२ कोरीन्थी 1 - पश्चिम तामाङ1 पर्मेस्वर्की थुः अनुसार् येसु ख्रीस्ट्की प्रेरीत् तबरी दम्बे ङ पावल, ओसेम् ङ्य्हङ्की अले तीमोथी ग्यम्से कोरीन्थरी मुबे पर्मेस्वर्की मन्डलीतेङ, अखैया प्रदेस्री मुबे पर्मेस्वर्की जम्मनो म्हीमात, 2 ङ्य्हङ्की पर्मेस्वर् अपतेङ् प्रभु येसु ख्रीस्ट्चे अनुग्रहतेङ् एङ्यीमात सान्ती न्हङ्खइ। 3 ङ्य्हङ्माइ प्रभु येसु ख्रीस्ट्की अप पर्मेस्वर्त तोप्प तखइ। थेङ् क्रीपालु अपतेङ् जम्मनो सान्त्वना न्हङ्जेत्पे पर्मेस्वर् य्हीन्ब। 4 ङ्य्हङ्चे ल्हो-ल्हो दुख यङ्बे म्हीमात सान्त्वना पीन्ब खम्खइ पङ्ज्यीम् थेङ्चे ङ्य्हङ्त जम्मनो दुखमारी सान्त्वना न्हङ्जेत्प। थेङ्यीमाकी दुखइ बेलोरी ङ्य्हङ्माचे पर्मेस्वर् ग्यम्से यङ्ब र्हङ्बे सान्त्वना पीन्ब खम्ब। 5 तलेपङ्सम् ख्रीस्ट्चे र्हङ्ले ङ्य्हङ्माचेएनो य्हक्को दुख नाब, होलेनो ख्रीस्ट् ग्यम्सेनो ङ्य्हङ्माचे य्हक्को सान्त्वान यङ्ब। 6 ङ्यीमाचे दुख यङ्ज्यी पङ्सम् हुजु एङ्यीमाकी सान्त्वनातेङ् मुक्तीइ लागीरी य्हीन्ब। ङ्यीमाचे सान्त्वना यङ्ज्यी पङ्सम् एङ्यीमाचेएनो सान्त्वना यङस्ये मुब। ओसेम् हुजु सान्त्वना ग्यम्से ङ्यीमाचे यङ्ब र्हङ्बे दुखमा धैर्यले नाबे सक्ती एङ्यीमाचेएनो यङ्स्ये मुब। 7 ओसेम् ङ्यीमाचे एङ्यीमारी थेन्बे आस् य्हङ्य्होङ् अत। तलेपङ्सम् ङ्यीमाचे नाबल र्हङ्बे दुख एङ्यीमाचेएनो नाब ओसेम् ङ्यीमाचे यङ्ब र्हङ्बे सान्त्वना एङ्यीमाचेएनो यङ्स्ये मुब बी ङ्यीमाचे स्येःब। 8 बीस्वासी र्होमा, ङ्यीमाचे एसीयारी नाबे दुखइ बारेरी एङ्यीमाचे थेखइ पङ्बे सेम् ङ्यीमाल मुब। तलेपङ्सम् हुजुरी ङ्यीमाचे नापनो अखम्बे दुख यङ्ज्यी, हुजु दुखचे लज्यीम् ङ्यीमाल सोबे आस्नो म्हबल मुबल। 9 ङ्यीमाचेम् देरेम् स्यीथोबे बेलो तनेम् बी म्हेन्बल मुबल। तर र्हङ्तनो भर् लबरी अय्हीन्, स्यीबलमात सोनलजेत्पे पर्मेस्वर्तकीनो भर् स्य्हेङ्ब खम्खइ पङ्ज्यीम् चोतेब तबल टीम्। 10 थेङ्चे ङ्यीमात लोङ्बे स्यीब ग्यम्से थर्न लपीन्जेत्ज्यी, ओसेम् देबेएनो थेङ्चे थर्न लपीन्जेत्स्ये मुब। थेङ्रीनो ङ्य्हङ्माचे पुरा आस् थेन्बल मुब ओसेम् थेङ्चेनो ङ्य्हङ्मात देबेएनो थर्न लपीन्जेत्स्ये मुब। 11 एङ्यीमाचे ङ्यीमात प्रार्थना स्य्हेङ्ज्यीम् र्हो लपीनो। ओसेम् एङ्यीमाचे स्य्हेङ्बे प्रार्थना सेन्जेत्ज्यीम् पर्मेस्वर्चे ङ्यीमात मोलम् न्हङ्जेत्स्ये मुब, होत्तज्यीम् य्हक्को म्हीमाचे पर्मेस्वर्त व्होर्छये पीन्स्ये मुब। पावलचे योजन पोबल 12 ङ्यीमाचे चु तम् ढुक्कले पङ्ब खम्ब, ओसेम् ङ्यीमाकी बीबेक्चेएनो गबाही पीन्ब, चु जम्बुलीङ्की म्हीमाकी ङोन्ग्यम्कीनो अय्हीन् तर एङ्यीमाकी ङोन्ग्यम्एनो ङ्यीमाचे पर्मेस्वर्चे ङोन्जेत्पे ज्यबतेङ् देमेन्की ग्यम्री ब्रबल मुब। चु देमेन्की सेम् ङ्यीमाचे पर्मेस्वर्की अनुग्रह ग्यम्से यङ्बल य्हीन्ब, म्हीइ बुद्दी ग्यम्से अय्हीन्। 13-14 एङ्यीमाचे खेत्पतेङ् गोब अखम्बे तम्मा ङ्यीमाचे एङ्यीमात अब्री। ओसेम् देरे सम्म एङ्यीमाचे चेक्कीनो गोबल मुब, तर देरेम् एङ्यीमाचे ङ्यीमात ज्यनले गोस्ये मुब पङ्बे आस् ङचे लबल मुब। ओसेम् प्रभु येसु ब्योन्युजेत्पे दीन्री ङ्यीमाचे एङ्यीमाकी बारेरी घमन्ड स्य्हेङ्ब र्हङ्ले एङ्यीमाचेएनो ङ्यीमाकी बारेरी घमन्ड स्य्हेङ्ब खम्स्ये मुब। 15 ङ्य्हङ्माचे गीःचे गीःत गोब खम्ब पङ्बे तम्री ङ य्हक्को ढुक्क मुबल, होत्तज्यीम् ङचे ङोन्ग्यम् एङ्यीमात खतु लबरी खबे सेम् लज्यी। चोले एङ्यीमात ङ्य्हीख्यप् फाइद तस्ये मुबल। 16 माकेडोनीयारी ङ्यीबतेङ् एङ्यीमात खतु लज्यीम् ङ्यीब ओसेम् माकेडोनीयाचे दोःज्यीम् खबतेङ्एनो एङ्यीमात खतु लस्ये मुब, ओसेम् हुजु ग्यम्से यहुदीयारी ङ्यीबरी एङ्यीमाचे ङत र्हो लस्ये मुब म्हेन्ब मुबल। 17 ङ्यीमा एङ्यीमातेङ् खबे सल्ल पोथोःबल तज्यीम् ता एङ्यीमाचे ङत सेम् ङ्य्ही थोःबे म्ही बी म्हेन्ब? ता ङचे सेम् ङ्य्ही थोःबे म्हीमाचे र्हङ्ले य्हमम् य्हीन्ब, य्हमम् अय्हीन् बी पङ्ब स्यीम्? 18 पर्मेस्वर् बीस्वासीलो मुब, ओसेम् ङ्यीमाकी छीमाएनो एङ्यीमात य्हमम् “य्हीन्ब”, य्हमम् “अय्हीन्”, अत। 19 तलेपङ्सम् सीलासतेङ्, तीमोथी ओसेम् ङचे एङ्यीमाकी गुङ्री प्रचार् स्य्हेङ्बे पर्मेस्वर्की ज येसु ख्रीस्ट्री “य्हीन्ब” ओसेम् “अय्हीन्” बी पङ्बे तम् अरे। तर ख्रीस्ट्री खेम पङ्लेनो “य्हीन्ब” पङ्बे तम्कीनो मुब। 20 तलेपङ्सम् पर्मेस्वर्की जम्मनो बाचामा येसु ख्रीस्ट्रीनो “य्हीन्ब” तब। होत्तज्यीम् थेङ् ग्यम्सेनो पर्मेस्वर्की महीमाकी लागीरी ङ्य्हङ्माचे “आमेन्” पङ्ब। 21 देरेम् पर्मेस्वर्चे ङ्यीमातेङ् एङ्यीमात ख्रीस्ट्री बीस्वास्री कोङ्न लजेत्पल मुब। ओसेम् पर्मेस्वर्चेनो ङ्य्हङ्मात दम्जेत्पल मुब। 22 थेङ्चेनो ङ्य्हङ्मात र्हङ्की म्ही य्हीन्ब पङ्ज्यीम् छाप् ठोक्जेत्पल मुब, ओसेम् थेङ्चे बाचा स्य्हेङ्जेत्पलमा जम्मनो ङ्य्हङ्माचे यङ्स्ये मुब बी ङ्य्हङ्माकी सेम्री पबीत्र आत्मा बैन न्हङ्जेत्पल मुब। 23 ङ पर्मेस्वर्त साक्षी थेन्ज्यीम् पङ्ब, एङ्यीमाकी सेम् अनखइ पङ्ज्यीम् ङ कोरीन्थरी दोःज्यीम् अखबल य्हीन्ब। 24 एङ्यीमाचे बीस्वास् स्य्हेङ्बे तम्री ङ्यीमाचे कर् अल, तर एङ्यीमा तङ्खइ बी ङ्यीमा एङ्यीमातेङ् बक्च्य लक् स्य्हेङ्ब। तलेपङ्सम् र्हङ्की बीस्वास्री एङ्यीमा कोङ्बल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.