१ तीमोथी 4 - पश्चिम तामाङभ्युकी तम् लोप्पे लोप्पोन्मा 1 पबीत्र आत्माचे गोनलेनो सुङ्ब, लीक्क्यम्की बेलोरी डेत्डेत् म्हीमाचे बीस्वास् स्य्हेङ्ब पीत्लास्ये मुब। ओसेम् थेङ्यीमाचे भ्युकी आत्मामातेङ् म्हङ्माचे पङ्बे तम्मा ङ्येन्स्ये मुब। 2 चोतेबे तम्मा कपटी म्हीमाइ भ्यु ग्यम्से खब, थेङ्यीमाकी बीबेक् लेप्लेप् फइचे ख्रङ्ज्यीम् स्यीबल र्हङ्ब तब। 3 थेङ्यीमाचे भ्या स्य्हेङ्ब अत ओसेम् डेत् डेत् चबमाम् चब अत पङ्ज्यीम् म्हीमात लोप्प। तर बीस्वास् स्य्हेङ्बलमातेङ् देमेन्त स्येबलमाचे व्होर्छ्ये पीन्ज्यीम् पर्मेस्वर्चे स्य्हेङ्जेत्पे चु चबे स्हेमा चब तब। 4 पर्मेस्वर्चे स्य्हेङ्जेत्पे स्हेःमा जम्मनो ज्यब मुब। ओसेम् पर्मेस्वर्त व्होर्छ्ये पीन्ज्यीम् ग्रहन् स्य्हेङ्सम् तइ स्य्हेःएनो अच पङ्अथो। 5 तलेपङ्सम् पर्मेस्वर्की फ्रोइतेङ् प्रार्थनाचेनो हुजुत चोखो तन लब। 6 एचे चु तम्मा बीस्वासीमात लोप्प पङ्सम् एचे बीस्वास् स्य्हेङ्बे सम्तर्तेङ् देमेन्की फ्रोइमारी बङ्ज्येन् तज्यीम् ए येसु ख्रीस्ट्की ज्यबे योक्पो तस्ये मुब। 7 पर्मेस्वर्त अम्हन्दीबे तम्तेङ् तइ अर्थएनो अरेबे अर्तमा एचे थङ्येनो, तर एम् पर्मेस्वर्त म्हन्दीज्यीम् ब्रबरी र्हङ्चे र्हङ्तनो दुल्थोब। 8 ल्हीः दुल्ज्यी पङ्सम् चेक् चेक् तम्मारीकीनो ज्यब तब तर पर्मेस्वर्त म्हन्दीज्यीम् ब्रबरी दुल्ज्यी पङ्सम् य्हक्को तम्मारी ज्यब तब। तलेपङ्सम् चुचे देरेतेङ् लीक्यम्की जीवन्की लागीरी ज्यबे बाचा स्य्हेङ्बल मुब। 9 चु तम् देमेन् य्हीन्ब ओसेम् जम्मचेनो चु तम्री बीस्वास् स्य्हेङ्थोःब। 10 होत्तज्यीम् ङ्य्हङ्माचे सेम् य्हङ्सेनो लक् स्य्हेङ्ब। तलेपङ्सम् ङ्य्हङ्माकी आस् सोम्बो पर्मेस्वर्री मुब। थेङ्नो जम्मा म्हीमाइ लागीरी ओसेम् झेन् थेङ्त बीस्वास् स्य्हेङ्बलमाकी लागीरी मुक्तीदाता य्हीन्ब। 11 चु तम्मा ङ्येनो बी कुलो ओसेम् लोपो। 12 ए ब्योन् तबल तज्यीम् खल्चेएनो एत अब्रखइ। बीस्वासीमाकी ङोन्ग्यम् एचे पङ्बे तम्री, लक्री, म्होइबतेङ् बीस्वास्री ओसेम् जम्मनो तम्री चोखो तज्यीम् ए नमुना तउ। 13 ङ हुजुरी अख गदे एचे सेम् पीन्ज्यीम् म्हीमात धर्म छ्येः खेत्पीनो, बीस्वासीमात आर् पीनो ओसेम् थेङ्यीमात लोप्स्यीनो टीउ। 14 पर्मेस्वर्चे एत न्हङ्जेत्पे बरदान्त लक् अतबल थम्हेनो। हुजु बर्दान् एल्डरमाचे एइजोरी या थेन्ब बीसेम् अगम्बानी तज्यीम् यङ्बल य्हीन्ब। 15 एचे चु तम्मा जम्मनो सेम य्हङ्से म्हेन्ज्यीम् स्य्हेङ्स्यीनो टीउ, हुजु लीप्चे एचे ज्यनले स्य्हेङ्टीबे लक्मारी ज्यब तबोर्टीबल जम्मचे म्रङ्खइ। 16 एइ बानी बेहोर्की बारेरी ओसेम् र्हङ्चे लोप्पे तम्माकी बारेरी चोङ् तथोब। चु तम्मारी ब्रस्यीनो टीज्यी पङ्सम् एतेङ् एइ तम् ङ्येन्बलएनो थर्स्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.