१ तीमोथी 5 - पश्चिम तामाङबीस्वासीमात स्य्हेङ्थोबे जीम्मेवारी 1 र्हङ् बीम फेरङ्ब अपकोलमात थबराको, तर थेङ्यीमात र्हङ्की अपत र्हङ्ले स्य्हेस लज्यीम् लोपो, ओसेम् र्हङ् बीम दीर्हङ्बमात र्हङ्की अलेत र्हङ्ले लोपो। 2 ओसेम् र्हङ् बीम फेरङ्ब अममात र्हङ्की अमत र्हङ्ले स्य्हेस लज्यीम् लोपो, ओसेम् र्हङ् बीम दीर्हङ्ब अमकोलमात र्हङ्की अङत र्हङ्ले चोखो सेम् थोज्यीम् लोपो। 3 र्हङ्ल खलए अरेबे र्हेम्बो स्यीबे अमकोलमाकी स्य्हप्तो स्य्हेङो। 4 तर ज जमे वुइ कोन् कोमे खल पङ्लेनो मुबे र्हेम्बो स्यीबे अमकोलमातमी थेइ ज-जमे वुइ कोन्-कोमे खल्चे पङ्लेनो स्य्हप्तो स्य्हेङ्खइ। थेङ्यीमाचे पर्मेस्वर्त म्होइब ङोन्बरी ङोन्ग्यम् थेङ्यीमाचे र्हङ्की दीम्की म्हेम्यमाइ स्य्हप्तो स्य्हेङ्थोब, होले स्य्हेङ्सम् थेङ्यीमात कोलइ बेलोरी म्हेम्यमाचे स्य्हेङ्बे स्य्हप्तोइ खीत् फाब खम्ब, तलेपङ्सम् चु लक्चे पर्मेस्वर् तङ्जेत्प। 5 र्हङ्ल खलएनो अरेबे र्हेम्बो स्यीबे अमकोलचेम् र्हङ्की भरोसा पर्मेस्वर्री थेन्बल तब। ओसेम् थेचे र्हङ्त र्हो लपीनो बी पर्मेस्वर्तेङ् दीन् म्हुन् प्रार्थना स्य्हेङ्स्यीनो टीब। 6 तर मन मोज्यीरी ब्रबे र्हेम्बो स्यीबे अमकोलमी ल्हीरी सोम्बो मुलेएनो आत्मारी स्यीज्यीन्बल तब। 7 थेङ्यीमा खलेएनो दोसी अतखइ पङ्ज्यीम् चु तम्मा बीस्वासीमात लोपो। 8 खल्चे पङ्लेनो र्हङ्की म्हेम्यमा, ओसेम् झेन् र्हङ्की दीम्की म्हेम्यमात स्य्हप्तो अस्य्हेङ्ज्यी पङ्सम् थेङ्यीमाचेम् बीस्वास् स्य्हेङ्बएनो पीत्पल तब। थेङ्यीमा बीस्वास् अस्य्हेङ्बलमा बीमएनो अज्यबल तब। 9 र्हेम्बो स्यीबे ल्हेगोर् ङ्ह यो:बे अमकोलमा ओसेम् अपकोल गीःतेङ्कीनो भ्या स्य्हेङ्बे अमकोलत र्हेम्बो स्यीबे अमकोलमाकी मीन् ब्रीबे छ्येःरी मीन् ब्रीउ। 10 थे ज्यबे लक्मा स्य्हेङ्ज्यीम् मीन् चल्दीबल तथोब, थेचे र्हङ्की कोलमात ज्यनले स्य्हप्तो स्य्हेङ्बल, डोम्बोमात दीम्री क्योङ्बल, बीस्वासीमाकी कङ् ख्रुबल, दुखरी मुबलमात र्हो स्य्हेङ्बल, ओसेम् खजु पङ्लेनो ज्यबे लक्मा स्य्हेङ्बल तथोब। 11 र्हेम्बो स्यीबे छमे अमकोलमाकी मीन् र्हेम्बो स्यीबे अमकोलमाकी मीन् ब्रीबे छ्येःरी थब्रीउ, तलेपङ्सम् थेङ्यीमाचे देबेएनो भ्या स्य्हेङ्गे म्हेन्ज्यीम् ख्रीस्ट्की लक् स्य्हेङ्ब पीत्स्ये मुब। 12 चोले थेङ्यीमाचे ङोन्ग्यम् ख्रीस्ट्तेङ् स्य्हेङ्बे थेङ्यीमाकी बाचा म्लेत्ज्यीम् दोसी तस्ये मुब। 13 मीन् ब्रीबे छ्येःरी थेङ्यीमाकी मीन् मुसम् थेङ्यीमा ब्लेकु तबल तस्ये मुब, ल्होल्होमाकी दीम् दीम्री कोर्ज्यीम् ब्रबल तस्ये मुब, होदेकीनो अय्हीन् र्होकी तङ्मेन् लज्यीम् अथुन्नलबल तस्ये मुब, ओसेम् पङ्ब अतबे तम्माएनो पङ्बल तस्ये मुब। 14 होत्तज्यीम् ङ र्हेम्बो स्यीबे छमे अमकोलमाचेम् देबेएनो भ्या स्य्हेङ्खइ, कोलमा न्हखइ ओसेम् खीन्तब् जुखइ पङ्ब। चोले ङ्य्हङ्की सत्तुर्माचे ङ्य्हङ्की बीरोद्री अज्यब पङ्म्यङ्स्ये अरे। 15 तलेपङ्सम् र्हेम्बो स्यीबे डेत् डेत् छमे अमकोलामा सैतान्की लीप्चे ब्रबरी सैतान पट्टीचे दोज्यीन्बल मुब। 16 बीस्वासी अमकोलइ म्हेम्यमा न्हङ्री र्हेम्बो स्यीबे अमकोलमा मुसम् मन्डलीत स्य्हप्तो स्य्हेङ्अपुङ्नले थेचेनो हुजु र्हेम्बो स्यीबे अमकोलमाकी स्य्हप्तो स्य्हेङ्खइ। ओसेम् मन्डलीचे र्हेम्बो स्यीबे खलएनो अरेबे अमकोलमालकीनो स्य्हप्तो स्य्हेङ्ब खम्खइ। 17 मन्डलीइ स्य्हप्तो ज्यनले स्य्हेङ्बे एल्डरमाचे य्हक्को स्य्हेस यङ्थोब। थेङ्यीमा न्हङ्रीएनो खल्चे पर्मेस्वर्की फ्रोइ लोप्पतेङ् प्रचारकी लक् स्य्हेङ्ब थेचे य्हक्को स्य्हेस यङ्थोब। 18 तलेपङ्सम् धर्म छ्येःचे पङ्ब, “दइ स्य्हेङ्बे बेलोरी ग्लप्माकी सुङ्री बुरु थताको” ओसेम् “लक् स्य्हेङ्बे म्हीमाचे थेङ्यीमाइ म्हेला यङ्थोब।” 19 ङ्य्ही वुइ सोम् साक्षी अयङ्गदे मन्डलीकी एल्डरता ल्हइतीबे दोस् ङ्येन्नो थङ्येनो। 20 पाप स्य्हेङ्बलमात म्हीमाकी ङ्होन्सङ्नो बराको, होले लबतेङ् ल्होल्होमाएनो पाप् स्य्हेङ्बरी लोङ्स्ये मुब। 21 पर्मेस्वर्तेङ् येसु ख्रीस्ट् ओसेम् पबीत्र स्वर्गदुत्माकी ङ्होन्सङ् ङ एत कुल्ब, ङचे एत लोप्पे चु तम्म एचे ङ्येनो। डेत्की तम् ङ्येन्ब ओसेम् डेत्की तम् अङ्येन्ब अय्हीन्, जम्मलनो तम् ङ्येनो। 22 खल्तएनो मन्डलीइ लक् स्य्हेङ्बे जीम्मा पीन्बरी चप् चप् थलउ। ल्होल्होचे पाप स्य्हेङ्बे बेलोरी थेङ्यीमातेङ् थडीःको, र्हङ्त पबीत्र थेनो। 23 ओसेम् एचे यीकीनो थथुङो, तर ए य्हम्चे य्हम्री नपल तज्यीम् एइ फोइ लागीरी अङ्गुर्की नीङ्गु चेक्चेक् थुङो। 24 डेत् डेत् म्हीमाचे स्य्हेङ्बे पाप्मी जम्मनो म्हीमाचे म्रङ्ज्यीम् न्याय स्य्हेङ्ज्यीन्बल तब, तर डेत् डेत्चे स्य्हेङ्बे पाप्मी लीप्चेकीनो म्रङ्बोर्ब। 25 होलेनो डेत् डेत् म्हीमाचे स्य्हेङ्बे ज्यबे लक्मामी जम्मनो म्हीमाचे म्रङ्ब। जम्मनो म्हीमाचे अम्रङलेनो लीक्यम् ज्यबे लक्मा छुम्ब अखम्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.