथो। 17 धर्म छ्येचेएनो पङ्ब, “घमन्ड स्य्हेङ्बलचे पर्मप्रभुरीनो घमन्ड स्य्हेङ्खइ।” 18 तलेपङ्सम् खल्चे पङ्लेनो र्हङ्चे र्हङ्तनो ज्यब पङ्मनो थे ज्यबमी अय्हीन्। तर खजु म्हीत प्रभुचे ज्यब बी सुङ्जेत्प हुजु म्हीनो ज्यब तब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.