१ तीमोथी 6 - पश्चिम तामाङ1 जम्मनो बानामाचे र्हङ्की मालीक् स्य्हेस यङ्बरी जेःबल मुब बी म्हेन्थोब। होले स्य्हेङ्सम्के म्हीमाचे पर्मेस्वर्की छेन्तेङ् ङ्य्हङ्चे लोप्पे तम्त दोस् ल्हइतीम्यङ्स्ये अरे। 2 बीस्वासी मालीक्मात थेइ बानमाचे बीस्वास्री गीकीनो य्हीन्ब पङ्ज्यीम् स्य्हेस अस्य्हेङ्ब अत। बानमाचे झेन् य्हक्को थेङ्यीमाकी स्य्हप्तो स्य्हेङ्थोःब, तलेपङ्सम् थेङ्यीमाचे स्य्हेङ्बे लक्चे पर्मेस्वर्चे म्होइजेत्पे बीस्वासीमात ज्यब तब। एचे चु तम्मा लोप्ज्यीम् आर् पीनो। भ्युकी तम्तेङ् देमेन्की सम्पती 3 खल्चे पङ्लेएनो ङ्य्हङ्की प्रभु येसु ख्रीस्ट्चे लोप्जेत्पे देमेन्की फ्रोइतेङ् पर्मेस्वर्त सेम्री ङ्यीबे तम्तेङ् अडीःज्यीम् ल्हो-ल्हो तम् लोप्ज्यी पङ्सम्, 4 थेचे र्हङ्चे र्हङ्त ङ्हच्छ्यङ् म्हेन्बल तब, ओसेम् थेचे तएनो अस्येःबल तब। थेचे छीः र्हङ्स्यीनो अतोबे तम्मा लब ओसेम् ङ्युङ् म्हइब। थेचे स्हेर्न, बङ्न, अखोन ओसेम् अज्यबे सङ्क स्य्हेङ्न लब। 5 चोतेबे म्हीमाचे खेम पङ्लेनो बङ्नलब, तलेपङ्सम् थेङ्यीमाचे देमेन्की तम्त स्वीकार अस्य्हेङ्। ओसेम् थेङ्यीमाचे पर्मेस्वर्त सेम्री ङ्यीबे लक् स्य्हेङ्बमी बरु तबे ग्यम् य्हीन्ब बी म्हेन्ब। 6 य्हीन्बरीम् पर्मेस्वर्त सेम्री ङ्यीबे लक् स्य्हेङ्ज्यीम् र्हङ्की सेम् देज्यीम् ब्रबनो ङ्य्हच्छ्यङ् बरु य्हीन्ब। 7 तलेपङ्सम् ङ्य्हङ्चे न्हबे बेलोरी चु जम्बुलीङ्री न्ह तए बइज्यी, न्ह स्यीबे बेलोरी तए बोर्ब। 8 होत्तज्यीम् ङ्य्हङ्चे चपतेङ् येन्ब यङ्मनो सेम् देथोःब। 9 तर बरु तबे सेम् थोबे म्हीमाम् परीक्षरी दोःब ओसेम् वरी ङ्यम्ङ्य स्यप्प र्हङ्ले स्यप्प। थेइ सेम्चे मुर्खतेङ् र्हङ्तनो दुख यङ्बे लक् स्य्हेङ्गे म्हेन्ब। ओसेम् हुजु लक्चे लज्यीम् थे न्होङ्बतेङ् नास्री दोःब। 10 तलेपङ्सम् जम्म थोइ दुस्ट लक्माकी म्रु टङत म्होइब य्हीन्ब। डेत् डेत् म्हीमाचेम् टङ छाबे लोभ् लज्यीम् बीस्वास् स्य्हेङ्ब पीत्लाबल मुब, ओसेम् थेङ्यीमाकी सेम् य्हक्को दुखचे क्रोबल मुब। तीमोथीत पावलचे लोप्पल 11 तर ए पर्मेस्वर्त सेम्री ङ्यीबे लक् स्य्हेङ्बे म्ही अज्यबे लक्मा ग्यम्चे फेज्यीम् टीउ। ओसेम् पर्मेस्वर्की ङोन्री ज्यबे लक्, सेम्री ङ्यीबे लक्, बीस्वासी तबे लक्, ल्हो-ल्होत म्होइबे लक् ओसेम् आर् यङ्बे लक्तेङ् र्होतेङ् थुन्बे लक् स्य्हेङ्बरी सेम् पीनो। 12 बीस्वासकी जीवन छर्बोर्बे बेलोरी खेमेएनो अबेबे जीवन्त चुङ्ज्यीम् टीउ। चुइ लागीरीनो एत पर्मेस्वर्चे ङ्होत्जेत्पल य्हीन्ब, ओसेम् एचेएनो य्हक्को म्हीमाकी ङोन्ग्यम् एइ बीस्वासकी साक्षी पीन्बल मुब। 13 जम्मनो स्हेःमात जीवन् न्हङ्बे पर्मेस्वर्तेङ् पन्तीयस् पीलातसकी ङोन्ग्यम् देमेन्की साक्षी न्हङ्बे येसु ख्रीस्ट्की ङोन्ग्यम्, ङ एङ्यीमात कुल्ब, 14 ङ्य्हङ्की प्रभु येसु ख्रीस्ट् अब्योन्युगते पर्मेस्वर्चे कुल्जेत्पे अर्तीमा ज्यनले ङ्येन्ज्यीम् ब्रउ, ओसेम् एत खल्चेएनो दोस् ल्हइदी अम्यङ्खइ। 15 पर्मेस्वर्चेनो थेङ्त ठीक् बेलोरी देबेएनो पीत्युजेत्स्ये मुब। थेङ्नो तोप्परी जेःबे पर्मेस्वर् ओसेम् थेङ्चेकीनो जम्मइ जोरी सासन् स्य्हेङ्ब, थेङ्नो ग्यल्बोमाकी ग्यल्बो ओसेम् प्रभुमाकी प्रभु य्हीन्ब। 16 थेङ्कीनो खेमेएनो अस्यी, ओसेम् थेङ् खलएनो दोअखम्बे य्हल्री स्य्हुजेत्प। थेङ्त खल्चेएनो खेमेएनो म्रङ्बल अरे ओसेम् न्ह म्रङ्ब खम्ब। ङ्हच्छ्यङ् सक्तीतेङ् स्य्हेस खेम पङ्लेनो थेङ्तनो तखइ। आमेन्। 17 चु जम्बुलीङ्री बरु तबलमात र्हङ्चे र्हङ्त ङ्हच्छ्यङ् थम्हेनो पङो। न्होङ्ज्यीम् य्हर्बे सम्पतीरी अय्हीन् तर ङ्य्हङ्माकी सुखइ लागीरी जम्मनो स्हेःमा ल्हाब सम्मनो न्हङ्बे पर्मेस्वर्री भरोसा थेनो बी पङो। 18 ओसेम् थेङ्यीमात ज्यबे लक्मा स्य्हेङो, ज्यबे लक्मा य्हक्को स्य्हेङ्बरी बरु सेम् थोको, तोःबलमात स्हेः पीन्बे सेम् थोको बी पङो। 19 चोले थेङ्यीमाचे खस्येकी बेलोइ जीवन्की जग तबे लागीरी स्हेःमा सोखइ, ओसेम् चु जीवन्त चुङ्रीखइ, हुजुनो देमेन्की जीवन य्हीन्ब। 20 तीमोथी, एत सोप्तीबे जम्मनो तम्मा ज्यनले थेनो। पर्मेस्वर्त सेम्री अङ्यीबे लक् ग्यम्से थारीङ् ओसेम् चु जम्बुलीङ्की गदे म्हीमाचे ज्ञान् पङ्बे भ्युकी तम्मा ग्यम्से फेज्यीम् टीउ। 21 तलेपङ्सम् डेत् डेत् म्हीमाचे चोतेबे तम्माकी लीप्चे ब्रज्यीम् बीस्वास् स्य्हेङ्बनो पीत्लाबल मुब। एङ्यीमा जम्मतेङ्नो पर्मेस्वर्की अनुग्रह तटीखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.