१ तीमोथी 3 - पश्चिम तामाङमन्डलीइ लोप्पोन्मा 1 चु तम् देमेन् य्हीन्ब, खल्चे पङ्लेनो मन्डलीइ अगुवाकी लक् स्य्हेङ्बे सेम् लसम् थेचे ज्यबे लक् स्य्हेङ्बे सेम् लब। 2 अगुवाइ लक् स्य्हेङ्बे म्ही ताइ दोस्एनो अरेबल तथोब, थेचे म्रीङ् गीकीनो भ्या स्य्हेङ्बल तथोब, र्हङ्चे र्हङ्त दुल्थोब, र्हङ्की सेम्त अधीन्री थेन्थोब, स्य्हेस यङ्बरी जेःबल तथोब, डोम्बो क्योङ्ब स्येथोःब ओसेम् थेचे ज्यनले लोप्प खम्थोब। 3 थे ज्यी थुङ्ज्यीम् ङ्य्हेःबे म्ही ओसेम् र्होतेङ् छेत्पे म्ही तब अत, तर थे दयलु, र्होतेङ् थुन्बल ओसेम् टङत अम्होइबे म्ही तथोब। 4 थेचे र्हङ्की दीम् ज्यनले चल्तीब खम्थोब, ओसेम् थेइ कोलमाचे थेत स्हेस स्य्हेङ्ज्यीम् थेइ अर्ती ङ्येन्बल तथोब। 5 तलेपङ्सम् र्हङ्की दीम् ज्यनले चल्तीब अखम्बलचे खले पर्मेस्वर्की मन्डलीइ स्य्हप्तो स्य्हेङ्ब खम्ब? 6 ओसेम् थे छार् बीस्वासीएनो तब अत, अय्हीन् पङ्सम् थेचे र्हङ्चे र्हङ्त ङ्हच्छ्यङ् म्हेन्स्ये मुब, ओसेम् थेचे सैतान्चे यङ्बे दन्ड यङ्स्ये मुब 7 थे मन्डली बीम फीर्च्योर्की म्हीमाचेएनो स्य्हेस स्य्हेङ्बे म्ही तथोब। होले तसम्कीनो थे म्हीमाकी नीन्द ओसेम् सैतान्की वरी दोस्ये अरे। मन्डलीरी सेवा स्य्हेङ्बे म्हीमा 8 होलेनो मन्डलीत र्हो स्य्हेङ्बे म्हीएनो स्य्हेस यङ्बरी जेःबल, देमेन्कीनो पङ्बल, ज्यी अथुङ्बल ओसेम् अज्यबे ग्यम्से टङ छाबरी लोभ स्य्हेङ्बल तबअत। 9 ओसेम् पर्मेस्वर्चे ङ्य्हङ्त ङोन्जेत्पे देमेन्की सम्तर्त थेङ्यीमाचे सुद्द बीबेक्चे बीस्वास् स्य्हेङ्ज्यीम् टीथोब। 10 ङोन्ग्यम् थेङ्यीमाल छोत् च्याथोब, थेङ्यीमातेङ् तइ दोस्एनो अय्हङ्सम्कीनो थेङ्यीमात मन्डलीत र्हो स्य्हेङ्बे लक्री थेन्ब तब। 11 ओसेम् थेङ्यीमाकी म्रीङ्माएनो स्य्हेस यङ्बरी जेःबल, र्होकी बारेरी अज्यबे तङ्मेन् अलबल ओसेम् र्हङ्चे र्हङ्त दुल्ज्यीम् जम्मनो तम्री बीस्वासीलो तथोब। 12 मन्डलीत र्हो स्य्हेङ्बे म्हीइ म्रीङ् गीकीनो तथोब। थेचे थेइ कोलमातेङ् दीम्की म्हेम्यमात ज्यनले च्याब खम्थोब। 13 तलेपङ्सम् मन्डलीत र्हो स्य्हेङ्बे म्हीचे स्य्हेङ्थोबे लक् ज्यनले स्य्हेङ्बलचे म्हीमा ग्यम्से स्य्हेस यङ्स्ये मुब, ओसेम् र्हङ्चे येसु ख्रीस्ट्त स्य्हेङ्बे बीस्वासकी बारेरी ल्हो-ल्होमात आर् लज्यीम् स्येत्प खम्बल तस्ये मुब। बीस्वासकी देमेन्की तम् 14 एज ग्योने खबे आस् ङचे थेन्बल मुब, होलेतलेनो ङ एत चु चीठी देरे ब्रीटीब। 15 तलेपङ्सम् ङ एज खबरी गेःलेएनो चु चीठी ग्यम्सेनो पर्मेस्वर्की म्हेम्यमा खले चल्तीथोब बी एचे स्येको। ओसेम् पर्मेस्वर्की म्हेम्यमा सोम्बो पर्मेस्वर्की मन्डली य्हीन्ब, हुजुम् देमेन्त ते:बे थाम्तेङ् जग य्हीन्ब। 16 ङ्य्हङ्की बीस्वासकी चु देमेन्की सम्तर् य्हक्को ङ्हच्छ्यङ् य्हीन्ब बी ङ्य्हङ्माचे स्वीकार स्य्हेङ्ब, थेङ् म्हीइ ल्हीरीनो म्रङ्युजेत्ज्यी, पबीत्र आत्माचे थेङ्त धर्मी ङोन्जेत्ज्यी, थेङ्त स्वर्गदुत्माचे म्रङ्जेत्ज्यी, जाती जातीमाकी गुङ्री थेङ्की प्रचार तज्यी, जम्बुलीङ्री थेङ्त बीस्वास् स्य्हेङ्ज्यी, थेङ्त पर्मेस्वर्चे स्वर्गरी नोम्जेत्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.